Keluaran 34
34
Allah en e, “Helep pelal wo a’ge ebak a’ge de, ’biren womup o,” oluk Musa mo’gulesimu wesi wene
1Pobuk at Nenaik ’gain Onuk Logo a’ge en Musa disogo mo’gulesi,
“Helep ebak a’ge ’biren naduk welaga eriano ’gela’ge holuk deksogo womup o. Asogo wagunmu re, an en helep ai pam niak naduk helep ebak naduk a’ge pam pelal wegi a’ge hat en ’goluk-’gelaksogo hwikhegen ano a’ge togolik waik o. 2Asogo ’balogo pagunmu re, hat hebe tono hubetsogo dom Sinai pam orlu oroguntik, an ne’bek duk ebe pam orlu orogun en e, di a’ge yu a’ge emin, hebe emin, degelip o. 3Hat asogo orlu agoam aphwami logon he’berlik orlumarik, dom ai abel ’geba akhit ’gela’ge, welat e, wam sapi emin, domba emin, dom ai edipmu e’gela nasu lemagoluk lagalat, tu modok mia o,” oluk mo’gulesi. 4Asogo mo’gulesimu, at Musa en e, helep ebak a’ge ebe ’biren naduk a’ge eriano ’gela’ge hegit a’ge hele’gegei, at Nenaik ’gain Onuk Logo a’ge en e,
“Disogo tip o,” oluk mo’gulesi a’ge hegitsogoat e’gikmu woluk o loruk ’gela’ge hubet siaksogo re, dom Sinai pam ligaga.
5Asogo ligagama, Nenaik ’gain Onuk Logo a’ge ebe o hena ogola ’bu agarik e, Musa emin dom ano pam edik welat,
“An Nonuk Logo a’ge ai nu’gwarek nonuk o,” oluk mo’gulesi. 6#Kel. 20:5,6; Bil. 14:18; Ula. 5:9,10; 7:9,10Pobuk at Nenaik ’gain Onuk Logo a’ge en Musa orogolema inlau wagarik e, disogo mo’gulesi,
“An Henaik ’Gain Nonuk Logo a’ge ai re, nede lebeksogo wogentasulat, enebe nedeap enebiselat, taga legi a’ge Allah anat o. An nebabut e, ebam louksogo nedeap enebiselat, hebisogo tagalat, nolot het enebam perleneat po erlakma en tagalat, tago yo. 7An en e, aphwami pobuk-naduk deng ’gobok dagetil laga lema a’ge nedeap enebisoat welat, dagan togu lema a’ge emin, wiak togu lema a’ge emin, erlagapsogo ukpasu leik o. Asogo a’geat de, is aphwami ai logon dagan togwi a’ge ai wene enebam po erlakma en mesik ugenebaik erlak o. We, wene enebam poluk, is en dagetil laga lema a’ge, hwerli henagan pam de a? Ugan pam de a, is eneiyagai emin, is eneiyagai en dogoma a’ge ene’balak emin, is ene’balak ai pam en dagema a’ge emin, eneminat, is enaiklak wiak tigisa ai pam wene enebam pasu modok weleik o,” oluk mo’gulesi.
8Asogo mo’gulosokhwe eriayat, at Musa en odogorlu pam hurotluk erliktagalat e, 9disogo mo’gulesi,
“Naik, hat en an nebe hebam lo’buktak ai demat holuk e, hat hebe nis sennentarok neneminat wolomogoluk yo’go hebegi ai niak hesa’go hwelin o. Aphwami Israel a’ge ai enede modok helep a’geat de, nis dagan togulat, wiak togulat, togu lege a’ge ai hat en erlagapsogo ukpoluk e, nenebe hat hu’gwarek heiyagai a’geatma re, nenebe woknenebin o, naik,” oluk yo’go pesi.
Allah en pobuk wene wusogo wogenebegei wene
10Asogo mo’gulesimu, at Nenaik ’gain Onuk Logo a’ge en Musa disogo mo’gulesi,
“An yogodak aphwami Israel a’ge wene wusogo wokhenebik o. An en aphwami ’gwiangma welagai a’ge logon pobi tuagoluk elalin a’ge mesik tu erlak a’ge, is aphwami Israel a’ge enilem mesik tik o. An Henaik ’Gain Nonuk Logo a’ge en elalin honogorlok a’ge mesik henebaget tik ai en e, aphwami ’berlegat an en elalin tik a’ge ai enil houwa o. 11His togu lorogup a’ge paget,
Disogo togu lomup, asogo togu lomup, oluk yogodak mo’gulhentegis a’ge ai, hwelak poluk hegitsogo togu lomup o. An en his lagaiam e, aphwami ena’gul onuk Amori a’ge emin, Kanaan a’ge emin, Het a’ge emin, Feris a’ge emin, Hewi a’ge emin, Yebus a’ge emin, mukho lebigenebaik o. 12Aphwami o his lagupmu eba a’ge henemin wene worogumu re, ’baik herle pogwiam ’gotnoksogo wathasu ai ’gela’ge ’gotnok oguptik henebe warorogup ai en e, o aphwami eba a’ge oruakma lagalat enemin wene logon ’balogup ani o. Aphwami o his lagupmu eba a’ge henemin wene worogumu re, ’baik herle pogwiam ’gotnoksogo wathasu ai ’gela’ge ’gotnok oguptik henebe warorogup ai en e, o aphwami eba a’ge oruakma lagalat enemin wene logon ’balogup ani o. 13#Ula. 16:21Holuk e, his en e, is en di a’ge yu a’ge onodogwi asua a’ge paget wusogo narlogulom a’ge ebale hele’gik a’ge ai moluk-melaksogo ’bo pogulat, aphwami ’gela’ge ogut heli’gogo edikpoluk ebe erliktogwi a’ge ai orlo’buksogo hwikhogulat, is aphwami eba en,
Nondogwi asua onuk Asyera, oluk e a’ge heli’gogo daintak pogwi a’ge ai moluksogo hwikhogulat, til lu o.
