Kejadian 14

Abram en Lot delegei wene

1Eria hegit e, ap ’gain ononuk logo a’ge welegesa. Mesik e, onuk Amrafel owi Babilonia a’ge, mesik e, Ariokh owi Elasar a’ge, mesik e, Kedorlaomer owi Elam a’ge, mesik e, Tideal owi Goyim a’ge, enebe ugan welegesa. 2Ye, is eneselei a’ge ap ’gain ononuk logo a’ge logon enebe huaben a’ge enemin weim obogu legesa. Ap ’gain ononuk logo a’ge enebe huaben ai, mesik e, Bera owi Sodom a’ge, mesik e, Birsya owi Gomora a’ge, mesik e, Syinab owi Adma a’ge, mesik e, Syemeber owi Zeboim a’ge, mesik e, ap ’gain onuk logo a’ge owi o Bela ogulat, Zoar ogulat, ogwi a’ge emin, enemin weim obogu legesa. 3Is ap ’gain enebe huaben ai enede mesigat welat, onosi tentara o Sidim do’go yogodak en onuk,

“Ik Laut Mati o’but lasu erlak ye’gelak modok welagoma,” oluk ogumu eba odoktigisa. 4Odoktigisa ai re, at ap ’gain Kedorlaomer en senentarok oruakhwe, hwerli 12 tahun aga. Asogo agarikmu re, tahun mesik 13 pam welat, is ap ai homi pebisogo at ’gain Kedorlaomer ebe woruogoluk tigisa ai o. 5Asogo woruogoluk tigisa a’geat de, tahun mesik 14 pam e, at ’gain Kedorlaomer emin op a’ge la’bolik poluk, onosi tentara a’ge enemin wagalat e, aphwami ena’gul onuk Refaim a’ge, o Asyterot-Karnaim eba mabenap onobogulat, aphwami ena’gul onuk Zuzim a’ge o Ham eba mabenap onobogulat, aphwami ena’gul onuk Emim a’ge, o Syawe-Kiryataim eba mabenap onobogulat, 6aphwami ena’gul onuk Hori a’ge o dom Edom eba mabenap onobogulat, tigisarik enebe mugonoboluk o lei esa’goma walek onuk El-Paran eba onobou wegesa. 7Asogo mukho onobou wegesarik, togolik o En-Mispat ai yogodak en onuk Kadesh ogumu eba legesa. Lagalat e, aphwami Amalek a’ge ono’gwiang ’berlegat sebelhwerlil lagalat, aphwami Amori a’ge o Hazezon-Tamar welegesa a’ge modok mabenap enebegesayat.

8Asogo mugonoboluk lagaimu, is ’gaindek o Sodom a’ge emin, Gomora a’ge emin, Adma a’ge emin, Zeboim a’ge emin, Bela a’ge emin, onosi tentara logolak o Sidim do’go eba esan logolak enalo’gwe hwelak poluk enemin weim ebigisa. 9Asogo is ap ’gain enebe huaben onosi enemin en is ap ’gain enebe ugan o Elam a’ge emin, Goyim a’ge emin, Babilonia a’ge emin, Elasar a’ge emin, enemin weim ebigisa.

10O do’go weim ebigisema eba, sin akhwi ’gela’ge ebi wiak a’ge omugwe da ye’gel legenak oruakma is ap ’gain o Sodom, Gomora a’ge weim hweiye lobom ’galma re, is e’birek nak sin akhwi ’gela’ge ebi wiak a’ge ye’gelakma eba dung ’bigisa. Asogo ’bugukhwe is ap ’gain enebe henagan nak e, elirat hweiye lebegesarik, hweiye o dom pam eba wegesa. 11Asogo tigisema, is ap ’gain enebe ugan enanni egesa a’ge en, di a’ge yu a’ge aphwami o Sodom, Gomora a’ge en no’gwi a’ge emin, tenak welagai a’ge emin, modok ’berlegat hogul ’gwigisarik horloluk legesa. 12At Lot Abram ot omlogo ano o Sodom oruakma no oluk e, is ap selei ebano a’ge en at ebe herle wusogo woluk lagalat, a’ge di a’ge yu a’ge emin, horloluk legesa.

