NA RUKUDA DA PA-PAHURUNGU 2

Na tàkana na Ngahuna i Ala

1Ba toma-yaka na lodu Petakota, mbuu ndàbada da mapawai pauhi-danyaka la hau pangia. 2Hi jia rongu biada malingu welingu la awangu ba hama tunguna na ngilu mbangatu. Na uma ngia pa-mandapu-da da tau nuda nahibu hàla-nyaka malingu. 3Hàla ka ita-danjaka da làma ba hama roka epiha da ma-làmbatu lai nu - lai nu dàngu hi na-tunggulu màra haàtu-ha nyuda. 4Ka kuaha hàla-madua-nanjaka paraïna Ngahuna i Ala, hi da-pakiringu pa-kareuku wàngu hilu hangia - hangia. Ba da-kareuku nyuda tundu-danya na pawua-nanja Ngahu la pa-kareuku.

5La rehi nu dangu tau Yahundi welingu la hau tana - hau tana la pa-nggubulu awangu, da maninja la Yeruhali. Nyuda mbuu ndàbada tau ma-manundu lai Alaha. 6Ba rongu-yaka nu na malingu, dangu langatàka tau mamai pa-langgungguru. Nyuda mbuu ndàbada da-katàtaku ba darongu-ha da tau pawai ba da-kareuku la hiluda nyuda haàtu - haàtu. 7Dawàngu pa-hangàtaru dàngu maratangu ba dapanii, “Da tau da ma-kareuku yiada yia mbuu ndàbada tau Nggalilia-ha? wàngguka. 8Ka nggikina hi tarongu-haika ba da-kareuku wàngu hilu la tananda haàtu - haàtu? 9Nyuta tau ma-pawelingu la Pàratia, la Mendia, Elàmu, welingu la Mahupatamia, Yundia dàngu Kapandokia, welingu la Potuhu, dàngu Ahia, 10welingu la Paringgia dàngu Papilia, welingu la Mehiru dàngu ngabana la Limbia lihina la Kireni, ningu lai nyuta mamai welingu la Roma, 11ningu tau Yahundi dàngu tau la banjaru hawiangu da matama la anggama Yahundi; ningumbu tau mawelingu la Kareta dàngu Arapu. Tarongu hàla-maha ba da-kareuku la hilunda nyuta haàtu - haàtu, ruku hangia - hangia da pa-hangàtarungu da pa-patumbu-na i Ala!” wàda. 12Pa-kariangu hangàtaru dàngu maratangu-da da pa-àrangu dàngga anguda, “Nggàra wànaka ihu yia?” wàda.

13Tàka ningu-madui ma-parikingu, “Ha, maüku-adanya dumu!” wàda.

Na pa-bobarungu-na i Peturu

14Ka hadangu-nanyaka i Peturu hamanai da pa-pahurungu hakambulu haàtu hawiangu, tunaka nu tungu-nanyaka kareuku-na la tau dangu. Na-pakodungu-ma ba napanii, “Angu dedi, tau Yahundi dàngu mbuu ndàbami ma-ngiangu la Yeruhali! Patingi pa-hàmungu, nadu na rukuna yiana ku-pakaloka-nya bàdi lai nyimi. 15Da tau yiada nda maüku-adanya, hama tuna bai kakaya; nàhu ba hina pàku njàmu hiwaya la mbaru. 16Tàka yiana mbàda peka-mana-nyaka paraïna i Ala la ngaruna i Wunangu Yoilu:

17Na puluna i Ala, ‘La njàpuna

na rehi napa kuburi-ya na Ngahunggu la tauka mbuu ndàbana.

Da anami mini dàngu da anami kawini napa da-bobaru-nggai nyimi ruku hangia - hangia na papeka-nggunja nyuda.

Da bidi minimi napa da-itangu hangia - hangia da pa-paita-nggunja.

Da ma-kaweda-mi napa da-manggadipangu rukuna na manggadipangu pawua-nggunja nyuda.

