Lukas 9

At Yesus en osi enebe 12 ebano enesa’go

wusogo peragenebesi wene

(Matius 10:5-15; Markus 6:7-13)

1Asogo mo’gulontoluk e, at Yesus en osi iak wogu legesa a’ge enebe 12 ebano odoktumagoluk worlentesimu wegesema re, is en di mu’gat yu mu’gat enebabut wiak a’ge aphwami onogola ’goluk oruakma henokho lebigonobogulat, di ou yu ou enebam oruak holuk obabonobugulat, til louwagoluk at anni wogentesirik eiye tagenebesi. 2Asogo tagenebesirik e, is en Allah eragam onobouwa wene ano mo’gulontogulat, ou enebam oruak a’ge obabonobogulat, til louwagoluk peragenebesi. 3Peragenebasulat e, disogo mo’gulentesi,

“His e, ebela’gwe a’ge paget di a’ge yu a’ge logon modok woluk lagup o. Hono’bouwa’gun emin, honosum di a’ge yu a’ge wokhontogwiam yagarogup a’ge emin, so’boru emin, uang emin, ye, honosum ’buktogup a’ge ’biren emin, logon modok woluk lagup o. 4Ye, his o mesik lagaiam e, wokhonobogwi holuk e, ebayat woloroguptik e, o momu louwogoluk holuk, eba enat liplau woroguptik lu o. 5#Per. 13:51#Luk. 10:4-11Ye, is aphwami o mesik en henebe wokhonobogwi erlak holuk e, ugonoboluk liplau wagalat e, is o eba a’ge onogola pobi tuagoluk, honoyuk ollong hosogo ’belakpoluk liplau manup o,” oluk, enesa’go wusogo peragenebesimu, 6is osi ebano legesa. Lagalat e, o eba o seli lo’bok op wene ano mo’gulontogulat, o da ya ou obabonobogulat, til legesa.

’Gain Herodes ede nalagama wongsogo

mo egei wene

(Matius 14:1-12; Markus 6:14-29)

7 # Mat. 16:14; Mrk. 8:28; Luk. 9:19 Asogo til denaga legesema, at Herodes o Galilea do’go ’gain onuk logo a’ge welaga ano, wene ai ’berlegat esa’go hwelegei. Is aphwami pema en e,

“Yohanes werigisema waraga a’ge elaluk agarik denago ai o,” oluk ogu legesa. 8Ye, is pema en e,

“At Elia ano hebarligen agarik denago yo,” ogulat, is pema en e,

“Is ap pageat Allah iak mo’gulontogu legesa a’ge ebano mesik elaluk agarik denago,” ogulat, ogu legesema re, ap ’gain Herodes ano ede nalagama wongsogo mo egei. 9Mo egeitik asogo welat e, disogo egei,

“Yohanes ano, an enat o’gorlop ’balogo weregis. A’geat de, at mesik en asogo tago oluk, obok nesa’go hwelegis ai, sa en tiso yo,” oluk, Yesus ebe il yethaigoluk walhasu laga.

At Yesus en aphwami enebe 5.000 a’ge so’boru eseik-’beseiksogo wogentesi wene

(Matius 14:13-21; Markus 6:30-44; Yohanes 6:1-14)

10Is ap Yesus en yo’go onoboluk peragenebesi a’ge ebano loluk naikhe’gwe wegesarik e,

“Nis en disogo tige o, asogo tige o,” oluk ’beling-’belangsogo Yesus mo’gulosu egesa. Asogo mo’gulosu egesema re, at en is wogonoboluk enematekma ’geksogo o seli onuk Betsaida ai laga. 11Eba enematek ’geksogo legesa a’geat de, aphwami en e,

“At Yesus ano o eba laga o,” oluk ogwiam, aphwami a’bik enesa’go hweligisarik e, enebe esanat e’berlik legesa. Legesema re, at Yesus en hau wusogo wogenebegeitik e, Allah eragam enebasu wene ano mo’gulentasulat, enebam ou oruak a’ge ebano obabenebiselat, tegei. 12Asogo tagenebasukhwe, o mo arat obuk lai lagama re, at osi enebe 12 ebano e’bek wegesarik e, disogo mo’gulegisa,

