Lukas 2

Yesus dagaga wene

(Matius 1:18-25)

1Eria hegit e, ap ’gain onuk logo a’ge Kaisar Agustus ai en aphwami o di owi yu owi ononuk ’baluagoluk yo’go lebigenebesi. 2Ononuk naduk-naduk ’baligisa ai, ap onuk Kirenius ai, o propinsi Siria eba ’gain gubernur oruakhwe ’baligisa. 3Asogo ononuk ’baluagoluk aphwami onowi seli lo’bok ’gwil legesa.

4-5Ye, at Yusuf ogo re, Daud en dogo’gwe a’ge no oluk e, o Galilea do’go o onuk Nazaret ai en e, o Yudea ap Daud dagagama, o onuk Betlehem ’bigoluk, at Maria e’birek iak tagalat welaga a’ge ano emalik ogola oruakma e’biregat ononuk ’baluagoluk ’bigisa. 6’Bigisarik eba oruakma emalik ano doru hegit agama, 7emalik naduk a’ge abat deregei. Deregeitik e, o aphwami ap ’bok a’ge nogogumu ebano modok ’beterak en e, sum kain a’ge pam e’girlogo, sapi so’boru nasumu ’ga’gokma ebano ebe ’bourak pesi.

Is ap wam domba o’gonugumu, malaikat ene’bek ’bu egesa wene

8Eria hegit e, o Betlehem esa’go’gwe eba, is ap wam domba o’gonogulat welagai a’ge logon huba’go onuam o’gonogu legesa. 9Asogo oruakma eriano, Nenaik ’gain Onuk Logo a’ge malaikat ’bogorl pam en yo’go ’belagonobou wago a’ge mesik ’ga en ’gela’geat wagarik e, onlogotma inagoam e, Nenaik ’gain Onuk Logo a’ge erliktogwi a’ge amulit enebam yogo pesimu, is onogorlok modok aga. 10Onogorlok agama re, at malaikat ano en e, disogo mo’gulentesi,

“Honogorlok hagup o. Yethemit, op wene aphwami ’berlegat onogola enagai a’bik houwa a’ge, mo’gulhentau wegi o. 11Yogodak delhonobua a’ge ’gain Onuk Logo a’ge Kristus ano o ap Daud owi seli welagama ano dagagarik oruak o. 12Ebe enak a’ge henil holuk pobi togup en e, malik ’get dogo a’ge sum kain a’ge pam e’girlogo wam sapi so’boru nasumu ’ga’gokma pegesarik oruakma re, henil hai lagup o,” oluk mo’gulentesi.

13Asogo mo’gulentasukhwe erianoat, malaikat ’bogorl pam en yo’go ’belagonobou wago a’ge enebe modok a’bigat, ’ga en ’gela’ge hebarligen egesarik e, at malaikat mesik ano eminat Allah erliktugulat disogo egesa,

14“Is erabu ’bogorl o’borl akhit welagai a’ge en, nenaik Allah aiat erliktogu lemak o.

Ye, is aphwami ’gwiangma yema enebe Allah ebam liok oso a’ge enede ha’buksogo welemak o,”

oluk egesa. 15Asogo mo’gulontoluk e, is ebano onoboluk naikhe’gwe togolik ’bogorl pam ligagaihwe re, is ap wam domba o’gonogu legesa a’ge ebano is-is nak en ogulat e,

“Disogo agama o, oluk Nenaik ’gain Onuk Logo a’ge en mo’gulnentesi ai, o Betlehem hai louwok o,” oluk egesarik e, 16perleneat legesa ’gal e, Maria Yusuf e’birek malik ’get dogo a’ge ano wam sapi so’boru nasumu ’ga’gokma ’bourak poluk oruakma hai legesa. 17Hai legesarik enil hogulat e, wene malik ano paget malaikat en mo’gulentigisa a’ge ebano ’beli’gogo mo’gulentigisa. 18Asogo mo’gulentigisema, is aphwami ebano enesa’go hweligisa a’ge ’berlek en, disogo egesa,

“Eige! Nonogorlok e,” oluk erliktigisa. 19A’geat de, at hwe Maria ano nak e, wene egesa a’ge ebano edemu wesirik e, mennei eberise laga. 20Ye, is ap domba o’gonogu legesa a’ge ebano enil holuk pobuk naikhe’gwe togolik wagalat e,

“Wene malaikat en mo’gulnentigisa ano hegitsogoat agama nenil hogulat, nenesa’go holugulat, tige o,” oluk, Allah erliktugulat, hau worugulat, il-il wegesa.

