MATIU 8

I Yehu na-pamàlaru-ya na haàtu tau mahidu manula pa-mayitangu

(Mrk. 1:40-45; Luk. 5:12-16)

1Ba napuru-ka i Yehu welingu la tandula, dangu tau makiku-nya. 2Ka tàka-nanyaka na haàtu na tau na mahidu manula pa-mayitangu.#mahidu ... pa-mayitangu: Pa-namatu-nya na kalaratu Yahundi na hidu tungu nu hangia pabetangu-ya hi nda ràkana na tau mahidu tungu nu la palumu-nya i Miri Ala la ngia pa-lumungu. (Tàngaru-ya la kalokatu hilu). Hi na patika la hanggana i Yehu, hi napanii, “Miri, jàka umbuhangu, peku-mana dumu bau pamàlaru-ka,” wànanya.

3I Yehu naràma-ya nuna na tau ba dàngu paniina, “Ku-mbuhangu, màlaru-wa,” hi wànanya. Ndedi mbàdiku-na munangu-madua-nanyaka na hiduna. 4Hàla panii-nanyaka i Yehu, “Namuya! Àmbu panii-duya ka lai nggamu-yakadu. Na nyuna luawa la ratu, kau karaiya ma-màndungu ba tuba màlaru-muka. Hàla nu kau ngàndi kameti maraku na hupu liina i Muha, tandana la tau dangu ba màlaru langatàka-munyaka,” wànanya.

I Yehu ba na-pamàlaru-ya na atana na parawira Roma

(Luk. 7:1-10)

5Ba natama-ka i Yehu la Kapinaumu, na haàtu na parawira Roma namai tomaya nyuna, hi nakarai-ya pa-ndulangu. 6“Miri, hidu-nanya na tau ma-hadangu la uma. Na-katuda-padua ba kaliparu-nanya, lalu mbana mayila-ya,” wàna.

7Napaya i Yehu, “Napa kulua papamàlaruya,” wànanya.

8Nahema na parawira, “Jàmangu-ka duna Miri. Nda ràka-anggu duku Miri bau tamangga umanggu. Wuangu bia pareta. Napa na-màlaru-ma duku na atanggu. 9Nadu nyungga ba ku-patundungu-mai duku la mangia ditangga. Dàngu la wawanggu nyungga ninja da panjuri da ma-patundu-nya na pareta-nggu. Jàka ku-paràha-nya na haàtu na panjuri, ‘Lua!’ jàka wànggunya, lua-mana-nyaka duna. Tàka na haàtu, ‘Mai yiahu-kau!’ jàka wànggunya, nàmu-manyaka duna; dàngu jàka ku-paràha-nya na atanggu, ‘Ràmaya yiana!’ jàka wànggunya, ràma-mana-nyaka duna,” wàna.

10Nu i Yehu ba narongu-yaka na paniina na parawira, na-maratangu-nya. Hi napanii-nja da tau da matundu-nya, “Kanjupu-duya na tau yiana. La honga tau Ihirailu ndedimbu ku-hunggungu mabokulu pawai tuna yia!” wànanja. 11“Langatàka! Nadangu napa na tau welingu la pahunga dàngu la patama lodu mamai pa-hawola dànja i Ambarahàmu, i Ihàku dàngu i Yakupu la Pinu Tana Bidina i Ala.

12Tàka pàku na tau na manjadi banjaru-na i Ala làti pa-wàrungu-ha napa hu lua la kapàtangu la hambeli. Lai nu napa hii-danyaka, mayila-danyaka,” wànanja. 13Hàla i Yehu hi napanii-nya na parawira, “Beliwa dumu, jàka jia-yaka na pakarai-mu wàngu pawaimu napa na-padeningu-ma,” wànanya.

Tàka jia-ma-aya la rehi nuna ba na-màlaru na atana.

I Yehu ba na-pamàlaru tau dangu

(Mrk. 1:29-34; Luk. 4:38-41)

14I Yehu nalua la umana i Peturu. Lai nu naita-ya na ina yerana i Peturu ba pariti-nanya la ngia pa-katuda. 15I Yehu nadàma-ya na limana, hi munangu-ma-ananya na pariti-na. Ka hadangu-nanyaka hi nainga-ya i Yehu.

