MATIU 4

I Miri Yehu ba kamanya

(Mrk. 1:12-13; Luk. 4:1-13)

1Tunaka nu i Yehu iru ngàndi-nanyaka Ngahuna i Ala la maràda telangu ka nakama-nya paraïna i Kambàliku. 2Patu kambulu lodu patu kambulu ruduna i Yehu ba nda nangangu. Ka manjuu-nanyaka. 3Mai-nanyaka i Kambàliku hi napanii, “Nyumu Ana Alakau wàngguka? Paràha-nja yia da watu ka dadedi roti”, wànanya.

4Napaya i Yehu, “La Huratu Matua ninya na pa-tulihu: Na tau nda roti pàku paluri wàna, tàka jia-mbuya welingu la nimbihu-na na pulungu na patiki-na i Ala,” wànanya.

5Hàlaka nu i Kambàliku nangàndi-ya i Yehu la Yeruhali, na parai matua, hi nabànjalu-ya dita la kawuku Umana i Miri. 6Hàla i Kambàliku hi napanii dànya, “Nyumu Ana Alakau, wàngguka? Jàka tuna nu kamburu mbehangu-wa hu waa; nadu daa la Huratu Matua ninya na pa-tulihu,

‘I Ala napa na-paràha-nja da papalewa-na la pamangga-nggau Nyumu,

nyuda napa danggepi-kau la limada,

hi nda peku tunjuru-da da wihimu la watu’, wàna,” hi wànanya.

7Nanapa-ya i Yehu, “Tàka nimbunyai daa la Huratu Matua na pa-tulihu: Àmbu kama-dunya na Miri Alamu, ba wàna,” hi wànanya.

8Tunaka nu i Kambàliku hi nahili ngàndiya i Yehu la palindi ma-kanjupu jangga hi na-paita hàlanja da pa-hanganji la pinu tana dàngu mbuu ndàbada da pawulu-naka. 9Hàla panii-nanyaka i Kambàliku, “Yiada-ka mbuu ndàbada ku-wuanggau-nja Nyumu, mili kau patika bau maraku-ngga,” wànanya.

10Nanapa-ya i Yehu, “Pahilangu hiana-kau, ha Ma-pakamangu! Daa la Huratu Matua ninya na pa-tulihu: Maraku-nya i Miri, Alamu, dàngu lumunya nyuna-a, wàna”, hi wànanya.

11La malamiri i Kambàliku dunjaku-nanyaka i Yehu, ka tàka-danyaka da papalewa la palumu-nya Nyuna.

I Miri Yehu ba kawunga ràmana la Nggalilia

(Mrk. 1:14-15; Luk. 4:14-15)

12Ba narongu-yaka ba patama-nya la uma kapàtangu i Yuhani, hinggilu-nanyaka i Yehu la Nggalilia. 13Na-dunjaku-nya la Naharitu, hi na-paengangu la Kapinaumu la halinggi Tàma Nggalilia la ngaba Hembulungu dàngu Nàputali. 14Ba nalaku-nyaka na matuna nu Nyuna i Yehu, pa-deningu-nanyaka na paniina i Wunangu Yahaya:

15“Na tana Hembulungu dàngu tana Nàputali,

la ngarangia hanggangu la tàma, la hapapa Luku Yorundangu,

la tana Nggalilia pangia tau nda Yahundi!

16Na banjaru na maluri la kapàtangu

da-itangu-ka harii ma-hanggilangu!

Ndumada nyuda da ma-ngiangu la kapàta meti

nahunga-njaka ma-handaraku hambila!” ba wàna.

17Piti welingu la rehi nu pa-kiringu-nanyaka i Yehu pa-pabobarungu, “Panjilungu-wa! welingu la njalami, nadu i Ala ba pareta-ama-naka ba Hanganji-ya!” wàna.

I Miri Yehu ba napaau-nja da mini jala tau mapatu

(Mrk. 1:16-20; Luk. 5:1-11)

18Ba talànga njàlapu-na i Yehu la hingi wara Tàma Nggalilia, naita-ha da mini jala tau madua, i Himungu (i Peturu ba wàda-mbunya tamuna) dàngu na erina i Andaria. Nyuda yàpada-padua iyangu lai nu la tàma wàngu jala. 19I Yehu napanii dànja nyuda, “Mai kai tundungga. Napa ka ku-ajaru-kai la pajala tau,” wànanja. 20Manyamalu dunjaku-madua-danjaka da jalada hi datundu-nya i Yehu.

21Laku pa-ngalangu-nanyaka i Yehu, hi naita-ha da tau madua da habanjaru da ma-paangu paluhu i Yakombu dàngu i Yuhani, anana i Hambandiu. Da-pambapa dànya na amada pa-pahulungu jala daa la tena. I Yehu napaau-nja nyudambu, 22ka manyamalu dunjaku-madua-danyaka na tena dàngu na amada, hi datundu-nya i Yehu.

I Yehu ba na-ajaru, ba na-pabobarungu dàngu ba na-pamàlaru tau

(Luk. 6:17-19)

23La Nggalilia, i Yehu na-winggiru hàlanya na tana hi na-ajaru la uma - uma bungguru-da. Na-bobaru-ya na Lii Mànangu, ba pareta-nanyaka napa i Ala. Dàngu na-pamàlaru-mbuha da tau mahidu dàngu da maningu nyurangu. 24Na langu rukuna i Yehu nakada hàla-nyaka la tana Hiria, hi lupa nadangu na tau na mamai lai Nyuna. Nyuda dangàndi-ha da tau ma-pàdangu hidu dàngu handuka hangia - hangia. Da tau da pa-huruku wàndi akatu, da mawutu manu, dàngu da ma-kaliparu, na-pamàlaru ndàbaha paraïna i Yehu. 25Dangu ailulu tau matundu-nya i Yehu la rehi nuna. Ningu mamai welingu la Nggalilia, ningu welingu la Parai Hakambulu, welingu la Yeruhali, la Yundia, dàngu ningumbu mamai welingu la tana la hapapa luku Yorundangu.

Currently Selected:

MATIU 4: KAM

Highlight

Copy