ZAKHARIA 10
10
Allahn eneg osit pilabik waharuk ibag ane
1Anggen tahantuk li uwanma osit pilap nisa watmihin ulug Ninikni Allah ubam heng uruk lamuhup. Aren eneg hina mondotuk lit osit pilabik waharukmu mun angge man angge kinangman wilip atuk. 2#Mat 9:36; Mrk 6:34Aben usangge men fulu roho yet haruk inap men nungge teko lahu ulug kapal isaruk angge famen iren enele si ane hiyag isaruk. Nei wihi ulug hiyag isaruk ane un ane uruk. Hinindi yuwag toho welamuhup urukon seni ahe hag toho folo-folo eleg atuk. Ari fahet ap arimano wam iniknisi elehon la wam turuk lit nonghong urukon hag toho wereg.
Allahn Israel inap windat enebuhuk ibag ane
3 Ninikni Allah pohol ha kinang ha senehon inowen ele uruk lit, ”Ap o winamon An numalikisi sen enesuhon arimano fahet An nolok haruk lahireg alem angginon unubam umbuhuk. Umbuhukteg numalikisi Yehuda inap arimano nanggengge ulug nindi pulmu roho fet enesug laruhukmu An nubahet wam kuda ineyon emberimu lahalug tog elma laruk ambohom hag toho welamuhup. 4It sehelimuwon helep ubule yag aruhu. It sehelimuwon e uwag ineyon pilap aruhu. It sehelimuwon sehen ineyon hag aruhu. It sehelimuwon ap inine roho fet enesuhon in amuhup. 5An Hinikni Allah numalikisi Yehuda inap arimano men welaruhukmu it enembong se roho tog elma laruk lit ap unuyuhen sabelep pisal-pasal isaruk hag toho ap seliyon arimano sobit-sabar isaruk lit wam kuda fam lahalug larukon oho apmayap eneptuk lamuhup. 6Anden Yehuda inap arimano hebeloho nindi isaruk lit inineyap enebuhuk hag toho hun Yusufen endetfahonen ondohowon Israel inap arimano oho windat enebuhuk. Windat enebuhukteg inibam suhuloho hondog eneplug waruhukmu indam Anden it nambol yig isa fugmu welatfag hag toho welamuhup. An it Inikni Allah welahireg iren An nubam enele urukon holtuk laruhuk. 7Israel inap arimano enembong se roho tog aptuk inap hag toho turuk lamuhup. Hele anggur ahaluwe nalug enehiyeg harukon hag toho welamuhup. Ari roho turukmu unumalikisiyen yet isahupteg iren oho enehiyeg haruk lit Ninikni Allahn fanowap neneptisi ulug enele hi roho wel turuk lamuhup.
8Anden numalikisi o kema-kema pilili-palala isibahon arimano suhuloho hinibam hondog heneplug lahuken palu arik maniyek ulug wol enebuhukteg ap seliyon ininggikmuwen tel enebuhuk. Tel enebuhukmu it enebe anggolo welatfag hag toho nin hebeloho anggolo amuhup. 9It arimano yat ke hik-hak isarik iyag ambeg wereg lit An nubahet wenggel haruk lamuhup halug it unumalikisi men onoluk wereg lit inibam suhuloho wamuhup. 10Anden o Mesir kinang men Asyur kinang men famen hondog eneplug wilip aruhukteg inibam suhuloho waharuk lit o Gilead kinangma oho tom Libanon fam oho welamuhuben hiyag isahukmu it enebe anggolo welamuhubonen kinang atogman atogma keleg aruhu. 11An numalikisi arimano ik haglaburen unusik oho turuken eneliplip toho weregman Anden ik haglabut ino ware fesehukmu ik Nil ahum yaron ino oho firig aruhu. Ari roho tuhukmu o Asyur inap inindi winik-wonog toho turukon arimano mako wamburukmu Mesir inap unuwanggun ineyon oho fala roho lahu. 12Anden numalikisi arimano inineyap enebuhukmu iren An nunuk wel naptuk lit Anden fano peruk lahi ane hikit toho turuk lamuhup,” ulug Ninikni Allahn ele uruk.
Currently Selected:
ZAKHARIA 10: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
