Kejadian 44

Ige’be nalaga wene

1At Yusuf en at eragam a’ge owi ’gwelakharok welaga a’ge ano, disogo mo’gulesi,

“Is ap ebano onosum gandum loropsogo is woluk lo elit a’ge holuk e, yagasogo pasulat, is onouang perak enebe lo’bok onosum emdema togolik yagarak pasulat, tin o. 2Ye, an not labo a’ge osum ogola re, ige’be perak a’ge an en a’ge ano emin, uang gandum e’gen paget woluk waga a’ge ano emin, yagarak pemen o,” oluk mo’gulesimu, at en egei a’ge hegitsogoat tegei.

3Tono ’gela’ge loruk o’gwe is ap ebano wam keledai emin Yusuf en wogonoboluk peragenebesi. 4Peragenebesimu o kotama en horoksogo lagaihwe, at Yusuf en eragam a’ge owi ’gwelakharok welaga a’ge ano ebam disogo mo’gulesi,

“Perlenesogo ap ebano mugentai lak o. Ene’bek laguntik e, hin disogo wokhomup o,

Obaphenebegei a’ge ano nopaget o’go wiagap nenebegep o? 5An nue ige’be ano nopaget hene’gik abusak wegep? Ige’be ai pam, at ik nasulat, pobuk om a’ge ik pam walhasulat, tiso a’ge o. Asogo tiso a’ge re, his wiak lok a’ge arat tigep o, oluk asogo mo’gulentai lak o,” oluk perakpesi.

6Asogo perakpesimu, at eragam a’ge ano mugentai lagarik enemin welaga. Enemin welat, Yusuf en mo’gulesi a’ge ano ap ebano asogoat mo’gulentesi. 7Asogo mo’gulentesimu is en e,

“Nue, hat wene asogo ese legen ai nopaget. Nis asogo modok tu erlakma no oluk e, ho’buk ’balogu lege o. 8Naduk, nis en uang nonosum emdema oruakma hege a’ge ebano o Kanaan en togolik he’bek woluk wege ano haluk nak o. Nis hat hue owi pam en perak de a? Emas de a, nis nopaget woluk lo epegen. Mia o. 9Nue, nis nenebe mesigat a’ge ige’be ano woluk wagaihwe hwiagorogunmu re, demat worogulat, ye, nis ado heneragam a’ge nonobogulat, tumu re, obat o,” oluk mo’guligisa.

10Asogo mo’gulegisema, at Yusuf eragam a’ge ano en e,

“Demat e’gen a’geat de, at ige’be woluk waga a’ge nak an neragam a’ge emma re, his ado we liborogup ani o,” oluk mo’gulentesi.

11Asogo egeimu is onosum ebano perlenesogo ’gwiang pam po’bu otluk enebe lo’bok onosum ebano emde la hegesa. 12Asogo emde la hegesema at Yusuf eragam a’ge ano opsogo heratil-til e, naduk-naduk ap naduk dogo a’ge osum pam ’gwelakhesi. Pobuk e’berlik dogo a’ge osum pam ’gwelakhesi. Asogo til-til ap labo a’ge pam waga. ’Gwelakhil lagarik e, Benyamin osum ogola en hwiaregei. 13Asogo hwiaregeimu, is ap ebano enede modok wiak agalat e, onosum ’buktogwi a’ge derlep-derlapsogo hwikhogulat e, onosum yagarogwi a’ge ebano keledai ebano o’borl pam pei ligegesarik e, togolik o kota ano legesa.

14Legesarik Yusuf owi pam wegesa ’gal, at ebe owi pam ebano welaga. Oruakma is en e, at orogolema erianoat ’gwiangma sakhunsogo ’bou egesa. 15Asogo ’bou ogukhwe re, at Yusuf en e,

“His no a’ge tigep? Ap ’gain an ’gela’ge pobuk om a’ge naluk om ebele paget e, heneperlak welegep a?” oluk mo’gulentesimu,

16at Yehuda en e,

“Nue, nis hat hebam no u o. Wene o’go ogulat no’gosogo wene nenebam oruak a’ge ano no’gorlogo wokho yo? Nis wiak tige a’ge sebelak welaga a’ge ano nenaik Allah en selakma pesi o. At ap osum ogola ige’be hwiaregei ano nak e, heragam a’ge welema puk. Nis nenebe ’berlek hat heragam a’ge modok wolomul o,” oluk mo’guligisa.

