Keluaran 30

E’ben op a’ge narlogulomma ebale hele’gu wene

1At Allah en Musa mesik emin mo’guleselat, “E’ben op a’ge narlogulomma e orlobuk a’ge pam heli’gogo pomup o. 2Yat akhit emin, horok akhit emin, hegit-hegit nak 45 senti pam takpasuam e, o’gut uganakho hegitsogo nak emak o. Ye, ligakhit e, 90 senti pam heli’gogo poluk, sapi iak ebano re, annisogo welemagoluk o’gut ugan eriano petne oyuk yogo pil lo yo. 3Asogo taga loroguntik, e ebe dalu a’ge emin, o hebat ligakhit-belagakhit pema-pema lo’bok tu a’ge ’berlegat emin, o uak edikpogulat o’gut ugan eriano petne sapi iak ugan eriano emin lo’boktak a’ge emin ebe dalu a’ge eragam o’gwe wali’gogo emas il op a’ge pam dopnosogo pil lasulat, takpoluk, 4emas il op a’ge pam nak asogo wale’gik poluk e, eragalet lekho abel pema-pema eriano re tigene ugan emas il op a’ge pam nak ikho lo’boktak poluk e, e yerak no’gulemagoluk hele’gik pasuam e, yerak woluk no’gulemak o. 5Ye odouk narlu a’ge ai re, e ’gwelebak poluk e yesogo woluk lagalom a’ge e orlobuk lologo emas pam lo’boksogo pasulat, 6Nebaget wusogo narlu a’ge ebale ai re, omu degelakma sum kain lok a’ge, en ’burl ogorlitak a’ge ebale Nenaik ’gain Onuk Logo a’ge nowi ogorlitak a’ge emin hegitsogo eriano pomup o. Nebaget wusogo narlogumu ebale ai re, wene wusogo wokhenebegi a’ge hegitsogo pomup o, ogola re disogo tip asogo tip, oluk wene wusogo wokhenebegis a’ge ai yagasogo pomup o. Asogo poluk e, emde lasogo pomup o. An is enemin wene ’baliselomma eba pomup o. 7-8An Allah nil pam e’ben op a’ge ano Harun, modok-modoknarlise lemagoluk, at Harun en o hubet esaga ’gwialogwi a’ge ’bogunsogo payok oluk ’gwi lasulat, o ai erlige e’ben op a’ge ano wokho odouk narlogulomma odouk o’borl pam poluk, odouk narliselat, pobuk nin o hupmu’gwe esaga ’gwialiselat e’ben op hogwi a’ge ebano a’ge emin odouk narliselat, taga lemak o. 9Ye, odouk narlogwi holuk e, e’ben op a’ge mu a’ge logon emin, ebaget wusogo odouk mu’galogo narlu a’ge ano a’ge emin, an nebaget wusogo e narlu a’ge ebano a’ge logon emin, gandum e’gen wokho an nebaget pogwi a’ge ebano emin, ye, an nebaget anggur a’bosu ’gela’ge herlilogo pogwi a’ge ebano emin, ai a’ge ’berlegat e’ben op a’ge odouk narlogulomma ebano ai a’ge wokho ebano po mia o. 10Tahun mesik pam e’ben op a’ge odouk narlogulomma wiak agoma no oluk op emagoluk, aphwami onowiak erlak emagoluk, an nebaget wusogo woknogwi a’ge emep ebano, at Harun en woluk sapi iak ’gela’ge 4 ebano petne dain tu a’ge ologun petne emep wusogo po a’ge ano pam la’bulogo pil lasu lemak o. Asogo tu ano re, Allah nebaget pulik modok asua a’geat wolomma re, tahun mesik tak a’ge pam heiyagai dagetil laga lema a’ge henemin modok-modogat tugu lomup o,” oluk, mo’gulesi.