16Ba na-malingu-ka nadangu na tau pa-huruku wàndi akatu da pangàndi tau lai Yehu. Nawàngu papanii handa - ndàkangu-a i Yehu ba nawàngga-ha da wàndi akatu dàngu na-pahàmu-mbuha da tau mahidu mbuu ndàbada. 17Nawunda-ha nuda mbuu ndàbada paraïna i Yehu, nu ba tuna nu hàrangu-nanyaka na papanii-na i wunangu Yahaya, “Nyuna na matanggu-nja da mayilanda dàngu hi na-pamàlaru-ha da mahidu-nda,” ba wàna.

Na tau na ma-mbuhangu pakiku-nya i Yehu

(Luk. 9:57-62)

18Dira danguya na tau la winggiru-na i Yehu. Ba naita-haka nyuda mbuu ndàbada, i Yehu na-paràha-nja da tau makiku-nya papala la hapapa tàma. 19Hàlaka na haàtu na ngguru anggama namai tomaya hi napanii, “Umbu Ngguru, ka kutundu-nya Nyuna wànggunggau jiapa nda nggi mu-hanggangu ningu,” wànanya.

20Nahema i Yehu, “Da ahu rumba ningu kubu liangu-da, dàngu da ma-hawurungu-mbu ningu hibuda, tàka na Ana Tau nda ningua ngia pa-tanggilingu-na,” wànanya.

21Hàla na haàtu na makiku-nya napanii, “Umbu Ngguru, puli pàkungga làti ka kubeli patani-nya na amanggu,” wànanya.

22Tàka nahema i Yehu, “Tundungga, màtanya na tau meti ka natani wikinya na anguna na mameti,” hi wànanya!

I Yehu ba na-pakamàndalu-ya na ngilu mbangatu

(Mrk. 4:35-41; Luk. 8:22-25)

23I Yehu nahei la tena dàngu da makiku-nya karia-mada. 24Hi jia tungu biana na ngilu mbangatu manda najaru na ma-làndahu-nya na tàma hi na-nàhaku-ya ngalingu na tena. La rehi nu i Yehu mahuru-nanya. 25Ka lua-danyaka da makiku-nya i Yehu hi dabengi-nya, “Umbu! Pa-ndulangu! Hanggàmaru-ndanyaka!” wàdanya.

26“Ka nggikina hi mi-mangàdatu? Ka ndai waimaka Nyungga?” wànanja. Tunaka nu hadangu-nanyaka i Yehu hi nakayàmbakunya na ngilu dàngu na tàma. Ka mandangu hàmu-nanyaka na tàma.

27Hangàtaru-danyaka da makiku-nya. “Nggàra tau-yaka yiana yia, jiapa na ngilu dàngu na ngalingu datundu-mbunya na pareta-na!” wàda.

I Yehu ba na-pamàlaru-ha da tau madua da pa-huruku wàndi akatu

(Mrk. 5:1-20; Luk. 8:26-39)

28Ka tàka-nanyaka i Yehu la hapapa tàma la ngaba Nggandara. Lai nu ninja tau madua-ha da pa-huruku wàndi akatu da ma-ndàharungu lai Nyuna. Nuda da tau madua lalu mbana kabularu-ha, hi lupa nda haàtu matoru mbeni pali ningu lai nu. 29Nyuda daluhu welingu la kubu reti ba dàngu warada, “Ou! Ana Ala! Nggikina wàmu-nggamaka nu? Ka pa-mayila-ha wàmuka nu dàngu ndedi jiaya na rehina?” wàda.

30Nda nggi tuna marauna welingu lai nu, ninja da wei da madira danguha da mahimbu pangangu lai nu. 31Da wàndi akatu dakarai lai Yehu, “Paràha-nja paluhu jàka wàmu-nggama, pahia-nggama làti ka matama la wei kabàba nida,” wàdanya.

32“Luawa,” hi wàna i Yehu. Ka luhu-danyaka da wàndi akatu welingu la tau madua nuda hi datama la wei kabàba. Nuda da wei palai-danyaka hi da-libungu wikida la ngambangu la karaha tàma, ka mumuhu-danyaka.

33Da tau ma-pawangu wei palai-danyaka la paraingu, hi dapanii hàlaya nuna na matumbu, dàngumbu rukuda da tau madua da pa-huruku wàndi akatu. 34Ka lua ndàba-danyaka da tau la paraingu nuna pa-tàbuku-ya i Yehu. Ba daita-yaka i Yehu, karai pa-mbanangu-danyaka ka na-dunjaku-nya na ngaba tanada nyuda.

Currently Selected:

MATIU 8: KAM

Highlight

Copy