ZAKHARIA 5
5
Suwesingga pohol ke larukmu fulu roho yet hibag ane
1Anden nin eke yet harukmen suwesingga eke pohol keyen larukmu yet hihi. 2Yet tegman malaikat inowen an nubam ele uruk lit, ”Haren nungge haruk lahen?” ulug kapal neyehekma anden hiyag utuk lit, ”Suwesingga eke pohol keyen larukmu yet haruk lahi. Suwesingga ari yat toho wirim turukon il sohowen, horog toho wirim turukon il uhan minggiroho men wereg,’ ihi. 3Ihimu aren ele uruk lit, ”Suwesingga ino fam ap kinang tu atogman atogma werehon huluwap eneptuk ane hahareg. Fuma fil aben tohon hirag tarukon arimano kinang tu famen eleg amuhup ulug hahareg, fuma fil Allah unuk fam tem toho ihi uruk anggeyen enele si ane urukon arimano eleg amuhubon fahet hahareg. 4Ninikni Allah pohol ha kinang ha senehon inowen ele uruk lit, ’Anden huluwap eneptuk ane ari monde fik waruhukmu aben tohon hirag taruk inap inibam men enele si ane uruk inap inibam men kuhureg weregman eneg o arimano eyet helebet halog toho lin-lan uhup,’ ehek,” ulug hiyag nerehek.
Hiyap kubag elma weregma fulu roho yet hibag ane
5Malaikat mun ane man ane seleg toho hiyag nutukon ino nin hebeloho wahareg an nubam ele uruk lit, ”Alem winon eke inam atukmu yet himin!” ehekma 6anden, ”Ari nungge?” ulug kapal hihimu aren hiyag nutuk lit, ”Kubag eke wereg,” ehekteg, ”Kubag ari elma ap kinang tu fam werehonen siyag ane turukon keleg toho wereg,” ehek. 7Ari ehekma anden yet harukmen kubag abilit ine anggolowon ino husoho laharukmu hiyap eke elma heriyegma yet hihi. 8Yet hihimu malaikat inowen, ”Allah ele ying turuk ane ari!” uruk lit hiyap ino nin hebeloho kubag elma pilabehekteg abilit lare fehek. 9Lare fehekma anden lahap harukmen hiyap piren ininggik pibalu aherabul hag toho wereg lit pohol keyen wahasareg kubag ino oko walug nin hebeloho pohol keyen lahasa. 10Lahasama anden malaikat ino ubam, ”Hiyap ino o kema walug laruk?” ulug kapal hihimu 11aren hiyag nutuk lit, ”O Babilonia kinangma lalusareg hiyap ino wel turuk ibam eke wiri felug hiyap kubag elma werehon ino lehoma unduhuk fik lahakup,” ulug hiyag nerehek.
Currently Selected:
ZAKHARIA 5: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
