Kejadian 25
25
Abraham eiyagai ebano ugwe Ketura pam en wiyalegesa wene
1Pobuk togolik at Abraham ano hwe mesik onuk Ketura wesi. 2Asogo wesimu, at hwe Ketura ano en e, Abraham ebalema emalik ononuk e, Zimran, Yoksan, Medan, Midian, Isybak, Suah yat dagenebegei. 3At Yoksan en eiyagai Syeba, Dedan e’birek dagenebegeimu re, at Dedan en wiyalak ena’gul onuk ai re, Asyur a’ge, Letus a’ge, Leum a’ge arat wiyalak enebesi. 4Ye, ap Midian eiyagai dagenebegei ano re, Efa, Efer, Henokh, Abida, Eldaa, dagenebegei. Is dagegesa a’ge yu re, ’berlegat hwe Ketura enat wiyalak enebesi.
5At Abraham eiyagai wiyalak enebe a’bigat oruakhwe, emining a’ge di a’ge yu a’ge ’berlegat Ishak nak wogesi a’geat de, 6at warom erlak elaluk welat, is hwami eragam a’ge ado wogenebegei a’ge enemalik ap a’ge holuk enebe ede yen a’ge mesik-mesik so’burentesirik, Ishak emin mesikmu la’bolik oruak hwia oluk, o Kanaan mo il liplau wago hegit eba o yatma eba peragenebesi.
At Abraham waragama owikmu ’gwiang sebeligisa wene
7At Abraham ano dagama 175 tahun takpoluk, 8arat arlue agarik, sebal mip otluk enat waraga. Asogo ebe arat waragarik e, e’balak warotluk loma owik oruakma ebanoat entai laga. 9-10#Kej. 23:3-16Ye, at eiyagai Ishak, Ismael e’birek en werak ebe wokho at Abraham en aphwami Het a’ge ono’gwiang o’go ’balegeimu, Zohar omlogo Het a’ge onuk Efron o Mamre horoksogo yabuk tagoma owik onuk Makhpela ugwe Sara werak sebelegeimu ebano at emin sebeligisa. 11Ye, at Abraham ano waragama, omlogo Ishak ano ik omuge ’gwiang ele delakma onuk, At otok welago a’ge en il pobirak pasumu, oluk tuelakma ebanoat oruakma at Allah en ede agahan ebam pasu laga.
Ismael eiyagai wiyalegesa wene
12Hwe Sara eragam a’ge Hagar owi Mesir a’ge ano en Abraham ebalema omlogo Ismael deregei a ge ano eiyagai wiyalegesa a’ge ononuk yuat o.
13Ismael eiyagai dogo a’ge hegitsogo ononuk yu o. Ismael omlogo naduk dogo a’ge onuk Nebayot. Pobuk e’berlik a’ge Kedar, Adbeel, 14Mibsam, Misyma, Duma, Masa, 15Hadad, Tema, Yetur, Nafis, Kedma dagenebegei. 16Ap Ismael eiyagai wiyalak aiat o. Ye, ononuk tualak ano re, enematek lo’bok onowi sabo ut horlogulat, takpoluk welagaimu onuk tualak hegit-hegit ononuk oruak a’ge enebe 12 pamat egesa. 17At Ismael dagama 137 tahun arat takpoluk ebe arat arlue otluk waragama. At e’balak warotluk loma welagaimu ebano entai laga. 18Ye, at eiyagai wiyalak ebano nak e, o Asyur lagaimu o Hawila ebela yet-yet, o Syur do’go yet-yet, o mo il liplau wago hegit, o Mesir horoksogo ’burl ebayat o Asyur eba o ’balhwerlegesa. Ebano welat enarilak ado pema la’bolu erlakma en onomu nak e’gik ’balogo hwerlisogoat welegesa.
