Kejadian 47
47
Yakub eiyagai enemin ’gain Firaun e’bek legesa wene
1-2Asogo mo’gulentesirik, pobuk at Yusuf enarilak enebe huaben wogonoboluk ’gain onuk logo a’ge Firaun e’bek lagarik disogo mo’gulesi,
“An heragam a’ge naik emin, narilak emin, o Kanaan en onuam oluk esan kambing emin, domba emin, sapi emin, ena’ge-a’ge di a’ge yu a’ge emin, woluk wegesarik yogodak o Gosyen oruak o,” oluk mo’gulesirik,
“Narilak enebe yu o,” oluk hwiagesi. 3Asogo hwiagesimu, at en e, disogo mo’gulentesi,
“His yabuk no togu legep a’ge,” oluk hin wogentesimu, is en e,
“Nis nene’ba wam eiye welat, o’gonogu legesa ’gela’ge, o’gonogu lege a’ge o. 4Nis o Kanaan so’boru obouk modok a’bik en, nonuam kambing emin, domba emin, oluk esan no’gulat e’gela no a’ge modok erlak en, o yema wolomogoluk, o Gosyen eba woknentemin o, nue,” oluk mo’guligisa. 5Asogo mo’gulegisema, at Firaun en Yusuf disogo mo’gulesi,
“Yogodak hat haik emin, harilak emin, o yema arat wegesarik oruak hegi. 6O Mesir yema hat oruakmayat o. Holuk, o yema op ’gela’ge re, o Gosyen ebayatma re, is eba welemagoluk wogontomup o. Ye, is logon wam di a’ge yu a’ge degelogwi enaluk a’ge holuk an nuam degelogu lemagoluk yo’go onobomup o,” oluk mo’gulesi.
7Mo’gulesimu, at Yusuf en aik wil wagarik woluk lagarik e, ebe ap ’gain Firaun ano mo’gulesimu, at Yakub en e,
“Allah en obaphebise lemak o,” oluk mo’gulesi. 8Asogo mo’gulesimu, at ap ’gain ano en e,
“Hat hebe umur tahun meren?” oluk hin wokhesi.
9Hin wokhesimu, at Yakub en e,
“An heragam a’ge yu, o poluk ’bogulogo neselat, hwerli yogodak nebe umur 130 tahun welegi o. An ne’balak o ’bogulogo no’gulat enebe umur yarat welegesa ai o. Ye, an welegi a’ge emin walhoma re, an modok wik-wiaksogo neselat, nebe umur horogat welegi o, nue,” oluk mo’gulesi. 10Asogo mo’gulotluk liplau weriogoluk e,
“Nue, an lebeik o. Hat hebe Allah en obaphebise lemak o,” oluk mo’gulesi. 11Asogo mo’gulotluk liplau wagama, at Yusuf en aik emin, arilak emin, o Mesir welemagoluk enebesi. Ai re, at ’gain onuk logo a’ge Firaun en egei hegitsogoat, o ’gwiang mesik modok opma o kota Raamses eragam eba is eiye welemagoluk wogentesi. 12Asogo wogentesirik, at aik emin, arilak enebe emin, is enemalik enebe enarlue a’ge en hwerli malik wei a’ge hwerli onso’boru no’gulom a’ge elitsogoat wogentesi.
So’boru obouk a’bik aga wene
13So’boru obouk modok a’bik agama, o di owi yu owi so’boru no’gulom a’ge modok erlak aga. Asogo agama, is aphwami ’berlegat o Mesir a’ge emin, o Kanaan a’ge emin, di bele yu bele tu a’ge enanni modogat erlak aga. 14Asogo erlak agama, so’boru at Yusuf ebam o’go ’balil ’gogukhwe, at en uang so’boru o’go a’ge ano odoksogo at ’gain onuk logo a’ge Firaun ano owi pam eba pasu laga. 15Asogo pasumu no oluk e, is aphwami Mesir a’ge emin, Kanaan a’ge emin, ono uang modok erlak agama, is aphwami Mesir a’ge Yusuf e’bek wegesarik e, disogo mo’guligisa,
“Nis nono uang arat erlak agarikmu re, so’boru nele en nenebe waromulno oluk e, uknonobo erlakma en e, nonso’boru logon woknentemin o,” oluk mo’guligisa. 16Asogo mo’gulegisema at Yusuf en e,
“Hono uang arat erlak aga holuk e, honuam logon woknoum o. Woknorogupmu re, an en so’boru logon wokhentaik o,” oluk mo’gulentesi. 17Asogo mo’gulentesimu, is en a’ge onuam kuda emin, domba emin, kambing emin, sapi emin, keledai emin, so’boru o’go Yusuf wogegisema, at en onuam o’gosogo so’boru wogentesi. Tahun ai pam e, is aphwami ebano en so’boru o’go onuam at Yusuf wogegisema, at en so’boru elirat wogentesi ai o.
