Gyenesis 32

Jakob Siesie Noho Hyia Esau

1Na Jakob sii no kwan do, na Nyankopɔn n’abɔfoe behyiaa no. 2Na Jakob hun hɔn no ɔsee dɛ, Nyankopɔn no dɔm nye yi: na ɔfrɛɛ bea no ne dzin Mahanaim#32.2 MAHANAIM: Asekyerɛ nye: Nseraban ebien..

3Na Jakob tuu abɔfo ma wodzii n’enyim kan kɔr no nua Esau hɔ wɔ Seir asaase do, Edom haban mu. 4Na ɔhyɛɛ hɔn dɛ, Hom nkɛse mo wura Esau dɛm; dɛ, Mbrɛ w’akowaa Jakob se nye yi, Menye Laban akɛtsena, na makyɛr hɔ ara ma ebodu ndɛ. 5Menya anantwi, nsoasopɔnkɔ, nguan, mpɔnkye na nkowaa nye mfonabaa: na masoma dɛ wɔmbɛka nkyerɛ mo wura, ama meenya w’enyim adom. 6Na abɔfo no sanee baa Jakob hɔ, dɛ, Yɛkɔr wo nua Esau hɔ na mbom ɔnoara so reba ebehyia wo kwan, na mbarimba ahaanan ka no ho. 7Nna Jakob n’akoma tuu kɛsenara, na no ho hiahiaa no. Na obuee nkorɔfo a wɔnye no nam no, nye mpɔnkye, nguan, anantwi nye efumpɔnkɔ no hɔn mu ekuw ebien; 8na ɔsee dɛ, Sɛ Esau ba kuw kor do, na oboku hɔn a, ɔno ikuw a ɔaka no eefi nsa. 9Na Jakob see dɛ, Ao, m’egya Abraham ne Nyankopɔn, na m’egya Isaak ne Nyankopɔn, ao, EWURADZE a esee me dɛ, San kɔ wo man mu, nye w’ebusua mu, na mebɛyɛ wo yie: 10ehumbɔbɔr nye nokwar a eyi akyerɛ w’akowaa no mennsɛ no mu biara; osiandɛ mo poma ara na medze twaa Jordan yi; na afei mayɛ ekuw ebien. 11Meserɛ wo, gye me fi mo nua Esau nsamu: na musuro no, bɛyɛ na ɔaba eboku emi, nye enanom nye hɔn mba yi. 12#Gye 22.17 Na esee me dɛ, Ampaara mebɛyɛ wo yie, na mama w’asefo ayɛ dɛ mpoano anhwea a no dodow ntsi wɔkan a ɔnnyɛ. 13Na ɔsoɛɛ hɔ anafua no; na oyii dza ɔwɔ ne nkyɛn no mu bi dɛ ɔdze rekɛkyɛ no nua Esau; 14mpɔnkyeber ahaenu nye mpɔnkyenyin eduonu, nguamber ahaenu nye nguannyin eduonu, 15efumpɔnkɔ a wɔma enumfo eduasa nye hɔn mba, anantwiber eduanan nye anantwinyin du, nsoasopɔnkɔber eduonu nye nsoasopɔnkɔmba du. 16Na ɔdze no ekuwekuw hyɛɛ no nkowaa no nsa; na ɔsee no nkowaa no dɛ, Hom ntwa mu ndzi m’enyim, na hom mma ikuw nye ikuw ntamu mbra kwan. 17Na ɔhyɛɛ dza odzi kan no dɛ, Sɛ mo nua Esau nye wo hyia, na obisa wo dɛ, Woana n’abofra nye wo, erokɔ henfa, na dza wodzi w’enyim yi woana dze a? 18Ɔno se dɛ, W’akowaa Jakob dze a; ɔyɛ akyɛdze a wɔdze rekɛma mo wura Esau: na, hwɛ, ɔnoara so dzi hɛn ekyir. 19Na ɔhyɛɛ dza otsia ebien no so, nye dza otsia ebiasa no, nye hɔn a wɔka mbowakuw no do no nyinara dɛ, Sɛ hom hu Esau a, wɔnka dɛm asɛm yi ara nkyerɛ no. 20Na hom nse dɛ, Nkyii so, hwɛ w’akowaa Jakob so dzi hɛn ekyir. Afei ɔkaa ɔsee dɛ, Medze akyɛdze a odzi m’enyim yi bɔkɔ akɔdwedwe no, na n’ekyir no meehu n’enyim; bi a no bo bɔdwe. 21Nna akyɛdze no twaa mu dzii n’enyim: na ɔnoara dze, ɔtsenaa dɔm no mu anafua no.

Jakob N’aperdzi Wɔ Peniel

22Na ɔsoɛɛr anafua no, na ɔfaa ne yernom beenu no, nye ne mbaawa beenu no, nye ne mba dubiako no, na okotwaa Jabbok esutwaree. 23Na ɔmaa wotwaa esutsen no, na ɔmaa dza ɔwɔ nyinara twae. 24#Hos 12.3, 4 Na ɔkaa Jakob no nko; na banyin bi nye no dzii aper wɔ hɔ ara ma okodur adzekyee. 25Na nyimpa no hun dɛ onndzi Jakob do konyim no, nna ɔkaa n’aserɛ tokur mu; na Jakob no ndwonku huanee wɔ aperper a ɔnye no dzii no mu. 26Na banyin no see dɛ, Ma monkɔ, na adze rekye. Na ɔsee dɛ, Mennkɛma akɔ, gyedɛ ehyira me ana. 27Na banyin no bisaa no dɛ, Wo dzin dze dɛn? Na obuaa dɛ, Jakob. 28#Gye 35.10 Na ɔsee dɛ, Wɔnnkɛfrɛ wo dzin Jakob bio, na mbom, Israel: osiandɛ ɔwo enye Nyankopɔn na ɔnye nyimpa ako, na edzi konyim. 29#Atsɛ 13.17, 18 Na Jakob bisaa no dɛ, Meserɛ wo, bɔ wo dzin kyerɛ me. Na ɔsee dɛ, Na iribisa me dzin ayɛ dɛn? Na banyin no hyiraa no wɔ hɔ. 30Na Jakob frɛɛ bea no ne dzin Peniel; osiandɛ, ɔsee dɛ, Mehu Nyankopɔn mpu na mpu, naaso me kra enya nkwa. 31Na orutwa mu wɔ Peniel no nna ewia epue, na no ndwonku a ehuan no ntsi nna ohuan n’aserɛ mu. 32Dɛm ntsi ɔdze bodu ndɛ da yi ara Israelmba nndzi ntsin a ɔwɔ ndwonku mu no: osiandɛ ɔkaa Jakob no ndwonku wɔ mbrɛ ntsin no wɔ no.

Currently Selected:

Gyenesis 32: MFANBRP

Highlight

Copy