Lukas 3
3
At Yohanes en ik olomu ’belabenebise laga wene
(Matius 3:1-12; Markus 1:1-8; Yohanes 1:19-28)
1Ap ’gain onuk logo a’ge Kaisar Tiberius ai aphwami Roma a’ge ’berlegat at e’gik pam tenentarok 15 tahun oruakhwe ai hwerli en, ap Pontius Pilatus ai ebe gubernur o propinsi Yudea welaga. Ye, ap Herodes ai ebe ’gain welat, o Galilea do’go eba tenentarok welaga. Ye, ap ’gain Herodes ot Filipus ai ebe ’gain welat e, o Iturea eba emin, o Trakhonitis eba emin, tenentarok welaga. Ye, ap Lisanias ai ebe ’gain welat, o Abilene ebayat tenentarok welaga. 2Onuelak ’gaindek pemerintah paget is eria oruakhwe, Allah paget e, ap Hanas Kayafas e’birek Allah eiye a’ge onuelak ’gain welegesa. Asogo oruakhwe, at Yohanes ap Zakharia omlogo ano o leimu aphwami erlakma eba oruakma, Allah en wene mesik mo’gulesi. 3Asogo mo’gulesimu, o Yordan do’go eba da ya denagalat, aphwami mo’gulentasulat e, disogo ese laga,
“Wene henebam a’ge Allah en erlagapsogo ukpou wagoluk e, his wiak togu legep a’ge ai ukpoluk, henebabut heberlemis o. Henebabut heberlumu, an en ik olomu ’belaphenebise leik o,” oluk, mo’gulentil denaga laga. 4#Yes. 40:3-5Asogo mo’gulentil denaga laga ai re, ap Yesaya, Allah iak mo’gulentasu laga a’ge ano en eselat e,
“Ap mesik o leimu aphwami erlakma eba en iak ngai eselat e,
Eiga! Nonue ’gain Onuk Logo a’ge wema’gwe ebela opsogo yorogulat,
’gorlo ’gela’ge takholuk e, hegitsogo yorogulat, togu lemis a, oluk worlentasu.
5Do’goma holuk e, ’gwiang petaksogo hegirap tugulat,
dom duktak holuk e, damulogo hegirap tugulat, ebela yorlo-’gorlotak holuk,
hegirap tugulat, sirak-harak holuk e, ’bulogo ebelugulat, togu lemis a.
6Asogo togup holuk e, Allah en aphwami ’berlek delnonobua a’ge mesik perakpou agoma henil hagup ani o,”
oluk, Yesaya en pelal wokho pesi a’ge hegitsogoat, at Yohanes en ogo asogoat mo’gulentil denaga laga ai o.
7 #
Mat. 12:34; 23:33 Asogo mo’gulentil denaga lagama re, is aphwami ebano modok a’bik ik olomu ’belabonobuagoluk Yohanes e’bek odoktu aga legesa a’ge disogo mo’gulentasu laga,
“His ’gosu en dogo’gwe a’ge yema logwe! His e, Allah olot het a’bik om a’ge ano henebam pouema hweiye elirat lo oluk sa en mo’gulhentesimu no? Mia o. 8#Yoh. 8:33Holuk e, henede eberak poluk, wiak togu legep a’ge ukpoluk e, henebabut demat heberlago holuk enagat emagoluk hegitsogo nak togu lomup o. Ye, henede en e,
Abraham ai nis nenaik, oluk epagup o. At Allah en Abraham eiyagai ’gela’ge emagoluk helep yu a’ge elit tuat o, oluk mo’gulhentegis ai. 9#Mat. 7:19E edip lo’bok e’gen op a’ge egesiso erlak holuk, mukho odoukmu hwikhaigoluk ’besie e eme’en pam pangtak modok oruak o,” oluk mo’gulentesi. 10Asogo mo’gulentasu lagama, is aphwami a’bik ebano en e, disogo mo’gulegisa,
“Holuk e, nis nenebabut ’gesogo tu,” oluk mo’gulegisema, 11at en e, disogo mo’gulentesi,
