ZAKHARIA 6
6
Wam kudan lisoho walug laruk angge fulu roho yet hibag ane
1Anden nin eke fulu roho yet harukmen wam kudan lisoho walug laruk angge kereta uhan tom ine angge tembaga eneg werehon piren honggolegman wilip ahasa. 2#Why 6:4-5Kereta tamon wam kuda onoruk huluwonen lisoho walug larukmu, pirenehon wam kuda onoruk singonen, 3#Why 6:2hinahanehon wam onoruk yanggowonen, uhanehon wam onoruk panduhabonen lisoho walug lahasa. Wam arimano inine roho larukmu yet isihi. 4Yet isihireg anden malaikat mun ane man ane seleg toho hiyag nutukon ino ubam nele uruk lit, ”Nikni, kereta aruma nungge fahet wahasa?” ulug kapal hihi. 5#Why 7:1Kapal hihimu aren hiyag nutuk lit, ”Kereta itano Ninikni Allah kinang obog toho senehon olohotman wahasareg wal taneg yali fil, hubula fil, ik eleruk fil, ambut fil lalusa. 6Wam kuda onoruk singon itano ik eleruk fil o Babilonia kinangma larukmu onoruk yanggowon hubula fil, onoruk panduhabon ik ambut fil lalusa,” ehek. 7Ari ehekma wam kuda inineyon arimano inindi ahe roho lul ulug turukmen malaikat inowen ele uruk lit, ”Kinang walinggoho aluwat hil aliyek!” ulug hiyag esehekma lahasa. 8Lahasama malaikat inowen an nubam ele hi roho uruk lit, ”It o Babilonia kinangma lahason arimanowen turuk lamuhup ane ariyen Ninikni Allah indimu olok harukon yuwag aruhu,” ehek.
Allahn Yosua ap suwon lahabuhup ibag ane
9 Ninikni Allahn an nubam ele uruk lit, 10”Ap o Babilonia kinangma hik isaruson ununuk Heldai men Tobia men Yedaya menen pen hisa waharusareg hun Zefanya amloho Yosia ibam wereg. Iren fano-fano angge emas men perak men hat og humul perukon foroho lit werehen hat o yoho enembeg lamihin. 11Lamihinteg og humusa angge perak men emas men wamihinteg ap suwon unggulmu lahaptuk angge eke wiri femihin. Wiri femihinteg hun Yozadak amloho Yosua Allah amingmingangge imam onowe ino unggulmu lahabik lamihin. 12#Yer 23:5, 33:15; Za 3:8Lamihinteg Yosua hiyag utuk lit, ’Ninikni Allah pohol ha kinang ha senehon ele urukon tu holeg lamin: Hun Dauren ondohowonen endebuhubon unuk Ahanuk Fanowon ino waruhureg at welaruhu ambehen anggen anggolo wilip aruhu. Wilip aruhumu aren An nibam oho wiruhu. 13We tem toho An nibam wiri fuhu! Lehoma hur arik lahakureg ap suwonen tuk teg ane hikit toho turuk lit umalikisi fet enesug laruhu. At iraham An namingmingangge imam eke wereg lit let turuk laruhu. Aret imam inowet inindi misig toho wereg lit ininggik ahandip toho welamuhup. 14Ap suwon unggulmu lahaptuk angge ino An nibam imbik kuhupteg foroho lamuhup. Ap san lahaptuk angge ino yet haruk halug hun Heldai men Tobia men Yedaya men hun Zefanya amloho Yosia indi fanowon ino men fahet wenggel haruk lamuhup,” ehek.
15Ap yatman wamuhubon nit men ambiyeg NinikniAllah ibam wiri feruk lamuhuk. Ari roho turukmu yet isahupteg Ninikni Allah pohol ha kinang ha senehon inowen an mon naptisi angge re honoluk aruhu. Hiren hit Hinikni Allah ele fuki roho holtuk lamuhup halug eneg ari obog toho teko lahu.
Currently Selected:
ZAKHARIA 6: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