Yesus onuk tualigisa wene

21 # Ima. 12:3; Luk. 1:31 Asogo wegesema welegesarik en, agauwa sabiren welegesarik loruk o’gwe re, malik ano agap e’gerlimu a’ge ’balu hegitsogo ’baligisarik e, ebe owan ia ogola om erlak oruakhwe malaikat en egei hegitsogo re, onuk Yesus tualigisa.

At Yesus ’get dogo a’ge pam ebe Allah

wogegisa wene

22Onuk arat tualigisarik e, Allah en pageat Musa mo’gulesimu, at en eselat e,

“Hwami enemalik dagonoboluk e, agauwa asogo ’gela’ge takpoluk parema libagalom o,” oluk egei a’ge hegitsogoat, asogo welegesarik e, malik ’get dogo a’ge ano Nenaik ’gain Onuk Logo a’ge wogomogoluk woluk o Yerusalem wegesa. 23#Kel. 13:2,12Asogo woluk wegesa ai re, Nenaik ’gain Onuk Logo a’ge en pageat nenesa’go weregei wene ano pam eselat e, disogo egei,

“Malik naduk a’ge ap holuk e, an henaik nebaget po yo,”

oluk egei. 24#Ima. 12:6-8Ye,

“Sue abiang ’gela’ge ai a’ge aik mesik de a? Ia mesik de a.

Ye, at e, sue ’berl ’get a’ge ’gela’ge ebe ’biren holuk a,

an henaik ’gain Nonuk Logo a’ge nebaget watnum o,”

oluk egei ano hegitsogo wogomogoluk woluk wegesa.

25Ai erlige ap o Yerusalem a’ge mesik onuk Simeon. At ebabut e, op, Allah ogorloksogo welat, modok hegitsogo taga laga. Asogo tagalat, aphwami Israel a’ge onogola obabonobouema a’ge ai yetharok oruakma, Allah Arogun ebam louk egeimu welaga. 26Asogo ebam louk u agarik e, disogo mo’gulesi,

“Hat hebe warom erlak oruakhwe, ap ’gain mesik Nenaik ’gain Onuk Logo a’ge en edikpoluk perakpou weik egei ano wagoam hil holuk en warorogun o,” oluk, obok mo’gulesirik e, 27at Simeon ano Allah Arogun ebam louktak welat, Allah owi werikmu ’goluk oruakma, Yesus aik ia e’birek Allah en egei a’ge pelal wogo welaga a’ge hegitsogoat tuogoluk e, Yesus dogo a’ge ano woluk ’gwigisa. 28’Gwigisema, Yesus dogo ano Simeon agaimu wesirik e, Allah onuk erliktiselat disogo egei,

29-32 # Yes. 42:6; 49:6; 52:10 “Naik Allah o. Aphwami di owi yu owi enebe ’berlegat enil houwagoluk,

delnonobua a’ge arat perakpou wegenma hegi o.

At en e, is o’borl o’gwe a’ge he’bek wemagoluk o dakharak enebasulat,

hat heiyagai Israel a’ge erligonobuagoluk o dakhasogo welat, tua a’ge nil arat hegi o.

Holuk e, hat en mo’gulnigen hegitsogoat,

yogodak an heragam a’ge nede ha’buksogo yema ukpoluk he’bek weik en woknobumu re, obat o,”

oluk, Allah erliktegei. 33Malik ai obok asogo egeimu re, ia emin, aik emin, enesa’go hweligisarik e,

“Eige!” oluk erliktigisa. 34Ye, at Simeon ano en e,

“Allah en obaphonobuak,” oluk, ede aganhan pam mo’gulontoluk e, malik ano ia Maria mo’guleselat e, disogo egei,

“Allah en e, malik yu pam, is ap Israel a’ge enebe esanat, pema edigenebasulat, nin pema ’belagenebasulat, tuagoluk edikpesi o. At yu aphwami ’berlegat pobi tuagoluk edikpesi a’geat de, is aphwami ’berlek en,

Nenebit o, oluk ogwi ano, 35onogola opogwi a’ge ai enagat ema o. Ye, hat ogo re, ’garok e’gat mago a’ge en hede pam dainsogo horu ’gela’geat, hogola modok wiak ema ani o,” oluk mo’gulesi.

