Kejadian 49

Yakub en eiyagai nonugwene mo’gulentesi wene

1Pobuk at Yakub en eiyagai worlentesimu wegesema disogo mo’gulentesi,

“His o pobuk henebam agokhwe hogulom a’ge mo’gulhentaik en e, an ne’bek horoksogo ya odoktu manis o,” oluk egeitik nonugwene disogo mo’gulentesi,

2“His an Yakub neiyagai a’ge odoktu manis o.

An henaik Israel en wene mo’gulhentaik a’ge henesa’go opsogo hwelip o.

3Ruben, hat e, nomlogo naduk a’ge o.

Eremna owi ligagalomtik naduk-naduk ikhasu ai ’gela’ge,

nanni pam dakhebegis a’ge o.

An neiyagai pema akhit ’berlegat e, mia ’gela’ge a’ge re,

hat nak e, hanni a’bik hebe ap heberlagat welegen o.

4Asogo a’geat de, hede ik ’gela’ge o’borlogouk oruak a’ge welegen o.

An nugwami neragam a’ge henemin nogoigepma,

an nogosoma wiagapsogo pegen ai en,

hat hebe logo a’ge abel akhit oroguntik wolorogun o.

5Ye, hat Simeon hot Lewi emin henebabut mesigarat o.

Henesegen honua’gun hene’gikmu wik-wok e,

henebabut harowiak o.

6Honolot het pam wene ’balogo aphwami waronobogulat,

wam sapi ierak a’ge henedeap po erlakma en,

onoyuk ’balogulat, togu legep ai en,

his henemin weneane ogumu an henemin u nebit o.

His odoktogumu an henemin wolom nebit o.

7Honolot het agalat onogorlok om a’ge togu legep ai en e,

Allah en heman honobouwak o.

Honolot het otluk aphwami henedeap onobo erlakma en,

waronobogu legep ai en, Allah en heman honobouwak o.

An en his o aphwami Israel a’ge onowi lo’gwe ’bogulogo perakhenebasulat,

o di owi yu owi aphwami ena’gul onuk lo’bok,

ene’bek ’bogulogo perakhenebasulat, tik o.

8Ye, hat Yehuda re, mene erimasu tenak poluk welagai ’gela’ge,

hat en heselei a’ge mabenap enebasulat tenentarok wolomup o.

Ye, harilak en heragam ’gumarik ondogorlu pam hweriogo welat erlikhobogu lema o.

9 # Bil. 24:9; Wah. 5:5 Hat e, hebabut mene orlomene ’gela’ge onuk singa ’get a’ge ebabut ’gela’ge welegen o.

Hebabut e, singa ’baik wit-wat owi pam togolik lasu ’gela’ge taga legen o.

Asogo wiagap onoboluk howi pam wotluk legi-lago osoam,

hebam tenhau wagalom e, onogorlok nak oruak o.

10Aphwami en e,

At ’gain onuk logo a’ge oluk enede we’gerlogo,

’bouwa’gun ene’gikmu tenak welagai a’ge ai,

harat eiye wolorogun o.

Oruakma hat en dogo’gwe a’ge en aphwami logon,

eneragam onoboluk, tenentarok modok welema o.

Asogo tenentarok oruakma,

aphwami ena’gul onuk lo’bok en,

onouang hat hebaget wokhomogoluk wagalat,

ondogorlu pam hurotluk,

hat heragam modok ’gu aga lema o.

11Hat huam keledai emalik,

e anggur edip pam ’go’bi erlelik oruak aiyat o.

Herle anggur modok op a’ge ai pam erlelik oruak o.

Hat en anggur e’gen a’bosu mep a’ge ’gela’ge ano pam,

hosum emerise legen o.

12E anggur ai a’ge e’gen a’bosu nasu legen ai en,

hil mep ’gela’ge agalat,

huam agamu nasu legen ai en, hiak e,

’gut agalat, tua o.

13Ye, hat Zebulon e, hebe howi ik laut ye’gelak a’ge eragam eba wolorogun o.

Oruakma ik so lok a’ge onuk kapal hat howi pam,

ik esa’goma eba wotluk erlilogo pogu lema o.

Hat howi pam wolorogunmu eba en,

hwerli o Sidon ai hwerli welema o.

14Ye, hat Isakhar hebabut e,

wam keledai anni a’bik a’ge ano ebabut ’gela’ge o.

Sum a’ge mul egeik a’ge o’borl pam erlilogo,

pema-pema ’belabogwiam o’borlogouk erlak,

’boutak welago ai ’gela’geat wolorogun o.

15Asogo welat o eba modok opma o,

oluk hil hasulat, modok enikmu, oluk hil hasulat tisoma,

is logon en yabuk is en a’ge togu lemagoluk,

eniak ningsogo eneragam a’ge ’gela’ge takhobogulat,

sum e’gin a’ge ho’borl pam pogwiam,

hodogun ’gonu ese lema o.

16Ye, hat Dan e, hosi he’gik pam tenentarok welat,

wene enebam pasulat, no’gorliselat, taga lorogun o.

Aphwami Israel a’ge ena’gul onuk mu a’ge,

welagai ai ’gela’ge otluk wolorogun o.

