Ndwuma 12
12
Atseetsee no Yɛ Kɛse
1Dɛm aber no mu, Ɔhen Herod tseen ne nsa tseetsee asɔrmba no binom ho. 2Na ɔdze afona kum James, John no nua no. 3Na ohun dɛ Jewfo no enyi gyee ho no ntsi, ɔtoaa do kɛfaa Peter so: nna ɔyɛ epitsi nda. 4#Eks 12.1-27 Na ɔkyeer no no, ɔdze no kɔtoo efiadze, na ɔdze no hyɛɛ nsordaafokuw anan ahorow anan nsa dɛ wɔnweɔn no, na ɔdween dɛ apaho afahyɛ no ekyir obeyi no abrɛ ɔman no. 5Dɛm ntsi wɔdze Peter kesiee efiadze hɔ dze, naaso asɔrmba no bɔɔ mpaa enyiberdo ara kyerɛɛ Nyankopɔn maa no.
Peter Fi Efiadze
6Na anadwe no a adze rebɛkye ma Herod ebeyi no akɔ no, Peter daa nsordaafo beenu ntamu a nna wɔdze nkɔnsɔnkɔnsɔn ebien ato no: na aweɔmfo gyinagyina abowano roweɔn efiadze no enyiber do. 7Na hwɛ, Ewuradze bɔfoe baa ne nkyɛn na kan hyerɛɛn efiadzedan no mu, na ɔbɔɔ Peter ne nkyɛnmu nyaan no see dɛ, Soɛr ntsɛm. Na no nkɔnsɔnkɔnsɔn no fii ne nsa gui. 8Na ɔbɔfo no see no dɛ, Fa w’abɔdo bɔ wo do, na kyekyer wo mpaboa. Na ɔyɛɛ dɛm. Na ɔsee no dɛ, Fura wo tam yie na ka mo do. 9Na opuei kaa no do, na oennhu dɛ dza ɔbɔfo no reyɛ no yɛ ampa, osiandɛ ɔdween dɛ ɔyɛ enyido adzehu. 10Na wɔtraa aweɔmfo no a wodzi kan, nye dza otsia ebien no, wɔbaa dadze abow a ɔdze kɔ kurow no mu no ho, na noara buei maa hɔn, na wopuei na wɔtraa ɔbrɔn kor, na ntsɛmara ɔbɔfo no gyaa no hɔ. 11Na Peter n’enyi baa no ho do no, ɔsee dɛ, Afei na mehu ampa dɛ Ewuradze asoma no bɔfoe na oeyi me efi Herod nsamu, nye dza Jewfo man hɔn enyiwa da kwan nyina mu. 12Na ɔrodwendwen ho no, ɔkɔr John a ɔnoara so wɔfrɛ no Mark no ne na Mary fie, mbrɛ dodowara aboa ano robɔ mpaa no. 13Na ɔbɔɔ paado abow no mu no, abaawa bi a ne dzin dze Roda bae betsiei; 14na ɔtsee Peter ne ndze no, dɛw ntsi oemmbue abow no, na otutuu mbirika kɔr mu kɛkaa dɛ Peter gyina abow no ekyir. 15Na wɔsee no dɛ, Ɔwoara w’adwen nnyɛ edwuma. Na ɔkɔr do ara kaa dɛ ɔtse dɛm. Na wɔsee dɛ, Ɔyɛ no bɔfoe. 16Na Peter kɔr do ara bɔɔ mu; na wobuei no, wohun no, na hɔn ho boow hɔn. 17Na ɔdze ne nsa kyerɛɛ hɔn dɛ wɔnyɛ komm, na ɔkaa mbrɛ Ewuradze duae yii no fii efiadze no kyerɛɛ hɔn; na ɔsee dɛ, Hom nkɛka nsɛm yi nkyerɛ James nye enuanom no. Na ofii hɔ kɔr beebi.
18Na adze kyee no, wentwiwentwi kɛsenara na ɔbaa nsordaafo no mu dɛ, ebɛnadze ara na ayɛ Peter. 19Na Herod hwehwɛɛ no, na oennhu no no, ɔnye aweɔmfo no kɔr nhwehwɛmu, na ɔhyɛɛ dɛ wonkoku hɔn. Na ofii Judea kɔr Kaesarea kɛtsenaa hɔ.
Herod no Wu
20Na Herod nyaa Taefo nye Sidonfo ho ebufuw no; wɔyɛɛ adwenkor baa ne nkyɛn, na wɔbɛfaa ɔhen no ne pianyi Blastus nyɛnko, na woduaa no do serɛɛ amandwee, osiandɛ nna wonya hɔn edziban fi ɔhen no ne nsaase do. 21Na da a wɔhyɛe no durii no, Herod hyɛɛ n’ahentar, na ɔtsenaa asɛndzii egua do, na ɔkasaa kyerɛɛ ɔman no. 22Na ɔman no bɔɔ ose dɛ, Ampa, Nyame bi ndze nye yi, na nnyɛ nyimpa dze bi a! 23Na ntsɛmara Ewuradze no bɔfoe bɔbɔɔ no, osiandɛ ɔammfa enyimnyam amma Nyankopɔn: na nsaamaa dzii no honam ma owui.
24Na Nyankopɔn asɛm nyinii, na ɔtserɛwee.
Saul na Barnabas San ba Antiok
25Na Barnabas nye Saul wiee hɔn som no, wɔsanee fii Jerusalɛm na wɔfaa John a wɔtoo no Mark so no kaa hɔn ho.
Currently Selected:
Ndwuma 12: MFANBRPC
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
