Keluaran 35

Set hwal horlogulom a’ge paget Musa mo’gulesi a’ge ano is aphwami Israel a’ge mo’gulentesi wene

1Pobuk Musa en aphwami Israel welagai a’ge ’berlegat odoktagenebesirik, disogo mo’gulentesi, “At Allah en his tugu lemagoluk, wene le’gelogo mo’gulhentesi ano re, yu at o. 2#Kel. 20:8-11; 23:12; 31:15; 34:21; Ima. 23:3; Ula. 5:12-14Agauwa naduk en ’bekhit agauwa 6 hwerli pam ai re, is yabuk til lagalom op at a’geat de, loruk o’gwe nak e, yabuk tu erlakma en set hwalhorlogulat, ’gain Nonuk Logo a’ge Allah erliknobogu lemagoluk nebaget pulogo pagathwerlegimu re, agauwa ai erlige ap mesik en yabuk tiso holuk e, o’go at ebe wusogo pogu lemak o. 3Agauwa ai erlige o welagaimu eba, ’berlegat, odouk mu’gwelakpoluk hobu tugulom mia o, oluk, egeimu re, mo’gulhentegis ai o,” oluk, mo’gulentesi.

Allah owi woru a’ge enede enat odoktu o oluk mo’gulentesi wene

4Pobuk at Musa en aphwami Israel welagai a’ge ’berlegat pobuk emin disogo mo’gulentesi, “At Allah en e, his tu wene mo’gulhentesi a’ge ano yuat o. 5Is enebe hun-hun lo’bok ’berlegat enede ene an na’ge yu at Allah paget paik o oluk an, ’gain Nonuk Logo a’ge nebaget pulogo poumak o. An Allah nebaget pou wom ano re, emas emin, perak emin, tembaga emin, 6domba asu tuelak lalu a’ge emin, ’borlu ’belak a’ge emin, herle il momi-momisogo tak a’ge emin, herle meinya esi ’gela’ge il op a’ge emin, kambing asu emin, 7domba ierak a’ge agap momi welat borlu ’belak a’ge emin, hiane ’gela’ge onuk lumba-lumba laut ogola welago a’ge agap emin, e orlobuk emin, 8esaga ’gwialogwi a’ge e zaitun a’bosu emin, Allah nebaget pulogo a’bosu ena’gul pam herlelik po a’ge emin, e’ben op ago a’ge emin, 9ye, an nebe eiye a’ge onue osum ebagal oruak a’ge ogolayat ’buk tago a’ge efodano pam ogo osum emik pam wan tiso a’ge wonogo a’ge emik pam lo’boktak wolom a’ge ogo, lo’bok tu a’ge helep ye e’gen a’ge emin, helep il erli a’ge emin, odoksogo poumak egeimu re, mo’gulhentegis o,” oluk, mo’gulentesi.

Allah owi worogulat, tu a’ge paget mo’gulentesi wene

10Mo’gulentesirik, pobuk mesik mo’gulentasulat, At Allah en di a’ge yu a’ge tugulom egei a’ge ano tuagoluk, is ap di a’ge yu a’ge ene’gik ’bogun pam togwi a’ge ’berlegat ene’gerlakma en odoktumak o. 11Odoktu agai holuk e, o sabo ebe emin, sel emin, sum ebak a’ge o’borl pam saplisogo salu a’ge emin, abel pema emin, uak le’gik ’belak edikpo a’ge emin, no’gorlikpo a’ge emin, uak ’burl edikpil lo a’ge emin, uak edikpil lo a’ge oyogut emin, heli’gogo pogulat, 12pobuk peti hele’gu a’ge emin, e yerak woluk lagalom a’ge e emin, peti hele’gu a’ge Allah emin, hwedik togulomma osolup laru a’ge emin, peti hele’gik sebelak wolom a’ge sum ebak a’ge emin, hele’gogulat, 13pobuk roti pogulomma e dalu a’ge emin, delak a’ge e yerak lagalom a’ge e emin ai pam pogwi a’ge di a’ge yu a’ge emin, Allah oruagat opogu lemagoluk, roti emin, heli’gogo pogulat, 14pobuk atiarak welemagoluk, esaga heberlogwi a’ge uak emin, esaga ai pam togwi a’ge di a’ge yu a’ge emin, esaga ebe heberlogwi a’ge emin, heberlogwi a’ge a’bosu emin, heli’gogo pogulat, 15E’ben op a’ge odouk narlu a’ge emin, ebe e yesogo woluk lagalom, a’ge e ebe emin, Allah paget pulogo pogulat, a’bosu herlelik pogulom a’ge emin, e’ben op ago a’ge emin, o worumu ’goduk ’gwi lagaimu emin, sum sepnu a’ge emin, heli’gogo pogulat, 16pobuk Allah paget wusogo odouk narlogulom a’ge emin, tembaga a’ge pam tigene ikho lo’boktak po a’ge emin, kawat odouk e’gen enakho ’bise lemagoluk, delak a’ge emin, ebe yerak lagalom a’ge e emin, odouk narlogulat, di a’ge yu a’ge togwi a’ge emin, heli’gogulat, pobuk ene’gik onoyuk emeru a’ge emin, ene’gik onoyuk emerogulom a’ge edip emin, tembaga pam heli’gogo pogulat, 17leget pam sum sepnogo po a’ge emin, tiang edikpo a’ge emin, oyuk hele’gik a’ge emin, leget wo a’ge ’goduk ’gwi lagalomma sum sepnogo belebak pou wom a’ge emin, hele’gogulat, 18pobuk owi worogulat, annisogo wolom a’ge ’besi uak emin, leget wogulat, annisogo wolom a’ge ’besi ’belabogwi a’ge en herle hettu a’ge emin, ebano heli’gogo pogulat, 19“Ye, Harun eiyagai enemin Allah eiye edigonobogwi holuk e, ’buktak welat, Allah owi woru o asuama ’gwi lagalomma Harun osum emin, eiyagai onosum emin, eikho pogulat, tugu lemak egeimu re, mo’gulhentegis o,” oluk, mo’gulentesi.