“Nis yema aphwami enareng erlakma welegema re, aphwami yema onso’boru no’gulat, nogogulat, til louwagoluk e, o yema esa’go’gwe o seli wei o’gwe lok o’gwe peragenebemen o,” oluk mo’gulegisa. 13Asogo mo’gulegisema, at Yesus en e, disogo egei,

“His enat wogentemit o,” oluk mo’gulentesi. Asogo mo’gulentesimu, is en e, disogo mo’gulegisa,

“Nis e, so’boru roti a’ge huaben, ye, hiane re, ’biren nak oruak yema re, nis en aphwami yema enebaget logon o’go ’bali louwagoluk ese legen a?” oluk mo’gulegisa ai, 14aphwami enebe ap nak e, 5.000 ’gela’ge oruak en egesa. Asogo mo’gulegisema, at Yesus en osi ebano mo’gulentasulat e,

“Is eba enebe 50 pam logologo-logologo huretil louwagoluk, mo’gulentemit o,” oluk mo’gulentesi. 15Asogo mo’gulentesimu, at en egei ’gela’geat,

“Owi wetil lit o,” oluk mo’gulentigisema, enebe ’berlegat huretil legesa. 16Arat huretil legesema re, at Yesus en so’boru roti a’ge huaben eriano emin, hiane ’biren eriano emin, e’gikmu wesirik e, il ’bogorl pam likholuk, Allah hau wusogo re, so’boru emin, hiane emin, eriano ’gusogo, at osi ebano en aphwami a’bik ebano so’burontouwagoluk wogentesi. 17Arat so’burentigisema, enebe ’berlegat onogum ningsogo ne’gesema re, dedilaga a’ge mul sum egeik a’ge 12 yagasogo pegesa.

At Petrus en, “Hat hebe Kristus at o,”

oluk ’baksogo Yesus mo’gulesi wene

(Matius 16:13-19; Markus 8:27-29)

18Agauwa mesik erlige re, Yesus ematek nak se’ban osoma, at osi iak wogu legesa a’ge ebano e’bek wegesa. Wegesema, at en enebam hin wasulat e, disogo mo’gulentesi,

“Aphwami a’bik en an nebe paget nobok ogulat e, sa oluk ogwi no,” oluk mo’gulentesimu re, is en e, disogo mo’gulegisa,

19 # Mat. 14:1,2; Mrk. 6:14,15; Luk. 9:7,8 “Is pema en e,

Yohanes ik olomu ’belabenebise laga a’ge ano ogulat, ye, is nin pema en e,

Elia de ogulat, is nin pema en e,

Is ap pageat Allah iak mo’gulontogu legesa a’ge ebano de, mesik elaluk agarik oruak o, ogulat, ogwi o,” oluk mo’gulegisa. 20#Yoh. 6:68,69Asogo mo’gulegisema, at Yesus en e, disogo mo’gulentesi,

“Is en asogo ogwi a’geat de, his nak e, an nebe paget sa ogu legep no,” oluk mo’gulentesimu at Petrus en e, disogo mo’gulesi,

“Hat hebe re, Kristus, nis delnonobuagoluk Allah en perakpou weigoluk obok mo’gulnentesi a’ge anoat o,” oluk mo’gulesimu, 21at Yesus en e, is osi ebano ’berlegat disogo mo’gulentesi,

“An nebe paget egei ai re, aphwami ado modok mo’gulentagup o,” oluk enesa’go weregei.

At Yesus en e, “Di wene yu wene nebam poluk

watnobua ani o,” oluk naduk naduk

obok mo’gulentesi wene

(Matius 16:21-28; Markus 8:31–9:1)

22Asogo enesa’go weregeitik e,

“An abat daklau wegi ano, is ap enarlue a’ge emin, is ap Allah eiye a’ge onuelak ’gaindek emin, Allah iak pelal wogo eiye a’ge emin, enemin en, an nebe enebirapnobouwarik, di obotut yu obotut a’bigat taknoboluk, nebe watnobua ani o. Watnobuema re, nebe agauwa ’biren werak weleiktik en, henaganak a’ge, Allah en nelalugapnobua o,” oluk mo’gulentesi. 23#Mat. 10:38; Luk. 14:27Asogo mo’gulentesirik, wene mesik is aphwami ’berlegat disogo mo’gulentesi,