14An Henaik ’Gain Nonuk Logo a’ge Allah nak erliknobu a’ge oruakhweat de, is aphwami en e, di a’ge yu a’ge paget,
Allah emin hegit, oluk erliktogwi a’ge ai modok nebit epasu legi ai en e, his en e, aphwami mu a’ge en erliktogwi a’ge ai erliktogup nogo. 15Is aphwami eba a’ge en, onodogwi enasua eba uam warogulat erliktua ai erlige, is en e,
His neneminat erliktuok o, oluk henede ’gagalogwiam, henemin asogo togup ai en e, his en e,
Nenemin disogo togu lomok, oluk enemin wene logon ’balogup no yo. 16His en heneiyagai onugwami aphwami o’borlma a’ge onogulani a’ge wogentagup holuk e, is hwami ano en e,
His en Allah ’goboksogo ukpoluk nis nonodogwi asua nak erliktogu lomok o, oluk enede ’gagalua an o ’goboksogo uknoboluk loborogup ai en e, asogo wogontogu lorogup no yo.
17 #
Kel. 20:4; Ima. 19:4; Ula. 5:8; 27:15 His en e, dogwi asua besieme’gen a’ge pam de, heli’gogulat, emas a’ge pam de, heli’gogulat, perak a’ge pam de, hele’gogulat asogo tugu legep ai en e, heli’gogup no yo.
18 #
Kel. 12:14-20; Ima. 23:6-8; Bil. 28:16-25 Dugwi his o Mesir ukpoluk liplau wegep ai pam e, dugwi naduk hene’gik wenarigep a’ge onuk Abib ogu legep ai en e, dugwi ai pam lagalat holuk e, seni roti e’gen periso a’ge emin ’belabu erlakma en worogo a’ge agauwa elitsogo naduk sabit en ’bekhit agauwa a’ge pam no’gu lomup o, oluk mo’gulhentegis ano ’gela’ge, an nebaget togulat seni no’gu lomup o.
19 #
Kel. 13:2
Heneiyagai ap naduk dagema a’ge enebe lo’bok emin, honuam holou pam en domba emalik ierak dagema a’ge ai emin, ebe an en a’ge o. 20#Kel. 13:13Asogo a’geat de, honuam keledai holou pam en emalik dorua a’ge ai his honu’gwarek horlogulat e, ebalema domba emalik holuk an nebaget po yo. Asogo a’geat de, his honu’gwarek horlo henebit holuk e, keledai ai o’gorlop ’balogo woru o. Ye, heneiyagai ap naduk a’ge enebe lo’bok enebalema mesik mu a’ge ’gwelabogulat honu’gwarek togolik horloat o.
Ye, sa en di a’ge yu a’ge an woknema a’ge woluk wema erlak holuk e, an ne’bek worogup no yo.
21 #
Kel. 20:9,10; 23:12; 31:15; 35:2; Ima. 23:3; Ula. 5:13,14 His agauwa hebarlik a’ge pam hene’gik a’ge elit togulom o. Asogo a’geat de, agauwa mesik sabit a’ge ai nak e, hene’gik a’ge wagup no yo. Yabuk ebe logat wogulat, ebe dorogulat, un a’ge ’balogulat, togwi a’geat de, agauwa sabit a’ge pam e, modok wo erlakma enat wolom o.
22 #
Ima. 23:15-21,39-43; Bil. 28:26-31 His en, gandum e’gen naduk-naduk ’balogup a’ge ai se’ban 7 minggu pam seni sakho momup paget seni sorogu lomup o. Ye, his en tahun naduk a’ge woloroguptik pobuk a’ge pam ’guogoluk gandum e’gen emin, anggur a’bosu emin, odoktil lagalat, 7 hari a’ge pam sakho momup o.
Orabo e’gela pam uthegeik welege, oluk henede ebesogo seni sorogu lomupat o.
