MATIU 5
5
Na pa-bobarungu la palindi
1Ba naita-yaka i Yehu na tau ba nadangu tuna nu, heina-nyaka la hau tandula. Ba na-mandapu-ka, mai-danyaka lai Nyuna da makiku-nya, 2hi na-pakiringu pa-ajaru-ha:
Na pa-ohangu na ma-langatàka
(Luk. 6:20-23)
3“Oha-adaka da tau da ma-pàdangu nda màkada, hi jiaya i Miri-makia-ka na pa-kanderu-da;
nyuda jia-haka da nua banjaru-na i Ala!
4Oha-adaka da tau da ma-handuka etida;
i Ala napa na ma-pamanda-nja!
5Oha-adaka da tau da ma-karàda etida;
i Ala napa na patutu-nya na paràndi-na lai nyuda!
6Oha-adaka da tau da ma-rinjungu pawànya na pambuha-na i Ala;
i Ala napa na-pahoda-ha nyuda!
7Oha-adaka da tau da maaï namu anguda;
i Ala napa naaï namuha nyuda!
8Oha-adaka da tau da ma-yahangu etida;
napa nyuda datanda-ya i Ala!
9Oha-adaka da tau da matàka ngàndiya na papeku la tau pinu tana;
napa napeka i Ala ba ana-nanja nyuda!
10Oha-adaka da tau da ma-pàdangu mayila ba pajàra-ha ruku lumu-danya na pambuha-na i Ala;
nyuda jia-haka da nua banjaru-na i Ala!
11Oha-amika nyimi jàka ningu ma-paaka-nggai, ma-pamayila-kai, dàngu ma-pulunggai lumunggu Nyungga. 12Da wunangu da maluri wunganggai nyimi pa-mayila tudanja numai duda. Hanggela hawola-wa, nadu ba na-bokulu na wundami na pa-payema-nanggai la awangu i Miri ndumami nyimi,” wàna.
Na mehi dàngu na harii
(Mrk. 9:50; Luk. 14:34-35)
13“Nyimi mehi pinu tanakai. Na mehi jàka nakàba-ka pekuna-ipa la pahilu pambàruya? Nda ningu-apa linguna, jia la wàru-kia-nyaka hi nakali - lijaku-nya tau.
14Nyimi hambila pinu tanakai. Na paraingu na maninya la pinu tandula nda peku wini-anya. 15Nda ningua tau ma-pakehingu palita tàka hi na-pangguru wànya mbàlu na palita. Jiangu-ma duna ba natuya la tandaina, hi na-hambila ndàbanya na tau na maninya la uma. 16Tuna numbu na hambila-mi màta ka na-handaraku la hangga tau, ka peku ita-danya na paraï rukumu na mahàmu, hi dawotu-nya na Amamu la awangu.”
Na lii pa-ajaru rukuna na uku anggama Yahundi
17“Àmbi kaka-duya ba mai-nggunya pa-podahu-ha da ukuna i Muha dàngu da lii pa-ajaru-da da wuna - wunangu. Nyungga duku nda mai-nggunya pa-podahu-aha, tàka ka paloha-nya na lii kaloka-mada duda wànggu duku. 18Namuya! Ka dàngu ni bia-nyapa na awangu dàngu na tana nda hau hurupu jàka ndia kadutulu makudu halawàla nu la uku, nda pajia podahu-aha, jàka ndedi-madu na-patutungu#jàka ndedi-madu na-patutungu: jàka ndia: jàka ndedi da-hàrangu ndàba da lii pa-pekangu la uku. hàla. 19Jia ba tuna, nggamu mapanggaya na haua welingu la pareta - pareta nuda, jiapa ka makudu halawàla-ya, dàngu ka na-ajaru tau hawiangu la patuna numbu, jia-yaka na ma-màrahu halawàla la honga banjaru-na i Ala. Na panjàngungu-na, nggamu ma-padeni-nja da pareta nuda dàngu ka na-ajaru tau hawiangu la patuna numbu, napa jia-yaka na ma-bokulu la honga banjaru-na i Ala. 20Jia ba tuna, namuya: Nyimi nda napeku-a la patama la banjaru-na i Ala, jàka ndai rihinja da ngguru anggama dàngu da tau Parihi la pa-patutu-nya na pambuha-na i Ala!” wàna.
Na lii panamu hahangu rukuna na mbeni
(Luk. 12:57-59)
21“Nyimi pi-maminya na pa-ajaru-da da bokunda la mangilu: Àmbi pameti tau, nggamu na mapameti tau timbanya bàdi ngerana, wàda. 22Tàka nàhu Nyungga ka kupeka-nggai nggamu mambeni#nggamu mambeni: da pa-haleli ndai da manda pirada: jàka nggamu mambeni nda pa-latangu. -nya na anguna timbanya badi na ngerana; dàngu jàka nggamu ma-tolangu anguna, timbanya bàdi la Bata Bokulu Anggama. Dàngu nggamu, ‘Katoba,’ na mawàna-nya na anguna ràka pa-wàrungu la epi naraka-ya. 23Jia ba tuna, era ningu haàtu la hongami mangàndi maraku lai Ala, tàka hi jia namu bia-nanya ba ninyapa na haàtu na makaraü-nya eti, 24màta ka na-dunjaku pàkunya na pangàndi-na la hangga ngia pawotu maraku, ka nalua pàku pa-pahàmu dànya na tau nuna. Hàla duna, peku-naka ba nabeli pawotu-ya na tanda maraku-na lai Ala.
