Keluaran 32
32
Sapi emas a’ge heli’gogo pegesa wene
1 #
Per. 7:40
Aphwami Israel a’ge Musa ebe ’buom erlakma en dom pam modok aregenat oruak en e, Harun e’bek odoktu egesarik, disogo mo’guligisa,
“At Musa o Mesir en woknonoboluk liplau wagarik waga a’ge ano no’gosogo agama. Nis neneperlak o. Holuk e, nis woknonoboluk louwagoluk Allah ’gela’ge dogwi mesik utnentemin o,” oluk mo’guligisa. 2Asogo mo’gulegisema, at Harun en e, disogo mo’gulentesi,
“Honugwami emin, heneiyagai emin, henalli a’ge emas a’ge enesa’go petne erlelik a’ge ’belakpoluk odoksogo re, an nak woknosu manup o,” oluk mo’gulentesi. 3Asogo mo’gulentesimu re, enebe lo’bok en emas a’ge enesa’go petne erlelik welaga a’ge ebano ’balogo re, Harun nak wogosu egesa. 4#1Raj. 12:28; Per. 7:41Wogosu egesema, wesirik e, sakho erlebe agoam sapi ebe ’gela’ge ele delak o’gwe herlilogo ’gwelebak pogwiam dogwi asua a’ge sapi ebe ’gela’ge hele’gik pesi. Asogo tegeimu, is aphwami Israel a’ge en e, disogo egesa,
“Yethemit, dogwi asua a’ge ’gela’ge o Mesir en nis woknonoboluk waga a’ge re, ebe yu o,” oluk egesa. 5Asogo egesema, at Harun enat di a’ge yu a’ge Allah paget wusogo odouk narlik ebasu lomma ebale mesik dogwi asua a’ge sapi a’ge ano eragam werik pesirik e, disogo mo’gulentesi,
“Loruk o’gwe Allah erliktuogoluk e, seni mesik sorul o,” oluk mo’gulentesi. 6#1Kor. 10:7Asogo mo’gulentesimu, is aphwami Israel a’ge loruk o’gwe hubet siaksogo re, wam di a’ge yu a’ge Allah paget wusogo odouk narloum a’ge mesik, ye, Allah emin la’buluogoluk warom a’ge mesik, woluk wegesa. Wegesarik e, seni sorogulat, e’gen a’bosu no’gulat, ne’gesarik e, enebe inegesarik onogola enagai en e, we, enede ’belaksogo ’gela’ge yogunat togu legesa.
7Asogo togu legesema, at Nenaik ’gain Onuk Logo a’ge en e, Musa disogo mo’gulesi,
“Aphwami hat en a’ge o Mesir en wogonoboluk liplau wegen a’ge ebano en modok wiak til legesa ai en, hat hebe perleneat ’bin o. 8Is en an niak sagalogo ukpoluk, mu a’ge mesik heli’gogo pegesa o. Enalli a’ge emas a’ge logon sogo poluk herlilogo re, dogwi asua a’ge sapi ’gela’ge mesik werigisarik e, wam di a’ge yu a’ge wusogo odouk narlik ebegesarik erliktigisa o. Asogo erliktogulat, disogo egesa,
Dogwi asua a’ge Allah ’gela’ge, o Mesir en woknonoboluk waga a’ge ebe yu o, oluk egesa. 9Aphwami eba enede modok helep ’gela’ge ai an naluk o. 10An nolot het enebam pegirik arat warenebik ai, hat en hwerlirak nenebaigoluk ogun o. Asogo a’geat de, hat nak e, ukhoboluk, hat en dogoma a’ge ena’gul onuk logemagoluk takhebaik o,” oluk mo’gulesi.
