NA RUKUDA DA PA-PAHURUNGU 7

Ba natungu lii i Hitipanu

1Na ratu bokulu na-paàra-nya i Hitipanu, “Màla na papanii-da da tau nuda na-padeningu?” wànanya. 2Nahema i Hitipanu, “Angu dedi dàngu Ama mbuu ndàbami! Màla kai patingi-ngga nyungga! Ba ndedipa na-lelingu na bokunda i Ambarahàmu la Haràngu, la rehi nu ba la Mahupatamia-yapa, namai i Ala ma-mangarangu lai nyuna, 3hi napanii-nya, ‘Dunjaku-nyawa na tanamu dàngu da nua kalembi-mu. Lakuwa la tana na pa-paita-nggunggau napa,’ wànanya. 4Ka dunjaku-nanyaka na tana Kàhandimu i Ambarahàmu, hi na-lelingu la Haràngu. Ba nameti-ka na amana i Ambarahàmu, paleli-nanyaka i Ambarahàmu paraïna i Ala la tana yiana, na ngia pa-ngiangu-mi nyimi nàhu angu dedi dàngu ama mbuu ndàbami. 5La rehi nu nda ana ha-kadipu-mbu tana la tana yiana na pawua-na i Ala lai Ambarahàmu ka namangu-nya paraïna i Ambarahàmu, mili ana ha-tàbalu-aka ndiambu. Tàka i Ala na-paràndingu, napa nawua-nya i Ambarahàmu la pamangu-nya dàngu wàla wuana. La rehi nu nyuna i Ambarahàmu nda ningua anana. 6Ba tuna yiana-yaka na papanii-na i Ala lai nyuna, ‘Da wàla wuamu napa da-ngiangu la tana tau hangàdangu hama tuna na tau tàka. Napa na-panyàku-ha paraï tau la tana lai nu wàngu mbana etida lundu patu ngahu ndaungu mandaina. 7Tàka napa nyungga kuhuku-nya na banjaru na maata-nja nyuda, dàngu napa daluhu welingu la tana lai nu hi da-maraku-ngga napa la tana yiana,’ wàna. 8Ba na-hàlaka papanii tuna nu, kawuku-nanyaka nu na pa-ràndingu paraïna i Ala ba na-pakata-nya na lii kàri. Jia-duya ba nadedi-ka i Ihàku na anana i Ambarahàmu hi nakàri-ya ba walu mbua lodu-naka ngalana padedi. Tunaka nu i Ihàku duna hi nakàri-ya i Yakupu na anana. Dàngu i Yakupu-mbu hi nakàri-ha da anana da tau hakambulu madua, nu jia-duhaka da boku la mangilu-na na banjaru Yahundi.

9Da bokunda la mangilu da-kapihi-nya i Yuhupu, hi lupa dadangga-nya panjadi ata la tana Mehiru. Tàka i Ala duna ndutu-nanya-padua, 10hi na-pahàla-ya welingu la handuka - handuka-naka. Nawua-nya kaminaku manggàna paraïna i Ala ba na-hurungu la hanggana i Piraüngu hanganji Mehiru, hi lupa natuya nggumbunuru la Mehiru na ma-kuaha-ya na uma hanganji Piraüngu. 11Tunaka nu ka tungu-nanyaka na rimba bokulu la nggubulu tana Mehiru dàngu tana Kanaàngu, hi lupa na-mayila langatàka na tau. Da boku la mangilu-nda nda da-ngalangu pangangu. 12Ba narongu-ka i Yakupu ba ningu uhu nggàndumu la Mehiru, paràha-duna-njaka da anana, nu da boku la mangilu-nda, palua lai nàhu, na kawunga luada. 13Ba da-panduangu wànguka palua, napeka-nja da anguna paluhu nyuna i Yuhupu, ba Yuhupu-ya nyuna. Hina-duka la rehi nu hi napinya paraïna hanganji Mehiru da nua nituna i Yuhupu. 14Tunaka nu i Yuhupu, pangàndi-nanyaka langu na amana, nu i Yakupu, hi nakarai-ya nyuna dàngu kuru umana ka da-lelingu la Mehiru – mbuu ndàbada tau pihu kambulu malima-ha. 15Lelingu-nanyaka la Mehiru i Yakupu dàngu lai nuduka nameti ningu hamanai da boku la mangilu-nda. 16La lodu malamiri da ngàndi beliha da metida la Hikimu, hi taninja la reti na pambàda kei wàna hau dangu àmahu paraïna i Ambarahàmu welingu la kabihu banjaru Hemuru la Hikimu.

