Kejadian 50

1Asogo waragama, at Yusuf ebe aik werak a’ge ebam ’bou tegeirik e, nge tagalat aik emde motok-motok hesi. 2Asogo tegeirik e, is ap at eragam a’ge aphwami werak muk agai erlak a’ge hedinsogo welemagoluk a’bosu enebetne worogwi enaluk a’ge en aik Yakub werak a’ge a’bosu wusogo pou wagoluk mo’gulentesi. 3Asogo mo’gulentesimu, a’bosu wusogo onobogwi ’gela’ge tugukhwe, agauwa 40 pam welegesa. At Yakub asogo waragama, aphwami Mesir a’ge pong worogulat agauwa 70 pam welegesa.

4-5 # Kej. 47:29-31 Arat pong asogo welegesarik, at Yusuf en e, osi en at ’gain onuk logo a’ge Firaun ano disogo mo’gulesi louwagoluk mo’gulentesi,

“An naik ebe arat warom hegit agama, an en ho’buk ’balogo wene weragobuagoluk mo’gulnesimu, an heragam a’ge en wene disogo weragebegi,

Hat hebe warorogunmu hebe werak e, o Kanaan nis waragaiam sebelnonobogu lemagoluk ’gwiang o’go ’balogo pegesema eba sebelhebi laik o, oluk mo’gulegis ai en, heragam a’ge naik eba sebeli laigoluk en mo’gulhegis o. Arat asogo sebelak poluk pobuk togolik weik o, oluk egei o, oluk mo’gulesi lu o,” oluk mo’gulentesimu mo’gulesi legesa.

6Asogo mo’gulesi legesema, at ’gain onuk logo a’ge Firaun en e, disogo mo’gulentesi,

“At en e, aik mo’guleselat e,

Disogo sebelhebi laik, oluk mo’gulesi hegitsogoat aik sebeli louwak o,” oluk mo’gulentesimu mo’gulosu egesa.

7Asogo mo’gulosu egesema, at Yusuf aik ’gwiangma sebeli laigoluk waga. Asogo wagoam, at ’gain onuk logo a’ge Firaun osi ’berlegat emin, ap enarlue at ’gain owi pam welagai a’ge emin, ap ’gain a’ge logon ’berlegat emin, Yusuf emin, wegesarik legesa. 8Ye, at Yusuf eiyagai emin, osi uelak emin, ue ari pema emin, eneminat wegesarik legesa. We, malik wei a’ge emin, wam di a’ge yu a’ge is en a’ge emin, eriano nak o Gosyen ukpoluk wegesarik legesa ai o. 9Ye, ap tentara esan pulholuk e, is logon ado pema wam kuda en lisogo woluk lasu a’ge onuk ’gwiangso pam ligotluk no’gwi a’ge emin, is logon wam kuda o’borl pam ligotluk no’gwi a’ge emin, enemin ene’berligat wegesa. Enebe esan modok a’bik logat pulholuk wegesarik legesa.

10Is ebano waga legesarik e, o ik Yordan abel mo yegelogo orlu ago hegit aphwami gandum e’gen sagalogumu o Goren-Haatad ebe hegit lai legesarik e, enede wiak agarik, eniak loksogoat nge tigisa. Asogo nge tigisema, at Yusuf en pong eba woruogoluk eba pesimu re, pong worogulat agauwa sabiren eba welegesa. 11O Goren-Haatad eba pong asogo worogumu aphwami o Kanaan a’ge enil entigisarik e, disogo egesa,

“Aphwami Mesir a’ge pong worogwi ai re, modok enede ’gela’geat werigisa ai nede o,” oluk egesa. Asogo egesa ai en o eba onuk e, Abel-Mizraim, oluk tualigisa.

12Naduk at Yakub en e, eiyagai mo’gulentasulat e,

“Disogo tip o,” oluk mo’gulentesi hegitsogoat asogo tigisa ai o. 13#Per. 7:16Is en, werak ano woluk o Kanaan ano legesarik, at Abraham en ’gwiang werak sebelonobogumu ap Efron a’gul onuk Het a’ge ono’gwiang a’ge pam o’go ’balegeimu eba owik onuk Makhpela o Mamre abel etle akhit o mo yegelogo orlu ago hegit eba oruakma sebeligisa. 14Ye, at Yusuf en aik asogo sebelak poluk, at uelak osilak enemin, aphwami at aik sebeluogoluk enemin legesa a’ge ebano ’berlegat emin, enemin togolik o Mesir legesa.