25Ngera hama tuna ka ningu tau makàla-kai la batangu, papeku pàku dàngu nyuna ba ningupa pekuna ba ndedi natàka la batangu. Jàka ndia, pajàma-nanggaika na tau nuna la hakimu, tàka nyuna hi na-pajàma-nggai la palihi. Hàla napa na palihi patama-nanggaika la uma kapàtangu. 26Dàngu namuya: Napa nda peku luhu-amipa welingu la uma kapàtangu, jàka ndedi-madu ikanjupu hàlaha da palohu-mi,” wàna.
Rukuna na njuraku
27“Nyimi mipi-manyaka yiana na lii pa-ajaru: Àmbu njuraku, ba wàna. 28Tàka nàhu kupeka-nggai: nggamu ma-panau-ya na haàtu na kawini ba dàngu kabàliku-nanya ba miniya, mbàda njuraku dàmana-nyaka nuna na kawini daa la etina. 29Jàka na mata kawana-mu na ma-titiru-kau la panjala, rukiya kau wàrunya na mata nuna! Nahàmu-pa ba na-mbulangu na hangia na nua ihimu welingu ba dàngu mbulungu-na na ihimu ba wàrunggau la naraka. 30Jàka na lima kawana-mu na ma-titiru-kau la panjala, kadipu-ya wàrunya nu na limamu! Nahàmu-pa ba na-mbulangu na hapungu na limamu welingu ba dàngu mbulungu-na na ihimu bau tama la naraka.
Rukuna na pahewa
(Mat. 19:9; Mrk. 10:11-12; Luk. 16:18)
31“Nimbunyai na lii pa-ajaru: nimbihu-na na tau na ma-pahewa dàngu papaha-na, nawua-nya bàdi huratu pahewa, wàna. 32Tàka nàhu Nyungga ka kupeka-nggai: nggamu na ma-pahewa dànya na papaha-na, dàngu nda hanjàliru-na nuna na tau kawini, pakiri njuraku wàngu-dunaka na papaha-na, jàka nahili mangoma nuna na papaha-na. Dàngu jàka nggamu na ma-kanoma-ya nuna na kawini pa-pahewangu, njuraku-mbunanya.”
Rukuna na harangu
33“Nyimi mipi-manyaka la boku la mangilu-nda ba ninya na lii pa-ajaru-da: Àmbu hinggilu-nya na paràndi-mu. Nggàraya na pambàda ràndi wàmu harangu la hanggana i Ala, patutu-manya bàdi,” ba wàda. 34Tàka Nyungga nàhu ka kupeka-nggai: Àmbi harangu ndokudu, àmbi hara wànya na awangu, ba kanjàka-na i Alaya, 35hamangui wànya na tanambu, ba lata wihi-nanya; jàka ndia wànya la Yeruhali, ba parai Hanganji bokulu-ya. 36Màtangu-mbu pahara wànya na katiku-mu, nadu nyumu wiki ba ndau ngalangu-a pa-pabara-ya jàka ndia pa-pamiti-nya na hawàla na ruu lunggimu. 37‘A-a,’ wàmu bia, jàka ndia, ‘ndia-a,’ wàmu bia. Na marihi-nya nuna ma-pawelingu lai ma-akatu-ya.”
Rukuna la patungu hilu kiringu
(Luk. 6:29-30)
38“Nyimi mipinya ba nimbunya na lii pa-ajaru: Mata hilu mata, ngàndu hilu ngàndu, na mawàna. 39Tàka nàhu Nyungga ka kupeka-nggai: àmbi tungudu hilu kiringu la matunggai ma-akatu. Tàka na pa-njàngangu-na jàka natàba-ya na papu kawana-mu, màta kau pajàma-mbunya na papu kalaimu. 40Dàngu jàka nakàla-kai tau la hakimu, ka na-karuhi-ya na kalembi-mu, wua-mbunya na kalembi bokulu-mu. 41Jàka ningu mangia dita ma-pambana-kau paduku-ha da ngàndina ràka pa-lakungu hau kilu, duku pangala-manja lundu dua kilu. 42Jàka ningu makarai-kau ngga - nggàra, wua-manya. Dàngu àmbu tipa-duya na tau na makarai pinjangu ngga - nggàra lai nyumu.”
Aï namuya na papa
(Luk. 6:27-28, 32-36)
43“Nyimi mipi-manya ba ningumbu lii pa-ajaru: namuha da angumu dàngu karaü-nja eti da papamu, ba wàna. 44Tàka nàhu Nyungga ka kupeka-nggai: namuha da papami, dàngu hamaya-nja ndumada da tau da ma-pamayila-kai, 45ka pekuna ba naana-nggai na Amami la awangu. Nadu i Ala ba na-pahunga-nya mata lodu ndumana na tau hàmu dàngu na tau akatu-mbu. Nyuna na-papuru-nya urangu na tau na mawunda ma-padeningu dàngu na mawunda ma-akatu-mbu. 46Nadu jàka jiaya na tau na manamu-akai na panamu-mi, nggàra linguna-ipa i Ala hi na-papapa-ya na paraï rukumu? Ka nda tuda numbu wàmi da ma-pahurungu hilu katiku? 47Dàngu nyimi jàka mi-kamàhaku dànja da angu-ami, nggàra-yaka na ngia parihi-mi? Da tau da manda tandaya i Ala tuda numbu. 48Na Amami la awangu nda ningua nyurana nahàmu-nanya mbuu ndàbana na tauka. Nyimi dimi ka timi numbu,” wàna.
Currently Selected:
MATIU 5: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
