Kejadian 15

Allah en Abram emin wene werak pesi wene

1Asogo tigisarikmu en, Nenaik ’gain Onuk Logo a’ge en e, Abram abi pam disogo mo’gulesi,

“Abram, hogorlok hagun. Wathobuogoluk togwi holuk an en tenhiarok welat, o’go lok a’ge wokheik o,” oluk mo’gulesi.

2-3Asogo mo’gulesi a’geat de, at Abram en disogo mo’gulesi,

“Allah modok ’gain Honuk Logo a’ge en, an nomlogo mesik woknigen erlak. Ai en an nemining a’ge re, neragam a’ge Eliezer owi Damsyik a’ge ano eiye emma re, hat en almasogo o’go ai nopaget wokneigoluk en egen,” oluk mo’gulesi. 4Asogo mo’gulesirikmu en, Nenaik ’gain Onuk Logo a’ge en Abram mo’gulesi,

“Hat hemining a’ge re, heragam a’ge ai en horlouwa puk o. We, hat hu’gwarek homlogo en horlouwa o,” oluk mo’gulosoma esa’go hwelegei. 5#Rom. 4:18; Ibr. 11:12Asogo mo’gulesirik, Nenaik ’gain Onuk Logo a’ge en Abram ebe odipmu woluk libagarik e, disogo mo’gulesi,

“Hil ’bogorl pam likholuk e, hwesagal erabu elirat he’gik wenarogun a? Mia ya. Walhomup o. Hat en dogo’gwe a’ge re, a’bik hwesagal ai ’gela’ge enebe a’bik yarluk ua o,” oluk mo’gulesi.

6 # Rom. 4:3; Gal. 3:6; Yak. 2:23 Asogo mo’gulesimu re, at Abram ede Nenaik ’gain Onuk Logo a’ge pam he’berik pesi ai en, Nenaik ’gain Onuk Logo a’ge en e,

“Hat en an nogola nagai a’ge tu ’gela’ge, hede nebam he’berik pegen aiyat o,” oluk wesi.

7Pobuk Nenaik ’gain Onuk Logo a’ge en e, disogo mo’gulesi,

“An haik ’gain Nonuk Logo a’ge enat hat o Ur Babilonia eba en ’gwiang yema hat eiye orogun en wokheigoluk wokhoboluk wegi o,” oluk mo’gulesi.

8Asogo mo’gulesi a’geat de, at Abram en hin wokhasulat, disogo mo’gulesi,

“Allah modok ’gain Honuk Logo a’ge, naik. ’Gwiang yema an eiye eik, oluk no’gosogo naluk om, naik,” oluk mo’gulesi.

9Asogo mo’gulesimu, at Nenaik ’gain Onuk Logo a’ge en e, disogo mo’gulesi,

“Hat en an nebaget e, wam sapi holou a’ge mesik, kambing holou a’ge mesik, domba ierak a’ge mesik, ebe lo’bok e, ebe umur 3 tahun a’ge holuk wasulat e, tue abiang ’gela’ge mesik, ye, ’berl ’gela’ge mesik, pulogo nebemin o,” oluk mo’gulesi. 10Asogo mo’gulesimu, Abram en e, wam, tue ano Allah paget pesi. Asogo pesirik, sapi emin, kambing emin, domba emin, ebe lo’bok wusogo hebisogo-hebisogo poluk e, erathegeik nak deng ’biren pesi. Asogo pesi a’geat de, tue nak e, ebesik pesi. 11Asogo pesimu, tue di a’ge yu a’ge werak a’ge nasu a’ge wagarik, wam heberik ebano eino lebilhegeik naigoluk ebam duklau wagoam e, Abram en silogo perakpesi.

12 # Ayu. 4:13,14 Asogo taga lagarik, o mo obuk i lasukhwe, Abram nogo modok lebek egei. Asogo nogo eselat wongat oruakma, ebam hik egeitik ogorlok a’bik aga. 13#Kel. 1:1-14; Per. 7:6Asogo ogorlok agarik oruakma, Nenaik ’gain Onuk Logo a’ge en e, wene disogo mo’gulesi,

“Hat en dogo’gwe a’ge re, aphwami muon onowi pam loluk enebe eba oruakhwe, aphwami onowirak a’ge eba en eneragam a’ge ’gela’ge tagonoboluk e, 400 tahun di obotut yu obotut tagonobua ano hede eberak wolomup o. 14#Kel. 12:40,41; Per. 7:7A’geat de, is aphwami onowirak a’ge en, hat en dogo’gwe a’ge eneragam a’ge ’gela’ge tagonobogu lema a’ge ai, an en wene enebam paik o. Enebasuam hat en dogoma a’ge o eba ukpoluk liplau wagalat, is onowirak a’ge ena’ge di a’ge yu a’ge a’bik horloluk liplau wema o. 15Hat hebe umur yarat woloroguntik en hede yamuktagat welat waragoam, ’gwiang ’balogo werak salhobua ani o. 16Aphwami Amori a’ge enebabut modok wiak togumu wene enebam paik a’ge owan welegi ai en e, hat en dogo’gwe a’ge re, enebe hwerli ugan pam dagemarik en hat he’balak togolik o yema wema o,” oluk mo’gulesi. 17Asogo mo’gulosoam, o arat hik egeimu re, sogoluak odouk heberlogo so’boru sorogwi a’ge mesik hobu duk-duk osokhwe mesik emin, esaga ’gwielak a’ge mesik emin, ’ga en ’gela’geat hebarligen agarik e, wam se’gerlak ebano hwerlirak poluk erasogo oruakma ’burl e’gerlakma waga. 18#Per. 7:5Asogo wagalat erianoat, Nenaik ’gain Onuk Logo a’ge en Abram wene disogo werak pesi,

“An en e, hat en dogo’gwe a’ge ’gwiang yu ’berlegat wogentaik o. Wogentaik ai re, o Mesir hwerli welago a’ge pam en ’bekhit ik Efrat hwerli, 19aphwami Keni a’ge onowi pam emin, Kenas a’ge onowi pam emin, Kadmon a’ge onowi pam emin, 20Het a’ge onowi pam emin, Feris a’ge onowi pam emin, Refaim a’ge onowi pam emin, 21Amori a’ge onowi pam emin, Kanaan a’ge onowi pam emin, Girgasi a’ge onowi pam emin, Yebus a’ge onowi pam emin, ’berlegat wogentaik o,” oluk wene werak pesi.

Currently Selected:

Kejadian 15: Wul

Highlight

Copy