18Da ata-mbunggu – ka miniha ka kawini-hakai –,

napa kuburi-nja na Ngahunggu la lodu - lodu nuda.

Napa dapeka hangia - hangia da papeka-nggunja nyuda.

19Napa kutuu pahanga - ngàtarungu nu dita la awangu,

dàngu hangia - hangia na manda ningu hamangu lai yiahu la pinu tana;

napa ningu ria dàngu epi, ma-hangolungu dàngu ma-kutungu.

20Na mata lodu napa na-kapàtangu,

na wulangu napa narara hama tuna wai ria

ba ndedi jiaya na Loduna i Miri, na lodu bokulu dàngu mangarangu na manàmu-nya.

21La rehi nuna, na tau na mawara-nya i Miri

jiaya na pa-pamànangu,’ wàna.

22Angu dedi tau Ihirailu! Ronguya yiana jàka nggàraya na papeka-nggunggai: Nu i Yehu tau Naharitu pa-wuangu wai ngera-mayaka paraïna i Ala ndumami nyimi. Nuna ita hàmu-manda-nyaka la pahanga - ngàtarungu dàngu hangia - hangia da manda ningu hamangu da paraï rukuna i Ala la ngaruna i Yehu. Nuna mbuu ndàbana pi hàla-mami-nyaka angu dedi. 23Pa-namatu-nya na pambàda pakaka wiki-mana duna, bota-duna-nyaka la pa-pakata-nya i Yehu lai nyimi. Ba na-pakata-nggainyaka, pameti-minyaka bai pahia-nya na tau akatu la pa-harika-nya Nyuna. 24Ba tuna na-paluri beli-yaka paraïna i Ala welingu la honga tau meti. Tubangu-ma ba na-kawàluku-nya meti, na nyuna na-pahàla-ya paraïna i Ala, ba nda peku-ana ka na-kuaha pangala-nya meti. 25Na ngerana nu i Yehu, mbàda tiki-mana-nyaka paraïna i Ndautu,

‘Kuita mànuya nyungga i Miri la hangganggu;

Nyuna na-karaha-ka, ka àmbu peku kàduku-nangga jiapa nda nggàraya.

26Nuya na kirina hi na-nggaüru na etinggu,

na ngarunggu nawunda-nya wotu hailangu:

na taunggu yiana nedingu-na padua

dàngu mànjaku-na daa la retinggu.

27Nadu ba ndau pahia-anya dumu na hamangu-nggu pa-paengangu la parai mameti.

Ndau pahia-anya dumu pa-làjaru dàngu pa-molungu na atamu na ma-tuturu.

28Mbàda paita-munggaka ànda ma-hanggangu la luri ma-langatàka.

Mbaha nda ukuya na etinggu nadu ba karia mànu-mamungga,’ wàna.

29Angu dedi, pahia àrungga ka kupanii pangala lulunya na ngerana i Ndautu, na boku la mangilu-nda. Nyuna nameti-ka dàngu pa-taningu-mbuyaka; na retina ni-manyapa la padua-nda nyuta lundu nàhu. 30I Ala naràndi-mayaka i Ndautu, ba nawàngu pa-harangu, na haàtu welingu la wàlana nawotu-ya napa pa-hanganji paraïna i Ala. Nyuna i Ndautu napinya nuna na pa-ràndingu dàngu ba haàtu wunangu-mbuya nyuna, 31napi-mbunya jàka nggàraya napa na pa-patumbu-na i Ala. Jia-duyaka hi nanyura-ya, nu na Hanganji Pamànangu na paràndi-na i Ala, ba naluri beliya napa welingu la meti. Na liina i Ndautu,

‘Nda papuli-anya nyuna pa-paengangu la parai mameti;

nda na-làjaru dàngu nda na-molungu-a napa na tauna,’ wàna.

