Lukas 4

At Iblis en Yesus ede ’gagaligoluk

e’bek waga laga wene

(Matius 4:1-11; Markus 1:12-13)

1At Yesus ik Yordan ik olomu ’belakpesimu re, Allah Arogun ogola ’betesogo ’gwegeimu liplau wagarik lasumu, at Allah Arogun en ebe woluk e, o leimu aphwami erlakma eba laga. 2Lagarik eba oruakma agauwa 40 Iblis en ede ’gagaligoluk e’bek waga laga. Wago modok oruakhwe, agauwa 40 eria so’boru modok no erlak welagarikmu no oluk e, so’boru modok nele agama, 3pobuk at Iblis e’bek wagarik e, disogo mo’gulesi,

“Hat demat Allah omlogo holuk e, helep yema so’boru roti ’gela’ge emagoluk mo’gulemin o,” oluk mo’gulesimu, 4#Ula. 8:3at Yesus en e, disogo mo’gulesi,

“Allah en e,

Aphwami so’boru nak no’gwi holuk e,

enelaluk modok welagai erlak o,

oluk egeimu pelal wokho pegesema oruak o,” oluk mo’gulesi. 5Asogo mo’gulesimu, pobuk Iblis en Yesus woluk e, erabu pei ligagarik e, eba en o ’gwiangma di owi yu owi ’gain ononuk logo a’ge welagai o’gwe ’berlegat yegelogo selakma poluk mesik erlige il yethouwagoluk mo’gulesi. 6Mo’guleselat e, disogo mo’gulesi,

“Is ’gaindek ononuk logo a’ge welagaimu eniak hologo welat erligonobogwi ai ’berlegat an eiye welemagoluk woknegisema re, an nede ebetholuk,

Ap ai wogeik, oluk wogentasu legirikmu re, 7hat hodogorlu pam neragam hutla ’gu woroguntik erliknobogun holuk e, ’berlegat hat eiye wolorogun en e, wokheik o,” oluk mo’gulesi, 8#Ula. 6:13at Yesus en e, disogo mo’gulesimu,

“Allah en eselat e,

His en e, henaik Allah ’gain Nonuk Logo a’ge anat hodogorlu pam neragam hutla ’gu oroguptik erliknobogulat e,

an nebaget nak togu lemis o,

oluk egeimu pelal wokho pegesema oruak o,”

oluk asogo mo’gulesimu re, 9-11#Mzm. 91:11-12pobuk Iblis en Yesus woluk e, o Yerusalem lagarik e, Yesus ebe o Allah owi dum yatsogo werik a’ge pam woluk ligagarik e, disogo mo’gulesi,

“At Allah en e,

An nosi malaikat yo’go ’belabonobou waga legi a’ge ebano en tenhiarok welemagoluk yo’go enebaik o,

oluk egeimu oruak o. Ye, agaikhen disogo egeimu oruak,

Hat hoyuk helep pam dungsogo wathwerlagunno oluk, is malaikat ai ene’gik delakma wokhobua o,

oluk pelal wogo oruagat epegi. Holuk e, hat demat Allah omlogo holuk e, ya en ’golokho orogobu ’bi lak da,” oluk mo’gulesimu, 12#Ula. 6:16at Yesus en e, disogo mo’gulesi,

“Allah en eselat e,

His en, an nebaget,

Nenaik ’gain Onuk Logo a’ge anni oruak a? Erlak a, oluk, nebabut ’balogup no yo,

oluk egeimu pelal wokho pegesema oruak o,” oluk mo’gulesi. 13Asogo mo’gulesimu, at Iblis en Yesus ebabut ’baligoluk di walhasulat, yu walhasulat, til laga a’ge mia agama re, pobuk mo’gulosokhwe elit ema hwi a, oluk, ukpoluk ’bok laga.

At Yesus togolik o Galilea orlu aga wene

(Matius 4:12-17; Markus 1:14-15)

14At Iblis ano arat ’bok lagama en e, at Yesus Allah Arogun annisogo ogola oruakma re, togolik o Galilea do’go orlu aga. Orlu agama re, at obok o eba modok saga egei. 15Asogo saga osokhwe, at ebe eba welat, o se’ban ogwi’gwe ’goluk wene mo’gulentasukhwe aphwami eba a’ge ’berlek en erliktogu legesa.