23 Tahun mesik a’ge pam ogola welat e, hene’gik henaganam his ap henebe lo’bok an his aphwami Israel a’ge henaik ’gain Nonuk Logo a’ge erliknobuogoluk ne’bek waga lomup o. 24An en aphwami ena’gul onuk mu a’ge his honorogolema en mukho lebigonoboluk, o his wolorogupmu eba logap pasuam, his en seni roti e’gen periso a’ge emin ’belabu erlakma en werakho no’gulat, di a’ge yu a’ge owi yorogup a’ge pam en ebe dorogulat, e’gen ’balogulat, toluk seni sakho no’gulat, henede en,
Orabo e’gela a’ge uthegeik welege o, oluk seni mesik sakho no’gulat, asogo togulat e, agauwa eria pam e, his ap an ne’bek wagalat e, togu lomogoluk o eba ’gogwiam e, aphwami eba a’ge logon en onogorlok erlaksogo welat o his wolorogupmu eba sebelua erlak o. 25#Kel. 12:10Seni asogo soruogoluk wam di a’ge yu a’ge an nebaget pouwa a’ge se’gerlogulat, di a’ge yu a’ge so’boru roti e’gen poruagoluk ’belabogwi a’ge ano emin ’belebak poluk worogo a’ge an nebaget logon pagup modok erlak o. Ye, wam domba seni Paskah paget nouwogoluk worogo poluk e, logon hubet a’ge paget po erlakma en, o hup ai erligeat ’berleksogo no’gulom o. 26#Ula. 14:21; 26:2Tahun ebe lo’bok his en di a’ge yu a’ge ebe naduk a’ge dorogulat, ’balogulat, togup a’ge ai woluk e, an Henaik ’Gain Nonuk Logo a’ge nowi werikmu pou waga lomup o.
Ye, wam kambing emalik emin, susu u’gwarek ia agamu nasu a’ge soru modok mia oluk mo’gulhentegis o,” oluk mo’gulesi.
27Asogo mo’gulesirik at Nenaik ’gain Onuk Logo a’ge en Musa disogo mo’gulesi,
“An wene mo’gulhentegis a’ge yu pamat hat hebe emin, aphwami Israel a’ge logon emin, wene wusogo wokhenebegis ai en e, pelal wokho pemen o,” oluk mo’gulesi. 28Asogo mo’gulosokhwe, Musa re, so’boru emin, ik emin, no erlakma en agauwa 40 en Nenaik ’gain Onuk Logo a’ge e’birek welegesa. Welat e, wene ebe 10 pam ai, Allah en nenesa’go werak poluk wene wusogo woknenebegei wene ai helep ebak a’ge pam pelal wokho pesi.
Musa dom Sinai duk pam en ’bu aga wene
29 #
2Kor. 3:7-16
At Musa Nenaik ’gain Onuk Logo a’ge emin dom Sinai duk pam welat, wene ebe 10 pam nenesa’go wusogo wogosoam e’birek ogu legesarikmu no oluk e, at Musa orogole pam modok e’bak-’bage yogo pasukhwe wene nenesa’go weregei a’ge ano woluk ’bu aga. Asogo a’geat de, at Musa u’gwarek orogole pam ’bak-’bage pasu laga ano eperlagat ’bu aga. 30Asogo ’bu agama, at Harun emin, aphwami Israel a’ge ’berlegat emin, Musa orogole pam ’bak-’bage ano yogo poluk ’bu agoma enil holuk e, Musa e’bek horoksogo lo a’ge onogorlok aga. 31Asogo tigisa a’geat de, at Musa en is worlentesimu re, at Harun emin, aphwami Israel a’ge onuelak ’gain ’berlegat emin, enemin Musa e’bek horoksogo wegesema wene enemin egesa. 32Asogo arat egesema re, is aphwami Israel a’ge ’berlegat eneragam odokti legesema re, wene at Nenaik ’gain Onuk Logo a’ge en,
“Disogo togu lomup, asogo togu lomup,” oluk dom Sinai pam en nenesa’go wusogo mo’gulesi a’ge ano ’berlegat is mo’gulentesi. 33At Musa en wene asogo arat mo’gulentesirik e, orogole sum ’bogoyum a’ge pam orlomu tegei. 34-35Asogo orlomu tegeirik, at agauwa nin hwedik nan hwedik Nenaik ’gain Onuk Logo a’ge emin weneane uogoluk, at Nenaik ’gain Onuk Logo a’ge owi sum owi werikmu ano ’gwigoluk holuk e, sum orogole hettak a’ge ano hebilogo ukpoluk en ’gwiselat holuk e, arat oluk en liplau wagalat e, pobuk ’buktaga laga. Asogo tagalat, at Musa en wene at Nenaik ’gain Onuk Logo a’ge en,
“Disogo togu lomup, asogo togu lomup,” oluk wene is aphwami Israel a’ge mo’gulontouagoluk mo’gulosoam, arat mo’gulentesimu, is en at Musa orogole ’bak-’bage yogo pasuam hogu legesa. Asogo hogwiam at Musa orogole orlomu taga lagarik, orlomurak wolomtik en agauwa mesik erlige Nenaik ’gain Onuk Logo a’ge e’birek wene’gak uogoluk holuk en no’gorlogo pasu laga.
Currently Selected:
Keluaran 34: Wul
Highlight
Share
Copy
Want to have your highlights saved across all your devices? Sign up or sign in
