Kejadian 48

Yakub en, Efraim emin, Manasye emin, Allah en obap enebise lemagoluk mo’gulentesi wene

1Agauwa mesik welegesarik aphwami en e, Yusuf disogo mo’guligisa,

“Hat haik ebam ou modok wiak oruak o,” oluk mo’guligisa. Asogo mo’gulegisema, at Yusuf eiyagai Manasye emin, Efraim emin, wogonoboluk Yakub il haiogoluk laga. 2Lasumu, aphwami en e,

“Yakub. Homlogo Yusuf ano wago yo,” oluk mo’gulegisema, esa’go hwelegeirik e, nogo ese laga a’ge re, inagarik, ede e’gatsogo hweriogo welaga. 3#Kej. 28:13,14Asogo oruakma, at Yusuf ano e’bek ’gwegeimu, disogo mo’gulesi,

“Allah di a’ge yu a’ge tu a’ge nak ano o Kanaan kota onuk Lus eba norogolema inagarik aphwami en mu’gat wusogo enebam pogwi ’gela’ge arat obap nebesimu welegi o. 4Asogo taknebasulat disogo mo’gulnesi,

Hat en dogo’gwe a’ge enebe modok a’bik emarik, ena’gul onuk a’bik emarik, he’balak a’bik dagemagoluk wokhegis o. Ye, o yema hat en dogo’gwe a’ge en eiye otluk modok welemagoluk wokhegisat o, oluk mo’gulnesi o,” oluk mo’gulesi.

5Asogo mo’gulesirik pobuk mesik disogo mo’gulesi,

“Yusuf. Heiyagai enebe ’biren Efraim emin, Manasye emin, o Mesir yema en an wom erlak oruakhwe dagenebigen a’ge ai, an neiyagai Ruben emin, Simeon emin, ’gela’ge epasu legi o. 6Asogo a’geat de, heiyagai pobuk dagonobogun holuk en nak de,

At neiyagai ’gela’ge, oluk ik erlak o. We, hat heiyagaiat welema o. Welat, is ai pobuk is Efraim Manasye e’birek emin enemining a’ge logon is horlouwa o. 7#Kej. 35:16-19An en asogo tik ai re, hat hia Rahel pagerat o. An o Mesopotamia en togolik wagoma, hia o Kanaan kota onuk Efrata eba horogat waragama, an nede modok wiak aga. Nede asogo wiak agarik, hia ebe werak o Efrata lagaimu ebela esa’goma eba ’gwiang ’balogo selak pegi o,” oluk mo’gulesi. (O naduk onuk Efrata ogu legesa a’ge yogodak en e, onuk Betlehem ogwi ai o.)

8At Yakub en asogo mo’gulesirik, Yusuf eiyagai ebano il entesirik e, Yusuf disogo mo’gulesi,

“Malik yema salak,” oluk hin wesi. 9Asogo hin wesimu, at Yusuf en e,

“Malik yu re, an o Mesir yema oruakma Allah en woknesi a’ge o,” oluk mo’gulesimu, at Yakub en e,

“An en e, aphwami en mu’gat wusogo enebam pogwi ’gela’ge, Allah en obaphenebise lemagoluk mo’gulentaik en e, enebe neragam horoksogo ya enebi suk o,” oluk mo’gulesi.

10At Yakub ebe arat sebal agarik, il modok hepnik ai en il pobisogo entasu laga erlak ai en asogo egei ai o. Asogo egeimu, Yusuf en eiyagai ai at Yakub e’bek horoksogo onobou wagama re, at Yakub en emikmu parliksogo wogenebegeitik e, hau emde motok-motok warenebegei. 11Asogo hau warenebegeitik e, Yakub en e, Yusuf disogo mo’gulesi,

“Pageat an pobuk hat he’birek mesikmu omul modok erlak epegi a’geat de, yogodak Allah ede epesi ano pam nemin mesikmu egerik heiyagai eneminat nil hentegis o,” oluk mo’gulentesi. 12Asogo mo’gulentesimu, at Yusuf eiyagai eriano Yakub emikmu parliksogo wogenebegeitik e, at ebe Yakub eragam odogorlu pam hurotluk welaga.