Aphwami o Nazaret a’ge onogola en,

Yesus mi-miarak pegesa wene

(Matius 13:53-58; Markus 6:1-6)

16Asogo erliktugukhwe re, at Yesus o Nazaret ebe arlue agama ebano laga. Lagarik e, at taga laga ’gela’geat, agauwa sabit a’ge pam Allah paget weat welat, se’ban uogoluk o aphwami Yahudi a’ge se’ban ogumu ebano ’gwegeitik e, Allah iak pelal wogo a’ge onuk tualiselat mo’gulentaigoluk inaga. 17Inagama re, ap mesik Allah iak ap Yesaya en pelal wogo pesi a’ge ano Yesus wogosi. Wogesimu hebilogo il ’gwelakhesi ’gal e, wene disogo egei a’ge pelal wokho oruakma onuk tualogo mo’gulentesi,

18 # Yes. 61:1-2 “Is aphwami ena’ge modok erlak a’ge enerlagaik a’ge ai op wene yu mo’gulentasu lemagoluk ediknebesimu no oluk e,

naik ’gain Onuk Logo a’ge Arogun ’belakpou wagama an nebam louktak oruak o. Ye, yo’go nebasulat e, disogo mo’gulnesi,

Is aphwami ene’gik herle werak a’ge herle hebilonobu wene emin,

enil hopnik a’ge dek uagoluk obabonobu wene emin, mo’gulentasulat,

is aphwami eneragam ’gela’ge sebelogo onobogwi a’ge delogo enematekma enebasulat,

19Nenaik ’gain Onuk Logo a’ge en obapnonobua a’ge arat horok lau waga o, oluk mo’gulentasulat, taga lomup, oluk peraknobou wagama wegi ai o,”

oluk egeimu, pelal wogo a’ge ano onuk tualiselat mo’gulentesi.

20Arat mo’gulontoluk pelal wogo a’ge ano e’girlogo re, ap eiye a’ge ano wogotluk e, ebe huraga. Huragama is aphwami ’berlegat se’ban uogoluk emin ’gwigisa a’ge ebano enil at ebam modok puttak pegesa. 21Asogo puttak oruakma, at Yesus en e,

“Allah iak pelal wogo yu pam,

Disogo tul, oluk egesa a’ge ano yogodak mo’gulhentasuam e, henesa’go holugukhwe yayat emin hegit aga o,” oluk egeimu, 22is aphwami ebano en e, disogo egesa,

“Ap yu ap Yusuf omlogo ano erlak no? Arat o. A’geat de, at en wene op modok mo’gulnentesi ai nonogorlok o,” oluk erliktigisa. 23Asogo erliktigisema, at Yesus en e, disogo mo’gulentesi,

“Is aphwami en, nin hwedik nan hwedik ’ban yeng hogulat e,

Hat hebe ap dokter ’gela’ge eba re, hebam ou ai hu’gwarek en obaphwerlagunmu re, oluk ogwi a’geat de, his en lagaksogo an mo’gulnorogup hegi. Asogo mo’gulnoroguptik e,

O Kapernaum en taga legen a’ge hologu lege ano ’gela’ge, yogodak hu’gwarek howi pam yema en ogo, asogoat mesik tin o, oluk, mo’gulnomogoluk ogu legep hegi o,” oluk asogo mo’gulontoluk mesik disogo mo’gulentesi,

24 # Yoh. 4:44 “Is ap Allah iak mo’gulontogwi a’ge ai re, onu’gwarek onowi pam eba onuelak enarilak en hau do’goksogo wogonobogwi erlak o, oluk, demat mo’gulhentegis. 25#1Raj. 17:1Ye, ap Elia welaga eria hegit e, moru wago erlak 3 tahun agarik e, pobuk lagaksogo dugwi hebarligen pollegeimu re, o eba da ya so’boru modok obuk aga. Eria hegit e, aphwami Israel a’ge oruakma hwami sugwe a’bik welegesa a’geat de, 26#1Raj. 17:8-16Allah en Elia hwami sugwe a’ge eba logon entai louwagoluk ene’bek perakpo erlak o. We, hwe sugwe a’ge mesigat a’ge o wema Sidon seli onuk Sarfat eba oruakma e’bek perakpesi o. 27#2Raj. 5:1-14Ye, ap Elisa en Allah iak mo’gulentasu laga eria hegit e, o aphwami Israel a’ge oruakma eba ou hwena’go ’gela’ge ano a’ge a’bik welegesa a’geat de, mesik obabenebise laga modok erlak. We, ap Naman owi o Siria a’ge aiat obaptegei o, oluk, demat mo’gulhentegis,” oluk asogo mo’gulentesimu re, 28is Yahudi a’ge se’ban ogumu welegesa a’ge enesa’go hweligisarik e, onolot het a’bik aga. 29Onolot het a’bik agarik, enebe inegesarik, at ebe ene’gik tenakho odipmu lebikpoluk e, o Nazaret eragam de, duk pam werigisema ebano woluk ligegesarik, pela’gogo ’bule ’belabuogoluk tigisa. 30Asogo tigisa a’geat de, at Yesus is ebano ugonoboluk ene’gerlakma en niagup-hiagup a’ge toluk laga.