Allah owi woru a’ge paget woluk pou wegesa wene

20Mo’gulentesimu, “Aphwami Israel a’ge ebano Musa oruakma odoktu egesa a’ge ebano onowi pam legesarik, 21hundomok en enede opogwi a’ge holuk motluk nak Allah emin hwedik togulomma owi woru a’ge emin, ogola werik poluk til lo a’ge ’berlegat emin, sum Allah ebaget degelak egesu a’ge emin, ’berlegat wegesarik at Allah ebaget pou wagalat, 22ye, hwami emin, ap emin, ’berlegat enede en opogwi a’ge motluk nak emas, enesa’goma a’ge emin, ene’biangma a’ge emin, enegeille emin, emas pam hele’gik a’ge di a’ge yu a’ge ’berlegat yu re, Allah hebagerat o, oluk, Allah ebaget onuk holuk, wogogwi ano a’ge woluk Allah ebaget onuk tak wogosu agalat, 23aphwami ado a’bigat ene’gikmu a’ge domba asu tuelak a’ge emin, ’borlu ’belak a’ge emin, herle il momi-momisogo tak a’ge emin, sum herle menya esi ’gela’ge il op a’ge emin Kambing asu emin, domba ierak a’ge agap ’borlu ’belak a’ge lumba-lumba laut ogola welago a’ge agap emin, woluk pou wagalat, 24is ap ado enematek lo’bok en perak emin, tembaga emin, yu re, Allah paget o, oluk, pou wagalat, ye, ap ado ena’ge-a’ge e orlobuk oruak holuk e, ai pam woruak oluk, woluk pou wagalat, 25ye, hwami ene’gik ’boguntak, Sum egesogwi a’ge ano en domba asu lalu a’ge emin, ’borlu ’belak a’ge emin, ’borlu a’ge emin ene’gik ’boguntak, tuelak de a, herle menya esi ’gela’ge op sokho tak a’ge de a, ano pou wagalat, 26hwami ado ’berlegat kambing asu pam herle tualogwi enaluk a’ge holuk, ai a’geat woluk pei lo yo, oluk enede tagenebesimu re, ai a’geat herle tualogo woluk pou wagalat, 27ye, is ap tenentarok welagai a’ge onuelak en ap Allah eiye a’ge onosum ebagal oruak a’ge efod ano pam lo’boksogo pogulat, sum emik orlomu tiso a’ge honogo a’ge ’gela’ge ’buktak wolom a’ge ano pam lo’boksogo pogulat, tuagoluk, helep ye e’gen a’ge emin, helep il ebe yaga erli tak a’ge emin, woluk pou wagalat, 28is ano en nak e’ben op a’ge emin, esaga ’gwialogwi a’ge zaitun a’bosu emin Allah paget pulogo pogulat, tugukhwe a’bosu emin, e’ben op a’ge emin, pou wagalat, tigisa. 29Di a’ge yu a’ge tu a’ge paget at Allah en wene le’gelogo Musa mo’gulosokhwe mo’gulentesi a’ge ebano is aphwami Israel hwami emin, ap emin, ’berlegat enematek-enematek enede tagenebasuam Allah paget pei laik o,” oluk, enede aganhan pam pou waga legesa.

Allah owi woruagoluk, ap pulogo enebegesa wene

30pou wagaiam e, at Musa en aphwami Israel disogo mo’gulentesi, At Allah en ap Hur eba ap uri omlogo onuk Bezaleel a’gul onuk Yehuda a’ge ano pulogo pesi a’ge paget ano, mo’gulhentaik o. 31-33At en emas pam emin, perak pam emin, tembaga pam emin, di a’ge yu a’ge tu a’ge il hundomok heli’gogo pasulat, helep amolit erli a’ge pulogo poluk, ebetne ebelogo pasulat, e pam di a’ge yu a’ge heli’gogo pasulat, di a’ge yu a’ge ’berlegat il hundomok e’gik ’bogun pam tagalat, taga lemagoluk, at Allah arogun emin, e’gik ’bogun pam tagalom a’ge emin, at en ede eberak poluk tagalom, aluk a’ge emin, ’berlegat at Allah en takpesi o. 34Ye, ap mu a’ge mesik a’gul onuk Dan a’ge onuk e, Ahisamakh omlogo onuk Aholiab ogo re, is e’birek aphwami mo’gulontogu lemagoluk, enede ’get a’ge wogentasulat, 35is aphwami en e pam di a’ge yu a’ge heli’gogo pogulat, emas pam di a’ge yu a’ge hele’gogulat, domba asu pam herle ’borlu ’belak iltak a’ge emin, ’borlu ’belak a’ge emin, ’borlu herle il momi-momisogo tak a’ge emin, herle menya esi gela’ge modok op tuelak a’ge emin, ai pam di a’ge yu a’ge il dape’gek-yape’geksogo hele’gogulat, herle tuelak pam kain ebak a’ge ikho pogulat, ene’gik ’bogun pam togwi ’gela’ge tugu lemagoluk, wogentasulat, tegei o.

Currently Selected:

Keluaran 35: Wul

Highlight

Copy