Keluaran 38

Allah paget wusogo odouk narlogulomma hele’gegisa wene

1Ye, Allah paget wusogo odouk narlogulomma hele’gogulat, e orlobuk o’gut yat akhit nogorlik akhit 2,25 meter, legeik yat akhit e, 1,35 meter pam, walsogo ’balogulat, takpegesarik, 2Tembaga pam sapi iak ’gela’ge egilogo poluk heli’gogo e pei lagai a’ge o’gut 4 ologun ano pam hweriogo poluk iak ano il mesik nak anniapsogo leruak oluk, e ano ’berlegat tembaga pam lo’boksogo pil laga. 3Lo’boksogo poluk, odouk narlogulat, yabuk tugulat, di a’ge yu a’ge ul orloksogo lebikpogwi a’ge ebale, emin, ul orlok togwi a’ge ul sekop emin, ik lu’gwerogwi a’ge ik e’be onuk mangkok emin, einnyo yegerlogwi a’ge heil emin, odouk e’gen orlok togwi a’ge emin, ’berlegat tembaga pam nak heli’gogo pogulat, 4Ye, kawat odouk narlogulom a’ge ebale en tembaga a’ge pam helegei. Asogo takpoluk e, ’burl heisogo hele’geik pesi. 5Odouk mu’galogwi a’ge ai, e yesogo woluk lagai a’ge uak oluk tigene tembaga a’ge pam ikho e uak edikpogwi a’ge 4 o’gut-o’gut ano pam dopno takpasulat, tegei. 6Ye, e yesogo woluk lagai a’ge e orlobuk ebano lologo tembaga pam egilogo poluk, 7Odouk mu’galogwi a’ge e yesogo woluk lagalat, tuak oluk, tigene pema-pema lo’boktakma ebano ’bourak pegesa. Ye, odouk mu’galogwi a’ge ebale hele’gegei ai, e pam heli’gogo ogola eba ’goloapsogo pesi.

Ene’gik-onoyuk emerogulomma ebale hele’gegei wene

8 # Kel. 30:18 Ye, ene’gik-onoyuk emerogwi a’ge loyang ik ebale na’gogo po a’ge ano alo’gwe ningsogo wolom a’ge paget hele’giselat e, tembaga a’ge is hwami at Allah owi edipmu yabuk tugu legesa a’ge ebano ene’gikmu a’ge napunak uak tembaga a’ge odoktak poluk hele’gik a’ge pam hele’gik poluk loyang emin hweriogo pesi.

