Kejadian 45

“An nebe re, honot Yusuf anoat o,” oluk ’baksogo uelak mo’gulentesi wene

1 # Per. 7:13 Asogo mo’gulogwiam at Yusuf eragam a’ge ebano oruakhwe, ede pobuk sebelu mia agama re, is eragam a’ge ebano odipmu libemagoluk mo’gulentesi. Is aphwami mu a’ge logon erlak, we, at ematek nak welat e,

“An nebe re, honot Yusuf anoat o,” oluk ’baksogo mo’gulentesi. 2Asogo at eragam a’ge ebano libegesema, at Yusuf nge modok logat tisokhwe re, is aphwami Mesir a’ge enesa’go hweligisarik obok Firaun owi pam woluk legesa. 3Asogo tigisema, at Yusuf en e, uelak ebano disogo mo’gulentesi,

“An honot Yusuf anoat o. Ye, naik ano re, elaluk oruak a? Erlak a,” oluk mo’gulentesimu, at uelak wene ai enesa’go hweligisarik onogorlok modok a’bik agalat e, eniak o’go u mia welegesa. 4Asogo welegesema re, at Yusuf en e,

“Ne’bek horoksogo manis o,” oluk mo’gulentesimu, is ebano e’bek horoksogo hegilhai legesema, at en disogo mo’gulentesi,

“Honot Yusuf is ap Mesir a’ge enebam o’go ’baluagoluk wogentigep a’ge ano nebe yuat o. 5A’ge re, his henede perik welat nebe o’go ’balnigepma yema woknoboluk wegesa ano paget,

Nis modok wiak tige o, oluk ogup o. His en tu erlak a’geat de, at Allah en aphwami a’bik delenebiogoluk naduk honologotma peraknebesimu welegi o. 6Tahun yu ’birenam nak so’boru obouk oruak a’geat de, 5 tahun eminat yabuk worogulat, e’gen ’balogulat, tul modok erlak o. 7Ai paget at Allah en henebe emin, his en dogo’gwe a’ge emin, delhonobuagoluk nebe naduk peraknebesi a’ge ano honogorloksogo welegep ani o. 8His en yema peraknebegep erlak o. At Allah enat peraknebesi o. At en e, at onuk logo a’ge Firaun ano ot logo a’ge welemagoluk ediknebasulat, aphwami at owi pam yema an ne’gikmu pasulat, o Mesir yema ’berlek an ’gwelagentarok welemagoluk ediknebasulat, tegei o,” oluk mo’gulentesi.

9 # Per. 7:14 Asogo mo’gulentesirik, mesik disogo mo’gulentasulat e,

“His perlenesogo naik e’bek laguptik disogo mo’gulomup o,

Homlogo Yusuf en wene yu perakpasulat e, disogo egei,

Nenaik ’gain Allah en an o Mesir yema aphwami ’berlek tenentarok welemagoluk anat ediknebesi o. Eba mo u erlakma en an ne’bek togolik manup o. 10Ye, hat emin, heiyagai emin, he’balak emin, hodomba emin, kambing emin, sapi emin, di a’ge yu a’ge ’berlek tenak welegen a’ge emin, o Gosyen eba nebe horoksogo welerinogoluk manup o. 11His ’gwiang Gosyen eba oruakhwe, an en ’gwelakharok wolom e, elirat o, naik. So’boru obouk 5 tahun owan wolomul o. Asogo oruakhwe, hat emin, heiyagai emin, huam emin, so’boru nele en warom ai an nebit o, holuk e, an egi a’ge ai naik mo’gulesi lit o,” oluk mo’gulentesi.

12Asogo mo’gulentesirik mesik emin mo’gulentasulat e,

“His henebe ’berlegat an not Benyamin emin, an nebe Yusuf demat yetniogu legep o. 13An yema o Mesir ’gain nanni oruak a’ge welegi ai paget emin, his di a’ge yu a’ge ’berlek hegep a’ge paget emin, naik mo’gulesi laguptik e, perleneat at ebe yema woluk manup o, narilak o,” oluk mo’gulentesi.