“Ap sa en, osum a’gul akhit a’ge ’biren oruak holuk e, at ap osum erlak a’ge mesik wogoum o. Ye, so’boru oruak holuk e, asogoat lerontoat o,” oluk mo’gulentesi. 12#Luk. 7:29Asogo mo’gulentesimu re, is ap pemerintah paget uang ’gonu oluk wogwi a’ge Yohanes e’bek wegesarik e, disogo egesa,
“Nis ogo re, ik olomu ’belapnonobogun en e, nue. Nenebabut no’gosogo tugulom,” oluk, asogo mo’gulegisema, 13at Yohanes en e, disogo mo’gulentesi,
“His en o’go wogulat, honogola en ’gagalogo logon ebam mangnosogo wogwi erlak, we,
Disogo wogu lomup o, oluk mo’gulhontogwi a’ge aiat hegitsogo wogu lomup o,” oluk mo’gulentesi. 14Asogo mo’gulentesimu, is ap tentara a’ge wegesarik e, disogo mo’gulegisa,
“Nis ogo re, nenebabut no’gosogo tugulom,” oluk mo’gulegisema re, at Yohanes en e,
“Aphwami ena’ge-a’ge wokhontouwagoluk heniak ningsogo mo’gulontogulat, heniak eseiyat wene enebam poluk ono uang horlogulat, togup no yo. At e, yabuk togu legep hegitsogoat, o’go gaji wokhontogwi ai,
Elirat woknentigisa, oluk henede yamuksogoat wogu lomup o,” oluk mo’gulentesi. 15Asogo mo’gulentesimu, is aphwami ebano en enede eberugulat e,
“Allah en ap mesik delnonobuagoluk edikpoluk perakpou weigoluk, yetharok welege a’ge ano, at Yohanes yuat hwi a?”
oluk enede opogwi oruakma re, 16at Yohanes en disogo mo’gulentesi,
“An nebe malik wei a’ge nanni erlak a’ge en, we, ik olomu nak ’belaphenebise legi o. A’ge re, at mesik ’gain anni a’bik a’ge pobuk wema o. At ebe wemarik e, at en ik olomu ’belaphonobu ’gela’ge, Allah Arogun emin, odouk magale emin, henebam ’belakpouma o. At ebe ’gain anni a’bik ai en e, oyuk sum herle hettak a’ge, an nebe malik wei a’ge en hebelu re, mia o. 17Gandum e’gen degelu ebele paget, wabun pam pusogo hwikhai louwa a’ge, at eiye a’ge e’gikmu tenakho oruak ai. Degelu hegit lau wago holuk, op a’ge holuk, degelogo pasumu ebale opma pasulat, ollong wiak a’ge holuk degelogo odouk nekhi oso erlakma ebano hwikhai lasulat, tua o,” oluk mo’gulentesi. 18Op wene ano aphwami a’bik mo’gulentasulat e, enesa’go asogo wetil denaga laga. 19#Mat. 14:3,4; Mrk. 6:17,18Enesa’go asogo wetil denagalat e, at ’gain onuk logo a’ge Herodes ai en ot ugwe Herodias ai e’gik abusak lisogo wasulat, di wiak yu wiak a’bik tagalat, til denaga laga a’ge paget, at eminat esa’go weregeimu re, 20at Herodes ano wiak til waga lagarik e, pobuk ebam louksogo, Yohanes ebe e’gik herle wusogo re, o aphwami ene’gik herle wusogo onobugumu ebano ’gwelakpesi.
At Yesus ik olomu ’belabegei wene
(Matius 3:13-17; Markus 1:9-11)
21At Yohanes en aphwami ’berlegat ik olomu ’belabenebiselat e, at Yesus ogo ik olomu ’belabegeiyat. Ik olomu ’belabegeimu, at Yesus ebe en se’ban osokhwe re, ’bogorl hialogo, 22#Kej. 22:2; Mzm. 2:7; Yes. 42:1; Mat. 3:17; Mrk. 1:11; Luk. 9:35Allah Arogun sue ’berl ’gela’ge ebam duk la’bu aga. Asogo tegeimu re, ’bogorl pam en iak disogo egei,
“Hat hebe an nomlogo nede hwedik a’ge. Hat hebaget nogola nagai epasu legi o,” oluk egei.
