KEJADIAN 40

Ap hele warehon pirenen nei wibag ane fahet Yusufen fag toho hiyag isibag ane

1Welatfareg Mesir inap inikni ik hinang utuk ahun men suburu roti wirag utuk inap onowe ino menen inikni fam siyag ane tibahon fahet 2olok hibareg 3ininggik hele waroho penjara Yusuf kilapfag ambeg ino kilap enepfag. Penjara ino Mesir inap inikni foroho latfag inap sehen senehon onowe ibam welatfag. 4Weregma ap suwon foroho latfag inap onowe inowen, ”Ap piren ariya let eneptuk laruhun,” ulug Yusuf hiyag itfag.

Hiyag itfagma welatfareg 5hup misihim sambil ik hinang utuk ahun men roti wirag utuk ahun men itanowen nei wibareg nei fulu roho weheyon nungge fahet hehe ulug enebe wal tanehen wenggel haruk latfag. 6Likiyamon Yusuf ino enembeg watfareg yet isarukmen onorohole hilik toho weregma yet isibareg, 7”Niknisi, nungge fahet honorohole hilik toho welahep?” ulug kapal isibag.

8Kapal isibagma iren hiyag utuk lit, ”Yoho hubanggo nei wehe ane fahet fag toho hiyag nisarukon elehen wenggel haruk lahe,” ibagma Yusufen, ”Allahn ap inindi anggarap eneptukmu eneg aben nei waruk ane alem tu fahet wehep ulug hiyag isa reg. Ari fahet nei wehep ane hiyag nemek!” ibag.

9Ibagma ik hinang utuk ahun inowen hiyag utuk lit, ”Anden nei og harukmen hele anggur alem norohole fil wilibigmu yet hihi. 10Anggur alem ino fam inggik hinahan tegma inggila wilip atuk lit owil turukmu anggen yihik lahasa. 11Ari turukmu nikni ap suwonen ik naruk anggubag ninggikmu weregma anggen ino tahanihireg ahaluwe pete roho kubag ino fam pilabe fihireg nikniyen namisi ulug og irihi,” ulug hiyag itfag.

12Hiyag itfagma Yusuf inowen ele uruk lit, ”Alem tu fahet wehen ulug hiyag hitmin: Anggur inggik hinahan itano hup hinahanam fahet hehen. 13Hup hinahanam welaruhunmu ap suwon inowen hat o tuwen wilip habuhureg lahap habuhumu tam ik hinang utuk latikin hag toho hinang utuk laruhun. 14Hat wilip aruhunteg fano wereg lit an oho o aruwen seleg toho wilip aruhuken wenggel niyahunteg hikni ap suwon ino fam an welahi ane fahet hiyag uruhun. 15Indam an nibam Ibrani inap wereg ambeg weregman hirag naptusama Mesir kinangma tuman oho siyag ane tirikik fug angge famen o aru kilap naptusama welahi,” ibag.

16Ari ibagma roti wirag utuk ahun inowen hol hibareg nare fam fano ane ehekma anden oho nei wihiyon hiyag itmin pibareg Yusuf hiyag utuk lit, ”Anden nei wihi ane oho ari hag toho wihi. Anden nei og harukmen roti wirahowon kou hinahan fam kilaboho nunggulmu ha roho warukmu hihi. 17Kou hinahanehon palimu wihiyon ino fam wiraho angge winon-winon nikni fahet kilaboho walug lamin ulug turukmen suwe wahasareg wiraho angge arimano nenggesa,” ulug hiyag itfag.

18Hiyag itfagma Yusuf inowen ele uruk lit, ”Alem tu fahet wehen ulug hiyag hitmin: Kou hinahan itano hup hinahanam fahet hehen. 19Hup hinahanam welaruhunmu ap suwon inowen hat o tuwen wilip habuhureg e fam lahap habuhureg hele fam ililoho song hubahakumu suwe wamuhupteg hunu wisal heheg nahup,” ulug hiyag itfag.

20Hiyag itfagma hup hinahanam welatfareg ap suwonen indag napfag sali horog ahama seni esetmin ulug otsi obog toho wol enepfag. Wol enepfareg ik hinang nutuk latisi ahun men roti wirag nutuk latisi ahun men penjara famen wilip enebik lalihip ulug hiyag isibagma it piren itano hondog eneplug ap suwon otsi luhaloho weregma watfag. 21Watfagma ap suwon inowen ap misig ino fam hiyag utuk lit, ”Atam ik hinang nutuk latikin hag toho hinang nutuk laruhunen lahap haptuk lahi,” ibag. 22Ibareg, ”Roti wirag nutuk latisi ahun aru war amag ulug e fam song tibisik lahalihip,” ulug hiyag isibag. Tibag ane ari obog toho Yusufen tam hiyag isibahon hikit toho tibag angge famen 23ap suwon ik hinang utuk latfag ahun inowen Yusufen hiyag itfag ane ino mondabi apeleg atfag.

Currently Selected:

KEJADIAN 40: YLI

Highlight

Copy