Keluaran 36

1“Asogoatma re, ap Bezaleel emin, Aholiab emin, is ap Allah en ene’gik ’bogun pam at owi woruagoluk, enalugwap pasulat, enede en ebetholuk tuagoluk wogentasulat, tegei a’ge ano emin, ’berlegat at Allah en wene le’gelogo pesi a’ge ano ’gela’geat at owi worogu lemak o,” oluk, mo’gulentesi.

2Mo’gulentesirik, “Ap Bezaleel emin, Aholiab emin, is aphwami enede eberak poluk ene’gik op ’boguntak a’ge pam til lagalom a’ge paget Allah en wogentesi a’ge ano emin, ’berlegat Allah owi wosuom a’ge tagenebesi a’ge ano Musa en worlentasuam wagaiam e, 3is aphwami Israel a’ge en na’ge yu o nebaget pulik wolomma woru a’ge pei laik o,” oluk, o’go erlak weat pou wegesa a’ge ano Musa en wogentasuam ai pam worogukhwe, is aphwami Israel en o huberen mesik emin Musa eragam pou wagalat nak togwi holuk, 4is ap ene’gik ’bogun a’ge enebam nebaget pulik wolomma worogwi a’ge ebano ukpoluk, ’berlegat 5Musa, mo’gulosu agalat, “Aphwami ena’ge woluk, wagai a’ge ai, at Allah en odoktu egei a’ge ano de a’bigat odoktogwi o.”

6-7Mo’gulegisema, is pou wegesa a’ge ebano re, pou wom oluk wene werak oruakhwe logat pou wegesema re, at Musa en, “O wolomma woru a’ge paget pou wagai a’ge ano ap emin, hwami emin, pobuk logon pou wom mia o,” oluk, aphwami onowi pam oruakma mo’gulentil louwagoluk mo’gulentesimu, mo’gulentil lagaiam e, pobuk logon pou wom erlakma en moat egesa.

Allah owi woruogoluk di a’ge yu a’ge odoktigisa wene

8Mo ogukhwe, ap o sum owi worogwi a’ge ene’gerlakma sum egesogwi enaluk a’ge ebano en Allah owi woruagoluk, herle menya esi ’gela’ge il op modok a’ge tuelak a’ge emin, domba asu tuelak il borlu iltak a’ge emin, ’borlu ’belak a’ge emin, ebano a’ge wogu legesarik, kain sepuluh at modok ebak a’ge egesogukhwe is ap malaikat ’gela’ge kerub hele’gogwi enaluk a’ge ebano en malaikat ’gela’ge kerub ogut heli’gogo kain ebak a’ge ano pam lo’boksogo pegesa. 9Sum kain 10 eriano a’ge re legeik yat akhit e 12,6 meter pam, ye, horok akhit 1,8 meter pam asogo nagat pil-pil laga. 10Ikho poluk kain ebak a’ge 5 egesegisa a’ge ebano ologun mesik pam la’bulogo egesegulat, ye, kain 5 ado ebano asogo nagat ologun mesik a’ge pam la’bulogo egesegulat, takpil legesarik, 11-12kain ebak a’ge egesegisa a’ge mesik ebano pam abel pema en nak wai lagalat tuak oluk domba asu tuelak ’borlu iltak a’ge herle abel pema 50 erlelik pogulat, ye, mesik ano asogoat 50 hwerli erelik pogulat, asogo tugulat, herle ano emin dip tuogoluk, ologun hegitsogo nak pogu legesarik, 13o woru a’ge kain egeik a’ge ai, mesigarat emak oluk, emas pam abel pema 50 takpoluk, kain ebak egeik a’ge ebano pam erlilogo pil legesa. 14Ye, o woru a’ge sel ’gela’ge Kain lo’boksogo po a’ge ano pema akhit oruakhwe ebam lo’boksogo pouwagoluk, Sum ebak 11 hwerli kambing asu pam eikho pegesarik, 15Sum kain il eriano a’ge re, yat akhit legeik e, 13 setengah meter ye, ebagakhit e satu komma delapan meter pam takpegesa. 16Sum 5 kambing pam egesegisa a’ge ebano ebe mesik a’ge pam la’bulogo egesogulat, ye, sum 6 eriano asogoat mesik pam la’bulogo egesogulat, tigisa. 17Asogo tigisarik, sum ebak egeik a’ge mesik ano pam abel pema nak herle abel pema nak wil louwak oluk, domba asu tuelak a’ge borlu iltak a’ge, herle pema 50 erlilogo pogulat, ye, kain agaikhe mesik ano asogo nagat, abel pema 50 erlilogo pogulat, 18ye, o sabo woru a’ge ai re, mesik hegit nak emak oluk, tembaga pam abel pema 50 pam takpoluk, sum ebak kambing agap ano emin erlelik pogulat, pil legesa. 19Asogo til legesarik, o woru a’ge ano ebe pam lo’boktak pogulat, sum ebak mesik domba ierak a’ge agap pam momi a’ge ’borlu il ’balogo ikho pogulat, ye, o’borl petne Egelik pogulat, tuagoluk, hiane ’gela’ge onuk lumba-lumba agap pam ikho pogulat, tigisa.

