Matius 3
3
Yohanes ap ik olomu ’belabenebise laga a’ge
ano en taga laga wene
(Markus 1:1-8; Lukas 3:1-9,15-17; Yohanes 1:19-28)
1Asogo tigisa ai pam en e, at Yohanes ap ik olomu ’belabenebise laga a’ge ano, o Yudea leimu aphwami erlakma eba wagarik e, wene mo’gulentasulat, disogo ese laga,
2 #
Mat. 4:17; Mrk. 1:15 “’Gain ’bogorl pam a’ge eragam nonobouwa ano yogodak arat nonobouwa. Holuk e, di wiak yu wiak togu legep a’ge ukpoluk henebabut heberlemis o,” oluk mo’gulentasu laga. 3#Yes. 40:3Ai ese laga ai re, at Yesaya Allah iak mo’gulentasu laga a’ge ano en mo’gulentasulat e,
“Ap mesik o leimu aphwami erlakma eba iak ngai eselat,
Eiga! Nonue ’gain Onuk Logo a’ge wema’gwe, ebela opsogo yorogulat, ’gorlo ’gela’ge takholuk e, hegitsogo yorogulat, togu lemis a, oluk worlentasu o,”
oluk Yesaya en ese laga ano hegitsogoat Yohanes ebe waga ai o. 4#2Raj. 1:8Wagarik, leimu aphwami erlakma ebano welat, wam unta wam asu a’ge ikho osum ’buktagalat, agap no’gorlak poluk opsogo heli’gogo ’bagaluk wantagalat, taga laga. Asogo tagalat e, oso’boru senarl a’ge nasulat, ’gin a’bosu e’gelema a’ge nasulat, taga laga. 5Asogo tagalat oruakma re, is aphwami o kota Yerusalem en, o propinsi Yudea en, ik Yordan esa’go’gwe eba ’berlek en, enebe a’bigat eragam odoktu egesa. 6Odoktu egesarik e, di wiak yu wiak togu legesa a’ge ebano ’baksogo ukpogwiam e, ik Yordan olomu ’belabenebise laga. 7#Mat. 12:34; 23:33Asogo tago oruakma, is ap Farisi a’ge pema ebano emin, ap Saduki a’ge pema ebano emin, enebe
a’bigat ik olomu ’belabonobuagoluk e, at e’bek wagaiam e, disogo mo’gulentasu laga,
“His ’gosu en dogo’gwe a’ge yema logwe! His e, Allah olot het a’bik om a’ge ano henebam pasuam e, hweiye elit lo oluk e, sa en mo’gulhentesimu no? Mia o. 8Holuk e, henede eberak poluk, wiak togu legep a’ge ukpoluk e, henebabut heberloroguptik tugulom a’geat hegitsogo nak togu lemis o. 9#Yoh. 8:33Ye, an en e, at Allah en Abraham eiyagai ’gela’ge emagoluk helep yu a’ge ogo elit walhoat o, oluk mo’gulhentegis ai en, his honogola en e,
Abraham ai nis nenaik, oluk honogola epagup o. 10#Mat. 7:19E edip lo’bok e’gen op a’ge egesiso erlak holuk, mukho odoukmu hwikhaigoluk ’besie e eme’en pam pangtak modok oruak o,” oluk mo’gulentesi.
11Asogo mo’gulentesirik mesik disogo mo’gulentesi,
“His wiak togu legep a’ge ukpoluk henebabut demat heberlagai holuk, an nebe malik wei a’ge nanni erlak a’ge en de, we ik olomu ’belaphenebise legi o. A’ge re, at ’gain anni a’bik a’ge pobuk wema o. At ebe ’gain anni a’bik ai en, an nebe wei a’ge en oyuk owi hettak a’ge woluk lo miayat o. At en ik olomu ’belaphonobu ’gela’ge, Allah Arogun emin, odouk magale emin, henebam ’belakpouwa o. 12Gandum e’gen degelu ebele paget wabun pam pusogo hwikhai louwa a’ge, at eiye a’ge e’gikmu tenakho oruak ai. Degelu hegit lau wagoam e, e’gen op on holuk, degelogo pasumu ebale opma ebano pasulat, owi’ga wiak on holuk degelogo odouk nekhi oso erlakma ebano hwikhasulat, tua o,” oluk mo’gulentesi.
Yohanes en Yesus ik olomu ’belabegei wene
(Markus 1:9-11; Lukas 3:21-22)
13Yohanes en wene ano mo’gulentasu oruakma, at Yesus ik olomu ’belabuagoluk o Galilea en Yohanes ik Yordan esa’goma oruakma e’bek lagama re, 14at Yohanes en e,
“An en ik olomu ’belaphobu re, mia o. Hat en an ik olomu ’belapnobu a’geat de, an ne’bek wegen yema re!” oluk mo’gulesi. 15Asogo mo’gulesimu, at Yesus en e,
“Erlak o. An ’belapnobuat o. At Allah en di paget yu paget asogo tuagoluk epasu hegitsogoat taknobo yo,” oluk egeimu re,
“I o,” oluk, 16ik olomu ’belakpesimu re, peiyalogo ineik ’galma re, ’bogorl hialogo Allah Arogun sue ’berl ’gela’ge ebam duk la’bu agoma il yethesi. 17#Kej. 22:2; Mzm. 2:7; Yes. 42:1; Mat. 12:18; 17:5; Mrk. 1:11; Luk. 9:35Duk la’bu agoma re, Allah iak ’bogorl pam en,
“Nomlogo nede o. At ebaget nogola nagai hasu legi o,” oluk ’bogorl pam en iak ’belakpobu aga.
Currently Selected:
Matius 3: Wul
Highlight
Share
Copy
Want to have your highlights saved across all your devices? Sign up or sign in
