Lukas 8
8
Hwami Yesus e’berlik denagalat, at ebaget
togu legesa wene
1At Yesus asogo tegeitik e, wolom erlakma enat, pobuk op wene Allah eragam enebasu wene ano, o seli lok o’gwe wei o’gwe mo’gulentil denaga laga. Mo’gulentil denagalat, at osi enebe 12 ebano emin, 2#Mat. 27:55,56; Mrk. 15:40,41; Luk. 23:49is hwami pema mu’gat enebabut wiak a’ge onogola ’golukmu henokho lebigenebasulat, enebam ou wiak a’ge obabenebiselat, naduksogo obabenebegei a’ge logon emin, enemin denaga legesa. Hwami eria pema re, hwe Maria owi Magdala ogu legesa a’ge, nadugat mu’gat enebabut wiak a’ge enebe sabiren ogola ’goluk oruakma, at Yesus en henokho lebigenebesi a’ge ano emin, 3ye, mesik e, ap ’gain Herodes a’ge di a’ge yu a’ge e’gik pam welat taga laga a’ge ap onuk Khuza ai ugwe Yohana emin, hwe Susana emin, ye, mesik e, is hwami pema esan ebano emin, uang is ena’ge pam di a’ge yu a’ge o’go ’balogo Yesus osi eneminat lerontogulat denaga legesa.
“Ap mesik e’gen owi pelil laga,” oluk ebam elitsogo mo’gulentesi wene
(Matius 13:1-9; Markus 4:1-9)
4At Yesus o eba oruakma, aphwami modok a’bik o da ya en, esan a’bigat e’bek odoktu wegesema, at en wene ebam elitsogo disogo mo’gulentesi,
5“Ap mesik yabuk wokho owi yeriso a’ge e’gen owi peligoluk libaga. Libagarik, pelil lasumu re, e’gen owi mesik ebela pam ’belakpoluk laga. Asogo ’bisoam aphwami lagalat e, onoyuk en sobut-sebat holuk legesema re, sue darak noso a’ge wagarik perlengsogo ne’gei. 6Ye, e’gen owi logon e, helep delakma ’belakpoluk lagama re, perleneat ’baktegeitik e, ’gwiang a’bosu erlak en ’buk aga. 7Ye, e’gen owi logon e, molip salma ’belabegei a’ge re, molip ebano emin mesik erlige ’baktegeirik e, owi op a’ge ano molip ebano en sebelhesimu re, obuk hesirik ’gen-’gen aga. 8Ye, pema re, ’gwiang eseimu pelil laga a’ge re, ’baktegeirik e, lok agarik, edip lo’bok e’gen 100 ’gela’ge egesil laga,” oluk mo’gulentesi. Asogo mo’gulontoluk iak loksogoat eselat e,
“Henesa’go oruak holuk e, opsogo hwelit o,” oluk mo’gulentesi.
At Yesus en e, “Wene ebam elitsogo
mo’gulhentasu legi ai re, ebe disogo oluk o,”
oluk mo’gulentesi wene
(Matius 13:10-17; Markus 4:10-12)
9Asogo mo’gulentesimu, at osi iak wogu legesa a’ge ebano en, at Yesus disogo mo’gulegisa,
“Hat en wene ebam elitsogo mo’gulnentigen ai, ebe ’gesogo paget en egen,” oluk mo’gulegisema, 10#Yes. 6:9-10at Yesus en e, disogo mo’gulentesi,
“Allah en eragam enebasu wene ai, at ogola hisogo welago a’ge ano, his nak e, wene ai henaluk emagoluk ’baksogo mo’gulhonto oluk, epesi a’geat de, is aphwami ado ebano at Allah en e,
Enil hogu lema a’geat de, dokhumsogo hogu lema erlak o.
Ye, enesa’go hologu lema a’geat de, dokhumsogo pobi hogu lema erlak o,
oluk egei ai hegit emagoluk wene ai ebam elitsogoat mo’gulentasu legi o,” oluk mo’gulentesi.