O sabo leget, wogulat, hele’gegisa wene

9-10Asogo tigisarik, o sabo woru a’ge tiang leget wogulat, tembaga pam uak edikpil lo a’ge 20 pam heli’gogo oyuk oruagap pogulat, ye, perak a’ge pam olukhwe hwelak pogulat, tiang edikpo a’ge ologun pam het til laga lemagoluk, herle hetsogo uak 20 ano pam hettak pogulat, takpoluk, abel pema o sogweik akhit tiang en erlilogo ’belabil lagalom a’ge meter 45 hwerli walhegesa a’ge ai pam sum ebak kain il op modok a’ge ano pam ikho pogulat, tigisa. 11Ye, o o’borl akhit eba re, asogo nak tiang edikpil lo a’ge re, 20 a’ge ano pam tembaga a’ge pam oyuk oruagap sago pogulat, perak olukhwe edenogo pogulat, tiang edikpo a’ge ano ologun pam dip silagalom a’ge uak 20 ebano pam hetsogo pogulat, ye, o erabu akhit sum il op a’ge onuk lenan ano pam eba ’belabil lagalom a’ge meter 45 hwerli pam walhogulat, tigisa. 12Asogo tigisarik, leget o mo obuk ilasu hegit eba tiang 10 edikpil lo a’ge ano pam oyogut oruagapsogo pogulat, perak a’ge olukhwe hwalogo pogulat, ye, uak ano ologun pam dip silagalom a’ge perak herle hetsogo tiang 10 ano sum il op a’ge onuk lenan ano pam hetsogo pogulat, ye, o mo obuk ilasu hegit eba ’belabil lagalom a’ge meter 23 hwerli pam walhogulat, tigisa. 13Ye, o mo porlu ago hegit eba, sum il op a’ge onuk kain lenan ano asogo nak meter 33 hwerlitak pegesarik, 14’Goduk delak poluk, eragam emde pema o tiang 3 oyuk oruak a’ge nak takpoluk, e uak ano pam erlelogulom a’ge kain ebak yat a’ge meter 6,75 meter a’ge ikho pogulat, 15Ye, ’goduk emde pema akhit ai re, asogo nak tiang 3 oyuk oruak a’ge nak takpoluk e tiang ano pam erle togulom a’ge wolom o kain sum il op a’ge onuk kain lenan ano ebak yat a’ge meter 7 ikho pogulat, tigisa. 16Asogo tigisarik, tiang leget woru a’ge ano wi-waling ’berlegat erlilogo belabil wagalom a’ge sepnogo herle menya esi sakho tak il modok op a’ge pam tuelak a’ge ebano pam sum ebak ikho pogulat, 17Ye, e tiang edikpil lagalom a’ge oyuk oruak a’ge ai, tembaga pam heli’gogo pegesa a’geat de, tiang edikpil lagalom a’ge ologun pam lo’bok tigisa a’ge emin, olukhwe hwalogo pegesa a’ge emin, het liloma herle hetsogo pegesa a’ge emin, ai nak e, perak pam heli’gogo pegesema re, tiang leget wogulat, tiang edikpil lagalom a’ge ’berlegat, ologun o’gwe hetsogo nagat pam perak a’ge pam herle hetsogo pil legesa. 18Pil lagarik, tiang leget ’goduk ’balogo poma ebano erlelogulat, domba asu tuelak lalu a’ge pam tuelak emin, ’borlu ’belak a’ge emin, herle meinya esi ’gela’ge op sakhorak ’bogunsogo tuelak a’ge emin, dape’gek yape’gek egesogwi ’gela’ge sum ebak a’ge, ologun yat akhit 9 pam walhasulat, ye, sum abel pema no’gorlik 2,25 meter pam walhasulat, sum esa’go no’gorlik ai re, ’goduk’gu agai a’ge siatle emin hegit agalat, legeik ligegenak a’ge ano emin hegitsogo hele’gik pesirik, leget wale’gik a’ge ebano siatle emin hegitsogo hele’gik pesi. 19Ye, e tiang 4 edikpesi a’ge tegei a’ge ai emin, oyuk 4 heli’gogo pesi a’ge emin, ai re, tembaga a’ge pam tegei a’geat de, lo’bok tagalom a’ge olukhwe hwalogo pesi a’ge emin, tiang ologun pam herle hetsogo pesi a’ge emin, uak edikpil lagalom a’ge ologun pam lo’boksogo pesi a’ge emin, ai perakpam nak takpesi o. 20O sabo werik a’ge ano edikpogulat, anniap tago a’ge emin tiang leget wali’gogo edikpil lasulat. Anniapsogo ’belebak a’ge emin, ’berlegat ai re, tembaga pam nak hele’gegei.