17Ba na-marenika na rehi pa-jàngapu-nanya na paràndi-na i Ala lai Ambarahàmu, na banjaru-nda la Mehiru mbàda bonjangu-naka padangu. 18La malamiri katangu-nanyaka pareta la Mehiru na haàtu hanganji manda tandaya i Yuhupu. 19Nuna na hanganji na-pajulu wànya na banjaru-nda dàngu mbana etina hanggangu la boku la mangilu-nda. Na-pambana-ha la pawàru-nja da anarara-da da mabidi dedi ka àmbu ihili-nja dàngu ka dameti. 20La rehi nuna-duka i Muha ba nadedi; bai anarara manandangu-ya Tailu mbua wula-ana ba kulipu-ya la uma amana, 21tàka ba wàru-nyaka, piti-nanyaka paraïna anana kawini i Piraüngu, hi na-kabida-nya ba hama tuna ana wiki-nanya. 22Mbuu ndàbada da papingu wàngu tau Mehiru pa-ajarungu-ya nyuna, hi lupa nanjadi tau ma-kanjupu kuaha-ya la kareuku-na dàngu la pawunda-na.

23Ba patu kambulu ndau-naka na ndau lurina i Muha, tumbu-nanyaka na rinjungu la etina palua pa-tadalu-ya na banjaru-na na tau Ihirailu jàka nggàra ehina. 24Hi naita-ya na haàtu welingu lai nyuda na pa-pajàra paraï haàtu tau Mehiru; ka kahiri-nanyaka na tau pa-pajàra ba nawàngu pa-pameti-ya na tau Mehiru. 25Ba nakaka-ya i Muha napa datanda-ya paraï banjaru-na ba nyunaka papindi-na i Ala la pa-pahàla-ha nyuda. Tàka nda dapi-anya duda. 26Hili hau lodu naita-ha da tau madua tau Ihirailu da ma-pahànggangu, hi na-patikingu làti pa-papeku-ha. Napanii, ‘Nyimi tau ma-paangu dedikai. Nggikina hi mi-pahànggangu?’ wànanja. 27Tàka na tau na mapalu-ya na anguna, na-jukaru-maanya i Muha la hingi, hi napanii, ‘Nggamu na mawotu-kau nyumu la paliku uru dàngu la pa-hakimu-nggama nyuma? 28Màla ka ku-pameti-mbuya nyuna wàmu-nggaka hama tuna bau pameti-ya na tau Mehiru kangeu?’ wàna. 29Ba narongu-yaka nuna i Muha na papanii-na nuna na tau, ka palai-nanyaka i Muha welingu la Mehiru, laku hi na-engangu la Mindiangu. Lai nu na-ngalangu ana tau madua.

