Matius 4

Iblis en Yesus ede ’gagaligoluk e’bek

waga laga wene

(Markus 1:12-13; Lukas 4:1-13)

1 # Ibr. 2:18; 4:15 Ik olomu ’belabegeimu re, Yesus ano Iblis en ede ’gagaluagoluk Allah Arogun en woluk o leimu aphwami erlakma ebano laga. 2Eba pei lagama welat e, o hup agalat, dakha eselat, tagokhwe agauwa 40 pam so’boru hwenik welat e, so’boru nele a’bik aga. 3So’boru nele a’bik agama re, at Iblis enede ’gagalil denago a’ge ano en e’bek wagarik e,

“Hat Allah omlogo demat holuk e, helep yema so’boru roti a’ge ’gela’ge emagoluk mo’gulemin o,” oluk mo’gulesimu re, 4#Ula. 8:3at Yesus en eselat e,

“Allah en e,

Aphwami so’boru nak no’gwi holuk e, enelaluk modok welagai erlak o. An Allah en niak oso a’ge ai ’berlegat wogwi holuk, enelaluk modogat welema o,

oluk egeimu re, pelal wokho pegesema oruak o,” oluk mo’gulesi. 5Asogo mo’gulesimu re, pobuk at Iblis en Yesus woluk, o kota Allah u’gwarek owi seli lokma ano lagarik e, o Allah owi dum yat werik a’ge ano pam pei ligagarik e, 6#Mzm. 91:11,12disogo mo’gulesi,

“At Allah en,

Hat hoyuk helep pam dungsogo wathwerlagunno oluk, an nosi malaikat ’bogorl pam en yo’go peragonobou waga legi a’ge ebano ene’gik delakma wokhobuagoluk mo’gulentaik o,

oluk egeimu pelal wogo oruak a’ge ai, hat demat Allah omlogo holuk e, ’golokho orogobu ’bin o,” oluk mo’gulesi. 7#Ula. 6:16Asogo mo’gulesimu, at Yesus en e,

“Allah en eselat e,

His en e, an henaik Allah Nonuk Logo a’ge nanni oruak a? Erlak a, oluk nebabut ’balogup no yo,

oluk egeimu pelal wokho pegesema oruak o,” oluk mo’gulesi. 8Asogo mo’gulesimu re, pobuk at Iblis en Yesus woluk dom lok yat a’ge mesik a’gul pam ligagarik e, o ’gwiangma di owi yu owi ap ’gain ononuk logo a’ge en tenentarok welagai o’gwe lo’bok ’berlegat, di a’ge yu a’ge a’bik oruakma selakma poluk il yethouwagoluk mo’guleselat e,

9“Yesus. Hat hodogorlu pam welat neragam ’gu oroguntik erliknobogun holuk, hil yethegen a’ge eba ’berlegat perlengsogo hat wokheik,” oluk mo’gulesimu re, 10#Ula. 6:13at Yesus en e,

“Hat Iblis yu lak o. Allah en eselat e,

His en e, henaik Allah ’gain Nonuk Logo a’ge anatma re, hondogorlu pam neragam ’gu oroguptik erliknobugulat e, an nebaget nak togu lomup o,

egeimu pelal wokho pegesema oruak o,” oluk mo’gulesi. 11Asogo mo’gulesimu re, Iblis ano Yesus ukpoluk ’bok lagama re, malaikat ’bogorl pam en Yesus e’bek ’bu agarik e, ’gwelakharok welegesa.