At Yesus a’bu e’balak dagatil wegesa wene
(Matius 1:1-17)
23At Yesus ebe umur 30 tahun agarik e, di bele yu bele til denaga leigoluk e’gik tenhesi. Ye, at ebe re, is aphwami en Yusuf omlogo oluk epegesa.
Ye, Yusuf ai re, Eli omlogo.
24Ye, Eli ai re, Matat omlogo.
Ye, Matat ai re, Lewi omlogo.
Ye, Lewi ai re, Malkhi omlogo.
Malkhi ai re, Yanai omlogo.
Yanai ai re, Yusuf omlogo.
25Yusuf ai re, Matica omlogo.
Matica ai re, Amos omlogo.
Amos ai re, Nahum omlogo.
Nahum ai re, Hesli omlogo.
Hesli ai re, Nagai omlogo.
26Nagai ai re, Maat omlogo.
Maat ai re, Matica omlogo.
Matica ai re, Simei omlogo.
Simei ai re, Yosekh omlogo.
Yosekh ai re, Yoda omlogo.
27Yoda ai re, Yohanan omlogo.
Yohanan ai re, Resa omlogo.
Resa ai re, Zerubabel omlogo.
Zerubabel ai re, Sealtiel omlogo.
Sealtiel ai re, Neri omlogo.
28Neri ai re, Malkhi omlogo.
Malkhi ai re, Adi omlogo.
Adi ai re, Kosam omlogo.
Kosam ai re, Elmadam omlogo.
Elmadam ai re, Er omlogo.
29Er ai re, Yesua omlogo.
Yesua ai re, Eliezer omlogo.
Eliezer ai re, Yorim omlogo.
Yorim ai re, Matat omlogo.
Matat ai re, Lewi omlogo.
30Lewi ai re, Simeon omlogo.
Simeon ai re, Yehuda omlogo.
Yehuda ai re, Yusuf omlogo.
Yusuf ai re, Yonam omlogo.
Yonam ai re, Elyakim omlogo.
31Elyakim ai re, Melea omlogo.
Melea ai re, Mina omlogo.
Mina ai re, Matata omlogo.
Matata ai re, Natan omlogo.
Natan ai re, Daud omlogo.
32Daud ai re, Isai omlogo.
Isai ai re, Obed omlogo.
Obed ai re, Boas omlogo.
Boas ai re, Salmon omlogo.
Salmon ai re, Nahason omlogo.
33Nahason ai re, Aminadab omlogo.
Aminadab ai re, Admin omlogo.
Admin ai re, Arni omlogo.
Arni ai re, Hezron omlogo.
Hezron ai re, Peres omlogo.
Peres ai re, Yehuda omlogo.
34Yehuda ai re, Yakub omlogo.
Yakub ai re, Ishak omlogo.
Ishak ai re, Abraham omlogo.
Abraham ai re, Terah omlogo.
Terah ai re, Nahor omlogo.
35Nahor ai re, Serug omlogo.
Serug ai re, Rehu omlogo.
Rehu ai re, Peleg omlogo.
Peleg ai re, Eber omlogo.
Eber ai re, Salmon omlogo.
36Salmon ai re, Kenan omlogo.
Kenan ai re, Arpakhsad omlogo.
Arpakhsad ai re, Sem omlogo.
Sem ai re, Nuh omlogo.
Nuh ai re, Lamekh omlogo.
37Lamekh ai re, Metusalah omlogo.
Metusalah ai re, Henokh omlogo.
Henokh ai re, Yared omlogo.
Yared ai re, Mahalaleel omlogo.
Mahalaleel ai re, Kenan omlogo.
38Kenan ai re, Enos omlogo.
Enos ai re, Set omlogo.
Set ai re, Adam omlogo.
Adam ai re, Allah omlogo.
Currently Selected:
Lukas 3: Wul
Highlight
Share
Copy
Want to have your highlights saved across all your devices? Sign up or sign in
