Gyenesis 33

Jakob Nye Esau Hyia

1Na Jakob maa n’enyiwa do, na ɔhwɛe, na, hwɛ, nna Esau reba, na mbarimba ahaanan ka no ho. Na ɔkyɛɛ mbofra no mu maa Leah, nye Rahel, nye mbaawa beenu no. 2Na ɔdze mbaawa no nye hɔn mba no dzii kan, na ɔdze Leah nye ne mba no dzii hɔ, na ɔdze Rahel nye Josef dzii ekyir. 3Na ɔnoara paa ho kedzii hɔn enyim, na ɔbɔɔ no mu adze mpɛn esuon, dze kodur dɛ ɔbɛɛn no nua no. 4Na Esau tutuu enguan hyiaa no kwan, na ɔyɛɛ no etuu; na ɔdze ne nsa too no kɔn mu, na ɔfeew n’ano: na wosui. 5Na Esau maa n’enyiwa do, na ohun mbaa no nye mbofra no; na obisaa dɛ, Woananom na wɔka wo ho yi? Na Jakob buaa dɛ, Mbofra a Nyankopɔn dze adom w’akowaa a. 6Nna mbaawa no nye hɔn mba twee pinii, na wɔbɔɔ hɔn mu adze. 7Na Leah nye ne mba so twee pinii, na wɔbɔɔ hɔn mu adze: na n’ekyir no nna Josef nye Rahel twee pinii, na wɔbɔɔ hɔn mu adze. 8Na Esau bisaa dɛ, Na ekuw a menye hɔn hyiae yi nyinara n’ase nye dɛn? Na ɔsee dɛ, Medze robɔhwehwɛ mo wura n’enyim enyimnyam. 9Na Esau see dɛ, Dza mowɔ no ara dɔɔ so; mo nua, ma w’adze nko hɔ mma wo. 10Na Jakob see dɛ, Dabida, meserɛ wo, sɛ afei menya w’enyim enyimnyam a, nna gye me nsamu akyɛdze: susuampa dɛ mehu w’enyim ara dɛ mbrɛ obiara bohu Nyankopɔn enyim, na masɔ w’enyi yi. 11Meserɛ wo, gye m’akyɛdze a wɔdze abrɛ wo yi; osiandɛ Nyankopɔn adom me, na eso dza mowɔ no dɔɔ so. Na ɔhyɛɛ no ma ɔgyee. 12Na Esau see dɛ, Ma yensi mu, na yɛnkɔ, na mibedzi w’enyim. 13Na ɔsee no dɛ, Mo wura nyim dɛ mbofra yi yɛ mberɛw, na eso nguan nye anantwi a wɔnye me nam yi wɔma enumfo: na sɛ wɔka hɔn dodow da kor a, nguan no nyinara bowuwu. 14Meserɛ wo, wɔmma mo wura mpa ho nkedzi n’akowaa enyim: na emi mobɔdwe m’enyi ara manantsew dɛ mbrɛ mbowa a wodzi m’enyim yi botum, na dɛ mbrɛ mbofra no botum, ekodu dɛ mubodu mo wura nkyɛn wɔ Seir. 15Na Esau see dɛ, Nna ma memfa nyimpa a wɔka mo ho yi bi mingya wo. Na ɔsee dɛ, Ma ɔnyɛ dɛn? Wɔmma minnya mo wura n’enyim enyimnyam. 16Nna Esau saan da no ara faa no kwan do kɔr Seir. 17Na Jakob sii mu kɔr Sukɔt, na okesii dan maa noho, na osisii mpata maa no mbowa: dɛm ntsi wɔfrɛɛ bea no ne dzin Sukɔt.

18Na Jakob baa Sekem kurow a ɔwɔ Keenan asaase do no mu asomdwee mu, wɔ ber a ofii Paddan-aram bae no; na ɔbɔbɔɔ asese wɔ kurow no n’enyim. 19#Jos 24.32; Joh 4.5 Na ɔtɔɔ asaase kakraba a ɔbɔɔ n’asesee wɔ do no, wɔ Sekem n’egya Hamor ne mba no hɔ, maa dwetɛ ɔha. 20Na osii afɔrmbukyia wɔ hɔ, na ɔfrɛɛ no El-elohe-Israel a asekyerɛ nye Israel Nyankopɔn.

Currently Selected:

Gyenesis 33: MFANBRP

Highlight

Copy