ZAKHARIA 12
12
Allahn o Yerusalem fanowap tuhuk ibag ane
1 Ninikni Allahn Israel inap unubahet irisiyon tu, ”An Hinikni Allah pohol leho feruk lit kinang pilaptik iyareg ap enehime wal tiyahon inowen nele iminon tu: 2Ap seliyonen o Yerusalem waling enebik waharuk lit o pumbuk Yehuda kinangma werehon oho kilap enesug lamuhup angge famen Anden o Yerusalem ino kubag ik olokon hinanggoho wereg ambeg hag tubuhukmu ap seliyonen ik ino nalug nenek turukon hag toho welamuhup. 3O itano li Anden o Yerusalem ino helep humon hag tubuhukmu ap o pumbuk obog tohowen ha roho walug lulen wal hul ulug luhaloho wamuhup angge famen wal harukmen helep inowen unuyug sahaloho unusuhu. 4O ino sambil Anden ap seliyon enembohom kuda obog toho enekolap eneptuk lit wam enemberimu lahalug larukon inindi nonghonga fusuhuk ulug An Hinikni Allahn nele uruk lahi. Yehuda inap arimano fet enesug lit An nilen kim isaruk laruhuk angge famen ap seliyon enembohom obog toho inil hupni fusuhuk.
5Ari roho tuhukmu Yehuda inap onowesi arimano it-it enele uruk lit, ”O Yerusalem inaben inindi wirik toho Inikni Allah pohol ha kinang ha senehon ino ubam wenggel haruk ane ariyen inine roho wereg,” uruk lamuhup. 6O itano li Anden Yehuda inap onowesi arimano inineyap enebuhukmu indok ambulpul ulu angge irahamen mililang turukon hag amuhupteg indok inowen ap o pumbuk walinggoho werehon obog toho nahu angge famen o Yerusalem inap arimano eneg inindi yuwag toho inibam welamuhup,” irisi.
7Hun Dauren endetfahonen ondohowon men o Yerusalem inap menen nit eneg palimu welahe ulug Yehuda inap arimano apmayap enebuhup tohon ulug Ninikni Allahn Yehuda inap arimano tam ap seliyon ininggikmuwen tel enebuhureg Yerusalem inap arimano fobik eneg windat enebuhu. 8O itano li Ninikni Allahn o Yerusalem inap arimano wanggi waroho fet enesug laruhumu ap inine elehon Daud ine reg latfag hag toho welamuhupmu Dauren endetfahonen ondohowon arimano Allah mondabi ineyon hag toho inine anggolo reg lamuhup. Ninikni Allah ot malaikat hag toho wereg lit Yerusalem inap arimano fet enesug lamuhup. 9Ninikni Allahn ele uruk lit, ”O itano li Anden ap o pumbuk kema-kema werehonen Yerusalem siyahap tul ulug waharuk lamuhubon obog toho elehap enebuhuk,” irisi.
Aben wabuhubon fahet uba yatuk lamuhup ibag ane
10 #
Yoh 19:37; Why 1:7 Ninikni Allahn nin ele uruk lit, ”Anden Daud inowen endetfahonen ondohowon men o Yerusalem inap men enebene hime fanowon pilabik waruhukmu it inindiyen An nubam sembahyang uruk lit ap inilaheg toho werehon let eneptuk lamuhup. Ari roho turuk lit at iren hak turuson fahet nenembiken turukuk ulug wenggel hahupteg aben enemloho misig eneg angge war atukon fahet fong watuk hag toho fong watuk lamuhup. Malik wandabon war atuk halug ikni isinga inindi siyag atuk hag toho iren oho inindi mondabi siyahen uba yatuk lamuhup. 11O itano li o Yerusalem inowen enele hum toho uba yatuk lamuhup ane ari men o Megido tonggoma Hadad-Rimon horogman enele uba yatuk latfahon men ambi reg laruhu.#O Hadad-Rimon horogma Israel inap onowe suwon Yosia ino tog elman war atfag ane fahet Israel inaben hundig-hundig wenggel haruk lit uba yatuk latfag (2Taw 35:20-25). 12-14Kinang atogman atogma ap ununggul unuk wal taneg ap enemu, hiyap enemu wereg lit fong watuk lamuhup. Hun Daud umbasi men Natan umbasi men Lewi umbasi men Simei umbasi menen uba yako piya sini uruk lamuhup hag toho ap ununggul unuk winonen oho piya sini yiko uba yatuk lamuhup,” irisi.
Currently Selected:
ZAKHARIA 12: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
