Keluaran 29
29
Harun eiyagai Allah eiye welemagoluk edigonobo wene
1Mo’gulesirik, Musa pobuk mesik emin mo’guleselat, “At Harun eiyagai enemin, an nebe eiye welat, nebaget tugu lemagoluk, edigonobogulat, tu ano re, yuat o. Hat en e, sapi ierak a’ge ot mesik wasulat, domba ierak a’ge ebetne yebil aik ’belak erlak a’ge ’biren wasulat, 2Gandum e’gen agap e’gen wogo modok opsogo wogo poluk, so’boru roti ragi emin po erlak a’ge pam werakho wasulat, roti ragi emin po erlakma en a’bosu pam ebelogo poluk werakho wasulat, ye, roti ragi emin, po erlakma en ebak a’ge werakho a’bosu egilogo wasulat, 3asogo taga loroguntik, roti ai mul ogola poluk e, ’berlegat an Allah nebaget pasulat, ye, sapi ierak a’ge ano emin, domba ierak a’ge ’biren eriano emin, asogo nagat nebaget pasulat, tip o.
4Asogoat taga loroguntik, ap Harun eiyagai enemin wogonoboluk, an nemin hwedik togulomma nowi tabo sum owi werikmu ’goduk pam eria nobou waga loroguntik, ik pam onowiak hosogo pomup o. 5Sum yat a’ge ogola ’gut a’ge a’ge ’buktak sum yat a’ge ’borlu ’belak a’ge ’buktak pasulat, sum efod o’borl o’gwe a’ge ’buktak pasulat, arat takpoluk e, sum emik orlomu tago a’ge ano ’buktak pasulat, ’bagaluk ebagase ’gwe ’buktak pasulat, sum efod emin erlelik ’age ano pam ebagase pam wantak pomup o, 6sum a’gul pam pagaiya wantak poluk, ebak a’ge pam ’gain Onuk Logo a’ge ebaget polik-wolom a’ge ano sum a’gul sum wantu a’ge ano pam lo’boktak pasulat, togun ani o. 7Asogo takpasu loroguntik, ap edigonobogulat, a’bosu herlil onobogwi a’ge ne’gak a’ge ano wasu loroguntik, a’gul pam herlelik pasulat, ’belak pil worogun ani o.
8Asogo taga loroguntik, Harun eiyagai ano heragam onobou wotluk, onosum baju ogola ’buktogwi a’ge yat a’ge ano ’buktak onoboluk, 9’Bagaluk sum ’betesogo Harun eiyagai enemin, enebagase pam ’buktak enebasulat, ena’gul sum ena’gul pam wantak enebasulat, tip o. An nebe eiye welemagoluk, ap edik enebasu ai, modok-modok tugu lemagoluk, an en wene hwalogo pegimu re, at Harun eiyagai enemin, asogoat takpoluk edigonobomup o.
10Asogo takpoluk, sapi ierak a’ge ano wik-woknemin la’bologumu nowi sabo werikmu ’godukmu eria pou wago holuk, Harun eiyagai enemin en sapi a’gul ano ene’gik en sebelak poluk oruakhwe, 11an nemin la’bulogumu nowi sabo sum owi ’goduk ’gwi lagalomma an Allah nil pam eria enat sapi ai wusogo nobomup o. 12Wusogo pasu loroguntik, emep ado he’gik pam wikwok, an nebaget wusogo odouk narlogulomma e sapi iak daintak oruak a’ge eriano petne ologun mu ene ologun pam egilogo pasu loroguntik, emep ano ’berlegat an nebaget wusogo odouk narlogulomma eragam eba herlelik pomup o. 13Asogo pasu loroguntik, sapi woru a’ge ano olot pam a’ge esei emin, hosuk pam lo’boktak a’ge amuako emin, ede e’gen emin a’ge esei emin, ’berlegat wasu loroguntik, odouk narlogulomma ebano odouk narlu a’geat de, 14sapi ierak a’ge ebe emin, agap emin, olot emin, ano re, woluk nowi sabo werikmu leget o’borlma eba odouk nouwak oluk, narlik pomup o. Ai tu ano re, onowiak ukpaik en e, nebaget woknoum ano re, aiat o.
15Ai, asogo taga loroguntik domba ierak a’ge are ano woluk wago holuk e, Harun eiyagai enemin en domba a’gul ai ene’gik en sebelak poluk oruakhwe, 16Hat en wusogo pasu loroguntik, emep wokho an nebaget wusogo odouk narlogulomma ologun wali’gogo pema-pema emde ligakhit ’belagakhit e lo’boktak pil legen a’ge petne ’berlegat ologun ’balogo pil lu o. 17Asogo takpoluk, domba ebe ano ’balogo pasu loroguntik, olot emin, odua’gen sarak emin, ik pam hosogo poluk, a’guluak emin, ado ’belak a’ge emin, la’bulik pasu loroguntik, 18#Efe. 5:2; Fil. 4:18ebano ’berlegat odouk narlogulomma ebano odouk narlik pomup o. Asogo togun ai re, An ’gain Nonuk Logo a’ge nebaget wusogo odouk narlogwi holuk e, e’ben op a’ge hasulat, nogola nagai houwak oluk, tugulom ano re, aiat o.