36Ye, o eba hwe mesik onuk Hana. Ap Fanuel a’gul onuk Asyer a’ge agalogo, Allah iak mo’gulentasu a’ge welaga. At ogun wesi hwerli en 7 tahun e’birek welegesarik, 37sugwe pesi hwerli en, at ebe umur 84 tahun modok sebal agarik welaga. Welat e, agauwa-agauwa ebano so’boru no erlakhweyang ’gela’ge poluk Allah owi werikmu eba hup erlige ebit om erlakma en, se’ban oso modok welaga. 38Asogo oso oruakma, at Yesus aik ia emin ’gwigisarik welegesa ai erlige ene’bek wagarik e, disogo egei,

“Allah naik o,” oluk hau weregeitik e, is aphwami o Yerusalem a’ge onogola en e, Allah en pobuk delnonobua oluk yetharok welegesa a’ge ’berlegat mo’gulentasulat e,

“Ebe waga yu o,” oluk, malik ano obok mo’gulentasu laga.

At Yesus woluk o Nazaret togolik wegesa wene

39 # Mat. 2:23 Nenaik ’gain Onuk Logo a’ge en nenesa’go weregei a’ge pelal wegesa ano hegitsogo arat tigisarik e, at Yesus aik ia onowi pam ik Galilea omugwe o onuk Nazaret ano orlu egesa. 40Orlu egesarik welat, malik ano arlue agalat, ebe anni agalat, ede modok ’gagal agalat, taga lagama, Allah ede aganhan ebam pasu laga.

At Yesus ebe 12 tahun pam Allah owi werikmu ’goluk tegei wene

41 # Kel. 12:1-27; Ula. 16:1-8 Tahun ebe lo’bok mo ligom, ’bugom, osokhwe, Yesus aik ia e’birek domba wam wusogo seni Paskah sakho nouwogoluk e, o Yerusalem ’bi legesa. 42Asogo ’bi legesarikmu no oluk e, is eba malik dagagaiam 12 tahun arat takpoluk seni sakho nouwogoluk odokto ’gogugumu no oluk e, at Yesus ano 12 tahun arat lau wagama re, seni sakho nouwogoluk woluk ’bigisa. 43’Bigisarik seni arat noluk e, Yesus aik ia e’birek Yesus o Yerusalem eba mo egeimu is eneperlagat naikhe’gwe togolik onowi pam orlu egesa. 44Is aik ia onogola en e,

Yesus ano aphwami pema enemin wege a’ge ebano re, pobuk enemin wagai hwi a? opoluk waga legesarik e, nogouwogoluk en de, enil ’gwelakhegesa ’gal ebe erlak en e,

“Ue ari enemin oruak hwi a? Ye, at e, arilak enemin oruak hwi a,” oluk enebam hin wegesa. 45Hin wegesa ’gal ebe erlak en e, pobuk togolik o Yerusalem at palo se’bigisa. 46’Bigisarik, palo tugulat agauwa ’biren denaga legesarik e, pobuk agauwa henaganak a’ge en de ’gwelakhegesa ’gal e, at ebe Allah owi werikmu ’goluk, is ap Allah iak mo’gulontogu legesa a’ge enemin ene’gerlakma hweriogo welat, is ebano eniak ogukhwe esa’go hweliselat, is en ogukhwe at en o’go eselat, hin wasulat, tagoma hwiarigisa. 47Asogo ogulat, is en hin wogumu, at wene modok aluk welat o’go mo’gulentesi ai paget e, is ap odoktak welegesa a’ge ebano ’berlek en iak enesa’go hweligisarik e,

“Nonogorlok e!” oluk erliktigisa. 48Asogo erliktugumu, is at aik ia e’birek en ebe arat hwiarigisarik e,

“Nonogorlok e!” oluk erliktigisa. Erliktigisarik ia en e, disogo mo’gulesi,

“Nomlogo, hat disogo taknenebegen ai nopaget. Haik nemin nenede perik welat herahebil denaga lege yema hil nentemen,” oluk asogo mo’gulesimu, 49at Yesus en e,

“His an heranebil denaga legep ai nopaget. An naik owi werikmu wolom ano heneperlak no?” oluk mo’gulentesi a’geat de, 50is e’birek pobitu erlakma en nelakpoluk welegesa. 51Asogo oluk e, at Yesus aik ia emin o Nazaret orlu egesa. Orlu egesarik welat, at aik ia eniak opsogo hwelak poluk taga laga. Ye, ia re, wene ebano ’berlegat edemu wesirik eberak modok welaga. 52#1Sam. 2:26; Ams. 3:4Ye, at Yesus asogo welat, ebe arlue agalat, ede modok ’gagal agalat, tagokhwe, aik Allah emin, aphwami emin, at ebaget enebam lobuk ese laga.

Currently Selected:

Lukas 2: Wul

Highlight

Copy