At Yesus en, “Ap mesik e’gen owi pelil laga, oluk
mo’gulhentegis ano re, ebe disogo,”
oluk mo’gulentesi wene
(Matius 13:18-23; Markus 4:13-20)
11Asogo mo’gulentesirik e, pobuk mesik disogo mo’gulentesi,
“Wene ebam elitsogo mo’gulhentegis ano re, ebe disogo oluk. Owi pelil laga egi ano re, ebe Allah iak aiat o. 12Ebela pam ’begei ai ebe re, is aphwami pema Allah iak enesa’go holugularat de, demat oluk wogumu, Allah en enebe delonobuano oluk, Iblis wagalat e, wene onogola a’ge henokho woluk lasu aiat o. 13Ye, helep pam ’begei ai ebe re, is aphwami pema Allah iak enesa’go holugularat de, onogola enagai hil-hil wogularat de, enedemu eme’en yogo erlak en, demat oluk agauwa wei nak enede eberak poluk oruakma, wiak tuagoluk onogola ’gagalu agoam e, arat ’goboksogo ukpoluk libagai aiat o. 14Ye, molip salma ’belabegei ai ebe re, is aphwami pema Allah iak ai enesa’go holugulat enat de, onogola en e,
Eige. No’gosogo tul e, oluk, mennei yat horok eberugulat,
Na’ge a’bik wellep e, oluk onogola eberugulat, ’gwiangma a’ge onogola en enagai ho a’ge eberugulat, togwi ai en e, onogola Allah iak ai e’gen hurle ago erlakma en, lologo erlak ago aiat o. 15Ye, ’gwiang opma ’begei ai ebe re, is aphwami pema wene op wene ai enesa’go holugularat de, enedemu modok pobisogo horloluk ukpogwi erlak tenak welat, e’gen a’bik oso aiat o,” oluk mo’gulentesi.
Esaga ebam elitsogo mo’gulentesi wene
(Markus 4:21-25)
16 #
Mat. 5:15; Luk. 11:33 Asogo mo’gulontoluk e, mesik disogo mo’gulentesi,
“Aphwami en e, esaga ’gwialogo sogoluak en sebelogo pogulat, nogogumu ebano e lekho pogulat, togwi erlak o. Aphwami o pam ’gwi lagalat atiarak oruakma enagat houwagoluk e, esaga e delak a’ge pam hweriogo pogwi o. 17#Mat. 10:26; Luk. 12:2Asogo pogwiam e, di a’ge yu a’ge orlomurak welago a’ge ebano, selakma agalat, wene onogola hisogo welago a’ge ano, selakma ’baksogo pogulat, tua 18#Mat. 25:29; Luk. 19:26ai en e, wene henesa’go holugu legep a’ge ai, opsogo pobi togu lomup o. Is aphwami en tenak oruak a’ge ai re, logon emin ebam louksogo wogontouwa o. A’geat de, is pema tenak erlak a’ge ai re, onogola en e,
Weiyat ya re, elit oruak, opogwi a’ge ai delogo horlouwa o,” oluk mo’gulentesi.
“An nia nosi his yuat o,” oluk mo’gulentesi wene
(Matius 12:46-50; Markus 3:31-35)
19Asogo mo’gulentasu oruakma, at Yesus ia emin, osi emin, at e’bek wegesa ’gal e, aphwami a’bik emin oruak en e, e’bek ’gwilo mia aga. 20Asogo agama re, is aphwami pema en disogo mo’gulegisa,
“Yesus! Hat hia emin, hosi emin, horohebil wegesarik odipmu oruak o,” oluk mo’gulegisema, 21at Yesus en e, disogo mo’gulentesi,
“An nia nosi re, aphwami Allah iak enesa’go holugulat e, hegitsogo togwi a’ge aiat o,” oluk mo’gulentesi.