“Ap sa an ne’berlik denaga leigoluk holuk e, u’gwarek ebaget tiso a’ge,

Nebit, oluk ukpoluk e, e pam edigonoboluk waronobogwi a’ge ai, agan a’geat nin hwedik nan hwedik woluk e, an ne’berlik denaga leigoluk wemak o. 24#Mat. 10:39; Luk. 17:33; Yoh. 12:25Ye, ap sa en,

An nebe nelaluk wolom nagai, oluk, ebe erlele horlouwa holuk e, warotluk nal ema o. A’geat de, an nebaget warema holuk e, ebe delhorlouwa o. 25Ye, ap sa en, di a’ge yu a’ge ’gwiangma a’ge ’berlegat eiye ema a’geat de, u’gwarek ebe paget wiagap poluk nal ema holuk e, mesik sabuthwerlegi u no? Modok erlak o. 26Ap sa en,

An Yesus ot, eselat, an niak ai mo’gulentasulat, aphwami enilem ’baksogo u e’gerli holuk e, an abat daklau wegi a’ge yu en ogo re, pobuk an nebe erliknobugulat, naik erliktugulat, malaikat Allah ematek paget yo’go ’belagonobou wago a’ge ebano erligonobogulat, tugukhwe wagalat e,

At yu an not o, oluk niak ’baksogo u ne’gerliat ema ani o. 27Ye, his edik welegep a’ge yema logon warom erlak welat, Allah eragam onobouwa a’ge ano enebasukhwe henil hagup ani o, oluk demat mo’gulhentegis o,” oluk mo’gulentesi.

At Yesus dom pam ligagarik oruakma orogole muat aga wene

(Matius 17:1-8; Markus 9:2-8)

28At Yesus en wene asogo arat mo’gulentesirik e, agauwa siragen ’gela’ge nogoluk e, Petrus emin, Yohanes emin, Yakobus emin, wogonoboluk se’ban igoluk dom mesik pam ligaga. 29Ligagarik e, se’ban osokhwe, at Yesus orogole muat agalat osum orogole modok ’gut agarik, sellim-wallimsogo yogo pesi. 30Asogo agokhwe, ap enebe ’biren, Musa emin, Elia emin, Yesus emin weneane ogumu, 31enebe ’bogorl pam erligonobu ’gela’geat hebarligen egesarik oruakma, enil entigisa. Ye, weneane egesa ai re, at Yesus agauwa loksogo wolom erlakma enat Allah en egei hegitsogoat o Yerusalem warema wene ogu legesa. 32Asogo ogukhwe, at Petrus arilak eriano enemin nogo enil agama nogogisarik enat, enelaluk egesarik Yesus ebe amulit a’bik sellim-wallimsogo yogo pesimu, ap enebe ’biren eriano Yesus emin oruakma enil entigisa. 33Asogo tigisema, ap enebe ’biren eriano Yesus ebano ukpoluk louwogoluk tugukhwe re, Petrus en Yesus mo’guleselat e, disogo mo’gulesi,

“Nue! Nis o yema op welege hegi. Holuk, nis en orabo henagan, hat hebaget mesik, Musa paget mesik, Elia paget mesik uthontul o,” oluk asogo egei ai re, wene no’gwe a’ge paget eselegi hwe, pobirak erlakma en de, mo’gulesi ai o. 34Asogo mo’gulosokhwe erianoat, o hena sebelonobou wagama, enebe o hena ogola welat onogorlok modok aga. 35#Yes. 42:1; Mat. 3:17; 12:18; Mrk. 1:11; Luk. 3:22#2Pet. 1:17,18Asogo onogorlok agama, at Allah iak o hena ano ogola en disogo mo’gulentesi,

“An nomlogo pulogo poluk edikpegi a’ge ebe aiat o. Holuk e, at iak hwelak wolomup o,” oluk mo’gulentesi. 36Asogo mo’gulentesi ai, iak ’goboksogo, enil yethegesa ’gal e, at Yesus ematek oruakma hegesa. Asogo agama enil hegesarik, wene aga a’ge ano, ai erlige en aphwami logon mo’gulonto erlakma en, onogolasogo welegesa.

