Keluaran 28

Allah eiye Lewi a’ge onosum egesu wene

1Asogo mo’gulesirik, At Allah en Musa wene mesik emin mo’guleselat, “Hat hue Harun emin, at eiyagai Nadab, Abihu, Eleazar, Itamar emin, an nebe eiye welemagoluk, aphwami Israel a’ge ene’gerlakma en hat he’bek wemak oluk mo’gulontomup o. 2Ye, at Harun en an nebaget tagalat, sum egesogwi a’ge polik a’ge ano a’ge de sum ano wansogo oruakhwe onogorloksogoat yethiogu lemagoluk hue osum egesuak oluk, mo’gulhegis ai o. 3At Harun ebe ano an nebaget polik pasu holuk e, an nebe eiye welat, taga lemagoluk, aphwami an nebe eiye a’ge welat onosum egesogu lemagoluk enalugwap pegi ano ene osum egesuak oluk mo’gulentemin o. 4Hat hue Harun eiyagai enemin onosum omu degelak a’ge an nebe eiye welat, ’buktogulom a’ge egesu ano re, enemik pam horok a’ge wantak wolom a’ge ano emin, onosum ebagal tak a’ge ogolayat a’ge ’buktogwi a’ge efod ano emin, sum o’borlma a’ge yat a’ge emin, sum ogola a’ge erabuno ’buktu a’ge emin, sum ena’gul het togulom a’ge emin, enagap enebagase’gwe wantak onobo a’ge emin. 5Emas a’ge pam lo’boksogo tuelak a’ge emin, herle ’borlu iltak a’ge pam tuelak a’ge emin, herle ’borlu momi-momisogo tak a’ge pam tuelak a’ge emin, herle meinya esi ’gela’ge op sakhorak a’ge pam tuelak a’ge emin, ebano pam is ap an eiye a’ge en egesogu lemak o,” oluk mo’gulesi.

Sum ebagal tak a’ge ogola ’buktu a’ge onuk efod egesu wene

6Asogo mo’gulesirik, mesik mo’guleselat, “Onosum egesu ano re, domba asu emas a’ge pam lo’boksogo tuelak a’ge emin, herle wibe’gen iltak a’ge tuelak emin, herle lalu iltak a’ge pam tuelak a’ge emin, ’borlu herle il momi-momisogo tak a’ge pam tuelak a’ge emin, herle menya esi ’gela’ge op sakho tak a’ge is ap enaluk a’ge holuk ’buktogwi a’ge ebano a’ge emin, wogu lemarik, ebano pam is an nebe eiye a’ge onosum ebagal oruak a’ge ogolayat a’ge ’buktu a’ge efod ano ene’gik opsogo egesogulat, 7um pema-pema o’borl akhit olukhwe akhit dipsogo egeik wolom a’ge ebagal ’biren dipsogo egesogulat, 8sum efod enemik pam wantogwi a’ge ano ologun pam en dipsogo ’bagaluk wantak wolom ano re, sum efod il mesik a’ge nak oruakhwe houwak oluk, emas a’ge pam lo’boksogo tuelak a’ge emin, herle il wibe’gen pam tuelak a’ge emin, herle lalu a’ge pam tuelak a’ge emin, herle il momi-momisogo tak a’ge pam tuelak a’ge emin, herle menya esi ’gela’ge sakhorak a’ge pam tuelak a’ge emin, il eria a’ge pam nak egesik poluk ’bagaluk il emin baju efod ano emin il mesigarap poluk egeik pouwak o. 9-10Pogwi holuk e, helep napunak ’gela’ge amolit yebek-yebek oso a’ge krisopras ’biren wa’guntik at Israel eiyagai a’bik egesa ebano ’gela’ge helep mesik pam ononuk 6 pam ’belakpasulat, ye, helep mesik pam ononuk 6 pam ’belakpasulat. Asogo nak til-til naduk dagegesa hwerli en ologunmu dagegesa hwerli ’balogo pomup o. 11Ene’gik a’bosu pogwi a’ge cap helo’gogwi ai ’gela’ge, at Israel eiyagai ononuk helep ’biren eriano pam ’belak pasu loroguntik, helep ebe ano pam mul ’gela’ge emas pam wali’gogo hettak poluk, 12sum efod um pam sebelogo ’buktak wolom a’ge ebagal ano pam lo’boksogo pomup o. At Israel eiyagai ononuk eberak welemagoluk, onosum ogolayat ’buktu a’ge efod ebagal ano pam sepnik pagunmu re, at Harun en um pam sebelak a’ge ano woluk an Allah nil pam noso holuk, an en, at Israel eiyagai ebano yuat o, oluk, eberak weleik ani o. 13Ye, helep ano pam mul ’gela’ge emas ano pam wali’gogo hettu a’ge ano heli’gogo poluk 14herle gobi egesogwi ai ’gela’ge emas a’ge pam tigene ’biren ikho mul pam helep hettak a’ge ano o’borl pam hettak pomup o,” oluk mo’gulesi.