At Yesus en yasobu lok a’ge erlagaptegei wene
(Matius 8:23-27; Markus 4:35-41)
22Agauwa mesik erlige re, at Yesus ebe emin, osi iak wogu legesa a’ge ebano emin, ik so ogola ’gwigisarik e, disogo mo’gulentesi,
“Ik esa’go etle akhit libomok o,” oluk mo’gulontoluk e, libegesa. 23Libagalat e, at Yesus ano nogo egei. Nogo osokhwe, yasobu loksogo punhau wagama, ik hererimtak wagalat e, ’gwisalogo ik so ogola ’gwegeimu, so ano edenogo ’bigoluk tegei. 24Asogo tegeimu, is ebano en, at Yesus nogosoma elalugaptugulat e, disogo mo’gulegisa,
“Nonue a! Nonue a! Nis arat ik olomu ’bi lul ai a!” oluk mo’gulegisema, at Yesus elaluk agarik e, yasobu emin, ik hererimtak waga laga a’ge ano emin, wene yagesimu ’garok egeitik e, modok ha’buk egei. 25Ha’buk egeimu, at Yesus en osi ebano disogo mo’gulentesi,
“Henede an nebam he’berik welegep a’ge ano, ’geba lagama en ogu legep,” oluk, asogo mo’gulentesimu is onogorlok egesarik, is-is nak ogulat e,
“Eige! Ap yu sa epegep. Yasobu emin, ik hererimtak wago a’ge emin, at iak pam,
Erlak emen, osoam, iak hologoat, erlak aga ai nogorlok o,” oluk erliktigisa.
At Yesus en ap o Gerasa a’ge mesik mu’gat enebabut wiak a’ge ogola ’goluk oruakma henokho lebigenebesi wene
(Matius 8:28-34; Markus 5:1-20)
26Asogo oluk, pobuk e, at Yesus osi enemin ik Galilea omugwe esa’go etle akhit ik so wusogo o Gerasa libegesa. 27-29Libegesarik, ik iak pam libegesa ’gal e, ap mesik owi seli kota ai a’ge mu’gat ebabut wiak a’ge ogola ’gwi lagama welaga a’ge, at Yesus e’bek waga. Ap ai page enat mu’gat ebabut wiak a’ge agauwa nin hwedik nan hwedik ogola ’gwisoam, is aphwami pema en e’gik oyuk ’besieme’gen herle pam hettogu legesa a’geat de, herle derlep-derlapsogo hwikholuk, mu’gat enebabut wiak a’ge ano en woluk o leimu aphwami erlakma eba lasu lagarik e, pobuk osum ’buktak erlak age’golomat, at owi pam opsogo wolom erlakma en owik werak a’ge onobugumu eba modok welat Yesus ebe wagoam il yetholuk e, eragam hutla ’gwegeitik iak loksogoat disogo mo’gulesi,
“Yesus. Hat Allah ’gain Onuk Logo a’ge omlogo yu, an no’gosogo taknebaigoluk wegen,” oluk mo’gulosokhwe, at Yesus en mu’gat enebabut wiak a’ge ebano libemagoluk mo’gulesimu, at ano en e,
“Nue. Wiagapnobogun o,” oluk iak sakhosogo mo’gulesi. 30Asogo mo’gulesimu re, at Yesus en hin wokhasulat e, disogo mo’gulesi,
“Hat honuk sa,” oluk mo’gulesimu, ap ano mu’gat enebabut wiak a’ge esan logolak mesik ogola ’goluk welegesa a’ge ebano en e,
“Nonuk esan logolak u ’gela’ge, Legiun,” oluk mo’gulesi. 31Asogo mo’gulotluk e, is mu’gat enebabut wiak a’ge ebano mukho ’gwiang ogola opma orogobu ’belabonobuano oluk eniak sakhosogoat, Yesus mo’gulegisa. 32Ai erlige, o eba dom petne wam modok a’bigat mugwa wil nosoma re, is mu’gat enebabut wiak a’ge ebano en e, Yesus disogo mo’gulegisa,
