Kejadian 43

Yusuf uelak en Benyamin woluk o Mesir togolik legesa wene

1So’boru obouk ano o Kanaan naduk weiyat ’gela’ge wiak welaga a’geat de, pobuk nak e, modogat wiak aga. 2Asogo agama, Yakub eiyagai ebano engandum e’gen o Mesir en woluk wegesa a’ge ano arat deng ne’gesarik e, at Yakub en e, eiyagai enebam disogo mo’gulentesi,

“Neiyagai. His togolik eba loluk gandum e’gen nis nenebaget o’go ’bali lit o,” oluk mo’gulentesi.

3Asogo mo’gulentesimu, at Yehuda en,

“At gubernur o Mesir a’ge ano iak ningsogo re,

His honot ano woluk worogup erlak holuk an nologotma worogup modok erlak o. 4Naik, hat en nonot perakpaik op epasulat holuk en e, nis en gandum ano o’go ’bali lul o. 5A’geat de, hat en,

Perakpaik erlak epasu legen holuk e, nis ogo lo nenebit o. At ap ’gain ano en e,

Honot woluk worogup erlak holuk an nologotma worogup modok erlak egei yo,” oluk mo’gulesi.

6Asogo mo’gulesimu, aik Yakub en e,

“An nede modok wiak emagoluk his en,

Nis nonot mesik oruak o, oluk nopaget mo’guligep?” oluk mo’gulentesi.

7Asogo mo’gulentesimu, is en e, disogo mo’guligisa,

“At ’gain ano en e, iak ningsogoat, nis nenebaget emin, nenaiklak nenarilak enebaget emin, hin wokhasulat e,

Henaik elaluk oruak a? Honot agaikhen oruak a? oluk hin wasu modok welaga yo. Asogo hin wokhasuam nis en o’go nak mo’gulige o. At en e,

Henemin honot woluk manup o, oluk u a’ge ano nis neneperlak welege o, naik,” oluk mo’guligisa.

8Asogo mo’gulegisema, at Yehuda en aik disogo mo’gulesi,

“An nemin louwogoluk malik ano perakpagunmu re, nis yogodagat lul o. Asogo tul holuk, nenebe logon so’boru nele en waromul erlak o. 9Malik ano an ne’gikmu poluk an en pekharok weleik en e, demat mo’gulheselegi o. An en togolik he’bek opsogo woluk weik erlak holuk e, hat en wene nebam poluk an nelaluk oruakhwe wene ai modok nebam welema o. 10Nis page yema wollo erlak holuk e, o eba nene’gik ’birenamat lak-wak ogullo yo,” oluk mo’gulesi.

11Asogo mo’gulesimu, enaik en e,

“Asogo tu a’ge nak oruak holuk, e op ’gwiang yema pam en e’gen op a’ge sum yagasogo woluk gubernur ano wogesi lit o. Hwedali a’ge pema emin, samuk a’bosu emin, ’gami ’gela’ge emin, di agan e’gen yu agan e’gen pema emin, woluk lit o. 12Uang perak honosum ogola yagarak pegesa a’ge ebano togolik woluk lo a’ge emin, pobuk gandum o’go ’balu a’ge emin, hene’gik ’birenam woluk lit o. Is uang perak honosum ogola yagarak pegesa a’ge ano dagansogo yagarigisa ya? Erlak a. 13Honot ano woluk laguptik perlenesogoat togolik manup o. 14Nomlogo Benyamin emin, henare agaikhen ano emin, togolik wokhontuagoluk at nenaik modok ’gain at Allah en di a’ge yu a’ge elit tu nak a’ge, at ap ’gain ano henebe ede emak o. An e, neiyagai almarom holuk e, almaromayat o,” oluk mo’gulentesi.

15Asogo mo’gulentesimu Yakub eiyagai a’ge ebano gubernur wogomogoluk ene’gikmu woluk legesa a’ge emin, uang perak ene’gik ’birenam wegesa a’ge emin, onot Benyamin emin, o Mesir louwogoluk perlenesogo legesarik, Yusuf orogolema ’gwigisa. 16’Gwigisema, at Yusuf ot Benyamin enemin lagaimu il hesirik e, at eragam a’ge owi ’gwelakharok oruak a’ge ano disogo mo’gulesi,

“Ap yu an nowi pam wogonoboluk lak o. Erlige an nemin so’boru nul en, wam mesik wusogo serip o,” oluk mo’gulesimu 17at eragam a’ge ano Yusuf en mo’gulesi a’ge hegitsogo tegeirik Yusuf arilak ebano owi pam wogonoboluk laga.

