Keluaran 33

Nenaik ’gain Onuk Logo a’ge en aphwami Israel a’ge dom Sinai ukpoluk wemagoluk mo’gulentesi wene

1 # Kej. 12:7; 26:3; 28:13 At Nenaik ’gain Onuk Logo a’ge en Musa disogo mo’gulesi,

“Aphwami o Mesir en wogonoboluk wegen a’ge eba henemin e, o yema ukpoluk, o an en Abraham emin, Ishak emin, Yakub emin, is en dogo’gwe a’ge emin, wogentaigoluk wene werak enebegimu eba lit o. 2An en e, malaikat mesik his modok wokhonoboluk louwagoluk yo’go poluk hene’bek perakpou weik o. Eba wokhonoboluk loma, an en e, aphwami ena’gul onuk Kanaan a’ge emin, Amori a’ge emin, Het a’ge emin, Feris a’ge emin, Hewi a’ge emin, Yebus a’ge emin, mukho lebigenebaik o. 3His e, o ’gwiang esei opma eba’gin a’bosu emin, di a’ge yu a’ge modok a’bikmu lagup ani o. Asogo a’geat de, aphwami Israel a’ge eba enede modok helep ai en, ebela’gwe lagalat an en erlagap enebaik no oluk e, an nebe nemin lul erlak o,” oluk mo’gulesi.

4-6Asogo mo’gulesirik, pobuk at Musa en aphwami Israel a’ge wene mesik mo’gulontouagoluk mo’gulesimu disogo mo’gulesi,

“At Allah en e,

His aphwami yu re, henede modok helep o. An nemin lul holuk e, an en his henebe modok erlagap honoboat epasu legi o. Holuk e, his henalli a’ge wogo welegep a’ge eba ’berlegat no’gorlogo pomup o. Asogo pagup holuk e, an en his obaphonobu a’ge wene hwalogo paik o ani o, oluk egei, oluk mo’gulontomup o,” oluk mo’gulentesi. Nenaik ’gain Onuk Logo a’ge en asogo mo’gulentesimu, is en enesa’go hweligisarik e, enede modok wiak agarik, onorogole ap werakma welat welagai ’gela’ge onorogole ’gela’ge takpesi. Asogo takpegesarik, is en a’ge enalli a’ge ebano ’balogo pegesarik, dom Sinai ukpoluk wagalat e, is aphwami Israel a’ge enalli a’ge logon modok wogu legesa erlak.

Nenaik ’gain Onuk Logo a’ge owi sum owi werigisa wene

7Is aphwami Israel a’ge orabo sum owi da wetil wagalat, at Musa en e, Nenaik ’gain Onuk Logo a’ge owi woluk horok weiyat ’geksogo walekma ’gela’ge werise laga. Asogo werik polukmu en, is logon Nenaik ’gain Onuk Logo a’ge en enesa’go woru enagai holuk e, o sum owi ano at Musa omuat lasu laga. 8At Musa o werikmu ano ’gwiogoluk lasuam e, is aphwami Israel a’ge enebe onowi ’goduk emde ’belak o’gwe eba edik welat, Musa ’gwisokhwe enil nak yetharok welegesa. Asogo oruakma en e, arat ’gwisoam e, mo ogu legesa.

9At Musa ano arat ’gwisoam e, o hena edik welago a’ge ano arat ’bu otluk e, o werik a’ge ’godukmu ebano mo ese laga. Mo osoam e, at Nenaik ’gain Onuk Logo a’ge ano ebe o hena ogola welat e, Musa emin wene’gak ogu legesa. 10O hena edik welaga a’ge ano Nenaik ’gain Onuk Logo a’ge owi sum a’ge werikmu ai ’goduk pam oruakma, is aphwami Israel a’ge enil yetholuk e, enebe ’berlegat onowi lo’gwe lo’bok ’godukmu inotluk, Allah erliktogu legesa. 11Asogo togukhwe, Nenaik ’gain Onuk Logo a’ge Musa emin aphwami enarilak enemin, weneane ogulat onorogole yet-yet ogwi ai ’gela’ge ogu legesa. Asogo arat oluk, at Musa ano is aphwami Israel e’ge ene’bek onowi sum owi werikmu ebano ene’bek waga laga. Asogo a’geat de, ap souwe a’ge mesik Musa lethasu laga a’ge Nun omlogo onuk Yosua ai nak e, o Allah owi sum a’ge werikmu ano o pam modok welaga.

