KEJADIAN 39

Yusuf men Potifar uhe men fahet ibag ane

1Ismael inaben Yusuf ino o Mesir walug libareg hun Potifar og itfagma aren onggo og isibag. Hun Potifar ino Mesir inap inikni foroho latfag inap sehen senehon onowe welatfag. 2#Kis 7:9Yusuf ino ikni Mesir ahun ino men weregma Ninikni Allahn let turuken yabuk fano roho wiri feruk latfag. 3Ikni Potifar inowen yet harukmen Ikni Allahn malik aru let turukmu yabuk hiyag utuk lahiyon obog toho fano roho wituk ulug pen haruk latfag. 4Ari roho turukmu yet hibareg Potifar inowen Yusuf fahet indi haruk lit hat eneg an niraham wereg lit let naptuk laruhun ulug hiyag itfag. Nin eke hiyag utuk lit, ”An nibam werehon men nanggengge obog toho haren hale feruk laruhun,” ulug unduhuk fibag. 5Unduhuk fibareg weregma Ninikni Allahn Yusuf fam wenggel haruk lit Potifar ibam ino fanowap turukmu hun inowen tohon olma werehonet selma werehonet obog toho fano roho teko laruk latfag. 6Mun angge man angge aren tohon arimano Yusuf inggikmu imbibareg at inggarehen nungge-nungge hal ha fug angge we narukon fahet eneg wenggel haruk latfag.

Yusuf ino ebe mondabi fano reg latfag. 7Welatfareg Potifar uhe inowen Yusuf yet haruk lit indi wat taruk latfareg, ”An hat men nohulen ma,” ibag. 8Ibagma Yusufen nirim ulug ele uruk lit, ”Nisinga, nikni Potifar inowen mun angge man angge aren tohon o tu werehon haren foroho laruhun ulug hiyag nitisireg inggarehen nungge-nungge hal haruk eleg. 9Nikniyen mun ane man ane fahet hiyag isarukmu holtuk hag toho anden oho hiyag isarukmu holuk teg. Mun angge man angge obog toho an ninggikmu emberisi angge famen nisinga, hat nikni uhe welahen angge re hat fahet nikniyen hiyag nitisi fug. Hiyag nitisi fugmu nangginoho anden siyag ane haren ehenon turuk lit Allah indi siyahap timin?” ulug hiyag itfag. 10Hiyag itfareg weregma hiyap inowen likiya hupmu Yusuf puhula ruruk latfag angge famen Yusufen nirim ulug holtuk latfag fug.

11O misihim sambil amingmingangge misig oho elegma Yusuf amu eneg nungge-nungge halmin ulug olma kibag. 12Kibareg turukmen Potifar uhe inowen Yusuf asum wan teg latfahon ebe men mangno roho senetfareg, ”An men nohulen ma!” ibagma Yusuf inowen nirim ulug hiyap ino miyaloho hik isalug wilip atukmen asum hiyap ino inggikmu embeselug libag. 13Asum embeselug libagma yet teg latfareg 14hiyap inowen amingmingangge wol enepfareg hiyag isaruk lit, ”Numalikisi, an nahunen Ibrani ahun o tu kilabik waharisimu nenele ying neneptuk. At ino an nohoruk ambeg kehekteg an men nohomin ulug turukmen an nele hum toho urukmu 15holehekteg akolen wilip atuk lit asum embeselug lahayon tu yet hemek!” ulug hiyag isibag.

16Hiyag isibareg hiyap inowen sum ino foroho lit weregma ahun ibam watfagma 17amingmingangge fam ibag ane hikit toho ahun fam oho hiyag utuk lit, ”Hamingmingangge Ibrani ahun haren o tu kilabik waharikinon ino an nohoruk ambeg kehekteg nele ying napmin ulug turukmen 18anden nele hum toho ihimu akolen wilip atuk lit asum embeselug lahayon tu,” ulug hiyag itfag.

19Hiyag itfagma Potifar inowen hol hibareg olok anggolo haruk lit 20Yusuf ino senetfareg penjara ap ininggik hele waroho kilap eneptuk ambeg Mesir inap inikniyen tohon ino fam kila fisibag. 21Kila fisibagma Ninikni Allahn Yusuf let turukmu penjara foroho ahun inowen Yusuf fahet indi haruk latfag. 22Indi haruk lit ap winon hele waroho kilap enesuhon arimano haren kim isaruk lit nungge-nungge penjara fam werehon haltuk laruhun ulug hiyag itfag. 23Hiyag itfareg yet harukmen Yusuf ino Ikni Allahn let turukmu yabuk aren turukon obog toho fano teko larukon yet hibareg Yusuf inggikmu yabuk imbibahon arimano hebeloho kim ha laruk latfag fug.

Currently Selected:

KEJADIAN 39: YLI

Highlight

Copy