17Asogo mo’guligisa a’geat de, at Yusuf en,

“Erlak o. An asogo tu nebit. At ige’be an a’ge tenak welaga a’ge ano nak neragam a’ge welema o. His ado henebe opsogo henaik e’bek lit o,” oluk mo’gulentesi.

Yehuda en ot Benyamin erlele waigoluk iak erlagaiksogo mo’gulesi wene

18At Yehuda en Yusuf e’bek horoksogo lagarik e, disogo mo’gulesi,

“Nue o. An wene mesik ’baksogo mo’gulheigoluk ’gonu eselegi o. Hat hebe ’gain onuk logo a’ge Firaun ’gela’ge welat, hat holot het nebam pagun no yo. 19Nue, naduk hat en e,

His henaik oruak a? Honot mesik oruak a? Nenebam hin wokhegenma 20nis en e,

Nenaik sebal a’ge oruak o, ye, nenaik en nonot sebal a’ge pam deregeimu oruak o. Enebe ’biren enia mesigat a’ge re, nonot ue ano arat waraga. Asogo waragama re, at nak elaluk oruakhwe aik en at ede hwedik modok oruak o. 21Nue, hat en e,

Honot yema an nil haik en woluk manup o, oluk mo’gulnentigen ano, 22nis en e,

Nonot ano aik ukpoluk woluk wom modok mia o. Asogo woluk wolomma omlogo ede en aik warelep o. 23Nis asogo ogumu hat en e,

Honot ano woluk worogup erlak holuk pobuk an norogolema yema his worogup erlak o, oluk mo’gulnentigen ani o.

24Asogo mo’gulnentigenma nis en nenaik e’bek togolik legerik hat hiak e’gen a’ge ano mo’gulige o. 25Pobuk nenaik en eselat e,

His togolik so’boru pema o Mesir o’go ’bali lit o, oluk mo’gulnentesimu 26nis en e,

Naik o. Nis lo mia o. Nonot woluk lul erlak holuk e, at ’gain orogolema nis ’gwi lo mia o. Nonot emin nak e, lo op o. 27Asogo mo’guligema nenaik en e,

An nugwe Rahel en neiyagai ’biren nak dagenebegei ano henaluk o. 28Mesik arat uknoboluk nalagama mene orlomene en ebe derlelegei hwi a. At nalaga hwerli en yogodak hwerli at ebe yetho modok erlak o. 29His en an nomlogo yu yogodak woluk lagupmu, at ebe wene ebam ema holuk nebe sebalma nede wiak-wiak warom nebit o, oluk mo’gulnentesi.

30-31Asogo mo’gulnentesimu, an yogodak naik e’bek lasuam e, omlogo ano ebe erlakma il holuk e, at ebe warema o. At omlogo ai modok ede hwedik oruakhwe nis en ede wiagap pulmu re, at ebe sebal pam demat warema o, nue. 32Wene mesik yu re. An nebe yu re, not ebalema weleik o, oluk naik obok mo’gulegis o. An en e,

Malik yu an he’bek togolik woluk weik erlak holuk e, wene ano modok hwerli an pobuk wareik hwerli nebam modok welema o. 33Asogo holuk e, nue. An not ebalema hat heragam a’ge weleik o. At e, uelak enemin nenaik e’bek louwak o, nue. 34Nonot erlakma nis nak no’gosogo nenaik e’bek lo yo, mia o. Modok wiak a’ge ai nenaik ebam om a’ge ano an yetho modok nebit o, nue,” oluk mo’gulesi.

Currently Selected:

Kejadian 44: Wul

Highlight

Copy