“Wam etleba ogola yagatlai lul en e, peraknenebemen o,” oluk, eniak sakhosogo mo’gulegisa. Asogo mo’gulegisema, at Yesus en e,
“I o. Lit o,” oluk, mo’gulentesimu re, 33is mu’gat enebabut wiak a’ge ebano, ap ano ogola en henokho liplau wegesarik, wam ebano ogola yagatlai legesema re, modok ’bule lusogo, ik omugwe ye’gelakma ’boluk e, lulasogo ik olomu legesa. 34Asogo agama re, is ap wam ’gwelakharok welegesa a’ge enil hegesarik e, pungtak yo’go legesarik, wene aga a’ge ano aphwami o seli wei o’gwe, lok o’gwe, mo’gulentil legesa. 35Asogo mo’gulentil legesema is aphwami ebano en e,
“No’gosogo agama en egesa,” oluk, enil houwogoluk Yesus e’bek wegesa. Wegesema re, ap mu’gat enebabut wiak a’ge ogola en libaga a’ge ano ebabut heberlagarik osum ’buksogo Yesus eragam hweriogo oruakma enil hegesarik, onogorlok aga. 36Onogorlok agama re, is aphwami pema Yesus en ap ano obaptisokhwe enil hegesa a’ge en, disogo mo’gulentigisa,
“Ap mu’gat enebabut wiak a’ge ogola ’goluk welegesa ebano a’ge disogo obaptegei,” oluk ’beli’gogo mo’gulentigisa. 37Asogo mo’gulentigisema, is aphwami o kota Gerasa a’ge emin, o esa’go’gwe a’ge emin, enebe ’berlegat onogorlok a’bik agarik e, Yesus disogo mo’gulegisa,
“Yesus. Hat hebe nenemin yema wolorogun erlak. Lak o,” oluk mo’gulegisa. Asogo mo’gulegisema, at Yesus ik so ogola ’gwegeitik wusogo re, togolik waga. 38Weigoluk tagoma re, ap mu’gat enebabut wiak a’ge ogola ’goluk oruakma henokho lebikpesi a’ge ano en, disogo egei,
“Nue. Ne’birek no’gu lomul en, louwok o,” oluk, iak erlagaik ’gusogo Yesus mo’gulesimu, at Yesus en e,
“Erlak o,” oluk owi pam perakpasulat e,
39“Howi pam lak o. Laguntik e, Allah en takhebesi a’ge ai ’beli’gogo mo’gulentil denaga lomup o,” oluk, esa’go wusogo perakpesimu ap ano owi pam lagarik e,
“Yesus en disogo taknebesi o,” oluk, ’beli’gogo is aphwami o kota eba a’ge ’berlegat mo’gulentil denaga laga.
At Yesus en Yairus agalogo elalugap pasulat, hwe
mesik emep lasu modok welaga a’ge
obap pasulat, tegei wene
(Matius 9:18-26; Markus 5:21-43)
40At Yesus ebe ik etle akhit en naikhe’gwe liplau wagama re, is aphwami enebe a’bik en, at ebe yetharok welegesarikmu no oluk e, hau wusogo ebe wegesa. 41-42Asogo wegesema, ap mesik onuk Yairus, o aphwami Yahudi a’ge se’ban ogumu eba onue ’gain a’ge, agalogo mesigat dogo a’ge ebe dagaga hwerli en, umur 12 tahun aga ’gela’ge, ou en wareriogoluk tagokhwe, Yesus e’bek wagarik eragam odogorlu pam hurotluk hau weriselat e, disogo mo’gulesi,
“Nue. An nowi pam louwok o,” oluk, iak erlagaik ’gusogo iak mo’gulesi. Asogo mo’gulesimu, Yesus at e’birek louwogoluk lagaimu re, aphwami modok a’bigat e’berlik ’bi-’betesogo legesa. 43Lagaimu re, hwe mesik emep lasu modok oruakhwe 12 tahun tegei a’ge, is pema en obap tuagoluk yo’go enebasu laga a’geat de, is en obaptu erlak oruakhwe, emep ano ’garok u erlak modok welagarik, 44aphwami a’bik ebano lagaihwe, Yesus o’borl akhit lagarik e, osum ologun e’gik tenhesi. Asogo tenhasukhwe erianoat emep ano ’garok egei. 45Asogo e’gik tenhesimu, at Yesus en e, disogo egei,