13-14Asogo welat e, omlogo Efraim pobuk a’ge ano Yakub e’gik hware akhit edikpesi. Ye, omlogo mesik Manasye naduk a’ge ai e’gik ’bekhit akhit edikpesi. Asogo edikpesi a’geat de, at Yakub e’gik ’gwanisogo e’gik ’bekhit akhit Efraim a’gul sebeliselat, ye, e’gik hware akhit Manasye a’gul sebeliselat, tegei. 15Asogo sebelegeitik, Allah en obap enebise lemagoluk Yusuf disogo mo’gulesi,

“At Allah Abraham emin, Ishak emin, erliktogu legesa a’ge en an woknoboluk modok hwerli yogodak hwerli woknoboluk modok noso yo. 16Asogo woknoboluk neselat, ebe malaikat ’gela’ge otluk en, an nebe alemat om ’gela’ge oruakma delnebise laga ai o. Holuk e, at enat malik yema obap enebise lemak o. Malik yu pegilsogo an nonuk emin, Abraham onuk emin, Ishak onuk emin, ogwi modogat welemak o. Is ene’balak en dogo’gwe a’ge enebe ’gwiangma o di owi yu owi modok a’bik seik-’beik uarik welemak o,” oluk mo’gulesi.

17At Yusuf aik e’gik ’bekhit akhit Efraim a’gul sebelegei ai en ede wiak aga. Asogo ede wiak agarik aik e’gik ’bekhit akhit Efraim a’gul sebelegei ano ha’boksogo Manasye a’gul pam pei laga. 18Asogo pei lagarik aik disogo mo’gulesi,

“Asogo togun erlak naik. Manasye yu re, nomlogo naduk a’ge, holuk he’gik ’bekhit akhit enat a’gul sebelin o,” oluk mo’gulesi.

19Asogo mo’gulesi a’geat de, aik en at iak ukpesirik, disogo mo’gulesi,

“An naluk o, nomlogo. Naluk. At Manasye anni re, we, weiyat ’gela’ge anni emarik e, at en dogo’gwe a’ge ena’gul onuk weiyat ’gela’ge logon logo emayat o. Asogo a’geat de, at ot Efraim nak e, anni a’bik otluk e, at en dogo’gwe a’ge ena’gul onuk a’bigat lok ema ai en tegis o,” oluk mo’gulesi.

20 # Ibr. 11:21 Asogo mo’gulesirik, o ai erligeat aphwami en mu’gat wusogo enebam pogwi ’gela’ge, Allah en obap enebise lemagoluk disogo mo’gulentesi,

“Aphwami Israel a’ge en aphwami logon Allah en obap enebise lemagoluk his hononuk il-il en mo’gulontogu lema o. Asogo ogulat disogo ogu lema,

Allah en e, Efraim Manasye e’birek obap enebise laga ai ’gela’ge obaphebise lemak o, oluk mo’gulontogu lema o,” oluk mo’gulentesirik, Efraim lok logo naduk a’ge ’gela’ge takpasulat, Manasye abel pam pobuk a’ge ’gela’ge takpoluk pesi ai o.

21Asogo tegeirik, at Yakub en Yusuf disogo mo’gulesi,

“An tagokhwe hil niegen ai ’gela’ge, an nebe yogodak yayat wareik a’geat de, his Allah en lethontoluk, pobuk togolik nene’balak welegesema ebano wokhonoboluk louwa o. 22An en e, is henarilak puk. At e, hat nak o Sikhem ’gwiang modok molimu aphwami Amori onowi pam a’ge ’garok emin, segen emin, ebam sebelak pegi a’ge ai hat wokhegis o,” oluk mo’gulesi.

Currently Selected:

Kejadian 48: Wul

Highlight

Copy