17Asogo welat, hat hebabut e,

’gosu ebela esa’goma welat,

aphwami warenebiso a’ge ebela lagaimu esa’goma welat,

asogo tagalat, wam kuda wagoma,

iak en oyuk o’gurl yaum pasuam,

aphwami o’borl pam hweriogo a’ge,

perlikho hwikhasu ai ’gela’ge,

hat hebabut ai ’gela’ge modok wiak wolorogun o,”

oluk mo’gulentesi.

18Asogo mo’gulentesirik pobuk Allah disogo mo’gulesi,

“Allah ’gain Honuk Logo a’ge naik,

hat en an delnobogun a’ge yetharok welegi o,”

oluk se’ban mo’gulesi.

19Asogo mo’gulesirik, eiyagai logon disogo mo’gulentesi,

“Ye, hat Gad e, is aphwami enebabut wiak,

di a’ge yu a’ge ene’gik abusak delogo horlogwi a’ge en,

wathobuogoluk wemayat o.

Wagaiam, hat en lagaksogo is en a’ge,

delogo hwerlasu lorogunat o.

20Ye, hat Asyer e, hoso’boru op modok a’ge nak,

ebam en ’bulogo orluk osokhwe nasu lorogun o.

Nasulat e, ap ’gain a’ge onso’boru

hat en degelogo wogentasu lorogun o.

21Ye, hat Naftali re,

wam onuk rusa holou a’ge herle hebelik welat,

emalik modok op a’ge nak deriso ’gela’ge,

heiyagai dagenebise lorogun o.

22Ye, hat Yusuf hebabut e,

wam keledai emalik ’gela’ge o.

Keledai il maro a’ge,

ik elaruk liplau wagoma welago a’ge ’gela’ge o.

Welat, pungtak dom edipmu lagai a’ge ’gela’ge welegen o.

23Ye, hat heselei a’ge segen woluk,

enebam harosogo mukhoboluk wegesarik,

dok segen e’gale pam pegesarik wathobuogoluk tigisa o.

24Asogo a’geat de,

an Yakub naik Allah anni a’bik a’ge ano oruak o.

An Israel delnebiso a’ge pekharok oruak o.

Ai en e, he’gik anni modok welat,

hesegen e’gale pam poluk ’gagalak welegen o.

25An haik naik Allah en lethiasu legi a’ge welat,

di a’ge yu a’ge elit tu nak a’ge ano en obap hebiselat,

moru ’bogorl pam en ’belakpou wagalat,

ik ’gwiang akhit en orlu agalat,

heiyagai wokheselat, huam sapi wokheselat,

26 gandum wokheselat, di agan e’gen yu agan e’gen,

op a’ge wokheselat, taga lemak o.

Dom page enat lok yat welago a’ge ai,

weiyat sebelak a’geat de,

an haik naik Allah en e,

op a’ge a’bik likho ereiya pam a’ge wokhese lemak o.

Allah en wogentasu a’ge ai ’berlegat,

hat Yusuf hebam emak o.

Hat harilak pema akhit e, weiyat mia ’gela’ge a’geat de,

hat nak e, modok logo wolorogun o.

27Ye, hat Benyamin e,

mene orlomene ebabut wiak a’ge onuk serigala ai en,

loruk o’gwe hubet siaksogo re, wam, tue, ’baik logon,

wathe’gik pasu ’gela’ge wolorogun o.

Ye, o hup e, wusogo pasu a’ge so’boriso ai,

ebabut ’gela’ge taga legen o,” oluk nonugwene asogo mo’gulentesi.

28Is ap Israel a’ge ena’gul onuk 12 egesa a’ge ano enebe re, aiyat o. Is enaik ebe wareriogoluk ologun pam is enebe lo’bok Allah en obap enebise lemagoluk mo’gulentasulat, hau warenebiselat, tegei aiyat o.

At Yakub ebe waragama, werak ’gwiang ’baksogo saligisa wene

29-30 # Kej. 23:3-20 Pobuk at Yakub en eiyagai disogo mo’gulentesi,

“An ne’balak waregesa ai ’gela’ge, an agauwa mesik eminsogo wolom erlakma en nebe wareigat o. Asogo wareikmu, owik onuk o Makhpela o Kanaan eba o Mamre abel etle akhit eba, Abraham en ’gwiang ap Efron a’gul onuk Het a’ge e’bek owik emin, ’gwiang eba emin, aphwami sebelonobogu lemagoluk o’go ’balegeimu ebano is waragaiam sebelenebigisema ebano sebelnebilu o. 31#Kej. 25:9-10; 35:29Abraham emin, ugwe Sara emin, Ishak emin, ugwe Ribka emin, ebayat sebelenebigisa. Ye, an en hwe Lea o ebayat sebelegis o. 32Owikmu emin, ’gwiang emin, eba re, aphwami ena’gul onuk Het a’ge enebam arat o’go ’baligisa. Holuk e, an ebayat sebelnebilu o,” oluk mo’gulentesi. 33#Per. 7:15At Yakub en eiyagai wene asogo mo’gulentesirik e, nogo ese lagama ebano ’bou agarik e, ebe arat waraga.

Currently Selected:

Kejadian 49: Wul

Highlight

Copy