Keluaran 37

Allah e peti hele’gegei wene

1Asogo tigisema at Bezaleel ano en e orlobuk a’ge pam Allah epeti hele’giselat, legeik yat akhit e, 110 senti pam, ye, horok akhit emin yat akhit emin e, 66 senti pam ha’bulogo hegitsogo nak heli’gogo pesi, 2o’borl akhit-ogola akhit ’berlegat emas il op a’ge pam nak lo’bok tagalat, ebe hele’gik a’ge eragam o’gwe re, emas a’ge pam nak wali’gogo pasulat, taga lagarik, 3e yesogo woluk lagalom a’ge egerle emas a’ge tigene 4 pam ikho abel pema-pema hebat ologun ligegenak a’ge pam lo’boktak pesi. 4E yesogo woluk lagalat togu lemagoluk, e orlobuk odoksogo poluk, emas pam lo’boktak pasulat, 5ye, e yesogo woluk lagalat togu lemagoluk, tigene egeik a’ge lo’boktakma re ele ’gwe e ’gwelabogo pasulat tegei. 6Asogo taga lagarik, Allah emin hwedik so’buagalomma op epeti yat akhit e, 110 senti pam, ye, horok akhit e, 66 senti emas il op a’ge pam nak hele’gik pesi. 7Osolup o’borl pam dopnosogo pogulom a’ge o’borl pam ologun wi-waling pema-pema pasulat o’borl ologun malaikat ’gela’ge kerub onogut ’biren heli’gogo welemagoluk, emas a’ge ene’gik en hele’gik a’ge ’gela’ge takpoluk enebe heli’gogo pasu lagarik, 8Malaikat mesik e, ologun pema heli’gogo edikpasulat malaikat mesik e, ologun pema heli’gogo edikpasulat, takpoluk e, enoyogut modok-modok yogo welemagoluk edigonoboluk e, onorogole mesikmu welat peti emde ano pam modok-modok edik welemagoluk heli’gogo enebesi. 9Onorogole mesikmu welat, enagapsaburl langsogo ologun mesikmu diptak poluk enagapsaburl ano en e, peti ano sebelak poluk welat onorogole peti ano ’gwelabogo welegesa.

So’boru roti werakho pogulom a’ge e dalegei wene

10Ye, roti pogulom a’ge e orlobuk a’ge pam daliselat, ologun horok akhit ai, yat akhit e 90 senti pam, ye horok akhit e 67,5 senti pam nak hele’gik pesi, 11emas il op ai a’ge pam nak o’borlma en-ogola en lo’boksogo poluk, e delak a’ge ano eragain dalogo y mul ’gela’ge de a, hisogo poluk, 12Asogo takpoluk e dalegei a’ge ano esa’go ’gwe re e elele e a’ge pam ene’gik dai’ge ebak walhegeik emas pam e delak ano esa’go-esa’go lo’boksogo pasulat, 13-14emas a’ge pam tegine 4 ikho e delak a’ge oyuk 4 edikpesi a’ge ologun pam diptak a’ge o’gut akhit e dalogo obok hesi a’ge ano ologun pam e yerak lagalom a’ge e ’baluak oluk, tigene egeik a’ge ano meja oyogut ligege nakma ologun pema-pema lo’boktak pasulat, 15Ye, e delak a’ge yerak laga lemagoluk, e orlobuk odoksogo emas pam lo’boksogo pasulat, taga lagarik, 16e delak a’ge ai pam Allah paget pogwi a’ge ebano dalogo pasulat, piring-piring emin, ik lugwarogwi a’ge e’be emin, ik a’bosu na’gogo no’gwi a’ge emin, anggur a’bosu, pogwi a’ge emin ’berlegat ai re, Nenaik ’gain Onuk Logo a’ge ebaget ede op emas oluk po yo, oluk, emas il op at a’ge pam heli’gogo pasulat, tegei.

