MATIU 7
7
Rukuna na pa-tandangu ngera tau hawiangu
(Luk. 6:37-38, 41-42)
1“Àmbi patanda-nya ngera na angumi patau, nyimi wiki ka àmbu na-patanda-nggai ngera paraïna i Ala. 2Nadu hama tuna bai patanda-nya ngera na angumi patau, napa tuna numai ba na-patanda-nggai ngera i Ala. Na hukutu na pa-hukutu wàminya na tau hawiangu, tuna numai napa i Ala ba na-hukutu wànggai. 3Nggikina hi mipanau niya na kanjibi ai la matana na angumi, tàka na patengangu la mata wikimi nyimi hi ndai pàdanyai? 4Nggikina hi mitoru mbeni bia papanii la angumi, ‘Màla ka kuàli-nya na kanjibi ai la matamu,’ hi wàminya tàka la mata wikimi hi ninya-padua na patengangu? 5Ha ma-kapelu! Àli pàkunya bàdi na patengangu la mata wikimi, hinaka duna hi miita hàmuya, hi peku àli-minya na kanjibi ai la mata angumi.
6Àmbi wua-dunja da ma-matua da ahu napa da-pambelingu-du panyàba-kai. Dàngu àmbi ndauha-dunja mutiara da wei, ka àmbu dakali - lijaku-nja nu da mutiara,” wàna.
Karai, himbu, dàngu katòrukungu
(Luk. 11:9-13)
7“Karai-wa, napa ingalangu. Himbuwa, napa ihunggungu. Katòrukungu-wa, napa na pindu pa-bunggahu-manggai. 8Nadu na tau na makarai napa na-ngalangu; na tau na mahimbu napa na-hunggungu; dàngu na tau na ma-katòrukungu, napa pa-bunggahu-nya pindu. 9La hongami nyimi ningu nu ama mawua-nya watu na anana jàka na-karai-ya roti? 10Jàka ndia ka nawua-nya ularu jàka na-karai-ya iyangu? 11Jiapa kai akatu-kai, mipingu-mai dimi nyimi pawua-nja mahàmu da anami. Ka narihi-aipa duna na Amami la awangu! Narihi-pa duna napa pawua-nya mahàmu na tau na makarai-ya.
12Pa-luangu-wa limami la tau hawiangu hama tuna na parinju-mi ka tuna-nggama nu tau ba da-palua-nggama lima ba wàmi. Ka ba jia-duyaka na ihi mbàngi-na na ukuna i Muha dàngu na lii pa-ajaru-da da wunangu dangu,” wàna.
Na pindu kujuru
(Luk. 13:24)
13“Tama li ninguwa la pindu ma-kujuru, nadu ba na-bokulu na pindu dàngu ba na-lerangu na ànda na ma-hanggangu la naraka, nadangu na tau na mali ningu lai nu. 14Tàka na-kujuru na pindu dàngu naharui na ànda na ma-hanggangu la luri. Dàngu hawutu-ana na tau na mahunggu-ya,” wàna.
Na pingi ai dàngu wuana
(Luk. 6:43-44)
15“Pa-nanjarungu hangganja da wunangu kabàli. Da matàka-nggai ba da-pahada mbimbingu, tàka na ma-langatàka nyuda da-pabohu ahu rumbangu. 16Napa nyimi mitandaha la paraï paruku-da. Da lulu rii paketu nda datua wua angguru dàngu da pingi rii madàka nda datua wua kapilitu. 17Welingu la pingi ai kamboka ta-ngalangu wua mahàmu, tàka welingu la pingi ai nda kamboka ta-ngalangu wua manda hàmu. 18Da pingi ai kamboka nda datua wua manda hàmu, tàka da pingi ai nda kamboka nda datua wuada mahàmu. 19Nimbihu-da da pingi ai da manda tu wuada punggu biaha ka tunuha. 20Tuda nu da wunangu kabàli. Nyimi napa mitanda-ha la ruku ràmada,” wàna.
Na paruku nda jia-aya na panii
(Luk. 13:25-27)
21“Nda mbuu ndàba-ana na mawara-ngga, ‘Miri, Miri,’ na mawàna, na matama la angu banjaru-na i Ala, tàka mbulungu-ana na tau na malaku-nya na pambuha-na na Amanggu la awangu. 22La Lodu Hupu njàpuna napa nadangu na tau na mapanii lai Nyungga, ‘Miri, Miri, ka nda jiaya na tamumu Nyumua làti ba ma-bobaru wànya na puluna i Ala? Dàngu ka nda jiaya na tamumu Nyumua làti ba mawàngga-ha da wàndi akatu dàngu ba ma-patumbu-ha da tanda pa-hangàtarungu? wàdangga. 23Tàka napa Nyungga kuhema-ha, Nda kuwàngu patanda-makai duku. Pa-yilangu-kai weli yiahungu, nyimi tau mawunda akatu’, hi wànggunja,” wàna.
Na mapingu pawulu uma dàngu na manduba pawulu uma
(Luk. 6:47-49)
24“Na, na tau na marongu-ya yiana na paniinggu, ka natundu-nya, hama-naka na tau na mapingu pa-pahadangu umana la pinu watu. 25Ba napuru-ka na urangu, dàngu ba na-tàkaka na iwa hamanai na ngilu mbangatu na ma-làndahu-nya nuna na uma, nda nanjoru-a, nadu ba pawulu la pinu watuya.
26Tàka na tau na marongu-ya na paniinggu yiana, tàka nda natundu-nya, hama-naka na tau na manduba na ma-pahadangu umana la pinu wara. 27Ba napuru-ka na urangu, dàngu ba natàka-ka na iwa hamanai na ngilu mbangatu na ma-làndahu-nya nuna na uma, ka njoru-nanyaka. Kanjupu ruha halawàla-ya,” wàna.
Na kuaha-na i Yehu
28Ka njàpu-nanyaka na-ajaru-naha i Yehu, na tauka na maninya lai nu hangàtaru nda uku-danya ba darongu-ya na lii pa-ajaru-na. 29Nadu ba lii pa-ajaru pa-mahumbarungu-ya, nda hama tuda da lii pa-ajaru-da da ngguru anggama-da.
Currently Selected:
MATIU 7: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