20Asogo tigisarik, o woru a’ge uak edikpil lagalom a’ge e orlobuk pam hele’gogulat, 21-22o uak ’belak en legeik meter 4 takpoluk, mesik ’burl hwerli walholuk ’balogo pogulat, uak ’biren edikpo a’ge edip pam emin, ologun ano emin, e mesik no’gorlik pei lo a’ge meter mesik ’burl ’gela’ge walholuk ’balogulat, takpil legesa. 23-26Asogo takpoluk, uak edikpil lagalom a’ge ano mesik edikpo a’ge paget oyogut ’biren hele’gik pogulat, til-til perak a’ge pam oyogut heli’gogo pogulat, abel pema o uak 20 heli’gogo poluk, ano pam oyuk 40 dipsogo pogulat, ye, abel pema o o’borl akhit o’gwe? Uak 20 heli’gogo poluk, ano pam oyuk 40 dipsogo pogulat, takpegesa. 27Asogo takpoluk, o worumu o’borlma o mo obuk ilasu hegit eba o uak asogo nak 6 pam heli’gogo pogulat, 28o u’gut pema-pema petne uak ’biren pema-pema edikpo o’gwe asogo nak takpogulat, 29Ye, u’gut pema-pema o uak edikpoma edipmu en ologun mesik mu lo’bok ti loma eba ’besieme’gen mesik ebam yat a’ge pam de a, tigene ’gela’ge ikho ebayat pogulat, tigisa. 30O mo il obuk ilasu hegit edikpo a’ge uak 8 heli’gogo poluk, uak mesik a’ge pam oyuk perak a’ge pam ’biren heli’gogo pogulat, mesik a’ge pam asogo nak heli’gogo pogulat, til-til oyuk 16 hwerliat takpoluk pegesa.

31Asogo pegesarik, o sabo sum owi abel pema sogeik akhit uak daintak pogulat, e no’gorlik, po’gorlik, po a’ge e orlobuk pam 5 hele’gik pogulat, 32erabu akhit abel pema o’gwe uak edikpogulat, e no’gorlik-po’gorlik obok ho a’ge 5 nak hele’gik pogulat, ye, o worumu ologun o’borlma o mo obuk ilasu hegit eba uak edikpogulat, e no’gorlik-po’gorlik pei lo a’ge 5 nak heli’gogo po’gulat, 33Uak edikpogulat, uak ’burl edik a’ge no’gorlik-po’gorlik elit pei lo a’ge e lok a’ge mesik ano louksogo pogulat, takpoluk, modok dip-dip pil legesa, 34e o uak edikpil lo a’ge emin, e no’gorlik pei lo a’ge emin, ai re, ’besi emas pam nak lo’boksogo pogulat, e no’gorlik pei lagalat, lobok til lagalat, emas pam tigene ikho pogulat, tigisa.

35Asogo tigisarik, is ap sum egesogwi a’ge modok arat enaluk en e, herle menya esi ’gela’ge op sakhorak a’ge ’bogun wiak tuelak a’ge emin, domba asu tuelak borlu il emin, ’borlu ’belak a’ge emin, wokho sum mesik ebak a’ge egesugukhwe, is ap malaikat ’gela’ge kerub ogut hele’gogwi enaluk a’ge ebano en malaikat ’gela’ge kerub ano ogut heli’gogo eminat ikho pogulat, 36Sum ebak ano, sepnik pogulat, tuagoluk, e orlobuk pam 4 heli’gogo emas pam lo’boksogo poluk, edikpo a’ge edip 4 nak perak a’bosu ’balogo ebelogo pogulat, sum sepnogo ’belakpou wagalat, emas pam olukhwe hwalogo e ano pam lo’boktak pogulat, tigisa. 37Ye, o woru a’ge ’goduk pam ’gain sepnogulat togulom a’ge paget herle menya esi ’gela’ge il op a’ge tuelak a’ge emin, domba asu tuelak lalu a’ge emin, ’borlu ’belak a’ge emin, ’borlu il momi-momisogo tak a’ge emin, ebano a’ge wogu legesarik, is ap sum il dape’gek-yape’gek egesogwi enaluk a’ge en ikho pogulat, 38ye, sum ebano sepnogulat tuak oluk, e orlobuk 5 heli’gogo poluk, emas pam olukhwe edenogo e ano pam sepnik pogulat, e edip-edip emas ano pam lo’boksogo nak pogulat, e 5 ano erlang-erlang osoma no, oluk, emas pam lo’boksogo pogulat, edip hweriogo poma tembaga a’ge pam heli’gogo pogulat, tigisa.

Currently Selected:

Keluaran 36: Wul

Highlight

Copy