“Sa en e’gik tenniesi logwe,” oluk egeimu is aphwami ebano ’berlek en,
“Nis erlak o,” oluk mo egesema, at Petrus en e, disogo mo’gulesi,
“Nue! Aphwami modok a’bik hi-hoposogo wagalat oluk e, hat hebetne egilluk wegesema ai o,” oluk mo’gulesi. 46Asogo mo’gulesimu, at Yesus en e, disogo egei,
“Erlak o. Aphwami pema en ene’gik tenniegesema en de, an nannisogo elalin tagenebasu legi ano a’ge nogola en aphwami logon enebam lagama enagat hegi o,” oluk mo’gulesi. 47Mo’gulesimu, at hwe ano ogola en e,
“Arat pobi nebegei hegi o,” oluk, ogorlok agarik e, uak erlik-erlik Yesus e’bek wagarik e, odogorlu pam eragam hutla ’gwegeitik disogo mo’gulesi,
“An disogo oluk hosum ne’gik tenhegi o. Asogo tenhasukhwe erianoat op egi ai o,” oluk, aphwami enilem ’beli’gogo mo’gulesi. 48Asogo mo’gulesimu, at Yesus en disogo mo’gulesi,
“Nerei o! Hede nebam he’berik pegen ai en op e’gen o. Holuk e, hogola opsogo lak o,” oluk perakpesi.
49Asogo mo’gulosokhwe erianoat, o aphwami Yahudi a’ge se’ban ogumu onue ’gain ano owi pam en ot mesik yo’go wagarik e, disogo mo’gulesi,
“Nue. Hagalogo ano arat waragama wegi o. Holuk e, nonue ’gain wene mo’gulnentasu a’ge ai, ’burlat he’birek louwogoluk ebam wik-wiaktak pagun o,” oluk mo’gulesi. 50Asogo mo’gulesimu at Yesus esa’go hwelegeitik e, ’gain ano disogo mo’gulesi,
“Hede perik togun. Hede nebam he’berik pagun holuk e, hagalogo ai op ema o,” oluk mo’guletil etil e, 51Yairus owi pam legesa. Legesarik e, aphwami pema odipmu welemagoluk mo’gulontoluk e, Petrus emin, Yohanes emin, Yakobus emin, hwele ano aik ia emin, enebe eria nak wogonoboluk ogola ’gwegei. 52’Gwigisa ’gal e, aphwami modok a’bik hwele ano werakma welat e, ebaget lo’gu marogulat, enede wathorlugulat, tugumu ’goluk at Yesus en e, disogo mo’gulentesi,
“Lo’gu marogwi puk o. Hwele ai warom erlak. We nogoso yo,” oluk mo’gulentesimu, 53is en e,
Hwele ai arat waraga, oluk enalukmu no oluk e, Yesus eida a’bik ebigisa. 54Asogo tigisema, at Yesus en hwele ano e’gik tenakho edikpesirik e, disogo mo’gulesi,
“Nagalogo yo. Inemen o!” oluk mo’gulosokhwe erianoat, 55arogun libaga a’ge pobuk ’gwegeimu ebe arat elaluk agarik inaga. Inagama, at Yesus en mo’guleselat e,
“Oso’boru mesik nouwagoluk wogomis o,” oluk mo’gulentesi. 56Asogo mo’gulentesimu, at hwele ano aik ia en e,
“Nonogorlok o!” oluk, erliktigisa a’geat de, at Yesus en e, disogo mo’gulentesi,
“An tagokhwe henil niegep a’ge ai, aphwami logon modok mo’gulentagup o,” oluk, enesa’go weregei.
Currently Selected:
Lukas 8: Wul
Highlight
Share
Copy
Want to have your highlights saved across all your devices? Sign up or sign in