30Patu kambulu ndaungu ma-palàngangu ninya na haàtu na papalewa na mamai lai Muha la maràda telangu la lihina la Palindi Hinai. Na papalewa namai la wuku rii madàka na maroka. 31Na-hangàtaru i Muha ba naita-ya na rukuna nuna, hi nalua palihi-nya ka kupinya hi nggàraya wàna. Hi narongu-ya na liina i Miri na mapanii, 32‘Nyungga yia Alada da boku la mangilu-mu; Nyungga Alada i Ambarahàmu, i Ihàku dàngu i Yakupu,’ wànanya. Ka ta - tàta-naka i Muha ba na-mangàdatu, nda natoru mbeni-apa pa-tàngaru-ya nuna na wuku rii madàka. 33Tunaka nu ka hilu panii-nanyaka i Miri, ‘Àlinja da halapa la wihimu, nadu nana na tana ngia pa-ndolaku-mu ba tana matua-ya. 34Kuita-mayaka dàngu kueti-wa-manyaka na mayila mbanana na banjaru-nggu la Mehiru. Kurongu-mahaka na pangiba-da, ka puru-dunggu-nyaka la pa-pahàla-ha. Nàhu, màla! Ka ku-paràha-nggau pabeli la Mehiru,’ wànanya.

35I Muha yiana yia, jia-mayaka i Muha na panda mbuha banjaru Ihirailu dàngu ba da-jukaru wànya na kareuku yiana, ‘Nggamu na mawotu-kau nyumu la paliku uru dàngu la pa-hakimu-nggama?’ ba wàdanya. Tàka jia bia-yaika nyuna na pa-paràha-na i Ala panjadi liku uru dàngu ma-pamànangu, ba nandula-ya paraï na papalewa na mamai lai nyuna la wuku rii madàka na maroka. 36Jiaya i Muha yiana-maka na mairu ngàndiya na banjaru Ihirailu paluhu welingu la Mehiru, ba nawàngu pa-patumbu màtu - màtu pa-hangàtarungu dàngu panda ita hamangu la Mehiru, la Tehiku Rara dàngu la maràda telangu patu kambulu ndaungu mandaina. 37Nyuna-maka i Muha na mapeka-nya na banjaru Ihirailu: ‘Napa i Ala nawua-nggai haàtu wunangu na papindi welingu la hongami nyimi wiki, hama tuna ba na-pindika nyungga,’#hama tuna ba na-pindika nyungga; jàka ndia: hama tuna nyungga. wànanja. 38I Muha-maka la honga banjaru Ihirailu la maràda telangu na mali padua-nya na papalewa na mapanii dànya la Palindi Hinai dàngu da bokunda. Nyuna na ma-kataku-ya welingu lai Ala na lii luri la pa-patàka-nda nyuta.

39Jiapa ka tuna nu da boku la mangilu-nda nda dabihu pa-karàda lai nyuna. Da-jukaru-maanya hi da-patikingu pabeli la Mehiru. 40Dapanii-nya i Harungu, ‘Pandoi-nggama marapu da matanggu iru ngàndi-kama. Nadu ba nda mapi-anyapa nyuma jàka nggiki-naka na ngerana i Muha na mairu ngàndi-kama paluhu welingu la Mehiru,’ wàdanya. 41Tàka la rehi nu pandoi-duda-nyaka hau kahala hada ana hapi, tunaka nu hi dangàndi-nya kameti maraku nuna na kahala hada ana hapi dàngu hi da-patumbu remi ba dawotu-nya nu na pa-pandoi wàda lima wikida. 42Ka taluru-nanjaka nyuda paraïna i Ala hi napuli-nja pa-maraku-nja da kandunu la awangu. Nuna jàngapu-nanyaka na pa-tulihu la mbukuda da wunangu,

‘Ha tau Ihirailu! Nda lumu-mingga Nyungga-a

bai rupu bai wotu kameti maraku banda la dalu patu kambulu ndaungu la maràda telangu.

43Jiaya na maü terana i Moluku dimi na pangàndi mànumi,

hamanai da kahala hada kandunu da pa-marapu-mi, nu i Repàngu; nunaya na kahala hada pa-pandoi-mi na palumu-mi.

Nu jia-duyaka napa hi kuwàru pamarau-kai hu papa la parai Mbambilu,’ wàna.