Mu’gat ebabut wiak a’ge malik mesik ogola ’goluk oruakma Yesus en henokho lebikpesi wene

(Matius 17:14-18; Markus 9:14-27)

37Loruk o’gwe re, at Yesus osi enemin dom pam en ’bu agaimu re, aphwami modok a’bik esan logolak mesik Yesus e’bek wegesa. 38Wegesarik, at ap mesik is ene’gerlakma en e, iak loksogoat Yesus disogo mo’gulesi,

“Nue! An nomlogo mesigat dogo a’ge yuno hil hagun en hiau wegi o. 39At ai mu’gat ebabut wiak a’ge ogola ’gwiselat e, e’gik pirok oyuk pirok tagalat eragop emde lo’gwe hopo tu agalat, ngai il-il ’gwiangma erle’gaksogo ’bulak tagalat, tagalat e, malik ai ogola en mu’gat ebabut wiak a’ge ai libom mia ’gela’ge welat ebe wik-wiak takpasu. 40Asogo tiso ai en, hat hosi hiak wogwi a’ge en henokho lebikpou wagoluk yo’go enebegi a’geat de, is en asogo tu re, mia aga o,” oluk mo’gulesi. 41Asogo mo’gulesimu, at Yesus en is aphwami logolak ebano disogo mo’gulentesi,

“Logwe! His aphwami o yogodak ya welegep a’ge yema re, henede nebam he’berik erlak welat, nal aga legep yema re! An nepe mosogo agauwa merenam ’gela’ge henemin wolomul no!” oluk mo’gulentesirik e, ap ano disogo mo’gulesi,

“Homlogo ai woluk suk o,” oluk mo’gulesi. 42Mo’gulesimu, nemi ano Yesus e’bek horoksogo woluk wagokhwe erianoat, mu’gat ebabut wiak a’ge ano en nemi ano ’gwiangma pela’gogo ’bo pasuam e, e’gik pirok oyuk pirok hesi. Asogo tegeimu, at Yesus en mu’gat ebabut wiak a’ge ano wene yagesirik e, nemi ano obap poluk aik wogesi. 43Asogo wogesimu aphwami ebano ’berlegat enil hegesarik e,

“Allah anni modok a’bik ai nonogorlok e,” oluk erliktigisa.

At Yesus en, “An watnobuayat o,” oluk, obok

naduk mo’gulentesirik pobuk ogo

mo’gulentesi wene

(Matius 17:22-23; Markus 9:30-32)

Is aphwami ebano ’berlegat, at Yesus en di tagalat, yu tagalat, taga laga a’ge ebano paget e,

“Eige!” oluk, erliktugukhwe re, at en osi iak wogu legesa a’ge ebano disogo mo’gulentesi,

44“An wene mo’gulhentaik a’ge yu opsogo pobi togu lemis o. An abat daklau wegi ano ap en yo’go loluk is pema en watnobuagoluk ene’gikmu nobouwa ani o,” oluk mo’gulentesi a’geat de, 45wene ai is pobi tuano oluk Allah en enede o hena ’gela’ge sebelogo pesimu, is pobitu erlak welat, disogo egesa,

“Wene ai ’gesogo oluk mo’gulnentigen,” oluk hin wokho onogorlok en mo egesa.

Yesus osi en, “’Gain e, hat no? Anat o,”

oluk eniak sagaligisa wene

(Matius 18:1-5; Markus 9:33-37)

46 # Luk. 22:24 Asogo oruakhwe, is Yesus osi iak wogu legesa a’ge ebano en ogulat e, at ap mesik en e,

“’Gain honuk logo a’ge hat no? Anat o,” oluk eselat, ye, mesik en e,

“’Gain honuk logo a’ge hat no? Anat o,” oluk eselat, eniak sagaligisa. 47Eniak asogo sagaligisa a’geat de, Yesus en enede epegesa a’ge enagat pobi enebegeitik, malik wei a’ge mesik wokho eragam pou wagarik e, 48#Mat. 10:40; Luk. 10:16; Yoh. 13:20is ebano wene disogo mo’gulentesi,

“His hene’gerlakma yema at onuk erlak a’ge aiat ebe ’gain onuk oruak ema ai en e, ap sa en malik wei yu a’ge an nebaget wasu holuk e, anat woknobua o. Ye, ap sa en an woknebiso holuk e, at peraknobou waga a’ge anoat wouwa o,” oluk mo’gulentesi.