Esau Yakub emin dagegesa wene
19At Abraham omlogo Ishak en taga laga re, disogo. 20At Ishak en e, hwe Ribka Laban e’berlik a’ge Betuel agalogo owi Aram o Mesopotamia a’ge wesi ano, Ishak ebe umur 40 tahun pam hwe wesi. 21Wesi a’ge re, emalik erlak en, Nenaik ’gain Onuk Logo a’ge ’gonu mo’gulesi. Asogo mo’gulesimu, Nenaik ’gain Onuk Logo a’ge en Ishak iak esa’go hwelegeirik e, Ribka emalik ogola aga. 22Emalik ogola aga ano, holup a’ge ogola agarik, emalik enebe owan dagom erlak welat, ogum ogola en emin orlumamit modok ’balogu legesa. Asogo orlumamit ’balogu legesema, Ribka en e, disogo egei,
“An nogola yu ’gesogo oluk tiso yo,” oluk Nenaik ’gain Onuk Logo a’ge pam hin wesi.
23 #
Rom. 9:12
Asogo hin wesimu, at Nenaik ’gain Onuk Logo a’ge en e,
“Ap ena’gul onuk ’biren a’ge hogola oruak o.
A’ge re, emin selei il ’belak a’ge dagonobogun o.
Malik pobuk a’ge anni a’bik dagagoam e,
naduk a’ge en e, e’berlik a’ge ai eragam a’ge ’gela’ge welema ai o,”
oluk mo’gulesi.
24Asogo mo’gulesirikmu en, Ribka emalik arat ’bo lau wagama re, emalik ap holup a’ge dagenebegei. 25Emalik naduk a’ge re, agap orogole momi a’ge ’gela’geatma re, omutaruk modok a’bik a’ge dagaga. Asogo dagaga ai en onuk Esau tualigisa. 26Ye, at e’berlik a’ge derisoam e, naduk a’ge en oyuk o’gurl e’gik tenakho dagaga. Asogo dagaga ai en onuk Yakub tualigisa. At Ishak ebe umur 60 tahun pam emalik eria dagegesa.
Esau en, “Malik naduk a’ge hat emin,” oluk ot ebam o’go wesi wene
27Is malik eriano emin enebe lok agalat, at Esau tue, ’baik weriso a’ge aluk modok agarik, ebe e’gelema modok welaga. Ye, at Yakub ebabut e, da ya lo erlakma en owi pam modok welaga. 28At Ishak tue, ’baik no ebele paget ede hwedik modok welaga ai en, Esau ede hwedik ’gela’ge welaga. Ye, at Ribka Yakub ede hwedik ’gela’ge welaga.
29Agauwa mesik erlige, at Yakub kacang il momi a’ge serisoma, at Esau tue, ’baik selil denaga lagarik, so’boru modok nele en e’bek waga. 30E’bek wagarik e, disogo mo’gulesi,
“Nare. An so’boru modok nele agama kacang momi serigen a’ge eba logon woknemin o,” oluk ’gonu mo’gulesi. (Asogo mo’gulesi ai en at Esau onuk mesik Edom, oluk ogwi ai o.)
31Asogo mo’gulesimu, at Yakub en e,
“Op o. Hat en e,
An nebe naduk a’ge logo welat eiye eik a’ge ai, hat eiye emin o, oluk mo’gulnorogun holuk e, wokheigat o,” oluk mo’gulesi.
32Asogo mo’gulesimu, at Esau en e,
“An so’boru modok a’bik nele agarikmu re, warom ’gela’ge wiak welegimu re, nebe malik naduk a’ge modok logo welat eiye eik a’ge ai logo re, erlak o,” oluk mo’gulesi.
33 #
Ibr. 12:16
Asogo mo’gulesimu, at Yakub en o’go disogoat mo’gulesi,
“Hat en e, an nebe naduk a’ge logo welat eiye eik a’ge ai, hat eiye emin, oluk Allah onuk ho’buk ’balogo mo’gulnemin o,” oluk mo’gulesimu, at Esau en e, Allah onuk ho’buk ’balogo ebe naduk a’ge logo welat eiye ema a’ge ai ot Yakub emagoluk wogesi. 34Asogo egesarik e, at Yakub en so’boru roti a’ge mesik, ye, kacang momi seregei a’ge ebano logon emin wogesi. Asogo wogesi a’ge ebano emin, ik emin, ne’geitik e, ’bok laga. At Esau en e,
An nebe naduk dogo a’ge welat eiye eik ai logo modok erlak, mia o, oluk ot ebam o’go wesi re, aiyat o.
Currently Selected:
Kejadian 25: Wul
Highlight
Share
Copy
Want to have your highlights saved across all your devices? Sign up or sign in
