NA RUKUDA DA PA-PAHURUNGU 3

Na tau kaliparu na pa-pamàlaru

1La hau lodu i Peturu dàngu i Yuhani dalua la Umana i Miri la njàmu tailu la maringu lodu, nu la rehi hamayangu. 2Lai nu la pindu bokulu, “Pindu Manandangu” ba wàdanya, ninya na haàtu na tau mini na ma-kaliparu welingu ba hina nadedi. Hau lodu - hau lodu dangàndi-ya lai nu la pakarai hunggu la tau matama la Umana i Miri. 3Ba naita-haka i Peturu dàngu i Yuhani ba datama la Umana i Miri, karai-nanjaka hunggu. 4Ka panau-danyaka, hi napanii i Peturu, “Tàngaru-kama,” wànanya. 5Hi napanau-ha nyuda, dàngu monungu-na pa-ngalangu ana ngga - nggàra welingu lai nyuda. 6Tàka i Peturu hi napanii-nya, ‘Nda ana ninguma àmahu-nggu. Tàka jàka nggàraya na maninya lai nyungga napa kuwua-nggaunya: Wànya na kuaha-na i Yehu Karitu tau Naharitu, panggawa!’ wànanya. 7Tàka i Peturu, hi nayàpa-ya na lima kawana-na nuna na tau kaliparu hi na-pahada-nya. Ka màka-madua-danyaka da wihina dàngu da kawudu kawita-na. 8Ka lumbatu wànaka ba na-hadangu, hi napangga palua maingu. Tunaka nu tama-nanyaka la Umana i Miri na-karia-nja i Peturu dàngu i Yuhani, nu ba napangga ba dàngu punduhu - punduhu-na wotu-mananya i Ala. 9Daita hàlaya tau ba napangga dàngu ba nawotu-nya i Ala. 10Ka hinaka hi datanda-ya ba jiaya nyuna na makarai hunggu, na makàli mandapu lua la “Pindu Manandangu” la Umana i Miri. Da-hangàtaru dàngu da-maratangu ba daita-ya ba tunaka nu nyuna.

Na pa-bobarungu-na i Peturu la Umana i Miri

11Na tau nuna tundu pangala-mananja i Peturu dàngu i Yuhani. Nu pa-kadua haàtu-da ba datàka-ka la hanamba “Kawindu-na i Halomu” ba wàdanya, mai hàla-nanyaka na tau lai nyuda pa-hangàtaru-nja. 12Ba naita-haka da tau nuda paraïna i Peturu, ka panii-nanjaka, “Ha tau Ihirailu, nggikina angu dedi hi mi-hangàtaru-nya na rukuna yiana? Nggikina hi tika papanau-kama nyuma? Bai kakaya na tau yiana hi napangga ruku ba ningu kuaha-ma nyuma jàka ndia ba ruku manundu-ma nyuma lai Ala? 13I Ala na pa-maraku-da i Ambarahàmu, i Ihàku, i Yakupu, Alada da boku la mangilu-nda, i Ala nuna-maka na ma-pa-mangara-nya na Atana, nu i Yehu. I Yehu nuna-maka na pa-pakata-mi la lima ma-katangu kuaha, dàngu na palawa-mi nyimi la hanggana i Pilatu, làti duna i Pilatu ka ku-pahàla-ya wàna. 14Nyuna duna na-matua dàngu nahàmu, tàka nyimi dimi mipapa-nya Nyuna dàngu hi pambana-ya i Pilatu ka na-pahàla-nggainya na tau pameti tau ndumami nyimi. 15Angu dedi nyimi-maka ma-pameti-ya, làti Nyuna duna pingi lurina na tauya mbuu ndàbana. Tàka i Ala na-paluri beli-yaka duna welingu la meti. Nyuma yia jiama-kamaka ma-hakahii-nya na rukuna nuna. 16Angu dedi, ita-mami-nyaka nyimi dàngu hakahii-mami-nyaka na rukuna yiana na ma-kaliparu. Àtalu-nanyaka dàngu hayandalu beli-nanyaka, nadu nyuna ba nawaiya i Yehu dàngu na kuaha-na. Ruku pawaina lai Yehu hi na-hayandalu beli na tau yiana la hanggami nyimi angu dedi mbuu ndàbami.

17Angu dedi! Nàhu kupinya-ka jàka nggàraya na pawunda-mi nyimi dàngu da amaboku - amabokulu-mi hanggangu lai Yehu, nuna bai wundaya ba nda pi-maami-nya jàka nggàra ulami. 18Dàngu jiaya ba tuna nuduka hi na-patutungu wàngu na pambàda pekana i Ala la ngaruda da wuna - wunangu-na ka nu na Hanganji Pa-mànangu na paràndi ba lupa na-pàdangu-ma bàdi mayila. 19Jia ba tuna Angu Dedi, ipambelingu-wa welingu la nja - njalami kai kabeli lai Ala, ka na-podahu-ha da njalami. 20Napa nàmunya i Miri lai nyimi, tàka hii eranya na hayandalu ndewami. Napa i Miri na-paràha-nya i Yehu pamai lai nyimi, nadu ba pa-kawuku-na i Ala-mayaka ba Nyuna na Hanganji Pa-mànangu ndumami nyimi. 21Enga-manaka bàdi Nyuna la awangu, hi lupa na-pabidi hàlaya paraïna i Ala, hama tuna na pambàda paniina la ngaruda da wuna - wunangu-naka weli àmangu. 22Handàka mbàda wàna-maka i Muha, ‘Napa i Ala Mirimi na-palewa-nggai haàtu wunangu welingu la banjaru wikimi, hama tuna ba na-palewa-ka nyungga.#hama tuna ba na-palewa-ka nyungga; jàka ndia: hama tuna nyungga. Mi-patingi-nya bàdi mbuu ndàbana na papanii-na na wunangu nuna lai nyimi,’ wàna. 23Na tau na manda patingi-nya jàka nggàraya na papanii-na na wunangu nuna napa pa-hinggalu-ya welingu la banjaru-na i Ala dàngu hi patàlaru-ya. 24Da wuna - wunangu-ka da mambàda patàka-nya na lii nuna welingu lai Ala, piti welingu lai Wunangu Hamuilu lupa la wuna - wunangu da matàka pa-malamiringu, jia ndàba-maya na rukuna na rehi nàhu. 25Da paràndi - paràndi welingu lai Ala, da pa-patàka-da da wunangu ndumami nyimi-mahaka. La pa-ràndingu patura-na i Ala la boku la mangilu-mi, tuna yia na papanii-na i Ala lai Ambarahàmu, ‘Welingu la wàlamu napa Nyungga ku-pakanyuru-ya mbuu ndàbana na banjaru la pinu tana,’ wàna. Na pa-ràndingu nuna ndumami nyimi-mbuya. 26Nuya na pakiri-na hi napindi-ya na Atana paraïna i Ala, hàla hi na-palewa-ya pamai mangilu lai nyimi, ka peku pa-kanyuru-nanggai. Na àndana ba na-pakanyuru-kai, jia-duyaka ba na-pawiti-nggai la pa-manjaria welingu la lurimi na ma-akatu,” wàna.

Currently Selected:

NA RUKUDA DA PA-PAHURUNGU 3: KAM

Highlight

Copy