At Yusuf en uelak osi enede sebelegei wene

15Is enaik Yakub arat waragama, Yusuf uelak en disogo egesa,

“Nis en nadugat Yusuf modok wiagapsogo pege ano ede wiak welemarik o’go nis wiagapnenebigoluk oso holuk, no’gosogo tu epegep,” oluk egesa. 16Asogo egesarik e, aphwami en Yusuf disogo mo’gulesi louwagoluk peragenebegesa,

“Nenaik Yakub ebe warom erlak welat, 17nis en e, hat disogo mo’gulhemagoluk mo’gulnentesi o,

Hat huelak en nadugat hebe modok wiagap hebigisa ai hat en wene enebam a’ge no’gorlogo wokholuk erlagapsogo ukpomup o, oluk mo’gulhemagoluk mo’gulnentesirikmu re, nis nenebe nenaik en Allah erliktago a’ge ano eragam a’ge holuk, nis en naduk hat modok wiagap hebige ano wene nenebam a’ge no’gorlogo wokholuk erlagapsogo ukpomup o, oluk egesa o, oluk mo’gulentai lu o,” oluk peragenebegesema Yusuf mo’gulesi legesema, wene is en egesa wene ano at Yusuf mo’gulosokhwe esa’go hwelegeirik e, nge tegei.

18Pobuk at Yusuf uelak osilak enebe at e’bek legesarik, ologotma ’gonu oluk disogo mo’guligisa,

“Nis yema hat heragam a’geat o,” oluk mo’guligisa.

19Asogo mo’guligisa a’geat de, at Yusuf en is disogo mo’gulentesi,

“An nebe Allah ’gela’ge eiktik his wene henebam po mia ai en e, honogorlok hagup o. 20His henebe ’berlek en an wiagap nobuogoluk modok egeptik wiagap nebigep a’geat de, at Allah en aphwami yogodak oruak a’ge a’bigat delenebigoluk, his en wiagap nebegep a’ge ai pam op a’ge emagoluk tegeimu o. 21Holuk e, his en,

Nogorlok o, oluk henede perogup o. An en his henebe emin, henemalik emin, honso’boru emin, hena’ge di a’ge yu a’ge emin elitsogoat wokhentasu leik o,” oluk iak sakhosogoat enede sebelogo mo’gulentesimu enede yamuk egei.

At Yusuf waraga wene

22Enede asogo yamuk egeimu, at Yusuf uelak osilak enemin o Mesir ebayat welat, eba en at ebe umur hwerli 110 tahun welaga. 23At Yusuf elaluk welat e, ap Efraim en dogo’gwe a’ge e’balak elirat il entasulat, ap Manasye en dogo’gwe a’ge e’balak ap Makhir eiyagai at Yusuf u’gwarek eiyagai ’gela’ge elirat tenentarok welat, tegei. 24Asogo welat, osilak uelak ebano disogo mo’gulentesi,

“An nebe warom horogat agama welegi o. Asogo a’geat de, at Allah en demat his tenhentarok welat, his henebe o yema en wokhonoboluk libotluk e, o Abraham emin, Ishak emin, Yakub emin, wokhentaik, oluk ho’buk ’balogo wene weragenebesimu ebano wokhonoboluk louwa o,” oluk mo’gulentesi. 25#Kel. 13:19; Yos. 24:32; Ibr. 11:22Asogo mo’gulentesirik, at Yusuf osilak uelak eneiyagai enemin disogo mo’gulentesi,

“His henebe Allah en o atnikmu wokhonoboluk lasu holuk e,

Hat hebe werak wokhobolugat lul o, oluk wene ho’buk ’balogo mo’gulnemis o,” oluk mo’gulentesimu wene waregisa. 26Asogo wene waregisema, at Yusuf ebe umur 110 tahun pam o Mesir en waraga. Asogo waragama ebe werak e, mugom erlakma en dorlom a’ge welemagoluk a’bosu wusogo peti aphwami werak onobogwi a’ge pam ogola pegesa.

Currently Selected:

Kejadian 50: Wul

Highlight

Copy