44Na maü ngia pamaina i Miri la tau nimanya la boku la mangilu-nda la maràda telangu. Nuna na maü ba wuluya, tundunya na pareta-na i Ala lai Muha, dàngu tundunya na ngerangu na pa-paita-nanya i Muha paraïna i Ala. 45Tunaka nu dangàndi pangala-nya nuna na maü paraï da boku la mangilu-nda ba da-kariangu dàngu i Yuhua ba dalua pawàhi-ya yiana na tananda welingu la kuaha-da da banjaru da pawàngga-na i Ala la hanggada nyuda. Nuna na maü ni-manyapa lai nu lundu toma la rehina i Ndautu. 46I Ndautu na-pahàmu etiya i Ala dàngu nakarai-ya ka na-pahia-nya pawulu-nya uma ndumana i Ala na pa-maraku-na i Yakupu.#i Ala na pa-maraku-na i Yakupu; da pa-haleli ndai da manda pirada: i Ala na pa-maraku tau Ihirailu. 47Ba tuna i Halomu-ka duna na ma-pahada-nya na uma ndumana i Ala.

48Na nyuna i Ala Mahupu mangunju nda na-ngiangu-a duna la uma pawulu tau; nadu la huratu wunangu ba ni-manyaka na pa-tulihu,

49‘Na awangu ngia pa-mandapu-nggunya,

na pinu tana lata wihi-nggunya.

Nggàra uma-yaka nu na pawulu-mingga?

Nggi-yaka na ngia pa-hangahu-nggu?

50Ka nda Nyungga nu ma-padika-nya mbuu ndàbana?’

wàna i Ala.

51Lalu mbana katiku watukai nyimi angu dedi dàngu lalu tangguru-kai nyimi la patundu-nya i Ala! Mi-kawanga-nya kahilu na puluna i Ala! Hama-maminja da boku la mangilu-mi, bai lawa mànunya na Ngahuna i Ala! 52Màla ningu nu wunangu da panda pa-mayila-da da boku la mangilu-mi? Da-pameti-ha da tau papalewa-na i Ala, da mambàda bobaru-ya weli ndaingu ba nàmunya na Atana i Ala na ma-padeningu. Tàka nyimi nàhu mi-kaleka-nya dàngu mi-pameti-ya nuna na Atana i Ala. 53Da papalewa awangu mbàda patàka-mada-nyaka na pareta-na i Ala lai nyimi, tàka nyimi ndai tundu-anya!” wànanja.

I Hitipanu ba da-nàhaku-nya watu

54Ba darongu hàla-yaka nu na papanii-na i Hitipanu paraï da angu Batangu Anggama, mbumbaru-nanyaka na mbenida paraï pakaraü-nya eti. 55Tàka i Hitipanu duna ba kuaha-mananya Ngahuna i Ala, na-tangara la awangu. Naita-ya na mangunju-na i Ala dàngu i Yehu ndolaku-mananya la ngia pa-kuaha-na la kawana-na i Ala. 56“Tàngaru,” wàna i Hitipanu, “kuita-ya na awangu na ma-tawanggahu dàngu na Ana Tau ba na-ndolaku la kawana-na i Ala!” wàna.

57Da ma-batangu ba dàngu warada da-pandàbi-maanja da kahilu-da hi handàka hadumbalu-ma-adanya i Hitipanu. 58Da-ruruhu-ya la hambeli paraingu, hàla hi da nàhaku-nya watu. Da tau da ma-hakahii-nya nuna na manjadi da-pakata-nja da pakida la haàtu bidi mini, na ma-tamungu Hauluhu. 59Ba talànga nàhaku-danya i Hitipanu, wara-nanyaka i Hitipanu, “Dou Miri Yehu, kataku àruya na ndewanggu,” wàna. 60Ka patika-nanyaka hi nawara pakodungu, “Miri, àmbu pabuku àrunya na njala yiana lai nyuda!” wàna. Ba nahàla-ka papanii tuna nu, meti-madua-nanyaka.

Currently Selected:

NA RUKUDA DA PA-PAHURUNGU 7: KAM

Highlight

Copy