Esaga hele’gegis wene

17Pobuk, esaga ’gwialogo pogulomma ebale hele ’giselat, emas il op a’ge pam nak esaga oyogut emin, ebagase emin, e’gik en heli’gogo poluk, e e’gen ’egeik welago ai ’gela’ge owan mong-mung tak wolomtik ’bul liso ’gela’ge oyuk ebagase hele’gik a’ge ano emin owil-owil a’ge il mesik nak takpesirik, 18e e’gik 6 at oruagapsogo poluk, e’gik 6 ano re, ebe mesik a’ge pam en abel pam en henagan ap sogo lebikpasulat pema akhit en henagan ap sogo lebikpasulat pesirik, 19Esaga uak mesik a’ge pam en e’gik pema ’bekhit akhit e, henagan, ye, e’gik abel hware akhit e, nin henagan pamat, hele’gik pasu lagarik, uak eriano hundomok petne re, uak mung-mung tak a’ge henagan emin, odouk ebe’gwialu a’ge emin, owil-owil a’ge emin, asogo nak heli’gogo pil laga. 20Ye, uak ’burl a’ge mesik nak ai pam e, e’gen mung-mung tak a’ge ebe ugan pam ye esaga ’gwialogwi a’ge emin, owil-owil a’ge emin ’berlegat asogo hele’gik pesi. 21Esaga uak ’birenak likho a’ge edipmu esaga heberlogwi a’ge onuk tombol ai hele’gik pasulat, ye, uak ’birenak ’burl a’ge edipmu esaga heberlogwi a’ge ’gwani ho’gwiam ’gwiok oso a’ge tombol ai hele’gik pasulat, ye, esaga uak henaganak a’ge edip yogoma tombol ai hele’gik pasulat, asogo nak esaga uak 6 a’ge hele’gik pil laga. 22Esaga uak ’burl mesigat edikpesi a’ge ano emin, ebam en abel pema-pema ’bekhit hware edikpesi a’ge ebano emin, uak 6 ai edipmu esaga heberl emak oluk ’gwiam hogwiam ’gwiak oso a’ge onuk tombol emin, ’berlegat ai re, ebe mesik a’ge pam nak edip ningsogo yogo welemagoluk, emas il op a’ge pam nak hele’gik pesi. 23Asogo pesirik, esaga ebe pam e’gik 7 hwerlitak poluk lebik pil laga a’ge ano emin, herle odouk nasu holuk heil emin, esaga ’gwielak welemagoluk togwi a’ge pogulomma ebale emin, ai ’berlegat emas a’ge pam nak heli’gogo pasulat. 24Esaga ebe emin, wiak ago holuk hele’gogwi a’ge di a’ge yu a’ge emin, emas a’ge pam nak e’gin 34 kilo walhegeik heli’gogo pegesa.

E’ben op a’ge odouk narlogulomma ebale hele’gegei wene

25E’ben op a’ge odouk narlogulomma e orlobuk a’ge pam hele’giselat, o’gut pema-pema, yat akhit ligakhit ogwe re 45 senti asogo o’guk uganakho hegitsogo hele’gegei. Legeik yat akhit 90 senti. Sapi iak ogore, e’ben opsogo oluk Allah ebaget narlogumu ebano heli’gogo mesigarap poluk ningsogo hele’gik pesi. 26E ebe delak a’ge emin, hebat ligakhit-’belagakhit o’borl-olukhwe lo’boktak a’ge ’berlegat emin, uak edikpegesa a’ge ologun sepsogo pogwi a’ge ebano emin, ano re, emas il op a’ge pam nak lo’boksogo pil lagarik, ebe delak a’ge ano eragam o’gwemul ’gela’ge emas a’ge pam waligo hetsogo poluk, 27e ’gwelebak poluk, e yesogo woluk no’gulemagoluk, tigene emas pam ugan ikho hettak a’ge eragam e uak edikpogwi a’ge eragam o’gwe pema-pema eba lo’boksogo pasu lagarik, 28odouk mu’gwalogulat, e yerak woluk lagalat, tuak oluk, e orlobuk odoksogo emas pam lo’boksogo pesi.

A’bosu enebam herlil hogulom a’ge hele’gegei wene

29 # Kel. 30:22-38 Asogo heli’gogo pasu lagarik, Allah paget pulogo pouwagoluk, a’bosu herlilogo pogulom a’ge hele’giselat, ye, di a’ge yu a’ge e’ben op a’ge wegesarik is ap enaluk a’ge en e’ben modok op at a’ge hele’gogwi ’gela’ge e’ben a’ge mu a’ge mesik emin e’gerlakma mesik erlak a’ge e’ben op a’ge ai, a’ge pam nak hele’giselat, tegei.

Currently Selected:

Keluaran 37: Wul

Highlight

Copy