14Asogo arat mo’gulentesirik e, at ot Benyamin ebagase parliksogo welat nge tisokhwe re, at Benyamin ogo nge tiselat ue Yusuf parlik tegei. 15Asogo toluk, nge tiselat e, at uelak enebe lo’bok parligenebiselat e, emde motok til laga. Arat asogo tisokhwe, eriano en nak e, uelak enemin weneane ogu legesa.

16Wene Yusuf uelak e’bek wegesa a’ge ano paget Firaun owi pam en enesa’go hweligisarik, at ’gain onuk logo a’ge Firaun emin, at osi emin, enagai a’bik hegesa. 17At Firaun en e, Yusuf disogo mo’gulesi,

“Honuelak sum a’ge ano wam keledai ano ono’borl pam lagabak poluk e, o Kanaan togolik lit o, oluk mo’gulentemin o. 18Louwarik e, enaik emin, eneiyagai emin, wogonoboluk togolik wemak o. Womma re, an en o Mesir yema ’gwiang modok op a’ge wogentaikmu is so’boru elirat logon emin louksogo no’gu lema o.

19Is en e, onugwami emin, malik wei a’ge emin, yema wogonoboluk wemagoluk ’gwiangso ’gela’ge o Mesir en eba woluk louwak o. Ye, enaik ano togolik eminat woluk wemak o, oluk mo’gulontomup o. 20Is en a’ge di a’ge yu a’ge eba ukpoluk wema a’ge paget enede perik tu erlakma en opsogo wemak o. O Mesir yema a’ge modok op a’ge is en eiye ema o,” oluk mo’gulesi.

21At ’gain Firaun en mo’gulentesi a’ge ano is en hegitsogoat tigisa. Asogo togukhwe at Firaun en ’gwiangso ’gela’ge ano paget mo’gulentesi ’gela’ge, at Yusuf en wogentasulat, so’boru ebela pam no a’ge wogentasulat, tegei o. 22At en e, ’bogoyum mesik enebe lo’bok wogentesi a’geat de, at ot Benyamin nak e, uang perak 300 emin, sum huaben emin, lo’boksogo wogesi. 23At aik e’bek wam keledai 10 re, holou a’ge o’borl pam di a’ge yu a’ge Mesir a’ge modok op a’ge sum yagarak pasulat, wam keledai 10 re, ierak a’ge logon o’borl pam gandum e’gen emin, roti emin, so’boru ebela pam no a’ge emin, sum ogola yagarak poluk peragenebesi. 24At arilak wogonoboluk peragenebasulat e, disogo mo’gulentesi,

“Ebela pam lagalat e, his wene-wene togup o, narilak o,” oluk mo’gulentesi.

25Asogo tigisarik, is o Mesir ukpoluk onowi Kanaan enaik e’bek wegesa. 26Wegesarik, is en e,

“Homlogo Yusuf elaluk oruak o. At ebe ’gain edikpesimu aphwami Mesir a’ge ’berlek tenentarok oruak o!” oluk mo’guligisa. Asogo mo’gulegisema at Yakub yuk egeitik eniak esei ogwi hwi a? oluk dongsogo mo egei.

27Asogo a’geat de, pobuk Yusuf en mo’gulentesi a’ge ’beli’gogo mo’gulegisema hweliselat, ’gwiangso ’gela’ge Yusuf en Yakub o Mesir togolik woluk wemagoluk perakpesi a’ge ano yethasulat, tegeirik e, ede yamuk egei. 28Asogo epesirik at en e,

“An nomlogo Yusuf elaluk oruak o. An e, demat oruak epasu legi. An nelaluk owan warom erlak welat e, nomlogo ebe nil yethaiogoluk lo nagai o,” oluk egei.

Currently Selected:

Kejadian 45: Wul

Highlight

Copy