Emik sum orlomu tu a’ge egesu wene

15Asogo mo’gulesirik, mesik emin mo’guleselat, “Sum emik orlomusogo egeik a’ge emik pam lo’boktak oruak holuk e, an en tu epasu a’ge ano aluk emagoluk emik pam lo’boktak welemagoluk, sum emik orlomu tu ’age ai re, baju efod ’gela’geat ikho pouwak o, ebagal hele’gik ogola ’buktu a’ge efod egesu o, oluk mo’gulhegis ano hegitsogoat egesugulat, domba asu pam emas emin lo’boksogo tuelak a’ge emin, herle wibe’gen iltak a’ge tuelak emin, herle lalu a’ge tuelak emin, herle il momi-momisogo tak a’ge tuelak emin, herle menya esi gela’ge sakho tak a’ge pam tuelak a’ge emin, ebano pam is ap egesogwi enaluk a’ge ebano en egesuak o. 16Yat akhit emin horok akhit emin, 22 senti pam nak hegitsogo ’belakpoluk po yo. 17Helep o’go lok a’ge permata ebano a’ge pam nak emik sum ano pam lo’boktak pouwagoluk, hwerli 4 pamat ebelogo pogu lemarik, helep ’borlu ’belak a’ge yaspis mesik wogwi, helep krisolit mesik wogwi, helep malakit mesik wogwi, takpoluk hwerli ebale naduk ebelogo pogulat, 18takpoluk, helep momi a’ge mesik wogulat, helep lazurit mesik wogulat, helep yaspis une’ga a’ge mesik wogulat, takpoluk hwerli o’borl pam hwalogo pogulat, 19takpoluk, helep ambar mesik wogwi, helep akik mesik wogwi, helep kecubung mesik wogwi takpoluk hwerli o’borl pam pogulat til-til 20hwerlitak poluk ogorlukmu re, helep pirus emin, helep krisopras emin, helep nefrit emin, eriano pam ebelogo pouwak o. Pogu lemarik, helep 12 ebelogo pouwa a’ge ai pam annisogo welemagoluk mul ’gela’ge emas a’ge pam hettak pouwak o. 21Helep 12 hwalogo pouwa a’ge ai pam e ap Israel eiyagai 12 ano ononuk mesik-mesik nak cap ’gela’ge takpoluk ononuk ’balogo pouwak o. 22Ye, sum emeik pam lo’boktak wolom a’ge ’bagaluk herle tigene egesogwi ai ’gela’ge emas modok il ap a’ge pam ikho pogulat, 23takpoluk, emas a’ge pam tigene ’biren ikho sum emik pam lo’boktak wolom a’ge ano o’gut pema-pema ologun pam erlelik poluk, 24ebagal e ’bodul ’gela’ge emas pam egeik a’ge ’biren eriano tigene ’biren sum emik pam a’ge ano o’gut pema-pema ologun o’gwe erlelik a’ge ano pam diptak pogulat, 25ye, herle ’bodul ’gela’ge emas pam egeik a’ge ologun ’biren eriano wokho emas pam mul ’gela’ge hettak a’ge ano sum efod ebagal pam lo’boktak a’ge ano emin selakma oruak a’ge ano pam lo’boktak poluk emin hettak pogulat tuak o. 26Asogo tuarik, emas a’ge pam ’bodul tegine ’biren mesik emin ikho sum efod pam egeik a’ge sum emeik pam lo’bok tu a’ge ano pema-pema ogola akhit en ologun wikwok, 27tigene ’biren emas a’ge pam egeik pouwak o, sum efod ologun sebelogo, diptak pouwak o, dipsogo re, um sebelak a’ge ano ologun sebelogo diptakma ebano tigene emas a’ge pam dipsogo pouwak o. 28Lologo ’bisoma no oluk, sum emik pam lo’boktak a’ge ano lekho tigene pouwa a’ge ano emin, tigene sum ogola ’buktu a’ge efod pam dip tu a’ge ano emin, emin lo’boksogo herle wibe’gen iltak a’ge ano a’ge pam diptak pouwak o. Asogo togwiam e, sum emik sebelak a’ge ai lebe u erlakma enat herle ebagase hettua a’ge bagaluk ai o’borl akhit welemak o.

29Asogo pouwama re, at Harun en an tu epasu a’ge ano aluk om a’ge sum enemeik sum egesu a’ge ano ede he’git ebano wantak poluk o asuama eba ’gwilasuam e, an ’Gain Nonuk Logo a’ge en modok eberak weleik en e, ap Israel eiyagai ena’gul onuk lobok ononuk enede pam lo’boktak poluk woluk ’gwi lasu lemak o. 30#Bil. 27:21; Ula. 33:8; Ezr. 2:63; Neh. 7:65An nede epasu a’ge aluk om a’ge ano onuk Urim Tumim emin, sum emik pam lo’bok tu a’ge ano pam emin lo’boktak poluk, ap Harun ede hegit lo’boktak poluk, woluk an ’Gain Nonuk Logo a’ge nil pam ’gwi lasu lemak o. Ye, aphwami Israel en togulom a’ge ap Harun aluk ago a’ge ede pam modok lo’boktak oruakhwe, an ’gain Nonuk Logo a’ge nil pam ’gwi lasu lemak o. Harun en An en osokhwe at Harun ede hegit ’buktegei a’ge ebano at en e, is aphwami Israel a’ge opsogoat mo’gulontouwak o,” oluk mo’gulesi.