At Nenaik ’gain Onuk Logo a’ge en, “An his tenhentarok modok weleik o,” oluk eiyagai wene weragenebesi wene

12O agauwa mesik erlige re, at Musa en Nenaik ’gain Onuk Logo a’ge disogo mo’gulesi,

“Naik, hat en e, an en aphwami yu wogonoboluk o hat en hwiaknentaigoluk wene werak nenebegenma ebano wogonoboluk louwagoluk mo’gulnigen o. Asogo mo’gulnigen a’geat de, ap ai en lethouwagoluk yo’go poluk perakpou wegi o, oluk mo’gulnigen erlak eba re. Naik, hat en e,

Hat hebe an honuk naluk welat, hebe nebam lo’buk oso yo, oluk mo’gulnigen ani o. 13An hat hebaget tagalat, hogola hagai a’ge nak tago modok weleik en e, hat en disogo tu o, oluk epegen a’ge ai mo’gulnemin o, naik. Hat en e,

Aphwami yu, an neiyagai welemagoluk, pulogo enebegen ano hede eberin o, naik,” oluk mo’gulesi.

14Asogo mo’gulesimu, at Nenaik ’gain Onuk Logo a’ge en e,

“An en tenhentarok oruakhwe re, o an en wokhentaigoluk wene werakhenebegimu eba eiye la’gwi laguptik hono’borlogouk erlaksogoat wolorogup ani o,” oluk mo’gulesi.

15Asogo mo’gulesimu at Musa en e,

“Hat nis nenemin lul erlak holuk e,

O yema ukpoluk lit, oluk mo’gulnentagun o. 16Hat en nis letnentagun erlak holuk e, aphwami en e,

Musa emin, aphwami Israel a’ge emin, enebe at Allah ebam liok oso hegi, oluk no’gosogo en enaluk ema epegen. Hat nis nenemin modok wolomul ai pam aphwami ’gwiangma welagai a’ge logon muat, ye, nis Israel a’ge muat agaihwe, enagat ema o,” oluk mo’gulesi.

17Asogo mo’gulesimu, at Nenaik ’gain Onuk Logo a’ge en Musa disogo mo’gulesi,

“Hat hebe an honuk naluk welat, hebe nebam lo’buk oso ai en, hat en ’gonu mo’gulnigen a’ge ai an arat nesa’go hwelegistik asogo tik o,” oluk mo’gulesi.

18Asogo mo’gulesimu, at Musa en e,

“Hat en e,

An nebe nemin welege, oluk he’bak-’bage yogo pasumu yethiaik en e, onukniemin o,” oluk ’gonu mo’gulesi.

19 # Rom. 9:15 Asogo mo’gulesimu, at Nenaik ’gain Onuk Logo a’ge en e,

“An nebe logoatma re, erliknobogwi a’ge nu’gwarek nonuk oluk horogolema laik o. An henaik ’gain Nonuk Logo a’ge en, neiyagai dedilogo poligenebasu legi a’ge nak enebe nede en obap enebise legi o.” 20An nebe aphwami en enil nioluk e, enelaluk welema erlak ai en e, norogole onukhiaik erlak o. 21’Gain Onuk Logo a’ge en eselat, “An nabel akhit duk yu pam helep mesik oruakma re, hat hebe eba edik wolomup o. 22An nebe welegi, oluk ne’bak-’bage yakho wagalat, hat hebe duk pam helep elema hobo ’goluk ne’gik en lasogo hoboluk en, ne’bak-’bage arat yakho lasu holuk en wokhaik o. 23Wokhaikmu, norogole hil niagun erlak a’geat de, no’borl akhit nak yetniagun en, ne’gik wokhaik o,” oluk mo’gulesi.

Currently Selected:

Keluaran 33: Wul

Highlight

Copy