18 Tahun pobuk a’ge pam is aphwami ebano at Yusuf e’bek wegesarik e, disogo mo’guligisa,
“Nis en wene modok ’baksogo mo’gulhomul o. Nis nono uang arat erlagat agama o. Ye, nonuam ogo ’berlegat hat nak wokheigema hat nagat eiye egentikmu re, di a’ge yu a’ge wokhum a’ge mesik modok erlak o. We, nis nenebe emin, nono’gwiang emin, ai nak e, oruak o. 19Nis nenebe waragalat, neniabuk o’gwe di a’ge yu a’ge modok erlak agalat, tuano oluk e, uknenebagun no yo. So’boru o’go re, nis nenebe emin, nono’gwiang emin, at ’gain onuk logo a’ge Firaun ano akhit agaihwe re, o’go ’balnenebin o. O’go ’balnonoboguntik e, nenebe nenelaluk welemagoluk, gandum nul a’ge emin, owi yabuk o’gwe pelul a’ge emin, logon woknentemin o,” oluk mo’guligisa.
20Asogo mo’gulegisema, at Yusuf en ’gwiang o Mesir a’ge ’berlegat at ’gain onuk logo a’ge Firaun ano paget o’go ’balegei. So’boru obouk modok a’bik aga ai en, is aphwami enebe lo’bok ono’gwiang enede hwedigap po erlakma enat, at Yusuf ebam o’go wegesa. Asogo o’go wegesema, o Mesir ’gwiang ’berlegat at ’gain onuk logo a’ge Firaun ano eiye aga. 21Asogo tigisema, aphwami o Mesir a’ge ’berlegat at Yusuf en at ’gain onuk logo a’ge Firaun ano eragam a’ge ’gela’ge tagenebesi. 22At Yusuf en ’gwiang ’berlegat o’go ’balegei a’geat de, is ap Mesir a’ge enasuagun eiye a’ge ono’gwiang nak e, at ’gain onuk logo a’ge Firaun ano en ono’gwiang wogentesimu is eiye welat, di a’ge yu a’ge yakho horlogu legesa ai en, is ono’gwiang nak e, o’go ’balu erlak.
23At Yusuf en is aphwami ebano disogo mo’gulentesi,
“Yethemit, his henebe emin, hono’gwiang emin, ’gain onuk logo a’ge Firaun paget an arat o’go ’balegis. Holuk e, his en owi yabuk wogo’gwe pelu a’ge owi ebe yema o. 24Owi asogo pelogup a’ge ebe e’gen ’balogulat e, hene’gik wenakho 5 pam lai lasu holuk e, ebe me’gisogo lok akhit 4 a’ge re, henemalik enemin henebe no’gulat, owi pogulat, togulat e, mesigat me’gerik a’ge holuk at ’gain onuk logo a’ge Firaun paget pogu lomup o,” oluk mo’gulentesi.
25Asogo mo’gulentesimu, is en e,
“Nis nenebe warolo a’ge delnenebigen ai en hau wathobogu lege o. Holuk e, nis nonu’gwarek enat nenebe ’gain onuk logo Firaun eragam a’ge wolomogoluk nenede enat ege o,” oluk mo’guligisa. 26Is en e,
“E’gen ’balogulat, e’gen nene’gik wenakho, 5 pam lau wagoam e, me’gisogo lok akhit 4 a’ge nonu’gwarek pagathorlogulat, mesik nak ’gain onuk logo a’ge Firaun paget pogu lomulat o,” oluk egesa a’ge ai, at Yusuf en asogo togu lema, oluk wene pelal wogo a’ge modok oruakma pobuk ebam eberak welat taga lemagoluk pelal wokho pesi. Asogo pelal wokho pesimu, hwerli yogodak hwerli en wene ai asogo togwiat o. Asogo a’geat de, ’gwiang is ap aphwami Mesir a’ge onodogwi eiye a’ge ono’gwiang nak e, ’gain onuk logo a’ge Firaun en a’ge emagoluk u erlak.
Yakub en, “An nebe wareikmu disogo tip,” oluk Yusuf mo’gulesi wene
27Eba is aphwami Israel a’ge ebano re, o Mesir a’ge o onuk Gosyen eba welegesa. Welat, ena’ge di a’ge yu a’ge modok a’bik agalat, eneiyagai a’bigat dagagalat tigisa. 28At Yakub ebe o Mesir lagarik e, 17 tahun eba welagarik, naduk welaga a’ge emin la’bulogo re, 147 tahun aga. 29#Kej. 49:29-32; 50:6Ebe asogo welagarik, arat warom hegit agarik, omlogo Yusuf ano worlhesirik e, disogo mo’gulesi,
“He’gik naga’gu tenak pemen o. Tenak paguntik holuk ho’buk ’balogo wene disogo mo’gulnemin,
An en e, hat hebe waragoam e, hebe werak o Mesir yema salhebik modok erlak o. 30We, hat hogola hagai epasu legen hegitsogoat, hat hebe werak o yema en wokhoboluk loluk, he’balak enebe werak ’gwiang ’balogo salonobogu legesema ebayat salhebi laik o, oluk ho’buk ’balin o,” oluk mo’gulesi. Asogo mo’gulesimu, at Yusuf en e,
“Naik en e’gen a’ge aiyat tik o,” oluk ho’buk ’balogo mo’gulesimu, 31at Yakub en e, disogo mo’gulesi,
“An en demat tigat o, oluk ho’buk ’balogunmu re,” oluk mo’gulesimu, at Yusuf en e,
“An demat tik o,” oluk ho’buk ’balegeimu re, at Yakub ebe nogo ese lagama en e,
“Naik Allah o,” oluk hau weregei.
Currently Selected:
Kejadian 47: Wul
Highlight
Share
Copy
Want to have your highlights saved across all your devices? Sign up or sign in