At Yesus en, “Ap sa en, his wene yakhentasu erlak

holuk e, at ebe his oruak o’gwe a’geat o,”

oluk mo’gulentesi wene

(Markus 9:38-40)

49Asogo mo’gulentasuam, at Yohanes en e, disogo mo’gulesi,

“Nue! Ap mesik mu’gat enebabut wiak a’ge aphwami onogola ’goluk oruakma hat honuk ’balholuk henokho lebigenebasuam nenil hegerik e, at ai nis nenemin denaga lege erlak a’ge ai en,

Hat asogo tiso puk o, oluk wene yagige o,” oluk asogo mo’gulesimu, 50at Yesus en e, disogo mo’gulesi,

“His en asogo wene yagorogup o. Ap sa en his wene yakhentasu erlak holuk e, at ap ai his oruak o’gwe a’geat o,” oluk mo’gulentesi.

Aphwami o Samaria a’ge en Yesus ebe

wo erlakma en ukpegesa wene

51Asogo mo’gulontoluk e, at Yesus ebe Allah en ’bogorl pam woluk ligom ano arat horok lau wagama re, at ogola en,

O Yerusalem ’bik, oluk ningsogo mennei perakpesirik e, ebela laga. 52At owan ’biselat, ap logon naduk yo’go ’belebagenebesi. ’Belebagenebesimu, is ebano ’bigisarik Yesus ologotma di a’ge yu a’ge odoksogo pogu lomogoluk, o Samaria seli mesik weimu ’gwigisa. 53Asogo ’gwigisema re, aphwami o Samaria a’ge en,

At Yesus o Yerusalem ’bigoluk ’bu ago yo, oluk ebabut enak a’ge ’baligisarik e, at ebe wo erlakma en ukpegesa. 54#2Raj. 1:9-16Asogo ukpegesema, at iak wogu legesa a’ge ap Yakobus o, Yohanes o, enil ontoluk e, disogo mo’gulegisa,

“Nue! Hat en op epegen holuk e, enebe waronobuagoluk ’bogorl pam en odouk ’belakpoumagoluk, ’gonu mo’gulomok hwi a?” oluk egesa. 55Asogo egesema, at Yesus orogole edenogo wogontoluk e,

“Asogo togup o,” oluk osi wene yagentesi. 56Asogo wene yagontoluk e, o momu mesik legesa.

Ap logon e, “Yesus e’berlik denaga lomul ani o,” oluk mo’gulegisa wene

(Matius 8:19-22)

57At Yesus osi enemin ebela lagaimu, at ap mesik en Yesus mo’guleselat e, disogo mo’gulesi,

“Nue. An e, hat ’gebane lagun holuk e, an he’berlik modok denaga leik ani o,” oluk mo’gulesi. 58Asogo mo’gulesimu, at Yesus en e, disogo mo’gulesi,

“Orlomene ai re, owi werik ogola welago yo. Ye, sue darak noso a’ge ai ogo, asogoat owi werikmu welago yo. Asogo a’geat de, an abat daklau wegi a’ge ai nak e, nogosoma nowi werik e, modok erlak o,” oluk mo’gulesi. 59Asogo mo’gulesirik, ap mu a’ge mesik disogo mo’gulesi,

“Ne’birek denaga lomok en ne’berlik suk o,” oluk, mo’gulesi a’geat de, ap ano en, disogo mo’gulesi,

“Eige, nue! An naduk naik werak a’ge yuno ’gwiangma sali laik en, hat en,

“I o. Lak, oluk mo’gulnorogun en mo’gulhegis o,” oluk mo’gulesi. 60Asogo mo’gulesimu, at Yesus en e, disogo mo’gulesi,

“Werak a’ge holuk, is aphwami enebe werak a’ge ’gela’ge oruak ai enat salonobogu lemagoluk, hat Allah eragam enebasu wene ai, o di owi yu owi mo’gulentil denaga lomup o,” oluk mo’gulesi. 61#1Raj. 19:20Asogo mo’gulesimu, ap muon enat e, at Yesus mo’guleselat disogo mo’gulesi,

“Nue! Hat he’berlik denaga leigoluk nede epegirikmu re, lul en, an nue nari naduk hau warenebi laiktik en de, peraknebagun en mo’gulhegis o,” oluk mo’gulesimu, 62at Yesus en e, disogo mo’gulesi,

“Is aphwami, enebe lo’bok yabuk woruogoluk yabuk hua woluk loluk, yabuk ebe tenak polugat de, pobuk onorogole hebeksogo yethau wagai holuk e, Allah eragam enebasumu eba ’gwi louwa modok erlak o,” oluk mo’gulesi.

Currently Selected:

Lukas 9: Wul

Highlight

Copy