YUHANI 13

Na baha-nanja da wihida da papanau-na i Miri Yehu

1Hau lodu ba ndedi jiaya na Lodu Remi Paha, pi-nanyaka i Yehu, ba jia-yaka na rehi taluru-nanya na pinu tana yiana la pabeli la Amana. Nambuha-nja da tau da pamangu-na la pinu tana, dàngu pa-daingu mbuha-mananja lundu njàpuna. 2Nu ngangu-danya la rudungu i Yehu dàngu da papanau-na. Mbàda runda-nanyaka paraïna i Kambàliku na etina i Yundahu anana i Himungu Ihikariu, la pa-kaleka-nya i Yehu.#i Kambàliku ... la pa-kaleka-nya i Yehu; jàka ndia: Mbàda kawuku-mana-nyaka paraïna i Kambàliku ba jiaya i Yundahu anana i Himungu Ihikariu na ma-kaleka-nya napa i Yehu. 3Napi-manya i Yehu ba mbàda pakata ndàba-nanyaka na kawaha lai Nyuna paraïna Amana. Dàngu napi-mbunya ba welina lai Ala dàngu ba jiangu-ma nabeli-ya lai Ala. 4Tuna nuduka hi na-ndolaku, naàli-nya na kalembi malaina, hi na-borungu hawàla tera podahu. 5Hàlaka nu ràba-nanyaka wai la tobu robu, hi na-pakiringu pabaha-ha da wihida da papanau-na hi na-kanguli wànja tera podahu la boruna. 6Ka tàka-nanyaka lai Himungu Peturu, na mapanii, “Ka ni hi Nyumu-maka Miri, mabaha-ha da wihinggu?” wàna.

7Nanapa-ya i Yehu, “Ndau pianya nàhu na pawunda-nggu, na nyuna upi-manya ngeru,” wànanya.

8Tàka i Peturu, “Màtangu àru Miri, àmbu jia baha langatàka-muhaka da wihinggu,” wànanya i Yehu.

Na nyuna nahema i Yehu, “Jàka nda kubaha-makau nda ningua papuingu-mu lai Nyungga,” wànanya.

9Nanapa-ya i Himungu Peturu, “Jàka tuna nu Miri, àmbu didi biaha da wihinggu da pabaha, baha-mbuha làti da limanggu dàngu na katiku-nggu,” wàna.

10Tàka i Yehu, “Na mambàda ihu, ili ndàba-nanyaka na ihi daana, nda nggàra ihi wàngu-apa la pa-paili-ya; hinggilu-da da wihina,”#La lawiti ndai da manda pirada nda ningua: hinggilu-da da wihina. wànanya i Peturu. “Nyimi yia mbàda ili-mika tàka nda mbuu ndàba-ami,” wànanja. (11Mbàda pi-mana-nyaka i Yehu jàka nggamuya napa na ma-kaleka-nya. Tuna nuduka, “Nyimi yia mbàda ili-mika, tàka nda mbuu ndàba-ami,” hi kiri wànanja.)

12Ba nahàla-ka i Yehu pabaha-ha da wihida, hau beli-nanyaka na kalembi malaina hi na-mandapu beli. Hi napanii-nja, “Ijàngapu-duya nu na pawunda-nggu lai nyimi ni kawai? 13Nyimi, Umbu Ngguru jàka ndia Miri, wàmingga. Tàka ma-tubangu-maya. 14Ba tuna jàka kubaha bidua-hai da wihimi, tàka hi Miri dàngu ngguru pàku dimingga, tuna numbudu bàdi nyimi bai maràngga ngeranya la pabaha wihi dàngga angumi. 15Ku-paita-nggainya nàhu na ngerangu yiana, màtawa hama tuna na pawunda-nggu Nyungga lai nyimi, ka tuna numbu na pawunda-mi nyimi. 16Langatàka ma-padeningu-maya yiana na paniinggu: Na haàtu ata nda jia rihi-ananya na mirina, dàngu na haàtu papalewa nda jia rihi-ananya na ma-palewa-ya. 17Jàkai pi ndàba-njaka yiada, oha-amika jàkai wundaha.

18Yiana na paniinggu, nda laa ndàba-nggunggai nyimia. Kupi-manja duku jàka nggamuha da pambàda pindinggu. Na nyuna na pa-tulihu la Huratu Matua, jiangu-ma ba na-hàrangu, nu, ‘Na tau angu ngangunggu, napa na-ndubaku-ka Nyungga,’ ba wàna. 19Ba ndedipa nu nanjadi kupanii haha-nggainya nàhu, màta jàka nanjadi-ka napa, ka peku pawaimi ba jiaka Nyungga-maka na patiki NYUNGGA NINGGA ba wàna. 20Langatàka ma-padeningu-maya yiana na paniinggu: Jàka nggamu mayema-ya na tau papalewa-nggu, yema-nangga Nyunggama. Dàngu jàka nggamu na mayema-ka Nyungga, yema-nanya Nyunama na ma-palewa-ka Nyungga,” wànanja.