At Yesus en ap mesik mu’gat ebabut wiak a’ge ogola ’gwegei a’ge henokho lebikpesi wene

(Markus 1:21-28)

31Ene’gerlakma en niagup-hiagup a’ge libagarik e, o Galilea do’go kota onuk Kapernaum ’gwegei. ’Gwegeitik e, agauwa sabit a’ge pam Allah paget weat welat, wene mo’gulentesi. 32#Mat. 7:28,29Mo’gulentasulat, wene ebe eiye a’ge en ogwi ’gela’ge osoma is ebano en e,

“Nonogorlok e!” oluk erliktogu legesa. 33O se’ban ogumu ebano oruakma, ap mesik mu’gat ebabut wiak a’ge ogola ’gwegeimu welat iak loksogoat disogo mo’gulesi,

34“Yesus Nazaret a’ge yu a! Hat en no’gosogo taknenebaigoluk wegen! Nis wiagapnenebigoluk wegen a? Hat hebe re, Allah u’gwarek paget edikhebesirik perakhobou wagama wegen ai, an en pobi hebegisat o,” oluk iak loksogo mo’gulesimu, 35at Yesus en wene yageselat e,

“Hiak. Ap yu ogola en henokho libemen o,” oluk mo’gulesimu re, mu’gat ebabut wiak a’ge ano en ap ano ebe erle’galogo aphwami a’bik ebano ene’gerlakma hwikhai lagama re, ap ebe wiagap tu erlakma re, we libaga. 36Asogo libagokhwe re, aphwami a’bik ebano onogorlok egesarik e, is-is nak ogulat e, disogo egesa,

“At iak oso ai no’gorak. At en mu’gat enebabut wiak a’ge,

Libemis, oluk u ai eiyeat welat, iak annisogo wene yagentasuam libagai ai nonogorlok e,” oluk erliktigisa. 37Asogo erliktigisarik, at Yesus obok ’baksogo o da ya eba woluk libegesa.

At Yesus en Simon iemalhwe emin, aphwami pema emin, ou obabenebegei wene

(Matius 8:14-17; Markus 1:29-34)

38Asogo obok woluk libegesema, at Yesus o se’ban ogumu ebano ukpoluk e, ap Simon owi pam laga. Lagama, at Simon ai iemalhwe ou ebam aganhan a’bik oruakma Yesus en obap tuagoluk yo’go pegesema, 39at en, hwe ano eragam lagarik edik welat e,

“Ou yu erlak emen o,” oluk, mo’gulosokhwe erianoat, ou ano erlak aga. Erlak agama, hwe ano inagarik e, is lerentasu laga.

40Lerentasu oruakma, o mo il obuk osokhwe, aphwami en is pema enebam di ou yu ou oruak a’ge ’berlegat wogonoboluk Yesus e’bek wegesema, at en enebe lo’bok e’gik tenentil lagarik obabenebegei. 41Asogo obabenebegeimu, is pema akhit enebe logolagat, mu’gat enebabut wiak a’ge onogola ’goluk welegesa a’ge en disogo mo’gulegisa,

“Allah omlogo harat o,” oluk eniak ngai il-il libegesa a’geat de, is onogola en e,

“Kristus Allah en, delnonobuagoluk edikpesirik perakpou weik egei ano ebe yuat o,” oluk, enalukmu re, Yesus en eniak erlagat libemagoluk wene yagentesi.

At Yesus en o seli lo’bok wene

mo’gulentil laga wene

(Markus 1:35-39)

42Asogo yagentesirik e, nogo oluk hubet o arat dakha egeimu re, at Yesus o aphwami erlakma eba laga. Lagama, aphwami modok a’bik, at heratil legesarik ebe arat emin sarlok tigisarik e, wema louwano oluk e, ene’gik tenak pegesa. 43Tenak pegesema, at Yesus en e,

“Op wene Allah eragam enebasu a’ge wene ano o seli pema akhit eba eminat mo’gulentil denaga lemagoluk peraknobou wagama wegirikmu re, an o ebayat mo’gulentil nese leik o,” oluk mo’gulentesi. 44Asogo mo’gulontoluk e, o Yudea do’go aphwami Yahudi a’ge se’ban ogumu ebano ’gwegeitik, wene ano mo’gulentasu laga.

Currently Selected:

Lukas 4: Wul

Highlight

Copy