18Yusuf owi pam wogonoboluk lasukhwe enede perik lagalat e, is onogola en e,

“Uang perak naduk togolik nonosum pam yagasogo pegesa a’ge ano paget woknonoboluk wago hwi a, oluk, is en e, nenebe tenak nonobogulat, keledai ebano delogo woluk lagalat, nenebe nonue ’gain ano eragam a’ge nonobogulat, tua hwi a,” oluk epegesa. 19Onogorlok en asogo opogulat e, at ’gain eragam a’ge ’goduk pam ’gagalak welaga a’ge ano, is en disogo mo’guligisa,

20“Nue, nis wene mesik oruak o. Naduk nis yema gandum o’go ’baluogoluk wege. 21Wegerik e, nonowi pam togolik lagalat hup nogouwogoluk togulat, nonosum emdema ’gwelakhege ’gal e, nonuang perak ’berlek oruakma hegerik e, nis en e, uang perak ai togolik he’bek woluk wege o, nue. 22Ye, uang perak logon emin gandum logon o’go ’baluogoluk woluk wege. A’ge re, sa en nonouang perak togolik nonosum pam yagarak pesi. Nis e, neneperlak o,” oluk mo’guligisa.

23Asogo mo’gulegisema, at Yusuf eragam a’ge ano en e,

“Honogorlok en henede perik togup o. Henaik ’gain Allah, henaik Yakub en erliktiso a’ge ano en, uang perak ano honosum ogola yagarak pesi epegi ai o. His o’go pegep ano an enat wegi a’ge naluk o,” oluk mo’gulentesirik, Simeon ano ene’bek woluk waga.

24Asogo tegeirik at eragam a’ge ano ap ebano wogonoboluk olema ’gwegeirik ik onoyuk petne emeruagoluk na’gogo wogentasulat, keledai onso’boru wogentasulat, tegei. 25Asogo tegeimu, naduk aphwami en e,

“O erlige pam Yusuf enemin so’boru nouwa o,” oluk enesa’go hweligisarik di a’ge yu a’ge wogomogoluk woluk wegesa a’ge ebano degelogo pegesa. 26At Yusuf owi pam wagama, is di a’ge yu a’ge woluk wegesa a’ge ebano at e’bek woluk ’gwi legesema, ologotma ’gwiang pam sakhunsogo ’gonu egesa. 27Asogo sakhunsogo ’gonu egesema, at Yusuf en e, is enebaget hin wogentesirik, pobuk at en e,

“Naduk henaik sebal a’ge paget mo’gulnigep ano no’gosogo oruak. At op welat elaluk oruak a? Erlak a,” oluk hin wogentesi.

28Asogo hin wogentesimu, is en e,

“Nenaik hat heragam a’ge ano op welat elaluk oruak o,” oluk ologotma ondogorlu pam en toluk ’gwiang pam sakhun egesa.

29Asogo togumu, at Yusuf en ot Benyamin enia mesigat a’ge il holuk e, disogo mo’gulentesi,

“Honot naduk ebaget mo’gulnigep ano ebe yuat hegi. Allah en ede aganhan hebam pouwak o, nomlogo,” oluk mo’gulesimu, 30at Yusuf ot ede modok hwedik en, erianoat nge tiogoluk libotluk, at o ogorlirakma ’gwegeirik nge tegei. 31Pobuk nge horegeitik togolik libaga. Libagarik ede sebeliselat so’boru woluk wemagoluk eragam a’ge mo’gulentesi. 32So’boru ebano no’gulat at Yusuf e delak a’ge mesik pam nasukhwe re, arilak e delak mu a’ge pam en ne’gesa. Is ap Mesir a’ge enemin no’gu legesa a’ge, ap Ibrani a’ge enemin no enebit en onomu ne’gesa. 33At Yusuf enarilak ebano e delak pam hweriogo enebil lasulat, naduk dogo a’ge, naduk hweriogo poluk e, ’bekhit nak hweriogo enebil lasuam e, enil yethegesarik onogorlok a’bik aga. 34So’boru e delak Yusuf en a’ge pam enarilak mesik wogentasulat e, ot Benyamin ano e’gik huap hebarligen loksogoat wogesi. Is asogo togulat e, Yusuf emin seni loksogo no’gu legesa.

Currently Selected:

Kejadian 43: Wul

Highlight

Copy