11 #
Bil. 14:13-19
Asogo mo’gulesimu, at Musa en aik Allah Onuk Logo a’ge disogo mo’gulesi,
“Hat en asogo holot het en wene yagentagun ai nopaget? Hat hanni modok a’bik ai pam is delenebigentik, o Mesir en wogonoboluk liplau wegen ano erlak no? 12Hat en asogo waronobogun holuk, aphwami Mesir a’ge en e,
Allah en, aphwami Israel a’ge ano re, o dom pam eba en warenebil-enebil modok erlagap enebaigoluk wogonoboluk libagarik lagama hegi o, oluk ua o. Holuk e, asogo togun o, naik. Hat holot het oroguntik e, aphwami eba almaronobogun no yo, naik. 13#Kej. 22:16,17; 17:8Hat heragam a’ge Abraham emin, Ishak emin, Yakub emin, wene ho’buk ’balogo weragenebasulat e,
His en dogo’gwe a’ge hwesagal ’bogorl pam a’bik ai ’gela’geat ema o. Ye, o wokhentaigoluk obok mo’gulhentegismu eba ’berlegat his en dogoma a’ge eiye emarik modok-modok welema o, oluk wene weragenebegen ai hede eberin o,” oluk mo’gulesi. 14Asogo mo’gulesimu at Nenaik ’gain Onuk Logo a’ge en aphwami ai wene enebam poluk modok warenebigoluk tegei a’ge ano mo egeitik e, waronobu erlakma en ugenebesi.
15Asogo ugenebesimu, at Musa en wene Allah en nenesa’go wusogo,
Disogo togu lomup, asogo togu lomup, oluk helep ebe ’biren a’ge pam pelal abel pema-pema ’balegei a’ge ano woluk dom pam en togolik ’bu aga. 16Allah u’gwarek en helep ai heli’gogo pesirik wene nenesa’go wusogo,
“Disogo togu lomup, asogo togu lomup,” oluk helep ebe ’biren eriano pam pelal wokho pesimu woluk ’bu aga ai o.
17Owan ’bu agalat, aphwami Israel a’ge eniak a’bik sagalogumu Yosua esa’go hwelegeirik e, Musa disogo mo’gulesi,
“O sum owi werikmu en enemin weim obogulat, eniak a’bik orluk ogwi o,” oluk mo’gulesi.
18Asogo mo’gulesimu at Musa en e,
“Eniak ai re, enanni otluk weni worogwi ai ’gela’ge ogo, maben agalat eniak ’gela’ge ogo re, erlak o. We, weni weat worogwi ’gela’ge o,” oluk mo’gulesi.
19Mo’gulesirik, o sum owi werikmu horoksogo waga ’gal e, sapi emas a’ge ano oruakma re, aphwami weni lak-wak worogukhwe il entesirik e, olot het a’bik aga. Asogo entesirik, dom edipmu erianoat helep woluk ’bu aga a’ge ano lekholuk ’gwiangma ’bo pasuam e, ’goluk-’gelak egei. 20Asogo tegeirik pobuk e, dogwi sapi ’gela’ge aphwami Israel a’ge en ene’gik pam heli’gogo werigisa a’ge ano wesirik e odouk narlik poluk, ’goluk-’gelaksogo e’gen nak takpesirik, ik emin mesikmu ne’garlok-he’garlok takpesi. Asogo takpesirik, aphwami Israel a’ge, enebam,
“Menit o,” oluk mo’gulentesimu ne’gesa. 21Asogo tegeirik, Harun disogo mo’gulesi,
“Is aphwami yu en no’gosogo takhebegesema en is wiak logat tuagoluk ugenebegen,” oluk mo’gulesi. 22Asogo mo’gulesimu, at Harun en e,
“Nue, an wene yaknoso puk o. Aphwami yema enede helep ’gela’ge welat wiak modok togwi ano hat hu’gwarek en is enebabut halugat o. 23Is en e, disogo mo’gulnegisa o,
At Musa o Mesir en woknonoboluk liplau wagarik waga a’ge ano no’gosogo agama hwe, nis neneperlak o. Holuk e, nis woknonoboluk louwagoluk Allah ’gela’ge dogwi mesik utnentemin o, oluk mo’gulnegisa. 24Asogo mo’gulnegisema, an en e,
