ZEFANYA 1

1 # 2Raj 22:1–23:30; 2Taw 34:1–35:27 Hun Amon amloho Yosia ino Yehuda inap onowe suwon welatfag li Ninikni Allahn hun Zefanya fam ele uruk latfag. Zefanya ikni Kusyi, Kusyi ikni Gedalya, Gedalya ikni Amarya, Amarya ikni Hizkia welatfag.

Allahn alem haluhu sambil fahet ibag ane

2 Ninikni Allahn ele uruk lit, ”Anden mun angge man angge kinangma werehon heroho hik isahuk. 3Ap men wam men suwe pohol ke larukon men ikan ik ahummu werehon men feleng toho hik isaruk lit ap siyag ane turukon mako tulungum tik wambukag ulug siyahap enebuhuk. We tem toho ap obog toho kinangman elehap enebuhuk. 4An ninggik ineyonen Yehuda inabet Yerusalem inabet obog toho unusuhuk. O inowen tu Allah hag toho wereg ulug wel turukon Baal tor angge werehon Anden mondabi eleha fusuhukmu Baal forohowon imam ununuk ap misihen oho wenggel haruk laruhu fug. 5Ap hinawi lahalug enelenggen fam hur atuk lit mo, pikalem, suhal men fam sembahyang urukon arimano oho Anden elehap enebuhuk. An Hinikni Allah nubam sali emberuk angge famen inikni Milkom ubam oho sali emberukon arimano siyahap enebuhuk. 6Iren An Inikni Allahn ele hiyag nisamisi ulug yami nabuk fug angge enembol yig nutuk,” uruk.

7Nit Ninikni Allah olohotma henekol toho henele eleg angge welamok! Ninikni Allahn alem kong tuhu sambil horog teg. An nubahet wam waroho emberuk hag toho numalikisi unusukag ulug ap seliyon wol eneptisi. 8O ino sambil tuhu ane fahet Ninikni Allahn ele uruk lit, ”Anden ap suwon umalikisi men ununuk suwon men ap o winamonen enesum wan teg ane hikit toho wan turukon obog toho alem angginon unubam umbuhuk. 9Iren o winaman turuk ane hikit toho sembahyang uruk lit ap enele ying eneptuk lit unusil laruk. Ari roho turuk lit aben tohon huhulangge walug inikni ibam imbik kurukmen eneg keleg atuk. 10Anden alem arimano obog toho haluhuk sambil ino aben hol harukmen elehet o Yerusalem walinggoho kilabehon sok unuk Ikan irahamen ap enele ya nga uruk lamuhup. O keron witusa ambehen oho uba yatukmu punumuwen o halog toho wamburuk lit aplohok tulungum uruk laruhu ulug An Hinikni Allahn uruk lahi. 11Nori, hit hinibam ayeg waroho waruk ambeg walinggoho welahebon, it obog toho war amuhup ane fahet uba yatuk lamek! 12O itano li Anden iral hunduhuk felug o Yerusalem walinggoho An nabug uruk inap yami enebil lahuk. Laruk lit ap enehum ouk toho nalug enele hemet toho Ninikni Allahn fano aneyet siyag aneyet nunubam turuk eleg urukon arimano hiyag enebuhukteg alem angginon unubam umbuhuk. 13It enenggengge aben yoholiyangge hilaruk lit inibam halog toho oluna fusuhup. O keron wit tahup angge famen o arimano fam welamuhup fug. Anggur yabuk wit taruk lamuhup angge famen anggen tahanoho ahaluwe naruk lamuhup fug,” uruk.

14 Ninikni Allahn alem obog toho haluhu sambil folo-folo horog atuk. Holiyok! O ino sambil enehako roho turuk inaben oho enele ya nga uruk lamuhup. 15O ino sambil Ninikni Allahn olok hahu, o ino ap asengseng toho wereg lit eneliplip toho welamuhup. O ino ap seliyonen mun angge man angge siyaha fisik wamuhup. O ino sambil hina singonen keleg tegma hik teg laruhu. 16O ino sambil ap seliyonen o pumbuk elehet ineyon walinggoho kilabehon men o yaron men siyaha fusul ulug ngik-ngog turuk lit pinggong ele hum toho watil wamuhup.

17 Ninikni Allahn ele uruk lit, ”Aben An nele ying naptuk latusa ane fahet Anden sohuwap enebuhukmu ap inil hupnihon hag toho fatil laruk lamuhup. Ap seliyonen it enemep ik hag toho hilil isahupmu enebe filik turuk lit kinang amug war amuhup,” uruk. 18Ninikni Allahn olok toho tuhu sambil ino perak ili rurukon men emas umbagpag turukon menen ap windat enebuhup fug. Nungge fahet iren An enembol yig nutuk ulug undama ahe indok ambulpul hag toho laharuk lit kinang obog toho narukmu ap enepeleg toho weregman obog toho unusuhu.

Currently Selected:

ZEFANYA 1: YLI

Highlight

Copy