At Yesus o Galilea orlu agarik taga laga wene

(Markus 1:14-15; Lukas 4:14-15)

12 # Mat. 14:3; Mrk. 6:17; Luk. 3:19,20 “At Yohanes ano e’gik herle werigisa o,” oluk egesema, at Yesus esa’go hwelegeitik e, o Galilea do’go orlu aga. 13#Yoh. 2:12Orlu agarik, o seli Nazaret ano ukpoluk e, o kota Kapernaum ik Galilea ye’gelak esa’goma, is ap ena’gul onuk Zebulon a’ge emin, Naftali a’ge emin, onowi pam eba weleigoluk orlu aga. 14Orlu agama re, at Yesaya Allah iak mo’gulentasu laga a’ge ano en pelal wasulat,

15 # Yes. 9:1,2 “His ap hena’gul onuk Zebulon a’ge emin, Naftali a’ge emin, honowi ik Yordan etle akhit werik a’ge emin, ik laut lok ye’gelakma ’bi lagai o’gwe werik a’ge ebano emin, honowi o Galilea do’go eba re, is ap o’borlma a’ge en sebelak oruak yema logwe!

16o hiktakma welegep a’ge ai, o dakharak honobouwa a’ge lok a’ge mesik hegep o. His o eba waromogoluk henebam hiktak oruakma, dakharak honobouwa a’ge mesik waga ai o,”

egei ano hegitsogoat emagoluk Yesus eba orlu aga ai o. 17#Mat. 3:2Orlu agarik welat, hwerli ai hwerli en, aphwami eba mo’gulentasulat e,

“’Gain ’bogorl pam a’ge en eragam honobouwa ano yogodak arat eragam honobouwa o. Holuk e, his di wiak yu wiak togu legep a’ge ukpoluk henebabut heberlemis o,” oluk mo’gulentil denaga laga.

Yesus en e, osi naduk yo’go enebesi wene

(Markus 1:16-20; Lukas 5:1-11)

18At Yesus ano ik Galilea ye’gelak esa’go’gwe lasulat e, ap enebe ’biren, Simon onuk mesik Petrus ogu lege a’ge ano ot Andreas e’birek nin hwedik nan hwedik hianeat wogumu no oluk e, ai erlige hiane wouwogoluk, sum hiane sum ik olomu ’belabugukhwe il yerentesi. 19Yerontoluk e,

“Hiane wogu legep ai ’gela’ge, aphwami asogoat wogenebil denaga lorogup en, mo’gulhentaik en an ne’berlik manis o,” oluk mo’gulentesimu re, 20erianoat onosum hiane sum egeik a’ge ano ukpoluk at e’berlik legesa. 21Legesema, at Yesus il yerentesi ’gal e, ap enebe ’biren Zebedeus eiyagai Yakobus ot Yohanes e’birek enaik emin, so ogola welat, sum hiane wogwi a’ge terleben tugumu yerentesirik e, worlentesi. 22Worlentesimu re, so ano emin, enaik Zebedeus ano emin, erianoat onoboluk e, is Yesus e’berligat legesa.

At Yesus en wene mo’gulentasulat,

ou wiak a’ge helingenebiselat, taga laga wene

(Lukas 6:17-19)

23 # Mat. 9:35; Mrk. 1:39 Legesema re, at Yesus o Galilea do’go o lo’bok eba denagalat e, aphwami Yahudi a’ge se’ban il ’gwi lagaimu ebano ’gwi lasulat e, wene op wene pobuk Nenaik ’gain Onuk Logo a’ge eragam nonobouwa ano wene mo’gulentasulat, di ou yu ou obabenebiselat, tagenebil denaga laga. 24Asogo tagenebil nosoma, obok o Siria eba modok saga egeimu re, di ou yu ou, di hwarl yu hwarl, enebam oruak a’ge emin, mu’gat wiak a’ge onogola ’gwi lasulat enebabut lugwi-lugwi ’balogwi a’ge emin, waragalat enelaluk agalat togwi a’ge emin, ene’gik onoyuk ut werak a’ge emin, e’bek wogonoboluk wagaiam enebe ’berlek helingenebise laga. 25Asogo helingenebisokhwe re, aphwami ’berlek o Galilea en, o kota 10 eba en, Yerusalem en, Yudea en, ik Yordan etle akhit a’ge eba en, modok a’bik wagalat e, Yesus e’berlik no’gu legesa.

Currently Selected:

Matius 4: Wul

Highlight

Copy