DEDI 35

I Yakupu dàngu juruna ba dalua la Mbetilu

1Na hau na lodu i Ala napanii-nya i Yakupu, “Nyungga-maka Ala na ma-paitangu wikina lai nyumu ba jiaya na palaimu welingu la ayamu i Ehaü. Laku pa-renggangu la Mbetilu. Ndàdiku-wa lai nu dàngu kau pa-hadangu hau ngia pawotu maraku ndumanggu,” wànanya.

2-3Ka panii dana-njaka i Yakupu da ihi umana dàngu mbuu ndàbada da tau da anguna nyuna, “Napa ta-hadangu welingu yiahu hi talaku la Mbetilu. Lai nu nyungga pahadangu-nggunyaka hau ngia pawotu maraku ndumana i Ala, na mambàda ndulaka ba talànga ningga la handuka dàngu na mamangga-ngga jiapa nda ngginika ba kulaku ningu. Jia ba tuna wàru-njawa da kahala hada marapu hangàdangu da maninja lai nyimi; paloku-yawa na lii pa-yahangu wiki dàngu kai wotu pakimi ma-yahangu,” wànanja. 4Ka wua-danyaka i Yakupu mbuu ndàbada da kahala hada marapu hangàdangu da maninja lai nyuda hamanai da pula-mbuda. Mbuu ndabàda nuda da malanja natani-nja paraïna i Yakupu la lumbu ai bokulu la lihi paraingu Hikimu.

5La rehi hadangu-na i Yakupu dàngu na juru kalembi-na, i Ala na-pamaradapu-ya nggubulu-na na mangia-nja da paraingu weli winggiru-na, tuna-nuduka hi nda dakeha-nya i Yakupu dàngu na juruna. 6Ka tàka-danyaka la paraingu Mbetilu la tana Kanaàngu, àmangu la Luhu ba wàdanya. 7Lai nu i Yakupu na-pandolaku hau ngia pawotu maraku hi natunya tamuna lai nu “Eli-Mbetilu” wànanya, nu hi wàna ka ba lai nudu ba na-paitangu wikina i Ala lai nyuna ba jiaya na palaina welingu la ayana. 8Lai numbu i Ndembora, na ina kabidangu-na i Ripuka nameti ningu hi taninya la lumbu ai bokulu la mbara luru paraingu. Nunaya na pakiri-na na pingi ai nuna “Pingi Ai Hii” hi wadànya.

I Ala ba na-pakanyuru-nya i Yakupu la Mbetilu

9Ba nabeli-ka i Yakupu welingu la Mahupatamia, nahili pa-itangu wikina Ala lai nyuna hi na-pakanyuru-nya. 10Napanii i Ala lai nyuna, “Nyumu nda hili Yakupu-akaupa, tàka Ihirailu-kauka,” wànanya. Tuna nu i Ala ba natunya tamuna, Ihirailu ba wànanya. 11Ka hili panii-nanyaka i Ala, “Nyungga-maka Ala Mahupu-mbiha. Màtawa kau paana umbukungu pada - dangu! Nyumu napa jiakau ngia pawelina na banjaru danguka dàngu boku la mangilu-da da hanganji dangukau. 12Na tana na pambàda wua-nggunya i Ambarahàmu dàngu i Ihàku napa ku-pakata-nggaunya nyumu dàngu na wàla wuamu,” wàna. 13Hàlaka nu i Ala hi na-dunjaku-nya i Yakupu. 14La ngia pa-paniina i Ala lai Yakupu, pa-ndolaku-nanyaka hau watu tanda. Hàla na watu nuna hi na-maraku-wànya lai Ala, ba naburi-nya angguru dàngu mina haitungu la pinuna. 15Na pangia nuna na-patamu-nya, “Mbetilu”.

Na metina i Rahilu

16Hàlaka nu i Yakupu dàngu na juruna dunjaku-danyaka la Mbetilu. Nu ba harangu marau-ipa welingu la Epurata, toma-nanyaka na rehina i Rahilu pa-habola. Tàka naharui na-habola-nanya na anana. 17Ba na-làmburu-ka na katiu habola-na panii-nanyaka na ma-patika, “Pa-bokulu-ya na etimu Rahilu, na anamu hili anakeda mini-maya,” wànanya. 18Ba tuna i Rahilu mareni-ama-naka na njàpuna, mbotawa ba wànaka na kayeku-na, na-patamu-nya, Mbeni-Oni#Mbeni-Oni; Na tamu yiana la hilu Imbarani “ananggu mini la mayila-nggu,” wàna. na anana, tàka na amana duna na-patamu-nya Mbanyamingu.#Mbanyamingu; Na tamu yiana la hilu Imbarani: anakeda mini ma-paura-ya ngeru, wàna.

19Ba nameti-ka i Rahilu, tani-danyaka la hingi ànda na ma-hanggangu la Epurata, nàhu la Mbetulehimu, ba wàdanya. 20I Yakupu na-pahadangu watu tanda panda mbulangu lai nu, tàka lupa la lodu nàhumbu, na tanda retina i Rahilu jia-mayapa na watu nuna. 21Hàlaka nu i Yakupu na-pangala-nya na lakuna, hi na-pandàngi maüna la hau pangia ba làpahu-nya na lewatu Endiru. 22Ba talànga ninya lai nu, i Rumbingu katuda angu-nanyaka i Mbiluha na kala wihina na amana, na rukuna nuna narongu-maka i Yakupu, dàngu mbeni nda uku#Na pa-haleli weli ndaingu: mbeni nda uku; La hilu Imbarani-na nda nianya na kareuku tungu nu.-ya.

Da anana i Yakupu

(1 L Nd. 2:1-2)

I Yakupu ningu anana tau hakambulu madua mini. 23Da anana i Lia, jiaha i Rumbingu (ana ma-maaya dehina na i Yakupu), i Hamiungu, i Lewi, i Yahunda, i Ihakàru dàngu i Hembulungu. 24Da anana i Rahilu jiaha i Yuhupu dàngu i Mbanyamingu. 25Da anana i Mbiluha, atana i Rahilu, jiaha i Ndàngu dàngu i Nàputali. 26Da anana i Hilipa, atana i Lia, jiaha i Nggàtu dàngu i Ahiaru. Nuda da anana dedida la Mahupatamia.

Na metina i Ihàku

27Ka tàka-nanyaka i Yakupu lai Ihàku na amana, la ngia pa-ngiangu-na la Màmurei lihina la Hemburungu (Àmangu i Ambarahàmu, na bokuna lai numayai na-ngiangu ningu.) 28-29Kaweda nàkapu-mana-nyaka i Ihàku, ka ba 180 ndau-dunaka na lurina hi namangu pameti, ka tani-danyaka paraï da anana, i Ehaü dàngu i Yakupu.

Currently Selected:

DEDI 35: KAM

Highlight

Copy