Nanyura-nanya na ma-kaleka-nya

(Mat. 26:20-25; Mrk. 14:17-21; Luk. 22:21-23)

21Ba nahàla-ka papanii tuna nu i Yehu, ka mila mumuhu-nanyaka na etina. Hi tuna yia na papeka-na, “Langatàka ma-padeningu-maya yiana na paniinggu: Na haàtu la hongami nyimi napa na-kaleka-ngga Nyungga,” wànanja.

22Ka hangàtaru-danyaka da papanau-na hi da-maràngga pa-tàngaru dàngga anguda ba nda dapinya jàka nggamuya na palana. 23Na pa-panaungu pambuha-na i Yehu na-mandapu papera dànya i Yehu. 24I Himungu Peturu na-kambàdiku-nya nyuna, ka na-paàra-nya i Yehu jàka nggamuya na palana.

25Ka doputu-nanyaka i Yehu paraïna nu na pa-panaungu hi na-paàra-nya, “Nggamuya nu Miri?” wàna.

26Nanapa-ya i Yehu, “Na tau pawua-nggu roti pahàbu-nggu la maku, jia-mayaka,” wànanya. Ka piti-nanyaka ha-kadipu roti i Yehu, hi nahàbu-ya la maku; hi namangu pawua-nya i Yundahu anana i Himungu Ihikariu. 27Ba nakei-kiyaka nu na roti i Yundahu, tama-nanyaka i Kambàliku la etina. Hi napanii-nya paraïna i Yehu, “Parengga-nyawa na pawunda ba wàmu,” wànanya. 28Nda haàtu-a lai nyuda da ma-mandapu pangangu lai nu na ma-jàngapu-ya nggikina i Yehu hi kiri panii tunanya nu i Yundahu. 29Ninja hawiangu lai nyuda, làbu paràha-nanya palua pakei ngga - nggàra nduma remi duna, jàka ndia ka wua-kinja hakudu àmahu da tau mamila wànanya duna, wàda bia – nadu ba jiaya i Yundahudu na matanggu pahàmu-ya na kanai àmahu-da nyuda.

30Nu ba nakei-yaka na roti i Yundahu, ailulu luhu madua-nanyaka. Nu ka rudungu-nanyaka.

Nahupu lii na mabidi

31Ba taliu-naka i Yundahu, panii-nanyaka i Yehu, “Nàhu pa-pamangunju-yaka na Ana Tau, hamana i Ala pa-pamangunju-yaka lai Nyuna. 32Jàka pa-mangunju-yaka i Ala lai Nyuna, na pa-mangunju-mbuya Nyuna paraïna i Ala la wikina. Dàngu nalu pa-mangunju-maya duna paraïna i Ala. 33Ai, da ana-kingguka duku, nda namandai-apa na-ndàdiku danggunggai nyimi. Napa nyimi ihimbuka Nyungga, tàka hama tuna na pambàda panii-nggunja da liku uru Yahundi, jia-mbuya na papanii-nggu lai nyimi; la ngia palaku-nggu Nyungga ndai ngalangu-a nyimi patàka lai nu. 34Kuwua-nggai hupu lii mabidi: Màtawa kai pa-mbuhangu dàngga angumi. Hama tuna Nyungga ba kumbuha-nggai nyimi, ka tuna numbu nyimi bai maràngga pa-mbuhangu. 35Jàkai maràngga pa-mbuhangu, napi ndàbanggai tau ba papanau-nggu Nyungga kai,” wànanja.

Na nyura-nanya na pa-hiningu-na i Peturu

(Mat. 26:31-35; Mrk. 14:27-31; Luk. 22:31-34)

36“Miri, nggii laku ningu-munya Miri?” wàna i Peturu ba na-paàra-nya i Yehu. Nanapa-ya i Yehu, “La ngia palaku-nggu Nyungga, ndau ngalangu-a nàhu pakiku-ngga! Napa ngeru kau mangu pakiku-nggaka,” wànanya.

37“Miri, ka nggikina hi nda pekunggu nàhu pakiku-nggau Miri?” Hili wàna na paàrangu-na i Peturu. “Ka meti lumunya i Miri wàngguma duku Miri!” wàna.

38Nanapa-ya i Yehu, “Langatàka-ma nu ka kumeti lumunya i Miri ba wàmungga? Langatàka-ma ka kupeka-nggau, ba ndedi da-hakuku taï da manu mbàda pandailu wundangu-muka papanii ba ndau tandaka Nyungga,” wànanya.

Currently Selected:

YUHANI 13: KAM

Highlight

Copy