13Asogo tigisema, at ap mesik weim hweiye waga a’ge wene aga a’ge ano ap Abram Ibrani a’ge ano, ebe e Allah agan ap onuk Mamre a’gul onuk Amori a’ge o’gwiangma Allah erliktogulomma eba oruakma, ’beli’gogo mo’gulosu aga. At Mamre emin, arilak Eskol, Aner e’birek eminat, eba re, Abram arilak enemin op a’ge o. 14Ap wene mo’gulosu aga a’ge ano en e,

“Abram, hot omlogo Lot ano ap en herle wusogo woluk legesa o,” oluk mo’gulesimu esa’go hwelegeirik e, at osi orabo sum owi wusogo welegesa a’ge ebano odogenebegei. Odogenebisoma, ap weim obogwi enaluk a’ge re, enebe 318 agama re, is ap ’gain a’ge enebe ugan eriano mugonoboluk hwerli o kota Dan legesa. 15O eba en, Abram osi ano esan hundomok pulhegeik enebesi. Asogo enebesirik e, o hup ede ’burl o larogulat enebe warenebil-enebil mugonoboluk laga legesarik hwerli o kota Damsyik en abel etle akhit o onuk Hoba eba enebi legesa. 16Asogo enebi legesarik, at Lot ebe emin, a’ge-a’ge di a’ge yu a’ge emin, hwami logon emin, ap logon emin, togolik delogo wogonoboluk wegesa.

Melkisedek en e, “Allah en obaphobuak o,” oluk di a’ge yu a’ge Abram en wogesi wene

17At Abram en ’gain Kedorlaomer emin, arilak ’gain a’ge logon at emin op a’ge emin, mi-miaragonoboluk togolik waga. Wagoam, at ap ’gain Sodom a’ge Abram orogolema o Syawe do’go onuk mesik ’gain onuk logo a’ge odo’go, oluk ogumu eba laga. 18#Ibr. 7:1-10Eba ap onuk Melkisedek ebe is aphwami Salem a’ge onue ’gain welat, Allah modok ’gain Onuk Logo a’ge eiye welaga a’ge en so’boru roti a’ge emin, ik anggur e’gen a’bosu emin, wogesi. 19Asogo wogesirik, disogo mo’gulesi,

“Allah modok ’gain Onuk Logo a’ge welat, ’bogorl emin, ’gwiang emin, walhesi a’ge ano en obaphebise lemak o. 20Allah modok ’gain Onuk Logo a’ge en heselei a’ge he’gik pam pesimu mabenap poluk wegenma o. At ebe erliktul o,” oluk mo’gulesi. Asogo mo’gulesimu, at Abram en e, di a’ge yu a’ge hogul woluk lebegesa a’ge ebano togolik delogo woluk waga a’ge ebano ebe hundomok e’gik wenakho, 10 agama, 9 ’gela’ge pagathwerlasulat, mesik-mesik odoksogo at Melkisedek wogesi.

21Asogo tegeimu, at ap ’gain onuk logo a’ge Sodom a’ge en Abram disogo mo’gulesi,

“Di a’ge yu a’ge hogul wa ’gwigisa a’ge delogo woluk wegen a’ge ai, hwerlasulat e, aphwami an en a’ge enebe nak e, woknemin o,” oluk mo’gulesi.

22Asogo mo’gulesimu, at Abram en e, disogo mo’gulesi,

“Naik modok ’gain Allah Onuk Logo a’ge welat, ’bogorl, ’gwiang walhesi a’ge ai onuk pam o. 23An en e, hat en a’ge di a’ge yu a’ge wasulat, herlesi de a, herle onoyuk sum hettak a’ge de a, an mesik modok waik erlak o. Asogo waik erlak holuk, hat en e,

An en Abram ’gainap pegi, oluk mo’gulnum modok miayat o. 24Di a’ge yu a’ge an nu’gwarek en a’ge paget, mesik wo nebit o. We, an horlo ’gela’ge re, an nosi en arat ne’gesa ai o. Asogo a’geat de, ap an nemin hwedik a’ge Aner emin, Eskol emin, Mamre emin, is ena’ge holuk is onu’gwearegat horlouwak o,” oluk mo’gulesi.

Currently Selected:

Kejadian 14: Wul

Highlight

Copy