’Gain Onuk Logo a’ge Imam onosum muat mesik egesu wene

31Mo’gulesirik, mesik emin mo’guleselat, “Is ap an nebe eiye a’ge onosum ogola ’buktogwi a’ge efod ano o’borlma oruakhwe, sum yat a’ge ogola ’buktogulom ano re, kain wibe’gen iltak a’ge ano a’ge pam nak egesogulat, 32ogorlop sum adi hettu a’ge kain ’burl ele hele’gik poluk, ni osoma no oluk, emde ’gwe sum ere’gin ’gela’ge egeik pogulat, 33ye, domba asu herle wibe’gen tuelak emin, herle lalu a’ge tuelak emin, herle il momi-momisogo tak a’ge tuelak emin, ebano pam e delima e’gen ogut a’ge pam wusogo sum ano petne erlelil laga lemarik, e’gerlakma iak ngerle oso a’ge emas pam hele’gu a’ge ano erlelik pil lagalat, tuak o. 34Sum petne erlelil lagalat e delima e’gen ogut ano erlilogo ’belabu agalat, emas a’ge pam helo’gu a’ge lebe hogwiam iak oso a’ge ebano erlilogo ’belabu agalat, til-til sum ebano petne ’berlegat erlelik pouwak o. 35Erlelik pogwiam e, ap Harun en o asuama An ’gain Nonuk Logo a’ge nil pam aphwami enebaget tiogoluk e, modok ’buktak poluk nak ’gwi lasu lemak o. Ye, ’buktak poluk iak oluk il’gwiselat, libagalat, tagokhwe is aphwami en enesa’go hologu lema ani o. A’geat de, at libom ’guom osokhwe iak oso erlak holuk nak e, Harun pobuk ebe warema o.

36Asogo toluk, emas il modok at en a’ge pam e, Nenaik ’gain Onuk Logo a’ge ebaget tiso a’ge o, oluk il hundomok egesik poluk ano pam pelal ’balogo pouwak o, pelal ai re, meterai ’gela’geat ’balogo pouwak o, 37herle il wibe’gen ’belak a’ge ’gela’ge ano pam lo’boktak poluk, sum a’gul sum ’buktak wolomma e’berli pam dopno takpouwak o. 38A’geat de emas ebak a’ge ’gela’ge ano re, Harun e’berli pam lo’boktak poluk oruakhwe, aphwami Israel wiak toluk, no’gwe a’ge polik poluk woknosu agai holuk, at Harun en uak lologo an ’Gain Nonuk Logo a’ge woknoso holuk, wasu leik en e, modok-modok e’berli pam lo’bok sagat welemak o. 39Ye, onosum ogola ’bekhit yat a’ge ’buktu ano re, kain herle menya esi op sakho tak ai ’gela’ge pam egesogulat, ye, ena’gul sum ’buktu a’ge ano ogo re, kain il mesik a’ge ai pamat egesogulat, eneba’galuk nak e, is ap ene’gik ’bogun egesogwi a’ge en egesogulat il hundomok egesik pouwak o.

40Ye, Harun eiyagai ai ogo, enalongsogo oruakhwe onogorloksogo yerontogu lemagoluk onosum yat ogola ’buktu a’ge emin, enebagaluk emin, onosum ena’gul sum pagaiya emin, ’berlegat ikho pouwak o. 41Ikho pogwi holuk e, hue Harun eiyagai enemin ’buk tagenebaguntik, is an nebe eiye welat, nebaget tugu lemagoluk, a’bosu ena’gul pam herlelik poluk, pulogo edigonobomup o. 42Ye, enagasogun selakma takhwe hogu lemano oluk, onosum celana ’buktogwi a’ge ai, enauwakhese pam en ’bekhit onodogorlu hwerli ’buktogu lemagoluk egesuak o. 43Ikho pouwama re, ap Harun eiyagai enemin en an nemin hwedik togumu nowi werikmu ebano ’gwi lagai a, o asuama aphwami enebaget mesik tuak oluk, nebaget wusogo odouk narlogumu ebano horok lail lagai a, asogo togulat, enagasogun telakma takhwe hogwi holuk e, ai wiagatma re, an en waronobu ’gela’ge, onosum ai ’buktak poluk en, togu lemak o. Ye, wene egi ai Harun ogo, eiyagai dak enebil louwa a’ge ogo re, modok-modogat togu lemagoluk, wene lekelogo mo’gulhegis ai o,” oluk, mo’gulesi.

Currently Selected:

Keluaran 28: Wul

Highlight

Copy