19Pobuk togolik domba ierak a’ge are ano wokho pou wago holuk e, ap Harun eiyagai enemin en, domba ai a’gul ene’gik sebelak poluk, oruakhwe, 20Hat en wusogo pasu loroguntik, emep ado pema wokho ap Harun eiyagai enemin, enesa’go ’bekhit o’gwe egelik pasulat, ene’gik dum ’bekhit akhit egelik pasulat, onoyuk huap ’bekhit o’gwe egelik pasulat, asogo takpasu loroguntik, domba emep ano ’berlegat an Allah nebaget wusogo odouk narlogulomma ologun pema-pema emde ligakhit ’belagakhit e lo’boktak pasu legen o’gwe ’berlegat egelik pomup o. 21Asogo takpoluk, domba emep odouk narlogulomma oruak a’ge ano mesik wasulat, ap edigonobogulat, a’bosu herlelik onobogwi a’ge ano a’ge mesik wasulat, takpoluk, ap Harun eiyagai enemin, ena’gul pam enebam egelik enebasulat, onosum ’bukhorlogwi a’ge pam egelik pasulat, tip o. Asogo togun ano re, ap Harun eiyagai enebe emin, onosum emin, an nebe eiye welat, arat degelak welemagoluk, tip o.
22Asogo taga loroguntik, domba ano esei wasulat, age’bo esei emin wasulat, olot pam a’ge esei wasulat, hosuk pam lo’boktak a’ge amua’go wasulat, amua’go e’gen esei emin, wasulat, ye, ap an Allah nebe eiye a’ge edigonobogwi holuk e, domba ierak a’ge woru ano yuatma re, odua’gen ’bekhit o’gwe wasulat, takpoluk, 23roti weraru a’ge emin, roti a’bosu esei pam ebelak poluk ebelogo werasu a’ge ano emin, roti ebak teptepsogo a’ge weraru a’ge ano emin, ’gain Nonuk Logo a’ge nebaget a’ge roti ragi emin, po erlakma en weraru a’ge mul sum egeik a’ge ogola yagaru a’ge nil ho a’ge ano Mesik hegeik nak wokho, 24ap Harun eiyagai enemin, ene’gik pam pasu holuk e, yu re ’gain honuk logo a’ge hebagerat o, oluk, ’bekhitsogo woknogwi a’ge ano is hegitsogoat ’bekhirat woknemak o. 25Asogo togwi holuk e, ’gain Nonuk Logo a’ge an en e’ben op at hasulat, nede aganhan haik en e, ene’gikmu a’ge wokho an Allah nebaget wusogo odouk narlise legen a’ge ano emin odouk narlik pomup o.
26Ye, is ap an Allah nebe eiye a’ge edigonobogulat, domba olukhwe emin, oyogut sarak a’ge emin holuk, is ap edigonobogwi eiye a’ge ai horlogu lema re, ap Harun emin, an Allah nebe eiye welemagoluk, edik ebasulat, domba olukhwe emin, oyogut sarak a’ge emin ’balu a’ge ai, yu re, Allah hebagerat o, oluk, onuk niasu loroguntik harat horlomup o.
27Ye, at Harun eiyagai enemin an Allah nebe eiye welemagoluk, edik enebasulat e, domba woru a’ge olukhwe emin, oyuk sarak a’ge emin, yu re, Allah hat hebagerat o, oluk, ene’gik ’bilogo woknogulat, ap Harun eiyagai enemin, horlo a’ge ano re, asogoat nebaget odoksogo pomup o. 28An nebaget odoksogo po a’ge paget mo’gulhegis ai re, is Israel en pou wagai holuk e, ap Harun eiyagai enemin enebageratma re, wogontogulom a’ge paget modok-modogat pulogo pegimu re, is aphwami Israel en at nenemin hwedik wolomok o, oluk, an Allah nebaget wusogo woknosu agai holuk olukhwe emin, oyogut sarak a’ge emin, odua’gen podok tak a’ge emin, ai re ap Harun eiyagai eneminat horlogu lemak o.
29Ye, at Harun osum ’buk tisolom a’ge polik a’ge ebano at eiyagai an Allah nebe eiye welemagoluk, edigonobogwi holuk, ’buktogulomma re, Harun eiyagai wigalak enebagerat welemak o. 30Enaiklak enebalema an Allah nebe eiye welemagoluk, edigonobogwi holuk sum, ano ’buktak welat, an nemin hwedik togulomma nowi sabo werikmu eba aphwami enebaget til lagaihwe agauwa 7 pamat aga lemak o.
