Kejadian 26

At Ishak o Gerar welaga wene

1O agauwa mesik pam o ebano so’boru obouk o pageat at Abraham oruakhwe ago ano ’gela’geat aga. Asogo agama at Ishak ano ap Filistin onue onuk logo a’ge Abimelekh eiye oruakma o Gerar ebano laga. 2Lagarik o Mesir laik oluk tisoma at Nenaik ’gain Onuk Logo a’ge en Ishak eragam wagarik mo’guleselat,

“O Mesir eba lagun o. A’geat de, an en o wolomma mo’gulhoso holuk e, eba yat wolomup o. 3#Kej. 22:16-18’Gwiang yu ’berlegat wokhesik o, oluk, ho’buk ’balogo haik Abraham mo’gulegis a’ge ano hegit emagoluk, hat heiyagai dagenebigen a’ge emin, wokhentaikmu re, hat ap ’bok a’ge ’gela’ge yemayat welemin o. Asogo oruakhwe, an neminat welat, nede aganhan hebam pasulik o. 4-5An en hat heiyagai he’balak ai hwesagal ’bogorl pam a’bik oruak ai ’gela’ge a’bigapsogo wokheselat, ye, o yema sagalak ’berlegat is eiye takpoluk welemagoluk wogentasulat, tik o At Abraham ano en an wene eselegi a’ge emin, disogo tip, asogo tip oluk wene werak a’ge emin, modok pobirak poluk hwologo nak taga lagama re, his hegitsogo togup ano pam is di aphwami yu aphwami o ’gwiang yema welagai a’ge ’berlegat enede aganhan hogu lema o,” oluk mo’gulesi. 6Asogo mo’gulesimu, at Ishak ano o Gerar eba yat mo egei.

7 # Kej. 12:13; 20:2 Eba oruakma, is ap Gerar a’ge en Ishak mo’gulogulat,

“Hwe hemin wegep a’ge ai re, sa o?” oluk mo’gulegisema ugwe Ribka ano modok ebe ebil-ebeltakma no oluk e, ede epesirik ogorlok en,

“An nugwe o,” oluk u erlakma enat e,

“Hwe yu re, not o,” oluk mo’gulentesi.

8Asogo mo’gulentesirik welat, agauwa mesik pam at ap onuk logo a’ge Abimelekh ano o yendela emde ’belakma en at Ishak Ribka e’birek oruakhwe ing togu legesema il yerentesirik, 9Ishak worlhesimu wagoam, disogo mo’gulesi,

“Hwe Ribka yu, hat hugweat a’geat de, no oluk, nugwe erlak o, not o oluk egen?” oluk mo’gulesimu, at Ishak en e,

“Erlak o. An nugwe o, oso holuk, nebe watnobogulat, nugwe horlouwano oluk epegirik, not egi o,” oluk mo’gulesimu,

10“Hat no’gosogo takhebik oluk ai egen? Ye, yu re, demat an not egen, oluk an nosi mesik en e, hat hugweat de, wokho e’birek nogo elipmu re, hat enat nis nenebe wiagapsogo nenebelen a’ge hegi o,” oluk mo’gulesi.

11Asogo mo’gulesirik, at Abimelekh en e, osi enebe ’berlegat enesa’go weriselat,

“His logon en ap Ishak ugwe e’birek ya wiagap logon tagenebagup holuk e, at modok woruat o,” oluk mo’gulentesi.

12Ye, at Ishak ano is enemin ebanoat welat, di a’ge yu a’ge yetil lasulat, edip mesik en e, e’gen yetil lasulat, edip mesik en e, e’gen mesi’garat ’baliselik yeregei a’geat de, at Nenaik ’gain Onuk Logo a’ge ede aganhan ebam pasumu re, edip mesik pam e’gen a’bigat 100 ’gela’geat egesisoma re, 13at a’ge-a’ge modok ogorlok a’ge wiyalak pagathwerlil liplau wogulat, ap lok modok e’gikmu oruak a’geat aga o. 14At uam domba emin, sapi emin, eragam a’ge emin, a’ge di a’ge yu a’ge a’bigat eiye oruakma, is aphwami o Filistin a’ge en enil hegesarik e,

“Nis logon woknonto pukmu en tago yu re, logwe!” oluk, onolot het ebam pogu legesa. 15Is onolot het ebam pogu legesarik ik no’gu lemagoluk at aik Abraham elaluk oruakhwe, at eragam a’ge en ’gwiang palegisa a’ge ano is ap Filistin a’ge en ik omugwe delakma ’gwiang ogola takpil legesa.

16Asogo tigisema, at ’gain Abimelekh en e, Ishak mo’guleselat,

“Hat hanni a’bigat welegen ano re, nis asogo ’gela’ge erlakma re, nenemin labuksogo wolom mia o. Uknonoboluk o momu eba lak o,”

17oluk mo’gulesimu, at Ishak ano ebano ukpoluk, o Gerar do’goma ebayat lagarik, o sabo werik poluk welaga. 18Ebano welat, ik no’gu lemagoluk, o pageat Abraham elaluk welat, omugwe ’gwiang palil laga a’geat de, at ebe waragama is Filistin a’ge en ’gwiang yethegeik heli’gogo pil legesa a’ge ano yegerlogo lebik pil lagarik aik Abraham en onuk tualegei ano ’gela’ge at asogoat onuk tualegei.