Israel a’ge ononuk ’balogukhwe, Allah ebaget pogulom wene

11Mo’gulesirik, at Allah en Musa mo’guleselat,

12“Aphwami Israel a’ge ene’gik wenakho ononuk odo ’balogwi ai erlige e’gin mesik enebam om no oluk, enagap delak wolom a’ge paget, is enematek lo’bok en an Allah nebaget uang pogu lemak o. 13#Kel. 38:25,26; Mat. 17:24An nowi worumu o’go pulogo po a’ge 1 syikal ai re, 11,4 gram atma re, is aphwami enebe wenakho ononuk pelal ’balogulat, enematek lo’bogat uang perak pam, hele’gik a’ge setengah syikal ai, 5,7 gram ’gela’ge at An ’gain Onuk Logo a’ge nebaget pulogo pogu lemak o. 14Is aphwami ononuk ’balogwi a’ge ’berlegat dogo oruakhwe tahun 20 en ’bekhit likho ’gwe laga, a’ge setengah syikal holuk nak An ’gain Onuk Logo a’ge nebaget pogu lemak o. 15Onu’gwarek onomu enat enagap delhorlouwak, oluk, uang mesigat hwe eragam a’ge nak e’gin 5,7 gram ’gela’ge An ’gain Onuk Logo a’ge nebaget pogulat, ap ene’gik oruak a’ge holuk e, uang logat pogulat, ye, ap ene’gik erlak a’ge holuk e, uang wei nak pogulat, tu mia o. 16Is aphwami Israel a’ge enagap delhorlouwak oluk uang odoksogo po ano re, an nemin hwedik togulomma nowi worumu ebano wetil agalat, erlagapsogo po a’ge pagerat po yo. Ye, uang pogwi ano re, his henagap delak wolorogup a’ge pagerat oluk, pogu legep a’ge Allah nil pam oruakma re, aphwami, Israel eberentasulik o,” oluk, mo’gulesi.

Ene’gik onoyuk emerogulomma ebale hele’gu wene

17At Allah en Musa pobuk mesik emin mo’guleselat,

18 # Kel. 38:8 “Hat en ene’gik-onoyuk emerogulat tuak oluk, tembaga a’ge pam ogola ’gwe ebelogo pasulat, hweriogo po a’ge edip opsogo hweriogo pasulat, takpoluk, woluk an nemin hwedik togulomma nowi werikmu ogola welat, ye, an nebaget wusogo odouk narlogulomma o’borl o’gwe welat, tisokhwe ’burl hweriogo poluk ik emde horoksogo na’gogo pomup o. 19Ik na’gogo pagun a’ge ai pam Harun eiyagai enemin en ene’gik onoyuk emerogulom a’ge paget welemak o. 20-21Asogo oruakma re, is en nemin hwedik togulomma nowi werikmu ogola ’gogulat, ye, aphwami enebaget tugulat, an Allah nebaget wusogo odouk narluak, oluk, e narlogulomma horoksogo pei lagalat, tugumu re, waronobuno oluk ene’gik onoyuk ik ai pam emerogu lemak o. Asogo tugulom ai re, at Harun eiyagai dagenebiso a’ge emin en modok-modogat til laga lemagoluk, pulogo pegi o,” oluk, mo’gulesi.