Henalli a’ge emas a’ge eba an woknosu manup o, oluk mo’gulentegismu re, woknosu egesa. Enalli a’ge ’berlegat woknosu egesa a’ge ebano an en odoukmu narlik pegimu re, sapi yu omuat heling aga o,” oluk mo’gulesi. 25Asogo mo’gulesimu, at Musa ede en e,
“Harun en e, wam kuda owi pam en herle hebilogo lebikpogwi ai ’gela’ge, aphwami Israel a’ge ugenebesimu eneselei a’ge en eneidarak onobogulom a’ge enebabut agama hegi o,” oluk pobi tegei. 26Pobi tegeirik, at Musa ebe o sum owi werikmu ’goduk emde ’belakma ’gogumu eba inagarik e,
“Sa en ebe Nenaik ’gain Onuk Logo a’ge oruak o’gwe ema oluk epasu holuk e, yema manis o,” oluk iak loksogo worlentesimu re, aphwami ena’gul onuk Lewi a’ge at Musa eragam odoktigisa. 27Asogo odoktu egesema, at Musa en e, disogo mo’gulentesi,
“Nis aphwami Israel a’ge Nenaik ’gain Onuk Logo a’ge en e,
His henebe lo’bok hene’garok lisogo waguptik e, orabo sum owi werik a’ge ’goduk emde ’belakma yema en ’goduk emde ’belakma mesik lagalat, henarilak honorokhwi emin, henemin hwedik a’ge emin, o henemin horoksogo welegep a’ge emin, enebe warenebil lu o, oluk mo’gulhentesi,” oluk mo’gulentesi. 28Allah en asogo tip, oluk egei ai pam, is ap ena’gul onuk Lewi a’ge en e, o ai erlige aphwami enebe 3.000 ’gela’ge warenebigisa. 29Warenebigisema, at Musa en ap ena’gul onuk Lewi a’ge disogo mo’gulentesi,
“O yogodak ya pamat, his henebe nis Nenaik ’gain Onuk Logo a’ge eiye oroguptik at ebaget togu lomogoluk heneiyagai emin, henarilak honorokhwi emin, warenebigep o. Holuk e, at Nenaik ’gain Onuk Logo a’ge en henebe obaphonobuak o,” oluk mo’gulentesi.
30Loruk o’gwe re, at Musa en is aphwami Israel a’ge disogo mo’gulentesi,
“His en wiak logat tigep a’geat de, an Nenaik ’gain Onuk Logo a’ge oruakma eba legeigat o. Ligomma, at en e,
Is wiak tigisa a’ge ai an nede op agarik erlagapsogo ukpegi, oluk mo’gulnema ya? Erlak a. Asogo mo’gulnoso holuk mo’gulhenta ’bu eik o,” oluk mo’gulentesi. 31Mo’gulentesirik, ebe Nenaik ’gain Onuk Logo a’ge e’bek ligagarik e, disogo mo’gulesi,
“Aphwami eba en e, wiak lok a’ge mesik tigisema o. Is en e, hat ’gela’ge muat emas a’ge mesik werigisa o. 32#Mzm. 69:28; Wah. 3:5Naik o, is wiak tigisa a’ge ai hat en erlagapsogo ukpoluk hogola op emin o. Asogo togun erlak holuk, an nonuk aphwami enelaluk modok welema a’ge ononuk tuesi’ga pam pelal wogo welagoma eba wogo oruak a’ge ano hosogo ukpomup o,” oluk mo’gulesi.
33Asogo mo’gulesimu, at Nenaik ’gain Onuk Logo a’ge en e,
“Asogo tik erlak o. We, aphwami logon an nil pam wiak togwi a’ge ononuk nak e, ononuk tuesi’ga ai pam pelal wogo a’ge hosogo ukpaik o. 34Is ai o an en mo’gulhegismu ebano wogonoboluk lagun en e, ’bin o. Malaikat an a’ge en wokhonoboluk louwa o. Asogo a’geat de, o agauwa an en wene e’gin enebam po ai erlige, is aphwami wiak tigisa a’ge eba wene enebam po a’ge oruak o,” oluk mo’gulesi.
35Is aphwami Harun en emas a’ge dogwi asua sapi ’gela’ge woruagoluk ningsogo mo’guligisa ai en Nenaik ’gain Onuk Logo a’ge en di obotut yu obotut logat enebam perakpou waga.
Currently Selected:
Keluaran 32: Wul
Highlight
Share
Copy
Want to have your highlights saved across all your devices? Sign up or sign in