19Tualak poluk o ebano welat, at Ishak eragam a’ge en ik no’gulomak oluk do’goma ebano ’gwiang logon palegisema re, ik elaruk a’bik a’ge porlolu harlu agalat, logat ye’gelegei. 20Logat ye’gelegei a’geat de, is ap o Gerar ebano kambing domba degelogwi a’ge en at Ishak eragam a’ge ebano enemin wene ’balogulat,

“Ik yu re, nis nenegeik,” oluk wene ’balegisema re, at Ishak en ik ’gwiang pelak a’ge ano onuk e, Eli Wokho Wene Balogumu o, oluk tuelak pesi. 21Pobuk nin at eragam a’ge yen e, ik no’gulomma ’gwiang ele muat mesik pelak pegesa a’geat de, asogoat eli ogwi en emin wene ’balegisarik at Ishak ano en e, ik ano onuk Ilbelak Welagaimu o, oluk tuelak pesi. 22Tuelak pesirik, o ebano en e, ukpoluk o momu ebano legesarik eba welat, ’gwiang muat mesik ele delegisa a’geat de, eli wene u erlakma at Ishak en e,

“O yema Allah en telagapsogo pesimu re, neneiyagai logat wiyalema hegi o,” oluk, ik ele palegisa ano onuk e, Wene Erlaksogo Op Welagoma o, onuk tuelak pesi.

23Pobuk nin o ebano ukpoluk o ’Bersyeba yat laga. 24Lagarik o hup ede’burl nogosoma, at Nenaik ’gain Onuk Logo a’ge at eragam wagarik e, disogo mo’gulesi,

“Hat haik Abraham aik Allah anat o. An modok-modok heragam ’gwelakhiarok welat, ye, nede aganhan hebam pasulat, neragam a’ge Abraham wene modok deksogo mo’gulegis a’ge ano ’gela’geat, hat heiyagai he’balak a’bigat wiyalak pasulat, togunatma re, hogorlok hagun no yo.”

25Asogo mo’gulesimu, at Ishak en e, o erianoat Aik ’gain Onuk Logo akhit wusogo odouk narlik oluk, helep uak wusogo poluk e, domba wusogo Aik ’gain Onuk Logo a’ge onuk ’balogo se’ban egei. Ye, o ebano onowi sabo werik poluk welat, at eragam a’ge ebano en e, ik no’gulomogoluk ’gwiang ele mesik deligisa.

Ishak Abimelekh e’birek en wene ’balegisa wene

26 # Kej. 21:22 At Ishak ebano oruakma agauwa mesik pam at Abimelekh ano osilak enebe ’biren, mesik wene ago weriso a’ge onuk Ahuzat, ye, mesik e, segen eiye a’ge onue onuk e, Pikhol e’birek Abimelekh emin o Gerar en at Ishak oruakma hau wegesa. 27Hau wegesarik at Ishak en e, is mo’gulentasulat e,

“O naduk en e, nebe henemin wolom henebit en mukho lebiknobou wegep a’geat de, no’gosogo yogodak niau wegep?”

28-29Asogo mo’gulentesimu, is en ogulat e,

“At Henaik ’gain Onuk Logo A’ge Allah en hemin opsogo welago ano nenil hiegerik nis-nis nak ogulat e,

O naduk eria yat disogo togu lomok o, oluk nenemin wene deksogo ho tige erlakma hege o, oluk, hat nenemin ho tuok oluk, hiau wegema re, Henaik ’gain Onuk Logo A’ge he’birek welat, yogodak ede aganhan hebam pasumu re, hat nenemin welat, nis en e, wiak mesik takhobogwi erlakma en op nak takhobogulat, ye, nenede op pamat perakhobogulat tige a’ge ano hegitsogo hat en an ogo re, wiagaphonobo erlakma en e, obaphenebasulik o, oluk e, wene ologun daksogo mo’gulnentemin o, oluk e, wene ologun daksogo mo’gulnentemin o,” oluk mo’gulegisa.

30Asogo mo’gulegisarik, at Ishak en seni onlogotma seregei a’ge, so’boru emin, ik emin, arat ne’gesarik 31enemin nogoluk e, tono hubet en,

“Disogoat togu lomul o,” oluk e, is enebe ’berlek enat ho’buk ’belakpegesarik at Ishak en e,

“Nari! Honowi pam lit o,” oluk mo’gulentesimu, hau wusogo poluk e, enede op pamat onowi pam ’bok legesa.

32Agauwa eria pam e, at Ishak eragam a’ge ebano en ik no’gulom a’ge ’gwiang mesik pelak pegesarik e,

“Ik elaruk mesik hwiakhwerlege o,” oluk, at Ishak mo’gulosu egesema, 33at Ishak en e, ik ’gwiang pelak onuk e, Syeba at tualegei. Ai tegei holuk e, o kota werigisema ano onuk e, Bersyeba oluk ogwi oruak.

Esau hwami ena’gul onuk muat a’ge wogenebegei wene

34At Esau ano dagama 40 tahun takpoluk, hwami ’biren mesik ap Het a’ge onuk Beeri agalogo Yudit wasulat, ye, mesik ap Het a’ge onuk Elon agalogo Basmat wasulat, tegei. 35Is hwami enebe ’biren eria togwi pam Ishak Ribka e’birek enede wathwerlegesa.

Currently Selected:

Kejadian 26: Wul

Highlight

Copy