31Harun eiyagai enemin an Allah nebe eiye welemagoluk, edik enebasulat, domba ierak woru a’ge ebe ai re, wokho nebaget pogwi holuk e, sorogulomma polik poma ebano en arat seriso loroguntik, 32roti mul egeik a’ge pam yagarigenma oruak a’ge ano domba werak ebe soru a’ge ano emin, woluk an nemin la’bologulomma nowi sum owi werikmu ’godukmu pei lasu holuk e, ap Harun eiyagai enemin en no’gulemak o. 33Ap Harun eiyagai enemin nebaget pulogo edigonobogulat, nemin hwedik wolomogoluk, eiyerak enebasuam nebaget wusogo woknosuagalom a’ge ano re, aphwami we yogunat no mia o. A’geat de, Harun eiyagai enemin nak no’gulemak o. 34Asogo no’gu lemarik, wam eino an nebaget polik a’ge is ap Imaman nebaget yabuk tugu lemagoluk polik a’ge ebano en so’boru roti worogo ebano re, ’berlegat no mia agoam tono hubet dakha oso holuk e, no mia o. A’geat de, ado dedelik a’ge eba re, ’berlegat odouk narlik po yo. ’Berlegat ai re, an nebaget nagat pomup o.
35Harun eiyagai enemin en an nebe eiye welemagoluk, edigonobo wene pulogo mo’gulhegis a’ge yu, takhebasukhwe agauwa 7 pamat taga lomup o. 36Asogo tagalat, aphwami onowiak erlagapsogo poluk, nemin hwedik wolomogoluk, nebaget wusogo woknogwi a’ge ebano sapiierak mesik-mesik nak wusogo pil lasukhwe agauwa naduk en ’bekhit agauwa 7 pamat lai louwak o. Asogo tagalat odouk narlogulomma ebale, obapsogo poluk, an nebaget degelak welemagoluk, a’bosu ebam herlilogo pomup o. 37Agauwa naduk a’ge pam en ’bekhit agauwa 7 a’ge pam ebale nebaget wusogo narlogumu ai re, an nebagerat polik welemak o. Hat en ogo re ebale ai an nebagerat pulogo pomup o. Ye, ebale ai re, an nebaget at pul otluk welemak o, is aphwami en ebale ai ene’gik tenhau wagai holuk e, is enebe ai ogore, an nebagerat poluk welemak o.
Loruk-hopmu Allah ebaget wusogo odouk narlogulom wene
38Mo’gulesirik, mesik emin mo’guleselat, o agauwa mesik dakha oso ano pam domba ’biren dogo oruakhwe tahun mesigat nak tak a’ge holuk wusogo odouk narlogulomma pogulom ano re yuat o. 39Domba mesik wusogo hubet nebaget pogulat, domba mesik wusogo hopmu nebaget pogulat, 40asogo tugulat, hubet domba wusogo nebaget woknogulat, gandum e’gen wogo modok op a’ge 3,6 liter ’gela’ge e zaitun e’gen hwelilogo a’bosu ne’gak 1 setengah liter emin, opsogo ebelogo pogwi a’ge emin, e anggur a’bosu nebaget herlilogo po a’ge 1 setengah liter ’gela’ge ne’gak a’ge emin, pogu lemak o. 41Ye, domba hupmu’gwe wusogo woknogulat, holuk e, an e’ben op hasulat, nede aganhan houwak oluk hubet sorogulat, ai ’gela’geat hupmu akhit soruogoluk leik-louksogo po yo, gandum daganak a’ge emin, zaitun a’bosu emin, anggur a’bosu emin, nebaget pouwa a’ge ano ’gela’ge eminat Allah nebaget narlogu lemak o. 42E narlogukhwe, an nemin hwedik togulat, is nemin wene ’baliselomma re, is eneiyagai dagetil lagai a’ge emin, modok-modogat an nemin hwedik togulomma nowi worogumu ’goduk pam eriayat Allah nebaget wusogo odouk narlogu lemak o. 43Ye, ’goduk pam eria yat is aphwami Israel a’ge ogo re, enemin hwedik tuok oluk ’buagalik ani o. Nemin hwedik so’bu ago holuk, an modok lok logo a’ge erliknobogwi ai pam o eria modok asuama at balema o. 44Asogo tagalige ai pam an en nemin hwedik togulomma nowi worogulomma emin, nebaget odouk narlogulomma emin, ebale asuama ’balogo poluk, Harun eiyagai enemin an nebe eiye welemagoluk, pulogo enebaik o. 45Asogo tagonoboluk, an aphwami Israel ene’gerlakma welat, ye, an en enaik Allah at agalat, togolik o. 46Ene’gerlakma oruak holuk, is en at nenaik Allah ano ene’gerlakma welik oluk, o Mesir en woknonoboluk liplau waga ano hege o, oluk, enaluk ema o. ’Gain Nonuk Logo a’ge enaik Allah an enat egi o,” oluk, mo’gulesi.
Currently Selected:
Keluaran 29: Wul
Highlight
Share
Copy
Want to have your highlights saved across all your devices? Sign up or sign in