32Jiaya i Yehu nuna-maka na pa-paluri belina i Ala welingu la meti. Nyuma-maka yia mbuu ndàbama ma-hakahii wikinya na rukuna nuna. 33Pawotu-yaka Nyuna la ngia pa-mandapu-na na majangga dàngu nawua-nyaka kuaha paraïna i Ala, hi nangala-nya na Ngahuna i Ala na pambàda ràndina i Ama. Tàka nàhu na parongu-mi dàngu na pangita-mi, jia-mayaka na Ngahu nuna na paburi-nanggama Nyuna. 34I Ndautu wiki nda naheia la awangu, tàka napanii-na,

‘I Miri napanii-nya na Miringgu:

35Mandapu-wa la kawana-nggu,#Mandapu-wa la kawana-nggu; Pa-namatu-nya na huri Yahundi, na tau patembi dàngu na pa-wuangu kawaha na-mandapu ningu la kawana.

hi lupa ku-pawiti-nja panyàku lai nyumu da muhumu!’ wànanya.

36Nunaya na pakiri-na mbuu ndàbana na tau Ihirailu napi hàmu-manya bàdi, nu i Yehu na pa-harika-mi, jiaya i Yehu nuna-maka na pawotu-na i Ala màta ka Miriya dàngu ka Hanganji Pa-mànangu-ya!” wàna.

37Ba darongu-yaka na rukuna nuna, bàrangu-danyaka da etida. Hi da-paàra-nya i Peturu dàngu da pa-pahurungu hawiangu, “Angu dedi, ka nggikina wàma-aka bàdi nyuma?” wàda.

38Nahema i Peturu, “Manjaria-wa welingu la nja - njalami. Dàngu màtawa ka parunu màra haàtu-nggai la tamuna i Yehu Karitu, ka peku jàmanja da njala-mika. Tàka hi mingala-nya napa na Ngahuna i Ala na pawua juana i Ala. 39Nadu nuna na paràndi-na i Ala ba tunggumi nyimi-maya dàngu da wàlami, dàngu tungguna mbuu ndàbana na tau la mamarau – nu mbuu ndàbana na tau na papaau-na i Ala Mirinda la pamai lai Nyuna,” wàna.

40Tuna nuduka i Peturu ba na-pakaloka-nja nyuda. Dàngu dangu-mapa kareuku hangia - hangia ba na-panamu-nja ka peku butuhu-da wikida welingu la banjaru na ma-akatu da-pahuku-na napa i Ala. 41Nadangu na tau mawaiya na kareuku-na i Peturu, hàla hi parunu-nja. Nggubulu-na na tau na mapawai la lodu nuna, da-bonjangu-ka anguda tau tailu rata. 42Pa-kunjangu-madanya pa-ajaru welingu la pa-pahurungu dàngu nuangu-mana ba da-pauhi ndàba. Nyuda da-mbulungu ba dangangu da-mbulungu ba da-hamayangu.

Na huri lurida da tau pawai

43Dangu langatàka pa-hangàtarungu pawunda-da da pa-pahurungu, hi lupa na-maratangu dàngu na-mangàdatu hàla na tau. 44Da tau da mapawai mbuu ndàbada mbulungu-maada, dàngu jàka nggàraha da pamangu-da maràngga wà hàla biada-nja. 45Nyuda dadangga-nja da malanja-da dàngu da banda pawulu-da, hàla hi dapabe - berinja da nduida la hapa-anguda tundunya na pa-kalana haàtu - haàtu. 46Hau lodu - hau lodu pauhi mànu-madanya la Umana i Miri; màlamai ba dangaa pa-matarungu dàngu nggaüru eti pa-kariangu wawa etida la hau uma - hau uma. 47Nyuda dawotu mànunya i Ala dàngu nambuha hàla-manja paraï tauka mbuu ndàbana. Hau lodu - hau lodu bo - bonjangu-mananya na danguda, nadu i Miri ba wua-mananja nyuda tau pa-pamànangu.

Currently Selected:

NA RUKUDA DA PA-PAHURUNGU 2: KAM

Highlight

Copy