ZAKHARIA 9
9
Fobik Allah umalikisi fano amuhup ibag ane
(9–14)
O pumbuk Israel inap walinggoho werehon Allahn alem angginon unubam umbuhu ibag ane
1 #
Yes 17:1-3; Yer 49:23-27; Am 1:3-5 Ninikni Allah ilen Israel inap ununggul unuk wal taneg werehon kim isaruk hag toho o Aram inap oho kim isaruk. Ari fahet it unubam fobik teko lahuwon fahet Allahn ele kong toho irisi. Wene ari o Hadrakh kinangma larisireg amusun toho Aram inap inibam pumbuk suwon Damsyik welaruhu. 2#Yes 23:1-18; Yeh 26:1–28:26; Yl 3:4-8; Am 1:9-10; Mat 11:21-22; Luk 10:13-14O Damsyik embeselug kinang horogma werehon Hamat keyen ap inindi anggat tehon wereg ambeg o pumbuk Tirus men Sidon men oho lahu. 3Tirus inap arimanowen inibam walinggoho elehet yaron eke wibareg wereg lit kinang alinlan anggolo wereg hag toho ili ruruk angge perak men emas men anggolo andog toho lahabil laharusa angge famen 4Ninikni Allahn enenggengge obog toho oko walug ik ahummu hik isahumu inibam pumbuk ino indoken nahu. 5#Yes 14:29-31; Yer 47:1-7; Yeh 25:15-17; Yl 3:4-8; Am 1:6-8; Zef 2:4-7Ari roho turukmu o Askelon inaben yet hahupteg enekol haruk lamuhup. O Gaza inaben oho enekolen unuwag elek-elek angge ruruk lamuhup. O Ekron inap arimanowen nit ninibil atukon Tirus inap arimano eleg atusa ulug inindi anggin aruhu. O Gaza inap onowe suwon eleg aruhumu o Askelon inowen ap enele teng uhup. 6O Asdod inowen ap pohon anggolo welamuhup. Ari roho tuhuwon fahet Ninikni Allahn ele uruk lit, ”O Filistin inap inindi winik-wonog turuk ane Anden elehap tuhuk,” uruk. 7Filistin inaben wam pak suwe waroho mebet angge naruk lit Allahn na fug ibag angge eneyehen saluk tegman Allahn taluk toho hik isaruk laruhu. Ari roho turuk laruhumu Filistin inap we tot onoluk welamuhubon arimano Ninikni Allah anggengge amuhupteg nit Yehuda ninap nonori welamuhup. O Ekron inap arimano oho indam Yebus inap arimano Israel inap sehelimu kuruk latfag hag toho#Yebus inap arimano o Yerusalem yug toho weregma Daud o ino senerik watfagma Daud umalikisi atfareg Israel inap sehelimu wereg latfag. ir oho Allah umalikisi sehelimu kuruk lamuhup. 8Ninikni Allahn ele uruk lit, ”Ap seliyon An nangginang ke la wam turuk lit nibam siyahap tuhup tohon ulug An ninggarehen kahaleg laruhuk. An numalikisi nilen kim isaruk lit wanggi wat enesug laruhukmu fobik ap olok toho turukon misihen oho apmayap enebik waruhu fug.
Hit honowe suwon waharukmu yet teg lamok ibag ane
9 #
Mat 21:5; Yoh 12:15 Sion hinap nori, henehiyeg toho welamok!
Yerusalem hinap, henele hi roho yunggultuk lamek!
Hit honowe suwon henembeg waharukmu yet teg lamek!
Numalikisi inibil atuk lit windat enebuhuk ulug waharuk.
Indi apma roho wam keledai emberimu heriyeg lit waharuk.
Wam keledai umalik kabiniyon fam heriyeg lit waharuk.
10 #
Mzm 72:8
Allahn ele urukon tu,
”Efraim inaben tog abul ulug
kereta wam kudan lisoho walug larukon arimano
Anden hik isahuk.
Wam kuda Yerusalem inaben tohon oho eleha fusuhuk.
Eneminggin tog obog toho
fala roho hik isahuk.
Hit honowe suwon inowen
o pumbuk obog toho mangno roho welamuhup ulug hiyag isahureg
ik Efrat ikman tulug saho ahik walinggoho kinang atogman atogma werehon obog toho
Aren eneg sen enesug laruhu.”
Allahn numalikisi nin hebeloho fanowap enebuhuk ibag ane
11 Ninikni Allahn Israel inap unubam ele urukon tu,
”Anden hit fet henesug laruhuk ulug sali emberuk lit
wam amep fam ineyap tiyahon pisan isamin fug peruk lahi.
Hit honori aben kiling elma pilap eneptukon hag toho werehon arimano Anden windat enebuhuk.
12Hit aben hele waroho fet henesuhon suhuloho maniyek!
Fano amuhuk peruk lamuhup!
Hinindi yuwag toho welamuhup ambeg wamuhup!
Asengseng haruk latikibon fahet
Anden fano ane sebe roho hunubam turuk laruhuk ulug
o yoho nele hiyag hisaruk lahi.
13An namuwen Yunani inap men tog abuhuk ulug
Yehuda inap sehen hag toho seneg lit
Efraim inap minggin tog hag toho sap teg laruhukteg
Sion inap karog hag toho leho laruhuk.”
14 Ninikni Allahn umalikisi inibil atuk lit enemberimu inam aruhureg
tog pinel lebeg turuk hag toho pising isaruk laruhu.
Ninikni suwon Allahn tog apmin ulug waruk ele hum toho tung turuk lit
At ebe ik ambut filen siyelu sehelimu waharuk.
15At pohol ha kinang ha senehonen umalikisi ili og eneptukmu
iren ap seliyon waroho apmayap eneptuk lamuhup.
Aben ik olokon nalug enele ngik-ngog uruk hag toho
tog aptuk lit enele ngik-ngog uruk lamuhup.
Allah fahet hubu lahaptuk ambeg wam mep hililtuk hag toho
ap seliyon enemep it enebene anggolo sililim toho laruk laruhu.
16Ari turuk sambil ino wam domba foroho ahunen ambohom windat eneptuk hag toho
Ninikni Allahn oho umalikisi windat enebuhu.
Windat enebuhumu
Allah angginangma wereg lit
helep umbagpag turukon hag toho welamuhup.
17At angginang fanowon fam
hele anggur men roti anggen men fano wilip aruhumu
ap kabiniyonet hiyap tuhumonet inine amuhup.
Currently Selected:
ZAKHARIA 9: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
