HABAKUK 3
3
Habakuk inowen Allah ubam sembahyang ibag ane
1Allah wene hiyag isaruk ahun nabi Habakuk inowen sembahyang ibahon tu,#Ibrani enele fam sebe roho hahatfahon seleg teg elehen niren emberuk lahe fug.
2”Nikni Allah, Haren indam turuk latnahon fahet anden holtuk latikikteg
nindi nakol toho welahi.
Indam hine roho turuk latnag hag toho ninilen yet hahuken
nit nonoluk weregma oho turuk laruhun.
Hat hindimu holok haruk lahen angge famen
ketiya hindi nisamihin!
3Allah, Hat hebe usa fulu hahun welahenon,
kinang Teman#Teman: Kinang Edom fahet uruk. famen waharuk lahen.
Tom Paran famen wambik waharuk lahen.
Hat hebe umbagpag tirikim
pohol obog toho seleg tegma
kinang obog tohowen wel haptuk.
4Pinel lebeglu ruruk lit
waharuk lahen.
Hat hinggik famen asinandi wilip atikim
asinandi sehelimu hine ino hiraho feruk lahen.
5Hat halukema ouk alem suwon monde feruk lahenma
war atuk ane hombolim waharuk.
6Huyuhen kinang soptikim
kinang yuk turuk.
Haren kinang walinggoho yet harikim
o pumbuk obog toho enekolen lagmag uruk.
Tom humon indamet angge werehon lilibug toho lin uruk.
Punu indameron oho wamburuk.
Punu ke indamen tulug
ketiya oho Hat laruk lahen.
7O Kusyan inap inibam halog-halog larukmu yet haruk lahi.
Midian inap olma werehon enekolen unuwag elek-elek angge ruruk.
8 Nikni Allah, sa watmin ulug
wam kudan lisoho walug laruk angge fam lahalug waharuk lahen?
Ik humon fahet holok haruk lit waharuk lahen?
Saho ahik fahet hundama het-pet teg lahen?
9Hasehen wep toho seneg lit
tog sap toho waharuk lahen.
Haren kinang pilang teberukmu
ik wilip atuk.
10Tom alma laruk lahenma
yuk turuk.
Poholman osit humon wambik waharuk.
Ik kinang apmon aplohok hum toho uruk lit
ik haglabut hik tik lahik waharuk.
11Tog pising turuk lahenma ambulpul ulog-ulog laruk.
Fit hik haruk lahenma
pinel lebeglu ririkim
mo men pikalem men wereg ambeg hirag atuk.
12Hat hindi inahan haruk lit
o pumbuk obog toho sobit-sabar isil
kinang atogman atogma laruk lahen.
13An numalikisi onowe suwon Anden mumal tarikikon men
windat enebuhuk ulug laruk lahen.
Hat men seli reg inap inibam ungga fiyog toho hik isaruk lit olunap feseruk lahen.
14It arimanowen sehen seneg lit
hik-hak nusul ulug
siyelu laruk hag toho waharuk.
Meneyen pak watug lisoho walug hirahoman na laruk hag toho
it inine elehon kililim-kililim lit eneplug lulteg unusul ulug enehiyeg toho waharuk angge famen
Haren it inikni fit inggarehen tohon fam haliyogangge ware feseruk lahen.
15Saho ahik ahum pulmu haglabut watuk ambeg
Hat hambohom kuda fam lahalug laruk lahen.
16Obog toho ari anden yet hihireg nindi nakol haruk lahi.
Aplohok arimano hol hihireg nambilik elek-elek angge ruruk.
Nuwag eleg ahareg nunu eneg wereg.
Nuyug elek-elek angge turuk.
An nangno rurukmen eneg
nunusul ulug waharuk inap Allahn unusuhu sambil horog aruhu.
17E ara owil turuk eleg,
hele anggur anggen oho uruk eleg.
E zaitun anggen tor angge urukon oho mondabi eleg.
Yabukmu oho mun angge man angge wereg eleg.
Nenembohom domba obog toho war atusama
nenembohom sapi oho eleg atisi.
18Arimano obog toho siyag atisi angge famen
Hat Ninikni Allahn fanowap nabuhun ulug
nahiyeg toho welahi.
19 #
2Sam 22:34; Mzm 18:33 Haren an nineyap naptukmu
nuwag ine eleg atisiyon huhubi uwag ine hag toho atuk lahi.
Haren hondog naptuk lahenma
an punu ke larikim oho
heleben nuwatuk eleg,” ibag.
Habakuk inowen sembahyang ibahon ari aben pinggong watuk lit sini yunggultuk latfahon fahet uruk.
Currently Selected:
HABAKUK 3: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