O sabo weregisa a’ge uang wonogo wene

21“Allah owi sabo worogulat, o asua onogorlokma peti hele’gegisa ano pam di a’ge, yu a’ge lebaga ano re at Musa en mo’gulentasulat, his Lewi a’ge en pelal ’balogu lomup o. Ye asogo ’balogukhwe, ap Allah eiye a’ge Imam Harun omlogo onuk, Itamar en tenhentarok welemak o,” oluk, mo’gulentesi ’gela’geat odo pelal ’balegisa a’ge ano yuat o. 22“Is ena’gul onuk Yehuda a’ge ap uri omlogo Kus eba onuk Bezaleel ano en Allah wene le’gelogo Musa disogo tu, asogo tu oluk wene mo’gulesi ano ’gela’geat tagokhwe, 23Ap a’gul onuk Dan a’ge onuk e, Ahisamakh omlogo Aholiab ano en kain herle menya esi sakhorak ai ’gela’ge il op a’ge emin, domba asu tuelak herle lalu a’ge emin, ’borlu il momi-momisogo tak a’ge emin, ebano pam di a’ge yu a’ge il dape’gek-yape’geksogo egesiselat, emas pam di a’ge yu a’ge il mumuat hele’giselat, e pam di a’ge yu a’ge e’gik ’boguntak tagalat, tagoma re, at e’birek en tugukhwe uang libaga ano re, yuat o. 24O Allah owi worogulat, emas lebaga a’ge a’bigat ai, emas yu, Allah hebagerat o, oluk, ebaget onuk hogulat, Allah hebaget pou wegesa a’ge ano Allah awi worogumu syikal o’go ’balogo po a’ge ano hegitsogo e’gin walhogulat, 29 talenta emin, 730 syikal emin, ai pam worogulat, la’buksogo ene’gik wenakho re, emas e’gin walsogo re, 985 kilo gela’geat aga. 25#Kel. 30:11-16Ye, aphwami Israel a’ge ononuk odo ’balogukhwe perakpegesa a’ge ’berlegat ebano, Allah owi worogumu syikal o’go pulogo po a’ge ano re, hegit-hegit e’gin walhogulat. 100 talenta emin, 1.775 syikal emin, ai pam worogulat, la’buksogo ene’gik wenakho re, perak e’gin walsogo re, 3.420 kilo pam walsogo pegesa. 26#Mat. 17:24Ap ononuk ’balogwi ai, ’berleksogoat dogo oruakhwe, tahun 20 en legenak erabu akhit tak a’ge enebe la’bulik ene’gik wenakho 603.550 atma re, ap mesik en Allah owi worogumu syikal o’go pulogo po ’gela’ge uang perak we weisogoat pou wagai holuk e, enebe hundomok en e, we, weisogo setengah syikal perak a’ge ai at pou wagalom o. 27Perak 100 talenta ai, e’gin 20 atma re, ano pam o sabo ano tiang edikpo a’ge oyuk emin, sum ’goduk pam erlelu a’ge e tiang edikpo a’ge oyuk emin ano re, oyuk 100 takpoluk pogulat oyuk mesik pam talenta mesigarat libagalat oyuk mesik pam talenta mesigarat libagalat, til-til 100 talenta ai, perak e’gin 3.400 atma re, libagalat, 28Ye, perak ado pema 1.775 syikal ai, e’gin 20 kilo atma re, ano pam e uak edikpogwi a’ge ologun pam lo’bok tugulat, olukhwe hwalogo pogulat, lo’bok tu a’ge herle hetsogo pogulat, tugu legesa. 29Ye, yu re, Allah ebaget a’ge o,” oluk, tembaga Allah ebaget onuk holuk ’balogo Allah paget pegesa ano re, 70 talenta emin, 2.400 syikal emin, ai, tembaga e’gin 2.425 kilo atma re, 30Ai pam Allah emin hwedik tugulomma o sabo ’goduk tiang edikpegesa a’ge oyuk emin, ebaget wusogo odouk narlogulom a’ge ebe emin, oduk e’gen ’bisoma no oluk teniso a’ge has emin, 31tiang leget wi-waling ’bororumsogo worogulat tiang edikpegesa a’ge oyuk emin, tiang leget werik ’goduk tiang edikpogwi a’ge oyuk emin, o sabo worogulat, anniap pasu a’ge ’besi uak emin, tiang leget wi-waling worogulat anniapsogo ’belebak a’ge ’besi tiang emin, ’berlegat hele’gogulat, asogo takpoluk tembaga a’ge pam nak hele’gik pegesa.

Currently Selected:

Keluaran 38: Wul

Highlight

Copy