A’bosu enebam herlelik onobogulom a’ge ebale hele’gu wene

22 # Kel. 37:29 At Allah en pobuk emin Musa mo’guleselat e,

23E’ben op ago a’ge a’bosu ne’gak e’gin 5,7 a’ge emin, e ’gami agap e’gin henagan a’ge emin, el a’bosu e’gin henagan a’ge emin, 24Hedit e’gin 6 a’ge emin, nowi werikmu o’go ’balogo po a’ge ano hegitsogoat walhegeik wasulat, e zaitun a’bosu 6 liter ’gela’ge wasulat, taga loroguntik 25an nebaget pulogo pogulat, a’bosu herlilogwi ano a’ge ebale heling emak oluk is ap enaluk a’ge en e’ben op emak oluk ne’garlok-he’garloktak pogwi ’gela’ge, hat en opsogoat asogo tip o. Asogo, ebelogo pagun ano re, an nebaget pulogo pogulat, a’bosu herlelogulom a’ge pagerat welemak o. 26Asogo takpoluk, hat en an nemin hwedik togulomma nowi werikmu ano emin, nepeti hele’gik poluk wene werak a’ge yagasogo po a’ge emin 27di a’ge yu a’ge tugulom a’ge paget emin, e dalise legenma emin, esaga uak pam emin, esaga wiak ago holuk opsogo hele’gogumu emin, e’ben op a’ge odouk narlogulomma emin, 28nebaget wusogo odouk narlogulomma emin, odouk narlogulat, tugulom a’ge emin, ene’gik onoyuk emeru a’ge emin, ’berlegat ai, 29an nebaget modogat polik welemagoluk, a’bosu ai, egilogo pei lasu holuk e, an nebaget puligat welemak o. Pulogo pagunmu re, ap a, di a’ge yu a’ge a, ai a’ge pam hebit hasu holuk e, an nebaget puligat welemak o. 30Ye, Harun eiyagai enemin ogo re, an nebe eiye otluk nebaget tugu lemagoluk a’bosu enebam herlilogo pasulat, nebaget pulogo enobomup o. 31Asogo taga loroguntik, aphwami Israel a’ge mo’gulentasulat, a’bosu yu re, Allah ebaget pulogo pogulat, herlelogulom a’ge paget modogat polikmu re, ik poluk polik modogat Allah emining a’geatma re, his henemalik dagenebil lagalat, tugulom a’ge re aiat o. 32Asogoatma re, ap we a’ge holuk e enebam herlilogo pogulat, e’ben op a’ge e’gin walhegeik a’bosu ebale hele’gu a’ge mo’gulhegis yu ’gela’ge, muat mesik hele’gogulat, tu mia o. A’bosu ai re, an Allah nebaget modogat polik welemma re, at Allah en a’ge poligat oruak o opoluk, 33ap mesik en e’ben op a’ge a’bosu disogo a’ge hele’giso a, ap we a’ge ebam herlilogo pasu a, tago holuk e, ue, ari, ene’gerlakma en a’guluak erlagapsogo pogulom egei ai o, oluk, mo’gulontomup o, oluk, mo’gulesi.

E’ben op a’ge ebale hele’gu wene

34At Allah en Musa pobuk mesik emin mo’guleselat, “E’ben op a’ge e hwedali kilu? ’gela’ge a’bosu emin, tagap e’gen agap emin, e wuli? hwedali rasamala a’bosu emin, e’ben modok op a’ge e sin a’bosu emin, mesik wei mesik lok erlak we, hegitsogo nak wasu loroguntik, 35is e’ben modok op a’ge togwi enaluk a’ge en togwi ’gela’ge yagariselat di a’ge yu a’ge emin po erlakma en yagarip egesa ano ’gela’ge nagat pasulat, mayu emin pelogo pasulat, takpoluk nebaget pulogo pomup o. 36Nebaget damulogo polik poluk, ul ’gela’ge odoksogo pasu loroguntik ado wokho an nemin hwedik togulomma nowi werik poluk nepeti helo’gumu wene werak a’ge yagasogo poma ebano nemin hwedik tuogoluk, po’gwisolomup o. Odoktak ano re, an Allah nebaget modok omu degelagat epasu lorogun ani o. 37Ye, e’ben op a’ge tinogoluk holuk e, e a’bosu walhegeik womup oluk mo’gulhegis ano ’gela’geat e’ben op a’ge mu a’ge mesik odoksogo horlo mia o. Yu re, at Allah ebaget modok degelagat welemma re 38ap mesik en e’ben op a’ge ai haik oluk, e’ben op a’ge disogo tago holuk, ue ari ene’gerlakma en a’guluak erlagapsogo pasu lomup o,” oluk, mo’gulesi.

Currently Selected:

Keluaran 30: Wul

Highlight

Copy