Keluaran 1
1
Aphwami Israel a’ge o Mesir en e’gin-pe’gin tagonobogu legesa wene
1-4 #
Kej. 46:8-27
At Yakub onuk mesik Israel ogwi a’ge ano eiyagai enebe lo’bok enemalik enemin o Mesir legesa. At Yakub eiyagai ai ononuk e:
Ruben emin,
Simeon emin,
Lewi emin,
Yehuda emin,
Isakhar emin,
Zebulon emin,
Benyamin emin,
Dan emin,
Naftali emin,
Gad emin,
Asyer emin welegesa.
5At Yusuf naduk o Mesir lagarik oruakma, at Yakub ebe emin, at eiyagai enemin, is eneiyagai enemin, ai enebe ’berlek e, 70 pam pobuk legesa ai o. 6Asogo legesarik welegesarikmu en, at Yusuf arilak enemin enebe waretil legesa. Ai ’gela’ge, at uelak osilak logon ogo waretilat legesa.
7 #
Per. 7:17
Asogo waregesa a’geat de, aphwami is Israel en dogo’gwe a’ge ene’balak enebe modok a’bik dagetil legesema, enebe ogo perleneat yarluk ogu legesa. Enebe asogo a’bik aga legesa ai en, o Mesir di owi yu owi is onorogole nak modok welegesa.
8 #
Per. 7:18
Pobuk ap ’gain Mesir ogulat Firaun ogwi a’ge ano en aphwami Mesir a’ge eragam onoboluk tenentarok welat, ap ’gain ano en e, at Yusuf ai eperlak at welaga. 9Tenentarok welat at en disogo mo’gulentesi,
“Aphwami Israel a’ge ai enebe a’bik agalat, enanni modok a’bik egesarik nis nenanni is enemin hegit modok erlakma re, nis almatnonobu ’gela’ge ago yo.
10 #
Per. 7:19
Weim ’gagal ago holuk e, is selei a’ge enemin op emarik, nis watnonoboluk o yema ukpoluk o momu ’bok louwa epasu legi o. Holuk e, is pobuk enebe a’bik ema no oluk nis en mesik tagonobouwok o,” oluk mo’gulentesi.
11Asogo mo’gulentesimu, aphwami Mesir a’ge en aphwami Israel a’ge modok wik-wiak tagonobogulat, yabuk modok a’bik togu lemagoluk, ap logon en eniak ningsogo mo’gulontogu lemagoluk edigenebil legesa. Asogo edigenebil legesema, o Mesir a’ge kota ’biren onuk Pitom emin, Raamses emin, di a’ge yu a’ge at Firaun ebaget pogulomma o lok a’ge werik pou wagoluk eniak ning-nangsogoat mo’gulontogu legesa. 12Is aphwami Mesir a’ge en asogo e’gin-pe’gin tagonobogu legesa a’geat de, aphwami Israel a’ge enebe modok a’bigat egesarik, o Mesir di owi yu owi eba is modok yarluk aga legesema, is aphwami Mesir a’ge en Israel a’ge onogorlok aga laga. 13Asogo onogorlok agalat, aphwami Mesir a’ge en is Israel a’ge enannisogoat e’gin-pe’ginsogo tagonobogu legesa. 14Enebe di e’gin yu e’gin hogulat, enede modok wiak emagoluk asogo tagonobogu legesa. Enebe enedeap onobo erlakma enat, yabuk modok e’gin a’ge o worogulat, yabuk worogulat, togu lemagoluk modok ningsogo mo’gulontogu legesa ai o.
15Pobuk at Firaun en hwami enebe ’biren hwami Ibrani a’ge enemalik dakhorlogwiam lerontogu legesa a’ge ononuk Sifra emin, Pua emin, enebam disogo mo’gulentesi,
16“His hwami Ibrani a’ge enemalik dakhorlogwiam lerontogulat e, disogo togu lomup o. Malik ap dagagai holuk waronobogulat, hwelani dagagai holuk enelaluk ugonobogu lomup o,” oluk mo’gulentesi. 17Asogo mo’gulentesi a’geat de, is hwami enebe ’biren hwami malik dagonobogumu lerontogu legesa a’ge ai Allah onogorloksogo togulat, at ’gain en,
“Disogo togu lomup o,” oluk mo’gulentesi a’ge ano hwelak poluk tu enebit en ukpoluk, malik dagagaiam ap a’ge eminat waronobu erlakma en ’berlegat ugonobogu legesa. 18Asogo togu legesa ai en at ’gain en hwami ’biren malik dagonobogukhwe lerontogu legesa a’ge eriano worlentesirik e, disogo hin wogentesi,
“His en malik ap a’ge waronobu erlakma en enelaluk ugonobogu legep ai nopaget,” oluk mo’gulentesi.
19Asogo mo’gulentesimu, is en e,
“Naik. Hwami Ibrani a’ge ai hwami Mesir a’ge enemin hegit erlak o. Is enanni a’bik welat selangsogo dagonobogwi ai ene, nis leronto a’ge owan lagaikhwe, malik arat dakhorlolukmu laga lege o,” oluk mo’guligisa. 20-21Is hwami malik dorogumu lerontogu legesa a’ge ai Allah onogorloksogo welat togu legesa ai en, Allah en enebe obabenebiselat, is en dogo’gwe a’ge wogentasulat, taga laga. Ye, aphwami Israel a’ge ogo re, enebe modok a’bigat agalat, enanni a’bik aga legesa. 22#Per. 7:19Asogo aga legesema, at Firaun en e, aphwami Mesir a’ge ’berlegat disogo mo’gulentesi,
“Malik aphwami Israel a’ge dagagai holuk, ap a’ge enebe lo’bok ik Nil olomu wusogo hwigontogulat hwami a’ge holuk, ugonobogulat, togu lomup o,” oluk mo’gulentesi.
Currently Selected:
Keluaran 1: Wul
Highlight
Share
Copy
Want to have your highlights saved across all your devices? Sign up or sign in
